Detoronomiyo 33
33
Mareliho a Mozeji zela malogo a Izarayeli
1Mozeji, mutu wa Mulugu, ahanakwe, ohaareliha Ana Izarayeli na mareliho ala, 2liye wonga eraga:
<<Yehova ohoza akumelaga mwango Sinayi,
ohonikumelela azelaga pandi ya Seyire,
ohowareya akumelaga mwango Parani.
Ohoza vamohi na atu otchenihiwa matchikwi na matchikwi,
aganna munlo wa malamulo pandi ya ndanda naye nodjana.
3Na ibaribari Yehova unoaziveliwa atwaye.
Atwaye atene otchenihiwa anafwanyeya mmandani mwaye.
Aliwa atene anokala vamanyaloni vaye,
liye afundjihaga mazwaye.
4Mozeji univaha malamulo,
anafwanyeya kagali yowatchela ya mulogo wa Jako.#33:4 mulogo wa Jako. Mulogo unawongiwa veva anawonga zela malogo matene a aIzarayeli. Mwasiwa atene kakumile mwa ahima kumi na ambinli a Jako.
5Yehova ohoroma kala mwene oatonga atwaye anaazivela liye,#33:5 atwaye anaazivela liye: MaBibiliya amohiwa anawonga Jezurumi. Sawasawa vs 26.
andimuwa a Izarayeli kagagumanele,
vamohi na malogo ewa.
6<<Nlogo na Rubeni nikalegewove, kanikwe,
masiki alombwana ewa kagali a vang'ono.>>#33:6 masiki alombwana ewa kagali a vang'ono: MaBibiliya amohiwa anawonga ira: alombwana ewa kakale oindjiva.
7Zela nlogo na Juda Mozeji ohowonga eraga:
<<Yehova muvwe jovepa ja Juda,
mmuzena ira akalege vamohi na malogo amohiwa a Izarayeli.
Mwaavahe kopolo dowanana kondoni,
mukale wenno unafuna avunelaga zela amwidaniwa.>>
8Zela nlogo na Levi Mozeji ohowonga eraga:
<<Yehova, jowombezana jofuna jenyu, jejo jineriwa Tumimu na Urimi, #Ezodu 28:30
mwaavahile nlogo na atwinyu aLevi anno mwaasakunlre nyo,
anno mwaaxixile nyo mwilamboni mwa Masa,
mukanganaga na aliwa, tempu ya mahindje a Meriba.#33:8 anno mwaaxixile nyo mwilamboni mwa Masa… tempu ya mahindje a Meriba: Ali tempu aIzarayeli kamuruwanile atu Mulugu na mwasa ohokana mahindje. Nione eto Ezodu 17:1-7.
9Nlogo na Levi ti neno nafiyedile mukonda babaye na mmaye ira:
<Miyo kannababihege uonani.>
eto banno kahaabanlre abaliwa
eto kahaarihedile ahimiwa.
Tchoira aliwa anohariha mazwinyu,
eto anokoya yopangana yenyu.#33:9 banno kahaabanlre abaliwa: Yohokala tempu aIzarayeli adjindji kairilena atu jabure, mbwenye aLevi muwari momuova no muvwelela Mulugu kohapa atu abure ale, aliwa habalraga ira kali abaliwa. Nione eto Ezodu 32:26-29.
10Aliwa anoafundjiha ahima a Jako jotonga jenyu
eto anoafundjiha aIzarayeli malamulo enyu.
Aliwa anofiyiha jonukela mpunoni mwenyu,
eto aliwene banavelela mikuto dotumeya vaibuwani venyu.
11Yehova areliheni zela kopolo diwa datene
vamohi na jolaba jiwa jatene ira jikalege jouzivelani.
Mwaaporotche mmwinini anne anaawaniheda vamohi na ale anaaida
eto amwidani ewa kagwa kivenye akoka.>>
12Zela nlogo na Benjami, Mozeji ohowonga eraga:
<<Anno Yehova unaaziveliwa liye anakalege na liye mwa murendele.
Malambo matene Yehova unerege aing'anela,
eto anerege vuma mmandani mwaye.>>
13Zela ahima a Joze, Mozeji ohowonga eraga:
<<Yehova arelihe ilambo yewa,
na mareliho okumela zulu, na ningame,
vamohi na munyeto unakumela vati va teya.
14Eto teya yewa ikumege jovaha japama jejo jinaulukulihiwa na nzuwa,
vamohi na jovaha japama ja kada mwedi.
15Eto aarelihe ira mwango dawale
na jipatapata ja mwango mukumege jodja jidjindji.
16Eto aarelihe akuda Joze ira kakayena jodja na japama jatene jinafwanyeya ilambo ya Kana,
vamohi na upama wa wenno akumelenle vanikupuni nohinda;
jatene ejo jifiye vamuru va Joze,
wenno unafwanyeya agali osakulriwa vari va abalaye atene.
17Undimuwa waye uli nnga ng'ombe yoroma baliwa ya mulombwana,
manyanga aye anakala nnga manyanga a nyari,
ira adowe aaporotchegena
atu atene, fiyeda magomo a ilambo yatene ya vati.
Ayo ba makalelo a ahima a Joze, anno anafwanyeya kagali matchikwi na matchikwi a Efarayimi,
vamohi na matchikwi a Manasesi.>>#33:17 Efarayimi… vamohi na matchikwi a Manasesi. Atene anno ba ahima a Joze eto kafwanyeya kagali malogo menli muwari mwa malogo kumi na menli a aIzarayeli.
18Zela nlogo na Zebuloni Mozeji ohowonga eraga:
<<Zebuloni ahagalale muulrendoni mwaye.
Eto Isakari ahagalale mmusasani mwaye.#33:18 Zebuloni ahagalale muulrendoni mwaye. Eto Isakari ahagalale mmusasani mwaye. Mazwala ba mazu oreliha nlogo na Zebuloni na Isakari. Hagalala muulrendoni ku tapulela nlogo na Zebuloni nafuna nikale nlogo norayela muwari mowendiha malronda muwari mwa vilambo dimohi diwa. Eto hagalala mmusasani ku tapulela nlogo na Isakari nafuna nikale nlogo norayela muwari mowendiha malronda mwilamboni mwewa.
19Aliwa anerege agumaniha malogo amohiwa a aIzarayeli kadowege mwangoni,
kavelelege wewule mikuto da ibaribari.
Tchoira kawendaga anerege pata jengo japama ja mbara,
anerege vitula jengo jokoyiwa mutcherelani mwa bara.>>
20Zela nlogo na Gadi, Mozeji ohowonga eraga:
<<Atamaleliwe wenno uulukulihile nlogo na Gadi.
Atu a nlogo na Gadi anakala nnga podogoma wa muhiyana.
Anovitala ira kamuhinde mwidaniwa, kamugwade muwono vamohi na muru.
21Aliwa bavisakulrele pandi yoroma, aliwa watchela ilambo yapama.
Tchoira ilambo yenno isakunlre atu tchi pandi yakoyeliwe mundimuwa otonga.
Kohogumana vamohi na asogolrelri a aIzarayeli atene,
aliwa roma tonga mwa ibaribari nnga munafunela Yehova,
aliwa atongaga aIzarayeli na jotonga jaye.>>
22Zela nlogo na Dani, Mozeji ohowonga eraga:
<<Nlogo na Dani nnakala nnga mwana podogoma,
unalupa akumelaga Bazani.>>
23Zela nlogo na Nafitali, Mozeji ohowonga eraga:
<<Nyo nlogo na Nafitali munorumbala upama,
munozaleliwa mareliho a Yehova.
Vilambo denyu nnodowave ante pandi ya suli, vamohi na pandi ya ntiya na Galileya.>>#33:23 Vilambo denyu nnodowave ante… Para niiziwe ilambo yavahiwe nlogo na Nafitali, nione Jozuwe 19:32-39.
24Zela nlogo na Azeri, Mozeji ohowonga eraga:
<<Nlogo na Azeri ti nlogo nitabwile relihiwa vari va abalaye atene.
Abalaye atene anerege muziveliwa,
unerege kana makura pwi, ante afiyedege bwinihamo manyalo aye.#33:24 unerege kana makura pwi, ante afiyedege bwinihamo manyalo aye. Mazwala anaoniha ira atu a nlogo na Azeri kafuna kakayena makura ohokala a masika. Tchoira makura anawongiwa gu azeti kapiyana atu eto kovizoliha maningo. Mbwenye aliwa makura kafuna atu kana kerege kala madjindji fiyeda mutu adowe abwinihegemo manyalo.
25Sidadi da akuda Azeri difungiwege na misuwo da momba na mukuwa.
Eto aliwa kopolo dewa diindjive nnga indjiva wa malambo ewa.>>
26Mozeji ohowongagave eraga:
<<Kavuruwanani nyo atu oziveliwiwa na Mulugu!
Kalivo Mulugu mmohiwa olingana na Mulugu wenyu.
Mulugu mmohive bahi uliwo gwenno unavira muzulu muzulu aukamihedagani,
wenno unavira vamiramboni na undimuwa waye.
27Mulugu wenno unakalawo kala no kala gu nimburo nenyu nokala.
Liye gunaukoyani na kopolo daye dohomala.
Liye uhatatilela amwidaninyu olapela na nyo
kwi: <Kaatolotcheni.>
28Nona aIzarayeli kakalaga ogarateyene mwa murendele,
eto ahima a Jako kakalaga okave
ilambo munafwanyeya jodja na vinyu,
eto mwemo munafwanyeya muzongwe wa zulu.
29Orelihiwa gu nyo aIzarayeli.
Kaniliwo nlogo nimohi niwa nnavuneliwa na Yehova, nolingana na nyo.
Yehova unafwanyeya agali defeza yenyu,
vamohi na supada na undimuwa wenyu.
Nona amwidaninyu anerege za kaukokorelegeni,#33:29 amwidaninyu anerege za kaukokorelegeni: Akokorela uwa unawongiwa va ku wonga mutu agamanle mugondjiha nfwaye, afunaga ira ampe, maliba gondjihiwa ule unoza vamentoni va wenne unafuna mpa, liye vepaga ira: <<Andimuwa pepani, nnauvepani ira mwahaniirele yabure. Hiyo roma peno eni nnakala azari enyu, nnerege uvwelelani malringana yengo ili yatene munafune nyo ira hiyo nilabe.>> Era enne maliba mugondjiha ule unomuhiya, liye roma mutongaga na makalelo unafuna liye.
nyo munerege nyingala mitana diwa.>>
Currently Selected:
Detoronomiyo 33: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
