Ezodu 17

Mulugu ohang'wiha aIzarayeli mahindje okumela vanibweni

1Mulogo watene wa Ana Izarayeli kagakumile isalesale ya Sinu, kowenda katamatamaga, muwari mosogolrelriwa na Yehova. Kadowagave, kohofiya nimburo nimohi neriwa Refidima, aliwa kunga misasa diwa wewule, aliwa garati. Mbwenye tchaoneya mahindje ira aliwa kang'we. 2Mwa enne kohoroma muruwana Mozeji keraga: <<Kanivahe mahindje, ning'we.>> Mozeji ohorumela kwi: <<Munadiruwanela nni miyo? Munairela nni jokala ha jejo, mmuxixaga Yehova?>>#17:2 mmuxixaga Yehova: Voira Mozeji ali mutu orumiwa na Mulugu, aIzarayeli kawongaga mazu abure wa Mozeji, ku wonga kamuwonga ubure Mulugu. Aliwa kamuxixile Mulugu muwari monvepa mutu arumiwe na Mulugu ira airena yengo yahawanda liye. 3Mbwenye na mwasa osanyeya na ntona, Ana Izarayeli kohoroma wonga ubure zela Mozeji keraga: <<Mwasiwa ali wa nni unikumihaga muIjipitu? Kodi ali ira unipe na ntona roma hiyo, ahimihu, na jifuwo jihu jatene?>>

4Evale Mozeji ohonvepaga Yehova eraga: <<Miyo atwala daairena avi? Kaaoneni, eni kahanle vang'ono ira kadipe na mabwe!>> 5Evale Yehova ohomuwakula Mozeji eraga: <<Udowe waatukule andimuwa angasi angasi a aIzarayeli, mudowe vasogolro va aIzarayeli eto mwadowaga, utukule mmandani mwawo ikumbuzo yakomilena we muhindje Nilu. 6Miyo nnadowa dakale vasogolro vawo, vazulu va nibwe neno nnafwanyeya Orebi.#17:6 Orebi ti nzina nimohi niwa na mwango Sinayi. Weyo wafiya wewule ukome nibwe nne na ikumbuzo. Wakoma, anokuma mahindje ira aIzarayeli kang'we.>> Mwa enne Mozeji ohodowa irana jatene jejile andimuwa a aIzarayeli ale kaing'anaga. 7Evale mulombwana Mozeji ohovaha nimburo nenne nzina na Masa [ku wonga xixiwa] na nzina na Meriba [ku wonga kangana]. Ali na mwasa oira Ana Izarayeli kokangana na Mozeji eto komuxixa Yehova keraga: <<Kodi Yehova uli na hiyo, owu kali na hiyo?>>

Kondo ya aAmaleki na aIzarayeli.

8Mwa tempu yenne aAmaleki kohozaga ira kawane na aIzarayeli ilambo ya Refidima. 9Evale mulombwana Mozeji ohowonga na Jozuwe eraga: <<Waasakulre alombwana, metchelo kadowe kawane na aAmaleki. Miyo metchelo evo nnadowa dagwele vazulu va mwango na ikumbuzo ya Mulugu#17:9 ikumbuzo ya Mulugu yawonga Mozeji yali yenno imohive yalabetchana liye mowandeliwa na Mulugu. Nione Ezodu 4:17, 20. mmandani mwaga.>> 10Jozuwe ohoirana nnga mwemo mwamuwandenle Mozeji. Ohasakulra alombwana muwari mwa mulogo wa Izarayeli, aliwa roma wana na aAmaleki. Mbwenye tempu yenno, mulombwana Mozeji na Arawu vamohi na Huri, kohodowa gwela vazulu va mwango. 11Muwari mowana, mulombwana Mozeji avenyiheda miwono daye zulu, aIzarayeli koagondjiha aAmaleki, mbwenye Mozeji agwiha miwono daye, aIzarayeli kogondjihiwa na aAmaleki. 12Mozeji muwari movenyiheda zulu miwono daye, ohogomana. Evale mulombwana Arawu na Huri kohotukulaga nibwe, aliwa sakanyedavo ira Mozeji agarativo. Agagaratile, kohotukula miwono da Mozeji, aliwa venyiheda zulu, nfwaye wu, nfwaye wu. Na makalelo anno, miwono da Mozeji dohokalagave dovenyihedeya dene zulu fiyeda nzuwa vira. 13Mwa enne mulombwana Jozuwe ohomugondjiha mwene wa aAmaleki vamohi na atwaye atene, aliwa mala apa na supada.

14Yehova ohomuruma Mozeji eraga: <<Ulrembe mulivuruni jatene jene jiireyile kondoni ira ikale yengo yowumbutcheda. Wamala lremba, umuwandele mulombwana Jozuwe jatene jilrembile we. Umuwandele eto ira miyo vasogolro nnoza dimalihe nzina na aAmaleki ira nahavweyege mwilamboni ya vati.>> 15Nomala enne, mulombwana Mozeji ohomanga ibuwa, liye vaha ibuwele nzina noira: Yehova gu bandera naga.#17:15 Yehova gu bandera naga. Ku wonga Yehova gunadivaha gondjiha. 16Nomala eno, Mozeji ohowonga ira: <<Yehova ulumbela ira unokana kondo na akuda Amaleki na ahimiwa anabaliwelegemo musogolro.>>#17:16 Yehova ulumbela ira unokana kondo na akuda Amaleki na ahimiwa anabaliwelegemo musogolro. Mazwala anafwanyeya kagali orutcha onelramo zela yafuna atu wonga. MaBibiliya amohiwa anatapulela eni: Sawasawa nnga Yehova uli liye vampandoni vaye, sawasawa eto Yehova unokana kondo na akuda Amaleki na ahimiwa anabaliwegeve musogolro.

Currently Selected:

Ezodu 17: iLolo

Highlight

Copy

Compare