Ezodu 2

Baliwa no ulukula wa Mozeji

1Mwa tempu yenne, ohokala mulombwana mmohi wa nlogo na Levi adowile mutela muhiyana mmohi wa nlogo nimohive na Levi.#Ezodu 6:20 2Kagatelanne, muhiyanole ohokana vambani, liye mbala mwanapongwe. Muhiyanole agaonne ira mwanole ohosimbwa riya, ohomukoyaga fiyeda medi miraru. 3Mbwenye na mwasa oira liye kawanda mukoyave mwanole, oholandaga ngogoda osakanyediwa na mirere, liye marela pama na alikataraya na ulrimbo ira mwahavolowege mahindje. Noira enne, ohomutukulaga mwanole, liye muhela mwemule. Liye tukula ngogoda mwafwanyeya mwanole, dowa goromeya mutcherelani mwa muhindje Nilu, vari va mirere. 4Noira enne, mwanole murongoliye ohodowaga kala olapela vang'ono ira aonege jafuna muireyela mwanole.

5Mwa enne mwana Farawu wa muhiyana ohodowaga muhindje Nilu ira ahambe. Evale agafiyile iko ule, ahiyana anno kamulaba kohoromaga wendawenda mutcherelani mwa muhindje ule. Mwa enne mwana Farawu ule ohoonaga ngogoda agali vari va mirere, liye muruma namalabaye mmohi, liye dowela ngogoda ule, nvaha. 6Mwana Farawu ule funa hulamo, unanfwanya mwana anlaga mwemule. Evale liye agamuonne mwanole, ohomuwendelaga tangaranga, liye kwi: <<Ula gu mwana wa aEberewu!>>#2:6 Ula gu mwana wa aEberewu! Mwana Farawu amuhiyile ira mwanole akalewo muwari mwa tangaranga daye bahi. Mwasiwa babaye ohokumiha nlamulo ira anapongwe atene a aEberewu anabaliwege, katatileliwege mmuhindjeni Nilu. (Ezodu 1:22) Nona, para liye muhiya mwanole alive tangaranga daye vamohi no funa wa Mulugu.

7Mwa enne, mwanole murongoliye ohozaga nfuka mwana Farawu ule, liye ira: <<Kodi munofuna ira didowe damusake makayaya mmohi wa aEberewu ira aze amulelege mwanola?>> 8Liye ohowakulaga, liye ira: <<He, kadowa wamusake umuzena!>> Namwali ule ohotamangaga, liye muitana mwanole mmaye. 9Agazile, mwana Farawu ule ohowongaga na mwanole mmaye, liye kwi: <<Umutukule mwanola, udowe wamulelege para miyo, fiyeda aulukule, amala umuzena. Miyo nnoutambilriha zela mabasa anafuna we laba omulela mwanola.>> Evale muhiyanole ohomutukulaga mwanaye ule, liye dowa mulelaga. 10Agaulukunle, ohomudowana wa mwana Farawu. Mwanole ohoroma kala mwana Farawu mwanaye. Evale mwana Farawu ule ohonvaha nzina na Mozeji [ku wonga mutu otavuliwa], liye wongaga ira: <<Mwasiwa miyo dimutavunle mmahindjeni!>>

Mozeji ohompa muIjipitu, liye tawela Midiyani

11Mozeji agaulukunle, agali sawa, siku nimohi ohovenyaga ira adowe aaone abalaye aEberewu. Agafiyile wewule, ohoonaga mabasa orutcha kalaba atu eto ohonfwanyaga muEberewu mmohi abubudiwaga na muIjipitu. 12Evale Mozeji ohoing'anaga wu na wu. Agaonne ira kaliwo mutu, ohompa muIjipitule, liye nvuhelela vamisevani. 13Mmetcheloni muwa agawelenlewo akoka, ohafwanyaga alombwana ambinli aEberewu ve, kawanaga. Evale Mozeji ohonfuka maliba muwaniheda nfwaye, liye ira: <<Kodi weyo unambubudela nni nfwawo?>> 14Evale maliba mbubuda nfwaye ule ohowakulaga eraga: <<Kodi bani uuhambihile weyo ira ukale musogolrelri wehu na namatonga wehu? Kodi unafuna udipe nnga umpile we muIjipitule?!>> Mwa enne Mozeji ohoromaga ova, muwari moiziwa ira: <<Mwa ibaribari jairile miyo jihivweya!>> 15Eto mwene Farawu vavwile liye jejile, ohoroma musaka Mozeji ira ampe. Na mwasa wenne, mulombwana Mozeji ohotawaga vamentoni va mwene Farawu, liye dowa ilambo ya Midiyani. Agafiyile wewule, ohodowaga garati vaisimeni.

16Fwanyeya ira ilambo ya Midiyani ule wohokala namakuta mmohi anna ahima a ahiyana atanu na ambinli. Mwa tempu yenne ahimale kohozaga vaisimeni vali Mozeji ira kazalihe jong'wela ja vinyama, kang'wihe anavinyama a babiwa. 17Mwa enne kohozaga anamakumbuza amohiwa, aliwa roma atamangiha anamwalale vaisimeni vale. Mbwenye Mozeji ohavunelaga, liye ng'wiha anavinyama ale. 18Anamwalale kagadowile vande, babiwa Reuweli ohafukaga eraga: <<Nyo peno mubaranyele nni welawo eni?>> 19Aliwa kohoira: <<Ukala muIjipitu mmohi nanfwannye hiyo. Nafuna tamangihiwavo na anamakumbuza afwihu, mbwenye liyene gunivunenle mmandani mwewa, fiyeda liye nirungela mahindje, ng'wiha anavinyama ehu.>>

20Evale babiwa ohafuka anamwalale, liye ira: <<Nnga muIjipituyo uli uvi? Nnga mmuhiyele nni wewo? Kadowani mwamuitane aze adje!>> 21Eto Mozeji agadowile vande va Reuweli vale, ohoziveliwavo, liye kalaga evale. Eto mulombwana Reuweli ohonvaha mwanaye mmohi aitaniwa Zipora ira akale muhiyanaye. 22Agamutenle, Zipora ule ohombala mwana mmohi wa mwanapongwe. Mozeji ohonvaha nzina na Jeresoni, [ku wonga mutu oza], liye wonga ira: <<Miyo dili mutu oza ilambo ya annya.>>

Mulugu ohoona goyi da atwaye aIzarayeli

23Vagavirile malambo madjindjene, mwene wa Ijipitu ohokwa. Mbwenye Ana Izarayeli dumbela wewa werave simbwa, kakuwaga na mwasa wa uzari wewa. Mwa enne nla wewa undimuwa wohogwela wa Mulugu na mwasa wa uzari wanna atu. 24Mulugu ohovwa nla wewa eto ohoumbuwela yopangana yasakannye liye na Abarahamu na Izaki na Jako.#2:24 Zela yopangana Mulugu yasakannye liye na Abarahamu, muwari mwa mazu a Jenesesi 15:13-14 Mulugu ohowonga na Abarahamu ira: <<Ahimawo a musogolro anokala azari ilambo ya annya. Mbwenye nnoakumihamo muuzarini mwewa.>> Mulugu ohoumbuwela yopangana yasakannye liye. Mulugu eto afuna aavahe aIzarayeli ilambo ya Kana. Tchoira liye ohowonga na Abarahamu zela ilambo ya Kana ira: <<Miyo nnouvaha ilambo yenna ira ikale ya ahimawo a musogolro.>> (Jenesesi 12:3,7) Mulugu eto ohowonga na Izaki zela ilambo ya Kana ira: <<miyo nnouvaha weyo na ahimawo ilambo yatene yenna…>> (Jenesesi 26:3) Mulugu eto ohowonga na Jako zela ilambo ya Kana ira: <<Miyo nnouvaha weyo vamohi na ahimawo ilambo yenna…>> (Jenesesi 28:13) 25Mulugu ohoona uzari wa Ana Izarayeli eto ohoroma akukumuwela.

Currently Selected:

Ezodu 2: iLolo

Highlight

Copy

Compare