Detoronomiyo 30

Tangaranga da Mulugu zela ale anatwaruwa

1Mozeji ohowongagave eraga: <<Mwaona jauzelani jatene jeji, mareliho vamohi na matembelrelro dihenle miyo vasogolro venyu kamala ufwanyani, mwagali vilambo datene nnafuna ubalaletchelani Yehova Mulugu wenyu, nyo mwaumbuwela mazu matene anna nnauwandelani miyo, 2mwawelela wa Yehova Mulugu wenyu romela nyo vamohi na ahiminyu atene, mwarungunuwa eto mwavwelela jowonga ja Yehova molingana na mazu matene nnauwandelani miyo peno na mmirimani mwenyu mwatene no kalawo wenyu watene, 3mwaira eno Yehova Mulugu wenyu unouwelihaniwo ilambo yenno itukuleliwe nyo mukala azari, unouwendelani tangaranga, aze augumaniheni akoka, aukumaganani mwilamboni mwatene mwemo mwaubalaletcheleni liye. 4Masiki nyo mukale olapela wene na nlogo nenyu, masiki mukale magomo wa ilambo ya vati, Yehova Mulugu wenyu unoutukulaniwo augumaniheni. 5Yehova Mulugu wenyu unoudowanani ilambo ya makolo enyu. Era eno nyo munodowa mwaitukule ira ikale yenyu. Evale rayela wenyu no indjiva wenyu Yehova unosakanya ira ukale woakwaranya makolo enyu. 6Yehova Mulugu wenyu unoza ainele mirima dinyu vamohi na mirima da ahima enyu ira mukale atu omuziveliwa na mmirimani mwenyu mwatene, no kalawo wenyu watene ira muwande kalawo. 7Eto Yehova Mulugu wenyu unotukula matembelrelro matene anna ira aavahede amwidaninyu vamohi na atu anne kauharaharani. 8Eto nyo munoza muwelele akoka vwelela nizu na Yehova eto munerege kwakwaneliheda malamulo aye matene anno nnauwandelani miyo peno. 9Eto Yehova Mulugu wenyu unosakanya ira jenyu jikalege pwi pwi zela mabasa matene munalabege nyo na mandinyu, nne masiki ahima munaabalege nyo, na ahima anaarelege anavinyama enyu, na jomela jatene ja mmundani. Tchoira Yehova unoza awelele hagalala na mwasa wa nyo ira auirelegeni upama na makalelo nnga ahagalala liye na makolo enyu. 10Upama watene wenna unouzelani, malringana nyo mwavwelelaga mazu a Yehova Mulugu wenyu, muharihaga malamulo aye na mangano aye anno kalrembiwe mulivuruni mwa malamulo mu eto mwatwaruwa muwelela wa Yehova Mulugu wenyu na mmirimani mwenyu mwatene, no kalawo wenyu watene.

Malamulo a Yehova kinafwanyeya olapela

11<<Tchoira malamulo a Yehova anno nnauwandelani miyo peno ala, kahi malamulo orutcha bure eto nne kinafwanyeya olapela wene na nyo, nari. 12Malamulo ala kinafwanyeya zulu ira munofiyeda wonga ira: <Kodi bani unafuna gwela zulu ira atukule mazu, azena anivwihe ira hiyo niiregena?> 13Eto nne kinafwanyeya kombela ya bara ira munerege wonga iraga: <Kodi bani unafuna lambuwa bara adowe kombela ya ule ira atukule mazu azena, anivwihe ira hiyo niiregena?> 14Mazwala anafwanyeya vakwikwive na nyo, tchoira anafwanyeya vamulomoni venyu, na mmirimani mwenyu ira muiregena.

15<<Kaing'anani, miyo peno nnouvahani vamentoni venyu ira muwande sakulravo: ingumi na upama owu hehi ukwa na ubure. 16Nyo mwakala oharihamo malamulo a Yehova Mulugu wenyu anna nnauwandelani miyo peno, mwamuziveliwa Yehova Mulugu wenyu, mwawendaga ndila yaye, muharaga malamulo aye na mangano aye vamohi na jotonga jaye, munokalawo malambo madjindji eto munoindjiva eto Yehova Mulugu wenyu unourelihani muwari mwa ilambo yenno inafuna nyo dowa tukula ira ikale yenyu. 17Mbwenye mirima denyu dahiya muhara Yehova, mwahafunege vwelela mazu aye, mwanyengiwa ira mwaakokorelege amilugu amohiwene eto muroma aharaga aliwene, 18miyo peno nnouwandelani ira na ibaribari munagomela tolowa. Ilambo yenno inafuna nyo dowa tukula mwalambuwa muhindje Jordawu, kamunadibeliwamo. 19Miyo peno nnotukula ilambo ya zulu vamohi na ilambo ya vati ira jikale amboni aga, duwandelagani ira musakulre akala munafuna ingumi owu ukwa, nari akala munafuna mareliho owu matembelrelro. Inafwanela musakulre ingumi ira muwande kalawo romela nyo vamohi na ahima enyu, 20mmuzivelaga Yehova Mulugu wenyu, muvwelelaga nizu naye eto mwagamuhidedileve liyene. Mwasiwa ingumi yenyu vamohi no indjiva wa malambo enyu jinafuna jizele muwari movwelela. Muharihegemo jatene jeji ira muwande kalawo ilambo yenno Yehova alumbenle liye avaha makolo enyu Abarahamu, Izaki na Jako.>>

Currently Selected:

Detoronomiyo 30: iLolo

Highlight

Copy

Compare