Detoronomiyo 4

Mozeji ohakokomeza aIzarayeli ira kamuharegeve Mulugu

1Mozeji ohowongagave eraga: <<Mwa eno aIzarayeli kavuruwanani mangano na jotonga jejo jinaufundjihani miyo, mukwakwanelihedege ira muwande kalawo eto muwande volowa ira mwatukule ilambo yenno Yehova Mulugu wa makolo enyu unafuna liye uvahani.#4:1 mukwakwanelihedege ira muwande kalawo eto muwande volowa ira mwatukule ilambo: Kahi ira aIzarayeli kafuna kawande volowa ilambo ya Kana na mwasa owanda wana pama, nari kana kopolo. So mbwenye para aliwa volowa ilambo ya Kana, yafuna izele muwari movwa mazu a Yehova vamohi no vwelela. 2Muwari mwa mazu matene anaurumani miyo, kikalevo mazu anafuna nyo wendjeda nne vungula.#Jowandeliwa 22:18-19 Mbwenye inafwanela muharihege malamulo a Yehova Mulugu wenyu anno nnauwandelani miyo. 3Meso enyu kohomala ona jejo Yehova jairile liye mwagali mwango Peyori.#4:3 atu atene kamuharile mulugu Baali wa mwango Peyori, Yehova Mulugu wenyu ohatolotcha: Fwanyeya ira wanle kohokalawo aIzarayeli kamuharile mulugu aitaniwa Baali, wa mwango Peyori. Mwa enne kohopiwaga atu 24.000 siku nimohive. Nione Numero 25:1-9. Tchoira atu atene kamuharile mulugu Baali wa mwango Peyori, Yehova Mulugu wenyu ohatolotcha vari venyu. 4Mbwenye nyo mwamuharile Yehova Mulugu wenyu, ante peno nyo mwatene muhukalawo.

5<<Miyo dihimala ufundjihani mangano vamohi na jotonga nnga mwemo mudirumile Yehova Mulugu waga ira mudowe mwaharihegemo ilambo yenno inafuna nyo dowa tukula. 6Inafwanela mukoye jatene jene eto muiregena, tchoira jejo jinafwanyeya jagali zelru vamohi no onelramo watene vamentoni va malogo amohiwa anafuna vuruwana mangano matene ala. Aliwa kavwa anoza kawongege keraga: <Nlogo nindimuwa ni ba atu a toto eto ba atu oiziwetchetcha.> 7Tchoira kanilivo nlogo nne nimohi nindimuwa nnawanda wandameliwa na mulugu wewa nnga makalelo unaniwandamela Yehova Mulugu wehu fendo datene nnamuitana hiyo. 8Eto kanilivo nlogo nimohi niwa nindimuwa ninna mangano okwakwanela vamohi na jotonga jokwakwanela jolingana na malamulo anno nnauvahani miyo vamentoni venyu peno.#4:8 kanilivo nlogo nimohi niwa nindimuwa ninna mangano okwakwanela vamohi na jotonga jokwakwanela: Malamulo na mangano anafuna Mulugu para atwaye kawendegena bapama eto analaba ira ilambo ikale pama eto atu kawendege vamohi mwa murendele. Mulugu kaavahile atu malamulo ira kasanyeyege, mbwenye aavahele ira kaone upama wewa hiya kalave azari a makalelo kanna atu wanle. Nione Salmu 19:7, 119:18,72,165; Tiyagu 1:25, 2:12; 1 Juwawu 5:3.

9<<So inafwanela mukale ororomeleya. Eto polre polre tawiha ira munadiwale jejo jionne nyo na meso enyu eto kajikumemo mmirimani mwenyu kalawo wenyu watene. Eto mwaawandelege ahiminyu vamohi na ahiminyu ahimiwa. 10Kamudiwale siku naligi nyo vamentoni va Yehova Mulugu wenyu, mwango Orebi. Tchoira siku nenne Yehova ohodiwandelaga eraga: <Waagumanihe atu atene kaze wa miyo ira daawandele mazu aga matene eto aliwa kafundje ira kawandege diova malambo matene anafuna atu kalawo mwilamboni ya vati. Eto anerege afundjiha ahimiwa.> 11Mwa enne mohozaga, nyo imela wandamelana mwangoni ule. Eto mwangole siku nenne ohindaga munlo fiyeda gwelaga zulu. Eto wohokalaga isi na mirambo eto mwango watene agali odiba pii. 12Mwa enne Yehova ohowongaga na nyo muwari mwa munlo. Eto nyo mohovwaga nizu niwongaga mazu. Mbwenye kamwaonileve yengo ili yatene, so mwavwilege nizu ve. 13Mwa enne liye ohouwandelagani yopangana yaye ira muharihegemo, yenno inafwanyeya yagali Malamulo Kumi. Evale oholremba vamabweni menli osemiwa nnga matabwa. 14Eto tempu imohive yenne Yehova ohodiwandelaga ira dufundjiheni mangano vamohi na jotonga jatene ira muharihegemo ilambo yenno inafuna nyo dowa tukula.>>

Jokokomeza ira aIzarayeli kahakayena vikwamutu josema

15Mozeji ohowongagave eraga: <<Siku Yehova awongaga liye na nyo mwango Orebi muwari mwa munlo, kamwaonile yengo ili yatene, so mwavwaga nizu ve bahi.#4:15 Siku Yehova awongaga liye na nyo… kamwaonile yengo ili yatene: Ahakale Mulugu afunaga ira atu kamutamalelege molabana vikwamutu dosema, liye ogovioneyiha ira atu kawande sema ilombolombo yokala ha liye. Mbwenye Mulugu kafunne eno. Eto fwanyeya ira peno atu kaganna vikwamutu josema jiwa ja Yesu na Mariya, kahi ira aliwa kohoiziwa kove diwa. So anasema wene, namaga ira: <<Ula gu Yesu. Ula gu Mariya.>> 16Nona inafwanela muing'ane pama ira mwahaviringane eto mwaharome sakanya nlandaniho nosemiwa na jofwalrafwaniha jili jatene, nari yofwalrafwaniha ya muhiyana nari ya mulombwana, 17nari yofwalrafwaniha ya mwanainyama uli watene unafwanyeya mwilamboni ya vati, nari yofwalrafwaniha ya mbalrame ili yatene inavava zulu 18nne yofwalrafwaniha ya mwanainyama uli watene omburunuwa vati nari yofwalrafwaniha ya somba ili yatene inafwanyeya mwiko.#4:18 somba ili yatene inafwanyeya mwiko. MaBibiliya amohiwa anawonga ira somba ili yatene inafwanyeya mmahindjeni anafwanyeya vati va teya. 19Eto wavenyiha meso awo uing'aniha zulu, waona mwedi nari nyenyedi vamohi na jomoneya jatene ja zulu, polre polre tawiha ira unanyengiwe uroma kokorela jejo eto uroma tamalelaga jejo Yehova Mulugu wenyu aavahile liye atu atene a ilambo ya vati.#4:19 aavahile liye atu atene a ilambo ya vati. MaBibiliya amohiwa anawonga ira aavahile liye atu amohiwa ira katamalelege. Kahi ira Mulugu aavahile jomoneya ira aliwa katamalelege, nari. So mbwenye kawongaga aavahile liye, ku tapulela ira malogo amohiwa atene Mulugu ohahiya ira katamalelege nzuwa vamohi na mwedi vamohi na nyenyedi. Ohahiya ira aliwa kasakanyege jofuna jewa joviringana na makalelo kafuna atu. Mbwenye zela aIzarayeli, Mulugu kaahiyile ira aliwa katamalelege jomoneya ja zulu, ohakondiha. 20Nyo mbwenye kamuharege jejo, mwasiwa Yehova ohoutukulani, aukumihagani Ijipitu muhofuni monyungulrutcha momba#4:20 muhofuni monyungulrutcha momba: Ku wonga muuzarini mohokala mwa masika. ira mukale atu osakulriwa a Yehova nnga munaonela nyo peno eni.

21<<Eto Yehova ohotakaleliwa zela miyo na mwasa wa mazu enyu eto oholumbela adikamelihaga lambuwa muhindje Jordawu vamohi no volowa ilambo yapama yenno Yehova Mulugu wenyu unafuna liye uvahani ira ikale yenyu. 22Nona miyo kannalambuwa muhindje Jordawu, nnokwa ilambo yenna. Nyo mbwenye munolambuwa eto munodowa mwatukule ilambo yapama ile. 23Mwa eno, inafwanela mwahadiwale yopangana yenno Yehova Mulugu wenyu usakanyile liye na nyo eto nne kamusakanye nlandaniho nosemiwa, nari yofwalrafwaniha ili yatene yenno Yehova Mulugu wenyu ukondihileni liye. 24Tchoira Yehova Mulugu wenyu gu munlo otolotcha eto gu Mulugu okana sandje.

25<<Nyo mwaabala ahima eto ahiminyu kaabalaga ahimiwa, nyo mwamala ulula, mwaroma sakanya johokala pama, mwaroma sakanya nlandaniho nosemiwa nari yofwalrafwaniha ili yatene, muromaga sakanya jabure vamentoni va Yehova Mulugu wenyu, mutatamulaga uwali wa Yehova, 26miyo peno nnoitana ilambo ya zulu vamohi na ilambo ya vati ira jikale amboni ira na ibaribari mohodibeliwa munagomela dimela ilambo yenno inafuna nyo dowa tukula mwagalambuwile muhindje Jordawu. Kamunasusa. Munagomela tolotchiwa atene. 27Eto Yehova unoubalaletchelani muwari mwa atu atene eto munoza muhale atu a vang'ono vari va atu anno Yehova unaudowanani liye. 28Eto wewule munerege alaba amilugu osakanyiwa na manda a atu, kagali amilugu a mitengo, a mabwe, anno kahanaona nne kahanavwa nne kahanadja nne kahanaona nukela wa yengo ili yatene.

29<<Nyo mwagali wewule, mwagamanle holowa, malringana mwanvenda Yehova Mulugu wenyu na mmirimani mwenyu mwatene no kalawo wenyu watene, munonfwanya. 30Mwa tempu yenno mwaza mukala mmakatamihoni eto ubure watene wenna waufwanyani, magomelo wa malambo anne munoza murungunuwe muing'ane wa Yehova Mulugu wenyu eto muvwelelege jowonga jaye. 31Tchoira Yehova Mulugu wenyu gu Mulugu wa tangaranga. Mwavwelela inawonga liye, Mulugu kanauhiyani, nne kanautolotchani nne kanadiwala yopangana yenno yalumbenle liye na makolo enyu.

32<<Kafukedani ilambo ya vati yatene komoni ya wu ante komoni ya wu akala wanle nyo mwahanabaliwe, romela siku Mulugu ampandutchile liye mutu amuhela mwilamboni, akala ihiroma ireya yengo ilukulu nnga yenna owu hehi akala ihiroma vweya yengo nnga yenna. 33Owu hehi mufukede akala kohokalawo atu kababihile vwa nizu na mulugu wewa awongaga muwari mwa munlo nnga muvwile nyo, amala kahakwa, kakalawo. 34Owu hehi mufuke akala ukalawo mulugu ubabihile xixa dowa awombola atu mmandani mwa afwiwa aazagana wa liye molabana jotonyiheda na jionihedo na jotikiniha na kondo vamohi na ndanda na kopolo na muwono owongowa na jokukumula jidjindji molingana na jatene Yehova Mulugu wenyu jairile liye Ijipitu muing'anaga na meso enyu. 35Nyo mohoonihiwa jatene ejile ira muiziwe ira Yehova unafwanyeya agali Mulugu. Kaliwo Mulugu mmohiwa ahali liye. 36Mulugu ohouvwihani nizu naye kumela zulu ira aufundjiheni eto ohouonihani munlo waye mundimuwa mwilamboni ya vati eto mohovwa mazu aye muwari mwa munlo. 37Tchoira Yehova ohazivela makolo enyu eto ohofiyeda usakulrani nyo ahimiwa, liye ukumihani muIjipitu, liye mwinnya usogolrelragani na kopolo daye dindimuwa, 38liye atamangiheda olapela wene malogo amohiwa mandimuwa eto a kopolo ukwaranyani nyo, liye uvolotchihani nyo ilambo yewa, liye uvahani ira ikale yenyu nnga munaonela nyo peno. 39Nona peno inafwanela muiziwe eto muumbuwelege mmirimani mwenyu ira Yehova bahi gunafwanyeya agali Mulugu wa zulu na ilambo ya vati. Kaliwo Mulugu mmohiwa. 40Nona inafwanela muharihege mangano aye vamohi na malamulo aye anno nnauwandelani miyo peno ira jatene juwendelegeni pama romela nyo vamohi na ahiminyu a musogolro ira kawande kalawo malambo madjindji ilambo yenno Yehova Mulugu wenyu unafuna liye uvahani ira mukalegemo malambo a mukalakala.>>

Mozeji ohosakulra sidadi dotawelamo

41Evale Mozeji ohosakulraga sidadi taru dafwanyeya pandi ya makumelo wa nzuwa wa muhindje Jordawu, 42ira mutu ampa nfwaye ahali mofuna mwaye eto vahali idana voroma vene, atawelege sidadi dedile ira ahapiwe.#4:42 mutu ampa nfwaye ahali mofuna mwaye… atawelege sidadi dedile ira ahapiwe: Ira niiziwe pama muselu ula, nione eto 19:1-13. 43Sidadi dasakulrile Mozeji ti di:

1. Yoroma ali sidadi ya Bezeri, yafwanyeya mukokolani, yagali ilambo yotandeleya yagali yogwela, aavahile atu a nlogo na Rubeni ira katawelegemo.

2. Yowelela ali sidadi ya Ramote yafwanyeya mwilamboni mwa Jileyadi, aavahile atu a nlogo na Gadi ira katawelegemo.

3. Yogomiheda ali sidadi ya Golani yafwanyeya mwilamboni mwa Bazani, aavahile atu a nlogo na Manasesi ira katawelegemo.

Mazu otanda Malamulo Kumi

44Ala ba malamulo Mozeji aavahile liye Ana Izarayeli, 45na jowelruza, na mangano, na jotonga jejo Mozeji aawandenle liye Ana Izarayeli kagakumile Ijipitu, 46kahanalambuwe muhindje Jordawu. Tempu yenno aliwa kali ndabo nafwanyeya sogolro wa sidadi ya Bete-Peyori mwilamboni mwa Seyoni mwene wa aAmore, akaletcha Ejiboni, wenno Mozeji vamohi na Ana Izarayeli kampile atu kagakumile Ijipitu. 47Kagampile, kohotukula ilambo yaye, kala yewa. Kohompa eto Oge mwene wa Bazani. Mwa enne kohapa amwene ambinlene a aAmore kakala pandi ya makumelo wa nzuwa wa Jordawu, aliwa tukula vilambo dewa, 48romela sidadi ya Aroweri, yenno inafwanyeya wandamelana tcherela ya mwana muhindje wa Arinoni ante dowa fiya mwango Siriyoni wenno eto unaitaniwa Herimoni, 49vamohi na ilambo yatene ya Araba, pandi ya makumelo wa nzuwa wa Jordawu, fiyeda Ntiya na Araba fiyeda mpedi mwa mwango Pijiga.

Currently Selected:

Detoronomiyo 4: iLolo

Highlight

Copy

Compare