Detoronomiyo 32

Nyumbo ya Mozeji

1Mozeji ohoromaga wonga mazu a nyumbo ila eraga:

<<Ilambo ya zulu ireye mabaru, ivuruwane inafuna miyo wonga.

Ilambo ya vati ivuruwane mazu anafuna kumela vamulomoni vaga.

2Jejo jinafuna miyo fundjiha jikale nnga muzongwe adondaga,

mazwaga kakale nnga ningame,

mazwaga kakale nnga muzongwe anyetihaga mpinda mutiti,

eto nnga muzongwe anyetihaga makupu.

3Mwasiwa miyo nnafuna divweyihe nzina na Yehova.

Inafwanela muwonge ira Mulugu wehu gu mundimuwa.

4<<Liye gu Nibwe nindimuwa eto jolaba jaye jatene ti jolaba jokwakwanela,

tchoira ndila daye datene nnafwanyeya dagali ndila dapama.

Mulugu gororomeleya, muwari mwa liye kamunafwanyeya jonyenga.

Mulugu unafwanyeya agali wapama eto owongowa.

5Mbwenye atwaye kohomala viringana zela wa liye.

Aliwa joira jiwa kahi jofwanela kala ahimaye, mwasiwa kohomala takala na jabure jiwa.

Aliwa anafwanyeya kagali atu ogomba eto abure.

6Kodi ayo ba makalelo munamuweliheda nyo Yehova?

Nyo atu ohokana zelru eto ohoiziwa yengo nyo!

Kodi Yehova kahi Babinyu uusakanyileni?

Kahi liyene uupandutchileni eto uukalihileni nlogo?

7<<Muumbuwele zela malambo a mundulri.

Muumbuwele yaka didjindji divirile muwari mwa makolo enyu a mundulri.

Mwanfuke babinyu, liye unouwandelani.

Mwaafuke andimuwa andimuwa a malogo enyu, aliwa anowongamo.

8Wenno Ukwaranyile Jatene aagawelaga malogo vilambo diwa,

aamwalanihaga kada atu na pandi yewa,

ohagwadela madilre ewa,

moaumbuwela Ana Izarayeli mokwakwanela na makalelo kafuna atu indjiva.#32:8 Ana Izarayeli. Kohokalawo maBibiliya amohiwa anawonga ana Mulugu.

9Tchoira Yehova pandi yaye ba atwaye.

Ahima a Jako anafwanyeya kagali atu a Yehova aye anno waasakunlre liye.

10Liye aafwannye kagadimenle muisalesaleni,

ilambo youmma, mwemo mwavweya kukuma wa nipevo bahi.

Mwa eno, liye ohabarela, liye aing'anelaga mwa jabure jatene,

ohakoya pama na makalelo nnga mutu unakoya liye niso naye.#32:10 niso naye owu hehi: yengo yodiba ya mmentoni mwaye.

11Nnga jinaira kakozi aavenyihaga ahimaye muitundjini mwaye,

atapulaga mapepelo aye,

aahelaga ahimaye vazulu va mapepelo,

aroma avavana,

12Yehova na liyene aatukunle atwaye na makalelo amohive,

kalivo nne mulugu mmohiwene amukamihedile, so Mulugu ali ekave.

13Yehova ohakamiheda ira kawandege tonga vilambo da mwango,

eto ohadjiha na jovaha ja mmundani.

Eto ohadjiha nuwi dokumela mmabweni,

na azeti okumela teya yabure yafwanyeyana mabwe pwi pwi.

14Eto ohang'wiha mukaka wa ng'ombe osakanyediwa na mukaka mutiti wa mabila,

ohadjiha makura a mabila ang'onong'ono

nari mabila a alombwana a ilambo ya Bazani vamohi na mbuzi

na tirigu wapama.

Nyo mohong'wa vinyu wapama osakanyediwa mofinya uva.

15<<Mbwenye atwaye anaazivela liye,#32:15 atwaye anaazivela liye: MaBibiliya amohiwa anawonga Jezurumi. kagaruvile kohovoka na nnyalo niwa jatene ja Yehova.

Weyo uhuruva, uhufiyeda ulukula na makalelo ohokala a masika eto uhuzaleliwa jodja.

Mwa eno, uhufiyeda muhiya Mulugu wenno uupandutchile,

uhululuviha Nibwe nouvulumutcha.

16Aliwa kohomutatamula Mulugu sandje na mwasa ohara amilugu amohiwene.

Kohotatamula takaleliwa waye na mwasa wa jengo jotakaletchetcha jairana atu.

17Aliwa katukunle mikuto diwa, aliwa velelaga wa minemba dotakala dedo dahali Mulugu.

Kavelenle wa amilugu anno kali atu kahanababihe aiziwa,

amilugu axa anno kaaiziwile atu tchineneva,

anno nne ababiwa kahaaovile atu.#32:17 Aova amilugu ku wonga atu kaaona amilugu, aliwa abalraga nnga yengo yokana kopolo, aliwa arihedaga no atamalelaga muwari moaova. Va mazu oira amilugu axa anno kaaiziwile atu tchineneva ku wonga ababiwa amilugu ale tchaatamalenle. Tchoira kohoona ira ti jengo johokana mabasa.

18Nyo muhumuhiya wenno uli Nibwe, wenno uubanleni.

Nyo muhufiyeda mudiwala wene Mulugu wenno uupandutchileni.

19<<Nona Yehova agaonne jatene ejo uhuunyanyalani,

tchoira nyo ahimaye a alombwana na ahiyana muhutatamula uwali waye.

20Evale liye ohoira: <Miyo nnotawiha kove yaga,

dione makalelo anafuna atu gomela.

Mwasiwa aIzarayeli ba atu oviringana,

ba ahima ohororomeleya.

21Aliwa kohotatamula sandje yaga na mwasa ohara yenno yahali miyo Mulugu.

Kohoditakaleliwiha na vikwamutu dewa dosema dohokana mabasa.

Nona, miyo nnafuna daasakulre atu ohokala atwaga ira aIzarayeli kaaona, kaakalele sandje.

Nnafuna daasakulre atu ohokana zelru ira daatatamulena uwali aIzarayeli.#32:21 Zela mazu oira nnafuna daasakulre atu ohokala atwaga nari atu ohokana zelru, ali ira aIzarayeli kaaona ale kafwanyeya olapela wene na Mulugu kavulusiwaga, kaasilrilrege zela vulusiwa wewa. Ali ira kagamanle silrilra, amohiwa katwaruwe ira na aliwene kavulusiwe. (Roma 11:11-14)

22Mwasiwa uwali waga uhinda munlo

eto uneregeve hinda fiyeda Nimburo na Anokwa.

Uwali waga unodowa watolotche ilambo yatene vamohi na jovaha jiwa.

Eto unomala tumeya maaliserisi a mwango datene.

23Miyo nnoagudela aliwa jabure johokala ja masika

eto mafumo aga matene nnoamalela aliwene.

24Miyo nnoarumiheda ndala yohokala ya masika

eto nnoarumiheda febiri

na jabure jowopiha jinafuna atolotcha.

Eto nnoarumiheda anavinyama a mukokolani okana meno owopiha

vamohi na nyowa dowopiha dedo nnamburunuwa vati ira daalumege.

25Kakala unde anerege piwa na supada.

Eto kavolowa mmba anerege kana ova wohokala wa masika.

Anoza kakwege azombwe vamohi na anamwali,

ahima a mmandani vamohi na andimuwa oulula.

26Miyo dofuna joamwadela pandi dannayi dene da ilambo ya vati eto ditimihe nzina newa mwilamboni ira aliwa kahaumbuweliwegeve.

27Mbwenye kadiirilena tawiha ira amwidaniwa no pudja wewa,

anaze karome vitukulela mohoonelramo,

kerege: <<Naagondjihile atwala muwari mwa ndanda nehu na kopolo,

Jatene eji airana ali hiyo hiya Yehova.>> >

28<<Mwasiwa aIzarayeli ba atu ohokana zelru

eto ba atu ohoonelramo.

29Yohofwanela aliwa kakala atu a zelru,

kaonelramo zela makalelo anafuna atu gomela!

30Kahakale atu a zelru kogoiziwa mwasiwa gwa nni vikalaga jowandeya mutu mmohi wandaga wana na atu 1.000

eto atu ambinli wandaga atawiha atu 10.000.

Mwa eno, kogoiziwa ira jinaireyela na mwasa oira wenno unafwanyeya agali Nibwe newa uhaguliha

eto Yehova uhavaheda mmandani mwa amwidaniwa.

31Mwasiwa amilugu a amwidani kahi olingana na Mulugu wehu.#32:31 amilugu a amwidani kahi olingana na Mulugu wehu. MaBibiliya amohiwa anawonga: nibwe na amwidani kahi nolingana na Nibwe nehu.

Ante masiki amwidani ehu anowanda kana ibaribari zela jejo.

32Tchoira aliwa miratchi dewa da uva anakumana minda da uva da akuda Sodoma,

na minda da akuda Gomora.#32:32 miratchi dewa da uva anakumana minda da uva da akuda Sodoma. Ku wonga makalelo abure a akuda Sodoma na Gomora. Tchoira makalelo ewa kohomala iziweya na mwasa wa joraruwa jewa. Nione Jenesesi 18:20-21; 19:4-11.

Uva wewa gu uva opa,

mazamwa ewa bonyunya.

33Vinyu wewa gu veneno wa nyowa

eto gu veneno opa wa ivili.

34<<Yehova unoza awonge ira: <Jatene ejo miyo Yehova direve miyalana,

dahamuiziwihaga mutu, miyo funga na karimbu, miyo koya.

35Miyo dili maliba weliha kunyakunya eto dili maliba tambilriha zela mabasa a kada mutu.

Nnyalo newa nnoza niteredeye.

Siku niwa nogwa nihiwandamela.

Eto jengo jinafuna aireyela jinofiya tchineneva.>

36Tchoira Yehova unoza aatonge atwaye mokwakwanela

eto unoawendela tangaranga anamalabaye,

aona ira aliwa kinna makalelo, kopolo dewa dahagomela,

kalivo ohala nne muzari nari mutu ohokala muzari.

37Siku neno Yehova unoza awongege ira: <Kodi amilugu enyu kali uvi?

Nibwe ninyu notawela, neno mwaroromeletcha nyo, nili uvi?

38Kali uvi amilugu enyu anno kadjetcha jonuna ja mikuto denyu,

eto kang'wetcha vinyu wa jovelela jenyu ja jong'wa?

Kaawandeleni kavenye, kaukamihedeni,

ira aliwa kakale votawela venyu!

39Kaing'anani, peno uliwo gu miyo bahi,

kaliwo Mulugu mmohiwa.

Miyo dili wenno unapa eto dili wenno unawanda mukalihawo mutu.

Miyo dili maliba porotcha na maliba vulumutcha.

Kalivo unawanda mutawiha wenno uli mmandani mwaga.

40Nona miyo nnovenyiheda ndanda naga zulu,

nnolumbelela kalawo waga wohomala ira:

41Miyo daza disayiha supada naga nojerimela,

dahideda na ndanda naga ira dirome tonga,

na ibaribari nnoza daawelihede kunyakunya amwidanaga

eto nnoza daavahe yotambilra yewa atene anadiida.

42Nnoza dilrezelrihe mafumo aga na sangiri

eto supada naga nnoza nidje nyama

na sangiri na atu kapiwe na atu ohindiwa kondoni

na miru da asogolrelri ewa.>

43Nyo atu a vilambo datene, muhagalale vamohi na Yehova atwaye,

tchoira liye unovuviha sangiri na amwidanaye,

awelihe kunyakunya zela sangiri na anamalabaye neno nivuvihile atu

eto unomaliha jotakala ja ilambo ya atwaye.>>

44Mozeji ohomalaga wonga mazu matene a nyumbo ila atu atene kavuruwanaga, agali vamohi na Jozuwe,#32:44 Jozuwe: MaBibiliya amohiwa anawonga Ozeya. Tchoira na iEberewu tapulela wa nzina na Jozuwe tchi imohive no tapulela wa nzina na Ozeya. mwana Numi. 45Evale Mozeji agamanle awandela aIzarayeli atene mazu matene anna, 46ohawandelaga eraga: <<Inafwanela mukoye mmirimani mwenyu mazu matene duwandenleni miyo peno ala, mwaakokomezege ahiminyu ira na aliwene kaing'ane pama ira kaharihegemo mazu matene a malamulo ala. 47Mbwenye kamuumbuwele ira: <Mazwala kinanilabela yengo!> Tchoira mazwala banafuna ukalihaniwo malambo madjindji ilambo yenno inafuna nyo dowa tukula ira ikale yenyu mwalambuwa muhindje Jordawu.>>

Mozeji ohowandeliwa zela ukwa waye

48Noira eno, siku nimohive nenne Yehova ohomuwandelaga Mozeji eraga: 49<<Udowe mwango Nebo, wenno unafwanyeya pandi ya Abarimi, mwilamboni mwa Mowabe, sogolro wa sidadi ya Jeriko, wagwele ira uone ilambo ya Kana yenno nnafuna miyo avaha Ana Izarayeli ira ikale yewa. 50Eto unodowa wakwele mwango wenno unafuna we dowa gwela, udowe wavume na atwawo, nnga jiirile mbalawo Arawu wenno ukwile mwango Hori adowa avuma na atwaye. 51Mwasiwa nyo ambinlene mohoviringaniha mazwaga vari va aIzarayeli, tempu yokumiha mahindje a Meriba, mwilamboni mwa Kadeji, isalesale ya Zini. Tchoira nyo kamwadititimihile miyo vari va Ana Izarayeli.#32:51 nyo kamwadititimihile miyo vari va Ana Izarayeli. Owu hehi: nyo kamwaditchenihile vari va Ana Izarayeli. Ira niiziwe jaireyile, nione Numero 20:1-13. 52Nona, weyo unafuna uing'ane olapela wene bahi, ilambo yenno inafuna miyo avaha Ana Izarayeli, mbwenye weyo kunavolowa ilambwele.>>

Currently Selected:

Detoronomiyo 32: iLolo

Highlight

Copy

Compare