Detoronomiyo 8
8
Mozeji ohakokomeza aIzarayeli ira kaumbuwelege upama wa Yehova
1Mozeji ohowongagave eraga: <<Inafwanela muing'ane pama ira muharihegemo malamulo matene nnauwandelani miyo peno ira muwande kalawo eto ira muindjivihane eto ira muwande volowa eto ira mwatukule ilambo yenno Yehova alumbenle liye avaha makolo enyu. 2Eto muumbuwelege ndila datene dauwendihani Yehova Mulugu wenyu muisalesaleni muwari mwa yaka 40 di, auyevihagani, auwombezagani ira aone mirima denyu akala mwali atu owanda hariha malamulo aye owu hehi. 3Eto ohouyevihani, liye uhiyani nyo kana ndala eto magomelo uwa ohoukamihedani auvahagani mana anno mwahaiziwile nyo, nne ababinyu kahaiziwile atu. Yehova airaga eno, auiziwihani ira kahi pawu bahi inamukalihawo mutu. Mbwenye mazu matene anakuma vamulomoni va Yehova banamukalihawo mutu. 4Muwari mwa yaka 40 dile, jowara jenyu kajaduwa, nne manyalo enyu tchazimba.
5<<Inafwanela muiziwe pama mmirimani mwenyu ira Yehova Mulugu wenyu unoutongani auonihagani goyi na makalelo mamohive nnga mutu unamutonga liye mwanaye amuonihaga goyi. 6Muharihege malamulo a Yehova Mulugu wenyu, muharege ndila daye datene eto mmuovege. 7Tchoira Yehova Mulugu wenyu unaudowanani ilambo yapama, ilambo yenno munafwanyeya mwana mihindje dokana mahindje apama, ilambo munafwanyeya visime na matiya odihetchetcha anakumela mmadaboni na mmwangoni, 8ilambo yokana tirigu na sevada, miratchi da uva na mitengo da mifigera, na mitengo da romaya vamohi na ilambo ya mitengo da azeti na nuwi pwi pwi, 9ilambo yenno inafuna nyo djaga pawu mohosauweleya. Mwadowa wewule, kilivo yengo inafuna uhalelani. Eto mabwe a ilambo yenne ba mabwe a momba#8:9 mabwe a mombavamohi na mukuwa: Jengo jambinli jene jeji ti jengo japama joakaiheda atu. Atu a tempu yenno kowanda tukula mabwe ale, aliwa piya ira kasakanyena himba na supada vamohi na fwaramento dimohi diwa da momba. Ku wonga ira ilambo ile yali ilambo yapama, mwafwanyeya jengo jofuneya. eto mmwangoni muwa munerege timbamo mukuwa. 10Mwamala dja, mwarumbala, inafwanela mmutamalele Yehova Mulugu wenyu zela ilambo yapama yenno yuvahileni liye.
11<<Polre polre tawiha ira munaze mmudiwale Yehova Mulugu wenyu. Inafwanela muharihege malamulo aye vamohi na jotonga jaye vamohi na mangano aye jejo jinauwandelani miyo peno. 12Polre polre tawiha ira mwagamanle dja, mwarumbala eto mwamala manga nyumba dapama mukalagamo, 13eto mwakana ng'ombe didjindji na mabila madjindji eto mwaganna parata ohokala wa masika vamohi na oru ohokala wa masika eto jokana jenyu jatene jagaindjivile na makalelo ohokala a masika, 14mwaona upama watene wenno, polre polre tawiha ira munarome vitukulela mmirimani mwenyu eto munamudiwale Yehova Mulugu wenyu wenno uukumihileni ilambo ya Ijipitu muuzarini mwafwanyeya nyo. 15Kammudiwale Yehova wenno aukumihileni mwilamboni mule ausogolrelragani muisalesaleni indimuwa eto yowopihetchetcha mule mwemo mwafwanyeya nyowa dowopiha na awalruze eto nagali nimburo noumma mwemo mwahafwanyeya mahindje. Mbwenye Yehova ohokumiha mahindje muwari mwa nibwe novanda ira mung'we. 16Eto kammudiwale Yehova wenno audjihani mana muisalesaleni, jodja jejo jahaiziwile ababinyu. Yehova airilena eno ira auyeviheni eto ira auwombezeni ira vasogolro viwa oireleni upama.#8:16 Yehova airilena eno ira auyeviheni eto ira auwombezeni ira vasogolro viwa oireleni upama: Ku wonga goyi datene nnaonihiwa ana Mulugu nnakuma mmandani mwa Mulugu eto nnalaba ira ana Mulugu kakale olimbene na nroromelo newa. (Roma 5:3-5; Tiyagu 1:2-4)
17<<Mwa eno, kamurome wongaga mmirimani mwenyu ira: <Miyo jorayela jatene jinna miyo diwandile kana muwari mwa kopolo daga na mandaga.> 18Mbwenye inafwanela mmuumbuwelege Yehova Mulugu wenyu ira liye gunavaha kopolo ira muwande kana jorayela. Liye gunairana jatene ejo ira akwakwanelihede yopangana yaye yalumbenle liye na makolo enyu nnga munaonela nyo peno.
19<<Mbwenye mwamudiwala Yehova Mulugu wenyu, mwaroma ahara amilugu amohiwa, mwaakokorelaga eto mwaalabaga aliwene, miyo peno nnowonga wa nyo ira na ibaribari munagomela dimela. 20Munagomela dimela molingana na makalelo kadimenle malogo anno Yehova aatolotchile liye vasogolro venyu. Mwahafune vwelela mazu a Yehova Mulugu wenyu, jatene jejo jinoza juireyeleni.>>
Currently Selected:
Detoronomiyo 8: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
