Detoronomiyo 7

AIzarayeli ba atu osakulrelreya a Mulugu

1Mozeji ohowongagave eraga: <<Yehova Mulugu wenyu auvolotchihani ilambo yenno inafuna nyo dowa tukula eto agamanle atamangihavo malogo madjindjene vari venyu roma aEti, aJirigazi, aAmore, akuda Kana, aFerizi, aEvi, aJebuzi anno anafwanyeya kagali malogo matanu na menli oindjivetchetcha eto a kopolo ukwaranyani nyo, 2Yehova Mulugu wenyu amala uvahani ira mwaatolotche, na ibaribari inafwanela mwaatolotche atene. Kamusakanye yopangana yowandana na aliwa, nne kamwaawendele tangaranga, 3nne kamutelane na aliwa. Kamwaavahege ahiminyu a ahiyana ira aliwa kaatele, nne kamwaatukulege ahimiwa a ahiyana ira ahiminyu kaatele.#7:3 nne kamutelane na aliwa: Ante siku na peno inafwanela atu omuroromela Yesu katelane omuroromela Yesu ve, hiya mutela mutu wa unde owu olobela eto ahali omuroromela Yesu. Nione 1 Korinto 7:39, 9:5; 2 Korinto 6:14. 4Tchoira mwaira eno, aliwa anoaholotcha ahiminyu, kadihiye miyo ira kaalabege amilugu amohiwa. Jaireya eno, Yehova unotakaleliwa na makalelo ohokala a masika zela nyo eto unoutolotchani mohodibeliwa. 5Mbwenye nyo mwadowa wewule, mubwanyulege vibuwa diwa, mutwege mambozo a mabwe anno anaatamalela atu nnga amilugu ewa, mugwadege mambozo a mulugu wewa Azera eto mutumeyege na munlo jolandaniha ja amilugu ewa jagali josemiwa. 6Mwasiwa nyo munafwanyeya mwagali atu otchenihiwa para Yehova Mulugu wenyu wenno uusakunlreni ira mukale atwaye muwari mwa atu atene anafwanyeya mwilamboni yatene ya vati.#Detoronomiyo 14:2; Titu 2:14; 1 Peduru 2:9

7<<Yehova ira auziveleni eto ira ausakulreni kahi ira nyo mwali atu oindjiva kwaranya atu amohiwa nari. Tchoira nyo mwafwanyeya mwagali atu a vang'ono kwaranya atu atene. 8Mbwenye Yehova ohoukumihani mwilamboni mule na ndanda naye na kopolo eto ohouwombolani muuzarini mwafwanyeya nyo mmandani mwa Farawu mwene wa Ijipitu na mwasa ozivela wanna liye na nyo eto ira akwakwanelihede lumbela walumbenle liye na makolo enyu. 9Mwa eno, inafwanela muiziwe ira Yehova Mulugu wenyu gu Mulugu ororomeleya wenno unakwakwaneliheda yopangana yaye. Zela mutu wenno unamuzivela eto aharihaga malamulo aye, unomuoniha zivela waye roma liye, dowaga ahimaye eto ahimaye anno ahimiwa, vamohi na ahimiwa anno ahimiwa dowagave eno fiyeda ndila 1.000. 10Mbwenye unomutonga mutu wenne unamwida, fiyeda mudimeliha mwilamboni. Yehova kanamudibeliwana mutonga mutu wenne unamwida mbwenye unokala okozeyene ira amutonge. 11Nona inafwanela muharihege malamulo na mangano vamohi na jokokomeza jatene jejo jinaurumani miyo peno ira muiregena.>>

Upama wafuna aIzarayeli ona muwari monvwelela Yehova

12Mozeji ohowongagave eraga: <<Nyo mwakala atu ovwa jotonga jatene eji, mwakoya eto mwairagana, Yehova Mulugu wenyu unokwakwaneliheda yopangana yaye vamohi na upama watene ulumbenle liye na makolo enyu. 13Eto unerege uzivelani, unerege urelihani, unerege uindjivihani. Liye unourelihani ira mwaabalege ahima adjindji eto unoreliha jalo jenyu vamohi na jolima jatene ja mmundani, na vinyu wenyu, azeti wenyu, ahima a ng'ombe na ahima a mabila. Yehova unourelihani mwa jatene jeji mwavolowa ilambo yenno yalumbenle liye na makolo enyu ira auvaheni.#7:13 unourelihani ira mwaabalege ahima adjindji eto unoreliha jalo jenyu: AIzarayeli kohowandeliwa ira muwari monvwelela Yehova, jewa ja mwilamboni ya vati jerege awendela pama. Hiya leveleliwa jotega jiwa eto hiya vulusiwa. Mbwenye zela tempu ili hiyo ila para atu omuroromela Yesu yoing'anela yenno kiliwo. So yoing'anela ihanle para mutu omuhara Mulugu ku onihiwa goyi tempu ili hiyo ila, amala aone upama siku nnafuna za Yesu Kiristu. (Joira ja Anamarumiwa 9:16, 14:22; Roma 8:16-18; Filipo 1:29-30; 1 Tesalonika 3:4; Jowandeliwa 22:12) 14Munorelihiwa na makalelo ohokala a masika kwaranya atu atene a mwilamboni. Muwari mwa nyo kaza akalamo muhiyana nari mulombwana ohobala. Nne muwari mwa anavinyama enyu atene kaza akalamo mwanainyama ohorela. 15Eto Yehova unomaliha maurenda matene muwari mwa nyo. Muwari mwa nyo kamunafwanyeyege marenda owopiha nnga marenda a akuda Ijipitu anno muiziwile nyo pama. Mbwenye marenda anno Yehova unoavaha atu anne anauidani. 16Eto nyo inafwanela mumale atolotcha atu atene anno anafuna uvahani Yehova Mulugu wenyu. Kamwaawendele tangaranga. Nne kamwaahare amilugu ewa, tchoira yenno inafwanyeya agali ratuwero unafuna umangani.>>

17<<Afwase nyo podi za wongaga mmirimani mwenyu muiraga: <Atwala kohosimbwa indjiva nikwaranya hiyo. Hiyo kannawanda atamangihamo mwilamboni mu.> 18Mbwenye miyo nnouwandelani ira kamwaove aliwa. Inafwanela muumbuwelege tempu ili yatene zela jejo Yehova Mulugu wenyu amuirele liye mwene Farawu vamohi na akuda Ijipitu afwaye atene. 19Muumbuwelege jengo ja ibaribari jejo jaonne nyo na meso enyu vamohi na jionihedo na jotikiniha vamohi na ndanda na kopolo vamohi na muwono owongowa wenno uukumihilenani liye Ijipitu. Yehova Mulugu wenyu unoairana makalelo mamohive atu anne munaaova nyo.

20<<Eto Yehova Mulugu wenyu unorumiha manyefu ira kadowe sogolro kaalumege atene kahanle ira nyo muwande adimeliha atene kavitanle.#7:20 Yehova Mulugu wenyu unorumiha manyefu ira kadowe sogolro… MaBibiliya amohiwa anawonga ira Yehova unoavaha rendjeya wohokala wa masika atu anne anafuna hala, ante afiyede atolotcha. 21Kamukukumuwe na aliwa, mwasiwa Yehova Mulugu wenyu wenno unafwanyeya vari venyu, liye unafwanyeya agali Mulugu mundimuwa eto owopiha. 22Eto Yehova Mulugu wenyu unerege atamangiha malogo matene anna vang'ono vang'ono vasogolro venyu tawiha ira atamangihamo atene fendo imohive, anavinyama owopiha anafwanyeya mukokolani anoindjiva kakale owopiha para nyo. 23Yehova Mulugu wenyu unouvahedani aliwa vasogolro venyu eto unosakanya ira kawendege mpungwe mpungwe ante aliwa atene katolowe. 24Eto Yehova unouvahedani amwene ewa mmandani mwenyu ira mudimelihe mazina ewa mwilamboni. Kalivo nne mulombwana mmohi unafuna imela vamentoni venyu. Munofiyeda atolotcha atene.

25<<Eto jolandaniha ja amilugu ewa jagali josemiwa nyo munerege tumeya na munlo. Eto parata na oru jirihedilena atu vikwamutu josema jile, nyo kamusilrilre, nne kamutukule, mwasiwa inokala yengo inafuna umangani. Mwasiwa jejo jinafwanyeya jagali jengo jotakaletchetcha wa Yehova Mulugu wenyu. 26Kamuvolotchihe mmba mwinyu yengo ili yatene yotakaletchetcha, tawiha ira munatolotchiwe na makalelo anafuna tolotchiwa yengwele. Mbwenye jatene jotakaletchetcha inafwanela mujione nnga jokamelihiwa eto mujiidege mwasiwa jinafwanyeya jagali jengo jinafuna tolotchiwa.>>

Currently Selected:

Detoronomiyo 7: iLolo

Highlight

Copy

Compare