Ezodu 16
16
Ana Izarayeli kohowonga mazu abure zela Mulugu na mwasa wa ndala
1Noira eno, mulogo watene wa Ana Izarayeli kohomaruwaga ilambo ya Elimi, aliwa dowa isalesale ya Sinu. Isalesale ya Sinu yafwanyeya wu ilambo ya Elimi, wu Sinayi, vari viwa. Wewule kafiyile vagamanle malambo kumi na matanu a mwedi wanembinli,#16:1 Malambo kumi na matanu a mwedi wanembinli: Fwanyeya ira Ana Izarayeli kakumaga Ijipitu, kakumilewo vagamanle malambo kumi na matanu a mwedi oroma. AIzarayeli kafiyile isalesale ya Sinu vagamanle mwedi mmohi vakumile atu muIjipitu. kagakumile muIjipitu. 2Kagafiyile wewule, mulogo watene wa Ana Izarayeli kohoroma wonga ubure zela Mozeji na Arawu, 3aliwa wongaga keraga: <<Yali yapama Yehova ahanipe Ijipitu wewule wali hiyo, wewo wafwanyeya hiyo naganna jombwe jozala nyama eto wadja hiyo pawu fiyeda gomana. Tchoira munizilena uno ira munipe hiyo atene na ndala.>>
4Evale Yehova ohomuwandela mulombwana Mozeji eraga: <<Miyo nnourumbwihedani jodja jokumela zulu ira nyo mudjege. Malambo matene atu anerege dowa kagudege jokwakwana ira kadje siku neno. Nnafuna daaxixe, dione akala anowanda wenda movwelela malamulo aga owu hehi. 5Va kada sumana, nafiyaga siku nanetanu na nimohi, inafwanela kagudege jodja jokwakwana dja malambo menli eto kavayelege sakanyeda.>>
6Evale mulombwana Mozeji na Arawu kohawandelaga Ana Izarayeli ira: <<Tchiguwo vano munokana ibaribari ira uukumihileni mwilamboni mwa Ijipitu gu Yehova. 7Eto metchelo na mabebehene munoona undimuwa wa Yehova. Mwasiwa liye uhumala vwa ubure mwawonga nyo zela liye. Kodi hiyo vano nili ani ira nyo muniwongege?>>
8Mozeji ohowongagave na Ana Izarayeli eraga: <<Tchiguwo vano Yehova unouvahani nyama ira mudje eto mabebehini uwa unouvahani pawu ante mufiyede rumbala. Tchoira Yehova umala vwa ubure unawonga nyo zela liye. Kodi hiyo nili ani? Jowonga jenyu jabure jinawonga nyo, kamunaniwonga hiyo, mbwenye munamuwonga Yehova.>>
9Evale mulombwana Mozeji ohowonga na Arawu ira: <<Waawandele mulogo watene wa Ana Izarayeli ira: <Muze mmukwivele Yehova. Tchoira liye umala vwa jowonga jabure jawonga nyo.> >> 10Evale Arawu agawongile na mulogo watene wa Ana Izarayeli, aliwa kovenyiha meswiwa, kaing'anaga muisalesaleni. Evale kohoonaga undimuwa wa Yehova wagazile mmiramboni.
Mulugu ohorumiha vizilri na mana ira aIzarayeli kadje
11Noira eno, Yehova ohomuwandelaga Mozeji ira: 12<<Miyo dihivwa jowonga jabure ja Ana Izarayeli. Waawandele wire: <Tchiguwo vano, munodja nyama. Eto metchelo na mabebehi munorumbala pawu. Jaireya eno, munoiziwa ira miyo dili Yehova Mulugu wenyu.> >>
13Siku nenne yagafiyile igudugudu, dohozaga vizilri, fiyeda zala vamisasani vafwanyeyaga atu vale.#Numero 11:32-33 Eto unde wagatchile, na mabebehi vamisasani vatene vevale vohozalaga ningame. 14Ningame nne nagatotowile, kohoonaga jengo jing'onong'onove nnga sambale, joluluva nnga utu, jagali pwi pwi vamisasani vatene evale. 15Ana Izarayeli voira tchaiziwile, kagaonne kohoroma fukana oka oka keraga: <<Nnga yenna nni?>> Evale Mozeji ohawandela eraga: <<Yeniyo tchi pawu Yehova yuvahileni liye ira mudjege. 16Yehova unaurumani ira: Mugudelege nnga munawanda nyo dja, kada mutu mulruzi mmohi, molingana no indjiva wa atu a vande venyu.>>
17Evale Ana Izarayeli kohoirana. Amohiwa kaguda pwi, amohiwa kaguda vang'ono. 18Mbwenye tempu yodowa pima na mulruzi jejo jagudela atu, wenno agudile pwi apima, kajakalawo johala eto wenno agudile vang'ono apima, kajahalela. Kada mutu oguda mokwakwanela na mwawandela liye dja.
19Evale Mozeji ohawandela eraga: <<Kakalevo mutu unafuna koya ira jifiyede metchelo.>> 20Mbwenye muwari mwa Ana Izarayeli, kohofwanyeyamo amohiwa kahanvwelenle Mozeji. Kohiya jimohi jiwa fiyeda mmetcheloni muwa. Mwa enne kagagonile, kafwanyilege anamingu pwi, nukaga nrimba nabure. Evale Mozeji ohotakaleliwaga na atwale. 21Malambo matene na mabebehi, kera beha, kada mutu liye gudaga mokwakwanela na mwawandela liye dja. Mbwenye nzuwa nakahaga, jodja jile jonyungulruwavo vati vale.
22Siku nanetanu na nimohi nagakwakwanne, Ana Izarayeli kohogudelaga jodja jokwakwana malambo menli, ku wonga kada mutu milruzi minli. Evale andimuwa osogolrelra mulogo wa aIzarayeli kohodowa, aliwa muwandela Mozeji jatene jaireya. 23Evale Mozeji ohawandelaga eraga: <<Yehova unaurumani ira: Metchelo ti siku novuma, sabado otchena wa Yehova. Jigudile atu peno, kafuna wotcha, kawotche eto kafuna piya, kapiye. Mwadja peno, jinafuna hala mukoye ira mudje metchelo.>> 24Nnga mwemo mwawongele mulombwana Mozeji, aliwa kohokoya jodja jiwa jatene jahanle. Eto kagagonne, fwanyeya ira jodja jakoyile atu jile kajanuka nrimba nabure eto nne kamwakala anamingu. 25Evale mulombwana Mozeji ohawandelaga Ana Izarayeli eraga: <<Peno mudje jeji mwasiwa gu sabado wa Yehova. Peno kamunaona jodja jimohi jiwa vati. 26Muwari mwa malambo matanu na nimohi mugudege. Mbwenye nafiya siku nanetanu na mbinli, ti siku na sabado. Jodja jile siku na sabado kajinazege.>>
27Mwa enne siku nanetanu na mbinli, atu amohiwa kohovuluvulihaga, aliwa dowa ira kagude. Mbwenye tchafwanyilewo. 28Evale Yehova ohowongaga na Mozeji eraga: <<Kodi nyo munaza muhiye alini konda harihamo malamulo aga na jinaurumani miyo? 29Kaing'anani miyo dagali Yehova duhuvahani siku na sabado ira nikale novuma. Nona siku nanetanu na nimohi duvahagani jodja ja malambo menli. Siku nanetanu na mbinli kada mutu akalege vevo vinafwanyeyege liye. Kakalevo unafuna venyavo vande vaye siku nanetanu na mbinli.>> 30Evale siku nanetanu na mbinli nne, atu kohovuma.
31Evale aIzarayeli atene kohovaha yodja yenne nzina na mana. Yodja yaitaniwa mana ile, makaleluwa yali nnga mpeza, yagali yotchena. Eto ziva uwa yakala nnga mabolu oheliwa nuwi. 32Mulombwana Mozeji ohowonga ira: <<Yehova unaurumani ira: Mukoye mulruzi mmohi wa yodja yenna ineriwa mana ira anamabaliwelamo enyu kaze kaone yodja mwadja nyo mwagali muisalesaleni, dukumihagani ilambo ya Ijipitu.>> 33Eto Mozeji ohomuwandela Arawu ira: <<Uruhe mulruzi mmohi wa mana, uhele muyombweni, udowe wahiye vamentoni va Yehova ira ahima atene a aIzarayeli anabaliwelegemo musogolro kaone.>> 34Na ibaribari, nnga mwemo Yehova mwamurumele liye Mozeji, mulombwana Arawu ohotukulaga yombwe ya mana ile, liye hela vasogolro va Kaxa ya Umboni ira mana ale kakoyiwe vevale.#16:34 liye hela vasogolro va Kaxa ya Umboni: Zela sakanyiwa wa Kaxa ya Umboni yenno yaitaniwa eto Kaxa ya Yopangana, nione Ezodu 25:10-22. 35Ana Izarayeli kohodja mana yaka dokwakwana 40 fiyeda tempu yafiyilege atu mmadilreni mwa ilambo ya Kana. 36Mpimo kavahiwe atu ira kada mutu agudege, atu kumi kagumaniha jejo jaguda atu na mpimo ule, jakwakwana kilu 20.
Currently Selected:
Ezodu 16: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
