Detoronomiyo 34
34
Kwa wa Mozeji
1Evale Mozeji ohokumaga ilambo yotandeleya ya Mowabe, liye dowa gwela mwango Nebo, fiyeda vazulu va Pijiga,#34:1 vazulu va Pijiga: Pijiga ali mwango Nebo ule vazulu viwa. sogolro wa sidadi ya Jeriko. Evale Yehova ohomuoniha ilambo yatene ya Kana, roma Jileyadi fiyeda Dani, 2na ilambo yatene ya Nafitali, ilambo ya Efarayimi, ilambo ya Manasesi vamohi na ilambo yatene ya Juda, fiyeda bara Mediteraniyo, 3na ilambo yatene ya Negebe na pandi yatene yotandeleya roma ndabo nafwanyeya sidadi ya Jeriko, sidadi yenno inaitaniwa Sidadi ya Mitengo da Minazi, fiyeda Zowari. 4Eto Yehova ohomuwandela Mozeji eraga: <<Ila tchi ilambo yenno yalumbenle miyo na Abarahamu, Izaki na Jako, diiraga: <Nnoza daavahe ahiminyu a musogolro.> Miyo nnauoniha ira uing'ane na meso awo bahi, mbwenye weyo ilambo yenne kunavolowa.>> 5Mwa enne Mozeji muzari wa Yehova ohokwaga mwangoni ule, mwilamboni mwa Mowabe nnga mwemo mwawongele Yehova. 6Yehova ohomukoya Mozeji ndabo nimohi eni, mwilamboni mwa Mowabe, sogolro wa sidadi ya Bete-Peyori. Ante fiyeda peno kalivo uiziwile nimburo neno vikoyiwe Mozeji. 7Mozeji akwile aganna yaka 120. Liye akwile meso aye kaonagave pama eto agalive na kopolo daye. 8Evale Ana Izarayeli kohomala malambo 30 kamunlelaga Mozeji ilambo yotandeleya ya Mowabe, fiyeda malambo omunlela no mukumbanya aliwa mala.
9Eto Jozuwe mwana Numi, ohozaleliwa zelru dokumela wa Mulugu, na mwasa oira Mozeji ohomuhela manda, liye mureliha. Mwa enne Ana Izarayeli kohonvwelela Jozuwe eto kohoirana nnga Yehova mwamurumele liye Mozeji. 10Muwari mwa aIzarayeli atene kalivo namafiyiheda azilewo, Yehova awongaga na liye kove na kove,#34:10 Yehova awongaga na liye kove na kove: Kahi ira Mozeji omuona Mulugu meso na meso, mbwenye era vwa Mulugu awongaga eto atapanya na liye nnga jini mutu awongaga na nfwaye. (Ezodu 33:11) Tchoira kalivo unaona kove ya Yehova amala akalawo. (Ezodu 33:20) nnga jawonga liye na Mozeji. 11Nne kalivo namafiyiheda mmohiwa azilewo airagana jionihedo na jotikiniha jolingana na jejo Yehova anvahile liye Mozeji adowa airagana ilambo ya Ijipitu vamentoni va mwene Farawu, na anamalabaye atene vamohi na ilambo yaye yatene. 12Eto nne kalivo namafiyiheda mmohiwa azile airagana jengo ja kopolo na jotikiniha johokala ja masika nnga jejo jaira Mozeji vamentoni va aIzarayeli atene.
Kukala mazu a livuru na Detoronomiyo.
Currently Selected:
Detoronomiyo 34: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
