Ezodu 15

Nyumbo ya Mozeji

1Mwa enne Mozeji na Ana Izarayeli kohomuimbela Yehova nyumbwela keraga:

Miyo nnomuimbela Yehova mwasiwa liye ugondjiha na makalelo otikiniha.

Ohavokeda mmahindjeni aliba wendiha kavalo na kavalo diwa dene.

2Kopolo daga na nyumbo yaga gu Yehova!

Liye gudivulumutchile miyo vano.

Liye guli Mulugu waga, nona miyo nnerege mutitimiha.

Liye gu Mulugu wa ababaga, na mwasa wenno nnerege muvweyiha.

3Yehova gowana kondo.

Yehova ti nzina naye.

4Ohaponyeda mbara aaterelado a Farawu na anyakondwaye.

Asogolrelri osakulrelreya a Farawu kohobwabwihiwa muwari mwa Bara Yofila.

5Aliwa kohobwinihiwa mmahindjeni odiha,

kohoririyela vati kalaga nnga mabwe.

6So Yehova, ndanda nenyu nodjana ti ndanda na kopolo dohokala da masika.

So Yehova ndanda nenyu nodjana nnoagwadanya amwidani.

7Nyo munoagwiheda amwidani enyu vati na undimuwa wenyu ulukulu.

Nyo munoruma uwali wenyu dowa atolotcha atu nnga vinaira munlo ajihaga malatchi.

8Muwari mwa mwelra wenyu bahi okumela mpunoni mwenyu, mahindje kohoimela.

Mahindje otamanga kohoimela nnga matchihi,

mahindje odiha a bara kohomanganyeya fiyeda umma nnga mabwe.

9Amwidani kawonga ira: <<Ndoweni, naahareni.

Naafwanyani, naawakeni jorayela jewa, niganeni. Eto nnoairela makalelo matene anafune hiyo.

Nitukuleni masupada ehu na mandihu, naapeni.>>

10Mbwenye ejo kahanairena, nyo no vuzela wenyu wa nipevo, bara yohavuhelela.

Kohofiyeda ririyela nnga momba aririyelaga vantiyani vodiha.

11So Yehova, kodi amilugu bavi analingana na nyo?

Uli nnga nyo bani? Nyo muli otchenetchetcha,

eto muli owopiha moirana jengo jindimuwa na jotikiniha!

12Mwagavenyihile ndanda nenyu nodjana na kopolo,

teya yohamida.

13Mwa upama wenyu, mohasogolrelra atwinyu mwaawombonle nyo.

Muwari mwa kopolo denyu muhasogolrelra ira kafiye nimburo nenyu notchena.

14<<Malogo amohiwa kohovwa jatene jiirile nyo, aliwa vayela roma ngurumela.

Eto atu anakala Filistiya na aliwene kohokana upa mozela ova umohive.

15Asogolrelri a ilambo ya Edomu kohokana kukumuwa ulukulu.

Eto alombwana atene a kopolo a Mowabe na aliwene anangurumela na mwasa wa jatene jivwile atu.

Mirima da atene anakala Kana dihimala nyungulruwa.

16Aliwa kanna tikiniheya no ova ulukulu.

Kavwa zela muwono wenyu wa kopolo, anokala omiyalene nnga nibwe,

fiyeda atwinyu so Yehova kavire,

fiyeda atu anno mwaawombonle nyo kavire.

17Nyo munoatukula, mudowe mwaazale mwangoni wenyu,

nimburo neno musakanyile nyo so Yehova ira mukalegevo,

nimburo notchena neno Yehova musakanyile nyo na manda enyu.

18Nyo Yehova gunatonga kala no kala.>>

Nyumbo ya Miriya vamohi na ahiyana amohiwa

19Fwanyeya ira kavalo datene da mwene Farawu vamohi na aaterelado aye a kondo, vamohi na aliba wendiha, kagavolowile mbara mule, Yehova ohoweliheda mahindje mwakoka mwene nnga mwali atu, atwale mala ririyela mwemule. Mbwenye Ana Izarayeli kohoviraga bara indimuwa ile, manyalo ewa kanyingalaga teya youmma. 20Evale namafiyiheda wa muhiyana aitaniwa Miriya, Arawu murongoliye, ohotukulaga makotcho, liye imbaga. Eto ahiyana atene kagamuonne Miriya aimbaga, na aliwene kohotukulaga makotcho ewa, aliwa roma muharaga kaimbaga, kainaga. 21Evale Miriya ohaimbihaga eraga: <<Kamuimbeleni Yehova mwasiwa uhagondjiha aIjipitu na makalelo otikiniha. Uhavokeda mmahindjeni aliba wendiha kavalo na kavalo diwa dene.>>

Mahindje owawa kohosanduwa kala otapilra

22Evale Mozeji ohasogolrelra Ana Izarayeli ira kakume Bara Yofila, aliwa dowa isalesale ya Suri. Mwa enne aliwa kohowenda malambo mararu muisalesaleni mule, mbwenye tchaonile mahindje ira kang'we. 23Mwa enne kawendagave, kohofiya nimburo naitaniwa Mara. Kagafiyile nimburo nenne, kohofwanya mahindje, mbwenye tchawandile ng'wa mahindjale mwasiwa kali owawa. Nona nimburo nne niitaniwaga na nzina na Mara [ku wonga wawa]. 24Evale atwale kohoroma wonga ubure zela Mozeji kanfukaga keraga: <<Kodi nnafuna ning'we nni?>> 25Mozeji ohonvepaga Yehova. Evale Yehova ohomuoniha mutengo#15:25 Kaniiziwile makalelo a mutengo unawongiwa, akala ali mulukulu owu mung'onong'ono, akala ali oumma owu mutiti eto akala ali mungulru ve owu na mitchitchi diwa dene na matakuru. mmohi eni. Mozeji ohodowana, tatilela mmahindjeni mule. Noira eno, mahindjale kohosanduwaga, kala mahindje otapilra.

Kagamanle ng'wa mahindjale, Yehova ohavaha mangano vamohi na jotonga, liye axixa, liye awandela ira: 26<<Nyo mwakala atu ovwelela jinawonga miyo dagali Yehova Mulugu wenyu, mwairana jejo jili jofwanela vamentoni vaga, mwavuruwana malamulo aga eto mwaharihagamo mangano aga matene, miyo kadiza dubulelihani na marenda daabulelihilena miyo aIjipitu. Miyo dili Yehova wenno unauvulumutchani.>>

27Noira eno, kohofiya ilambo ya Elimi wewo wafwanyeya visime kumi na mbinli na mitengo 70 nnga minazi dovaha jovaha jiwa. AIzarayeli kagafiyile wewule, kohomanga misasa diwa, aliwa garati wewule wandamela na mahindje ale.

Currently Selected:

Ezodu 15: iLolo

Highlight

Copy

Compare