Ezodu 1
1
Zuzumihiwa wa Ana Izarayeli ilambo ya Ijipitu
1Ala ba mazina a ahima a anapongwe a mulombwana Izarayeli wenno aitaniwa eto Jako, anno kadowile Ijipitu vamohi na liye, kada mutu na vande vaye: 2Rubeni, Simeyawu, Levi, Juda, 3Isakari, Zebuloni, Benjami, 4Dani, Nafitali, Gadi, na Azeri. 5Alombwana atene kakumile mwa Jako kadowile Ijipitu kali 70. Mbwenye tempu yatama atu, mwana Jako mmohiwa aitaniwa Joze, afwanyeya Ijipitu wewule.
6Vagavirile malambo madjindjene, mulombwana Joze na abalaye atene, na atu atene a tempu yaye, kohofiyeda kwa. 7Mbwenye Ana Izarayeli kohobalihana, aliwa indjivihana na makalelo ohokala a masika, kala atu pwi pwi eto aliwa kala a kopolo na makalelo ohokala a masika, fiyeda ilambwele zalamo aIzarayeli.
8Noira eno, ohogwela vampandoni mwene mmohiwa, ahaiziwile jatene jairile Joze. 9Mwene wenne ohawandela atwaye aIjipitu eraga: <<Kaing'anani nyo! Ana Izarayeli kohotabwa indjiva eto aliwa kohotabwa kana kopolo kwaranya hiyo! 10Inafwanela nilabena zelru doxanga ira kahaindjivihanegeve. Ineriha naahiya eni, kondo yaza, anogumanela na amwidanihu, karome wana na hiyo. Era eno anofiyeda tawamo mwilamboni muno.>>
11Mwa enne aIjipitu kohahambiha asogolrelri ira kaalabihege aIzarayeli ale mabasa orutcha. Evale aIzarayeli kohommangela Farawu sidadi ya Pitomi na sidadi ya Ramesesi ira dikale sidadi dokoyamo jongo. 12Mbwenye aIzarayeli vasimbwa atu onihiwa goyi, kerave simbwa indjiva, kabalaleyaga muIjipitu mule, fiyeda aIjipitu aliwa aovaga Ana Izarayeli pama pama. 13Na mwasa wenne, aIjipitu kohoroma alabiha Ana Izarayeli na makalelo abure, 14aonihaga goyi ira kalawo wewa ukale wa goyi muwari molaba mabasa orutcha, aliwa munyaga ulongo, wombaga boloki, hindaga mabasa matene a mmundani. Muwari mwa mabasiwa matene, aIjipitu kohasakanya Ana Izarayeli azari, aliwa alabihaga na makalelo abure.
Anamabaliha a Ana Izarayeli tchamuvwelenle Farawu
15Siku nimohi, mwene wa ilambo ya Ijipitu ule, ohowongaga na ahiyana kaabaliha aEberewu,#1:15 Nzina na aEberewu, ku wonga aIzarayeli. Eto kawongaga ahiyana kaabaliha aEberewu, kinaiziweya pama akala aliwa kafwanyeya kagali aIzarayeli owu hehi aIjipitu. ahiyana anno maziniwa kaitaniwa Sifara na Puwa, liye avaha nlamulo ira: 16<<Nyo mwadowaga ira mwambalihe muEberewu, mwamuona abaliwa mwanapongwe, mumpe. Mbwenye akala mwana wa muhiyana, mmuhiye akalewo!>> 17Mbwenye voira anamabaliha ale kali atu omuova Mulugu, vadowa atu ira kaabalihe aIzarayeli, mofutukula mazu aawandenle mwene wa Ijipitu ule, ahima atene a anapongwe kabaliwa, aliwa tchaapa. Ahima a ahiyana vamohi na a alombwana, atene koahiya ira kakalewo. 18Evale mwenole agaonne enne ohaitanihaga, liye afuka ira: <<Katchiyeni, kodi mwasiwa gwa nni nyo hafunaga irana yenno yuurumileni miyo? Mwasiwa gwa nni nyo ahiyaga anapongwe anabaliwa ira kakalegewo, nyo hafunaga apa?>> 19Evale anamabaliha ale kohowakulaga, aliwa ira: <<Mwasiwa tchoira ahiyana a aEberewu kohiyana na ahiyana a aIjipitu. Ahiyana a aEberewu kere kala otchatchuwa. Tchoira hiyo tempu inadowa hiyo ira naabalihe, nafiyaga nnaafwanya aliwa kohomala bala okave.>>
20Na mwasa oira anamabaliha ale kali atu omuova Mulugu, Mulugu ohairela upama eto ohareliha mmabandjani mwewa. 21Eto mulogo wa Izarayeli koindjivave eto aliwa kalaga atu a kopolo dohokala da masika. 22Evale mwenole ohokumihaga nlamulo, aawandelaga atwaye aIjipitu atene eraga: <<Mwana uli watene unabaliwe muwari mwa aEberewu, akala wa mwanapongwe, mmutukule, mudowe mwamutatilele muhindje Nilu. So ahima atene a ahiyana mwaahiye kakalewo.>>
Currently Selected:
Ezodu 1: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
