Detoronomiyo 31
31
Jozuwe maliba hala vamalroni va Mozeji
1Noira eno, mulombwana Mozeji ohodowaga wonga na aIzarayeli atene, 2liye awandela eraga: <<Miyo peno dinna yaka 120. Miyo kannawanda kalave na nyo ira dusogolrelregeni. Eto hiya yennove bahi, Yehova uhudiwandela ira: <Weyo kunalambuwa muhindje Jordawu.> 3Yehova Mulugu wenyu unolambuwa vasogolro venyu eto unodowa aatolotche malogo matene vasogolro venyu ira nyo mwatukule ilambo yewa. Mulombwana Jozuwe unousogolrelrani ira mulambuwe nnga mwawongele Yehova. 4Eto Yehova unoairana malogo ale nnga amuirilena liye Seyoni na Oge amwene a aAmore vamohi na vilambo dewa aatolotchaga. 5Mwa eno, miyo nnouwandelani ira Yehova auvahedani atwale mmandani mwenyu inafwanela mwaairele jatene mokwakwanela na malamulo anno duwandenleni miyo.
6<<Inafwanela mukale olimba kopolo eto mulimbe mirima. Kamwaove aliwa nne kamukukumuwe vamentoni vewa mwasiwa Yehova Mulugu wenyu gunafuna ukamihedagani. Liye kanauhiyani nne kanaunyanyalani.>> 7Noira enne, Mozeji ohomuitanaga Jozuwe, liye muwandela vamentoni va aIzarayeli atene eraga: <<Ukale olimba kopolo eto ulimbe murima, mwasiwa weyo unodowa wavolowe vamohi na atwala ilambo yenno Yehova alumbenle liye ira aavahe makolo enyu. Weyo gunafuna dowa agawelaga ilambo yewa. 8Yehova gunafuna kala vasogolro vawo. Liye unakala na weyo, kaza auhiya, nne kanaunyanyala. Kuove, nne kukukumuwe!>>
Tempu yofwanela ileriwa malamulo
9Mozeji oholrembaga malamulo ala muwari mwa livuru, liye avaheda livuru nne andimuwa atene a Izarayeli na anamakuta anno katukuletcha Kaxa ya Yopangana ya Yehova, anno kafwanyeya kagali aLevi. 10Mozeji agaavahedile malamulo ale, ohawandelaga eraga: <<Mamalelo wa kada yaka tanu na mbinli, yenno inafwanyeya yagali tempu yolevelelana mangawa,#31:10-11 tempu yolevelelana mangawa: Tempu yolevelelana mangawa matene yali mamalelo wa kada yaka tanu na mbinli. Nione Detoronomiyo 15:1. Mwa eno Mulugu aaruma aIzarayeli ira yafiya tempu yolevelelana mangawa, kailerigi malamulo vari va atu atene ira kavwe akoka malamulo na mazu matene a livuru na Detoronomiyo. mwagali muwari mwa tempu ya Pwando ya Misasa, 11aIzarayeli atene kaza gumana vamentoni va Yehova Mulugu wenyu, nimburo neno nnafuna liye sakulra, inafwanela muilerigi malamulo ala vamentoni va aIzarayeli atene. 12Tempu yenno yafiya mwaagumanihege atu atene, alombwana, ahiyana, ahima, vamohi na atu oza anno anafwanyeya muwari mwa sidadi denyu ira atene kavwe eto kafundje ira kamuovege Yehova Mulugu wenyu eto kaing'ane pama ira kaharihegemo mazu matene anafwanyeya mmalamuloni mu. 13Mwiregena eno ira ahiminyu anno kali kahanaiziwe malamulo ala, kawande vwa eto kafundje ira kamuovege Yehova Mulugu wenyu tempu yatene inafuna nyo kala ilambo yenno inafuna nyo dowa itukula, mwalambuwa muhindje Jordawu.>>
Mulugu ohomuwandela Mozeji zela uvuruvuru wafuna kana aIzarayeli musogolro
14Yehova ohowongaga na Mozeji eraga: <<Malambo awo okwa kohowandamela. Umuitane Jozuwe, mudowe mwavolowe mMusasani Ogumanamo ira miyo diwonge jatene jinafuna miyo muruma Jozuwe.>> Mwa enne Mozeji vamohi na Jozuwe kohodowaga, aliwa volowa mMusasani Ogumanamo. 15Evale Yehova ohozaga mMusasani mule, muwari mwa murambo oimela nnga nimbozo. Murambole ohozaga imela vazulu va mulango wa Musasa ule.
16Evale Yehova ohomuwandela Mozeji eraga: <<Weyo unokwa udowe wavume na makolo awo. Wakwa, atwala kahala, anovenya karome raruwa muwari moahara amilugu amohiwene a ilambo yenno inafuna atu dowa kala. Aliwa anodihiya eto anotwa yopangana yaga yenno isakanyile miyo na aliwa. 17Aliwa kaza kaira eno, nnoza ditakaleliwe na makalelo ohokala a masika zela aliwa, evale nnoza daanyanyale eto nnoza ditawihe kove yaga wa aliwa ira kafiyede tolotchiwa. Mwa enne jabure jidjindji vamohi na goyi dohokala da masika jinoza jaafwanye. Jaireya eno, pa evale vanafuna atu za umbuwela ira: <Ubure watene wenna para nizelaga eni, tchoira Mulugu wehu kali na hiyo!> 18Malambo anne miyo nnoza ditawihe kove yaga na mwasa wa ubure wenno unafuna atu za sakanya, na mwasa odihiya ira kaaharege amilugu amohiwa. 19Nona mulrembe nyumbo ila, mudowe mwaafundjihe Ana Izarayeli. Mwaaimbihe nyumbwela ira ikale umboni waga zela aIzarayeli. 20Tchoira miyo daavolotchiha atwaga ilambo yenno yalumbenle miyo na makolo ewa, ilambo yenno munafwanyeya mukaka na nuwi pwi pwi, aliwa anoza kadje, karumbale eto anoza karuve. Era enne aliwa anoza kadidiwale miyo, kawelele wa amilugu amohiwa, karome atamalela anno. Anoza kadilramwise miyo eto anoza katwe yopangana yaga. 21Mwa enne jabure vamohi na goyi yohokala ya masika jaafwanya, nyumbo inauwandelani miyo ila inoza ikale umboni waga zela aliwa. Tchoira nyumbo ila ineregeve imbiwa fiyeda ahimiwa a musogolro anaabalege atu, nne kiza kadiwala. Mwasiwa miyo dihimala iziwa joumbuwela jinafuna atu kana musogolro, masiki kahanavoloweve ilambo yenno ilumbenle miyo ira daavahe.>> 22Mwa enne mulombwana Mozeji oholremba nyumbo ila siku nenne, liye dowa afundjiha Ana Izarayeli.
23Yehova ohomuwandela Jozuwe, mwana Numi, liye ira: <<Ukale olimba kopolo eto ulimbe murima, mwasiwa weyo gunafuna asogolrelra Ana Izarayeli kafiyede volowa ilambo yenno yalumbenle miyo avaha. Miyo nnokala na weyo.>>
24Evale Mozeji agamanle lremba malamulo matene anna mulivuruni, kuma maromelo fiyeda magomelo, 25ohawandela aLevi anno katukula Kaxa ya Yopangana ya Yehova, liye ira: 26<<Mutukule livuru munafwanyeya malamulo ni, mukoye wandamelana Kaxa ya Yopangana ya Yehova Mulugu wenyu ira livuru ni nikale umboni zela joira jenyu jatene. 27Tchoira miyo dihiiziwa pokiha wenyu na uvuruvuru wenyu. Mwasiwa miyo peno dagaliwove eni, nyo munafwanyeya mwagali atu omuruniha Yehova. Nnga ikalele miyo dagakwile, havwelela wenyu unafuna ukale wa avi? 28Mwaagumanihe andimuwa atene a malogo enyu vamohi na asogolrelri enyu, muze vamentoni vaga. Miyo nnafuna diwonge mazu matene anna kavuruwanaga na baruni wewa eto zulu na ilambo ya vati jikale amboni zela mazu nnafuna miyo wongaga. 29Tchoira miyo dihiiziwa ira dakwa, na ibaribari viringana wenyu unosimbwa eto munoholowa muhiye ndila yenno duwandenleni miyo. Mwa eno, jabure jinoza juuzeleni malambo ogomiheda na mwasa wa jabure jejo jinafuna nyo irana vamentoni va Yehova, mutatamulaga uwali waye na jabure jinafuna nyo labaga na manda enyu.>>
30Mwa enne Mozeji ohoromaga wonga mazu matene a nyumbo ila,#31:30 Mozeji ohoromaga wonga mazu matene a nyumbo ila: Nyumbo inawongiwa inafwanyeya kapitulu oharela. Inafwanela niiziwe ira wanle Bibiliya alrembiwaga wene, kaanna makapitulu nne maversikulu. Jowonga jiwa jerave gumana nnga mutu alrembaga istoriya. So maliba gwada makapitulu agwadile vari, nyumbo inawongiwa yahanarome. Ku wonga nyumbo yalrembile Mozeji inafwanyeya kapitulu 32. aIzarayeli atene kagagumanne, kavuruwanaga na baruni wewa, fiyeda liye mala awandela jatene.
Currently Selected:
Detoronomiyo 31: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
