Jenesesi 50
50
Nleliwa wa Jako
1Jako agakwile, mwanaye Joze ohomukumbarela, anlaga, ambejarigi. 2Noira eno, Joze oharuma anamalabaye amediku ira kamuzolihe murombwe babaye ira ahavunde. Mwa enne anamalabaye ale anno kali amediku kohozagana mirombwe, aliwa muzoliha mulombwana Izarayeli ira ahavunde. 3Mwa enne aliwa kohomala malambo 40 kamuzolihagave mirombwe, nnga molemelela mwa akuda Ijipitu, tchoira ayo ali malambo kamaletcha atu kamuzolihaga mutu mirombwe ira ahavunde. Eto akuda Ijipitu kohomunlela mulombwana Jako fiyeda malambo 70.
4Malambo onla ale kagamanle, Joze ohowonga na anamalaba a mwene Farawu eraga: <<Akala munodifwewela murima, nnouvepani ira mudowe, mwamuwandele Farawu ira: 5<Joze wirile: <<Babaga ahanakwe ohodilumbeliha ira didowe damukoye nifukweni neno natimbile liye ilambo ya Kana. Dera duvepeni so mwene ira mudihiye, didowe damukoye babaga. Damala nnowela.>> > >> 6Farawu agavwile yovepa ya Joze, ohowakula eraga: <<Miyo kadinna makani. Venya udowe wamukoye babawo nnga mwemo mwaulumbelihile liye.>>
Koyiwa wa Jako
7Mwa enne Joze ohomaruwaga ira adowe amukoye babaye. Adowaga, ohoveleliwaga na anamalaba atene a palasiyoni wa Farawu na andimuwa atene a vande va Farawu vamohi na andimuwa atene a Ijipitu. 8Eto kohodowaga atu atene a vande va mulombwana Joze, vamohi na abalaye, na atu atene a vande va babaye Jako. So Gozeni ule kaahiyilewo ahima na mabila na ng'ombe bahi. 9Eto ohoveleliwa na anyakondo owendiha aaterelado na ogwela kavalo. Atu kanvelenle tchali ang'ono. 10Mwa enne aliwa kadowagave, kagafiyile nimburo nobubudavo jalo, pandi ya Atadi, ilambo inafwanyeya kombela ya muhindje Jordawu, kohotomola kuto kamunlelaga Jako na makalelo ohokala a masika. Evale Joze ohomalagavo malambo matanu na menli na atu atene, amunlelaga Jako.
11Mwa enne anamurala a ilambo ya Kana, kagaaonne aIjipitu ale kanlaga na makalelo ohokala a masika nimburo nobubudavo jalo na Atadi nne, kohowongaga keraga: <<Ii, akuda Ijipitu kohoiziwa nla.>> Mwa enne sidadile kohovaha nzina na Abeli-Mizirayimi, inatapulela ira: <<Nla wa akuda Ijipitu.>> Sidadi ya Abeli-Mizirayimi inafwanyeya kombela ya muhindje Jordawu.
12Mwa enne ahima a mulombwana Jako kohoirana nnga mwemo mwaawandenle liye. 13Tchoira ahimaye kohomudowana ilambo ya Kana, aliwa mukoya nifukwe neno nafwanyeya mmindani mwa ilambo ya Makepela, makumelo wa nzuwa wa Mamere, nimburo neno Abarahamu agunle liye na Eforoni nkuda Eti ira kakale masiye ewa. 14Joze agamanle mukoya babaye, ohowelela Ijipitu na abalaye atene, vamohi na atu atene kanvelenle ira kamukamihede mukoya babaye.
Joze ohalimbiha abalaye babiwa agakwile
15Jako agakwile, Joze abalaye kohoroma umbuwela ira: <<Kaya Joze kinampa mbani zela jabure jamuirele hiyo malambo a mundulrimu? Kaza afunaga jonizuzumiha ira aniwelihede kunyakunya?>> 16Mwa enne kohorumihaga milanyo na atu, aliwa ira: <<Mudowe, mwawonge na Joze ira baba ahanakwe ohowonga na hiyo ira namuwandele Joze,#50:16 Baba ahanakwe ohowonga na hiyo ira namuwandele Joze: Afwase ejo jali jonama Joze abalaye jawonga atu ira Joze ahatakaleliwe na aliwa. Tchoira Jako ahafune wonga ejo, ogomuwandela Joze mwinnya. 17niire: <Papa uwongile ira waalevelele abalawo yabure yenno yauirele atu.> Mwa eno, hiyo anamalaba a Mulugu mmohive ali Mulugu wa babihu, nnavepa ira Joze anikurumuwele yotega yenno yamuirele hiyo.>> Joze agawandeliwe milanyo da abalaye dile, ohoromaga nla. 18Eto noira enne abalaye ale kohozaga, aliwa fiya vamentoni vaye, aliwa mukokorela, keraga: <<Hiyo atene nnafwanyeya eva, nnafuna nikale azari enyu.>>
19Mbwenye Joze ohowakula, liye awandela abalaye ale eraga: <<Nyo kamuove. Miyo kannauirelani yabure. Tchoira miyo kadili vamalroni va Mulugu.#50:19 Mazu anawonga ira weliha kunyakunya kwa Mulugu. Nona liye awongaga ira: Miyo kadili vamalroni va Mulugu. Nione Detoronomiyo 32:35; Roma 12:19. 20Na ibaribari nyo malambo a mundulrimu youmbuwela yenyu yali yodiirela ibure, mbwenye Mulugu youmbuwela yaye yali yodiirela upama ira atu oindjiva kawande vulumuwa muwari mwa miyo nnga munaonela nyo peno va. 21Mwa eno, nyo kamuove. Miyo nnerege uing'anelani, roma nyo ababi pakana ahiminyu.>> Mwa enne Joze ohalimbiha, aahagalalihaga abalaye ale.
Kwa wa Joze
22Joze akala Ijipitu, vamohi na atu atene a vande va babaye. Joze kalawo waye watene amanle yaka 110. 23Liye ohofiyeda aona azuliye, ahima a mwanaye Efarayimi. Joze aabalra ahima a Makiri, mwana Manasesi nnga ahimaye.
24Siku nimohi Joze ohowonga na abalaye ira: <<Miyo eni dihanle vang'ono ira dikwe. Mbwenye Mulugu unoza aukamihedeni, aukumihenimo muIjipitu muno ira audowenani ilambo yenno yalumbenle liye avaha makolo ehu Abarahamu, Izaki, na Jako.>> 25Evale Joze ohalumbeliha abalaye Ana Izarayeli ale eraga: <<Mwa ibaribari Mulugu unoza aukamihedani ira muvenyemo muIjipitu muno. Nnauvepani ira mwadowaga, makuvaga munahiye.>>#50:25 mwadowaga, makuvaga munahiye: Joze ohokonda koyiwa ilambo ya Ijipitu. Eto kawongile ira kadowe kamukoye ilambo ya Kana nnga jerile babaye Jako. So liye afuna akale mukaxawuni fiyeda aIzarayeli atene katame ilambo ya Kana. Makuva a Joze kowanda aiziwiha atu amohiwa kabaliwa ira Ijipitu tchali ilambo yewa. Mutu aona makuva a Joze, afukeda, owandeliwa ira: <<Makuvala ba Joze. Liye anivepile ira nakumagamo mwilamboni mu, nidowegena.>> Yovepa ya Joze yohofiyeda mwezo oireya. Nione Ezodu 13:19; Jozuwe 24:32; Eberewu 11:22. 26Noira enne, mulombwana Joze ohokwa aganna yaka 110. Agakwile, maningo aye kohozoliha murombwe ira ahavunde, aliwa muhela mukaxawuni muhiya muIjipitu emule, mbwenye tchamukoyile.#50:26 mbwenye tchamukoyile: Hamukoya unawongiwa va, kahi ira aliwa kagamuhenle mukaxawuni, kereve muhiya gwembelre vandila, hehi. Aliwa kohomutukula, dowa muhiya nimburo naiziwile atu ira katukule makuva ale tempu yavenyamo atu muIjipitu.
Kukala mazu a livuru na Jenesesi.
Currently Selected:
Jenesesi 50: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
