Detoronomiyo 6

Mozeji ohalimbiha aIzarayeli ira kakale atu omuhara Yehova

1Mozeji ohowongagave eraga: <<Ala ba malamulo na mangano vamohi na jotonga jejo jadiwandenle Yehova Mulugu wenyu ira dufundjiheni ira mwaharihegemo mwavolowa ilambo inafuna nyo dowa tukula ira ikale yenyu. 2Miyo nnoufundjihani ira mukale atu omuova Yehova Mulugu wenyu eto muharihege mangano na malamulo anno anauwandelani miyo nyo vamohi na ahiminyu eto ahiminyu ahimiwa kalawo wenyu watene ira malambo enyu kaindjive. 3Kavuruwanani aIzarayeli eto muing'ane pama ira muharihegemo jatene ira mwavolowa ilambo yenno munafwanyeya mukaka na nuwi pwi pwi, jenyu juwendelegeni pama eto mukale atu oindjiva ohokala a masika nnga Yehova Mulugu wa makolo enyu mwapanganne liye na nyo.

4<<Kavuruwanani aIzarayeli. Yehova Mulugu wehu gu Yehova mmohive bahi uliwo. 5Mmuziveliwege Yehova Mulugu wenyu na murima wenyu watene, no kalawo wenyu watene, vamohi na kopolo denyu datene. 6Mazu anauwandelani miyo peno ala, inafwanela kakalege mmirimani mwenyu, 7eto mwaafundjihege ahiminyu ira na aliwene kakoyege mmirimani mwewa eto mwaawandelege mwagagaratile vande, nari mwawendaga mundila, nari mwagonantigi, nari mwavenyaga. 8Eto mwaapotege mazwala vandandani na vakoveni venyu ira ikale ionihedo. 9Eto mwaalrembege mazwala vakaxiluni na vamusuwoni va nyumba denyu.>>#Detoronomiyo 11:18-20

10Mozeji ohowongagave eraga: <<Yehova Mulugu wenyu auvolotchihani ilambo yenno ilumbenle liye na makolo enyu Abarahamu na Izaki na Jako ira auvaheni, mwemo munafwanyeya sidadi dindimuwa dapama dedo dahamangile nyo, 11eto nyumba muzanle jengo japama agali nyo kamuhenlemo yengo eto ilambo munafwanyeya visime pwi dedo dahatimbile nyo vamohi na minda da uva na mitengo da azeti dedo mwahazanle nyo, mwamala dja eto mwamala rumbala, 12polre polre tawiha ira munamudiwale Yehova wenno uukumihileni ilambo ya Ijipitu muuzarini mwafwanyeya nyo. 13Mmuovege Yehova Mulugu wenyu, mmulabege liyene eto mulumbelege na nzina naye bahi. 14Mbwenye kamwaaharege amilugu amohiwene, amilugu a atu anno mwaawandamenlena nyo, 15tawiha ira Yehova Mulugu wenyu unatakaleliwe na makalelo ohokala a masika zela nyo, afiyede utolotchani mwilamboni yatene ya vati. Tchoira Yehova Mulugu wenyu gu Mulugu okana sandje.

16<<Kammuxixe Yehova Mulugu wenyu nnga mwamuxixile nyo mwagali ilambo ya Masa.#6:16 nnga mwamuxixile nyo mwagali ilambo ya Masa: AIzarayeli kamuxixile Yehova muwari monvepa Mozeji mahindje, kalaga nnga Mozeji gwali Mulugu. Museluwa unafwanyeya Ezodu 17:1-7. 17Inafwanela muharihege pama malamulo a Yehova Mulugu wenyu vamohi na jowelruza jaye na mangano aye unaurumani liye. 18Eto muiregena japama na jowongowa vamentoni va Yehova ira jatene juwendelegeni pama eto ira muvolowe, mutukule ilambo yapama yenno Yehova alumbenle liye na makolo enyu, 19eto ira Yehova aatatilele unde amwidaninyu atene vasogolro venyu nnga mwemo Yehova muwongele liye.#6:18-19 muiregena japama na jowongowa vamentoni va Yehova ira jatene juwendelegeni pama: Yokokomeza yanna aIzarayeli zela vwelela malamulo tchali ira kaleveleliwe jotega. So ali ira jewa ja ilambo ya vati jawendele pama. Mozeji ohowonga ira muwari movwelela ali ira muvolowe, mutukule ilambo yapama yenno Yehova alumbenle liye na makolo enyu.

20<<Mwanawo aufuka musogolro ira: <Kodi mwasiwa gwa nni Yehova Mulugu wehu auvahagani jowelruza vamohi na mangano na jotonga jejo juwandenleni liye?>, 21weyo umuwakule mwanawo wire: <Hiyo nali azari a Farawu ilambo ya Ijipitu. Mbwenye Yehova ohonikumihamo mwilamboni mwa Ijipitu na ndanda naye na kopolo. 22Eto Yehova ohoirana jionihedo na jotikiniha jilukulu eto jagali jowopiha muwari moatonga aIjipitu na mwene Farawu vamohi na atu atene a vande vaye. Jatene ejo Yehova ohoirana hiyo niing'anaga na meso ehu. 23Mwa enne ohonikumihamo muIjipitu mule, liye nitukula ira aze anivahe ilambo yenno yalumbenle liye na makolo ehu. 24Noira eno, Yehova ohoniruma ira niharege jokokomeza jatene jeji eto nimuovege Yehova Mulugu wehu ira niwande kana upama wa mukalakala eto ira niwande kalawo nnga mukalele hiyo fiyeda siku na peno ni.#6:21-24 Harihamo mangano na malamulo a Mulugu unazela morumela jengo mbinli. Voroma nali azari a Farawu… Yehova ohonikumihamo: Ku wonga nnoharihamo jinawonga Mulugu mwasiwa nihimala kumihiwamo muuzarini mwali hiyo. Yowelela Yehova ohoniruma ira niharege jokokomeza jatene… ira niwande kana upama: Ku wonga Mulugu kanivahile mangano na malamulo ira nisanyeye, mbwenye ali ira nikale pama. Ku wonga inafwanela mutu omuroromela Yesu aharihegemo mangano na malamulo a tempu ili hiyo ila muwari moira umala kana ibaribari zela kumihiwamo waye muuzarini mwali liye. Ku wonga mutu kanaharihamo ira akumihiwemo muuzarini mwaye mbwenye unafuna harihamo gwenno ukumihiwemo. 25Hiyo nakala oharihamo na makalelo apama malamulo matene vamentoni va Yehova Mulugu wehu nnga mwemo munirumele liye, Yehova unoniona nagali apama.> >>#6:25 nakala oharihamo na makalelo apama malamulo matene… Yehova unoniona nagali apama: Wenno unaharihamo malamulo matene kuma vabaliwe liye ante ukwa waye, kanakana yotega inafuna liye tongiwela. Fwanyeya ira uwandile kwakwaneliheda gu Yesu Kiristu bahi. (Roma 3:19,23; 2 Korinto 5:21) Mbwenye mazwala kinazana leveleliwa wa jotega nne kinazana vulusiwa para wenno aromile tega. Mbwenye wenno uwandile leveleliwa momuroromela Yesu, airagana jengo japama, Mulugu amuona unoziveliwa. (2 Korinto 5:9; Efezo 5:10; Koloso 3:20; 1 Tesalonika 4:1)

Currently Selected:

Detoronomiyo 6: iLolo

Highlight

Copy

Compare