Detoronomiyo 26
26
Joroma handa ja mmundani
1Mozeji ohowongagave eraga: <<Mwavolowa ilambo yenno inafuna uvahani Yehova Mulugu wenyu ira mutukule ikale yenyu, mwaroma kala mwilamboni mule, 2inafwanela mugumanihege joroma handiwa ja jodja jatene jili muwari mwa ilambo yenno Yehova Mulugu wenyu inafuna liye uvahani. Mwamala gumaniha, muhele mungogodani, mutukule mudowena nimburo neno Yehova Mulugu wenyu unasakulre liye ira ahele nzina naye wewo. 3Wadowana jatene ejile, udowe wanfwanye namakuta wenno unafwanyeye alabaga tempu yenno. Uwonge na liye wire: <Miyo peno nnowonga vamentoni va Yehova Mulugu wenyu ira dihivolowa ilambo yenno Yehova alumbenle liye na makolo ehu ira nnouvahani.> 4Era enne namakuta ule unotukula ngogoda ule mmandani mwawo, adowena vaibuwani va Yehova Mulugu wawo. 5Era eno weyo unowonga vamentoni va Yehova Mulugu wawo wire: <Nikolo naga ali muAramu#26:5 Nikolo naga ali muAramu: Mutu unawongiwa podi kala Jako mwasiwa liye mmaye ali muAramu (Jenesesi 25:20) eto liye ohodowa kala ilambo wali mbwiyaye wenno ali nkuda Aramu. ali mutu ahanna nimburo naye na ibaribari vakala liye, mwa enne ohodowa mwilamboni mwa Ijipitu kagali atu a vang'ono, kakalaga wewule nnga anowenda. Mbwenye kohofiyeda ulukula wewule, aliwa kala nlogo nindimuwa, nlogo na kopolo eto nlogo noindjiva. 6Mbwenye akuda Ijipitu kohonioniha goyi kanilabihaga na makalelo ohokala a masika, aliwa nilabihaga uzari. 7Mwa enne hiyo nohokuwa wa nyo Yehova, Mulugu wa makolo ehu. Evale nyo mohovwa nizu nehu eto mohoona goyi dohokala da masika nanna hiyo vamohi no labihiwa walabihiwa hiyo, vamohi no zuzumihiwa wehu. 8Mwa enne nyo Yehova mohonikumiha Ijipitu ule na ndanda na kopolo vamohi na muwono owongowa, na joira jidjindji jowopiha vamohi na jionihedo, vamohi na matikiniho madjindji. 9Noira eno, mohonizana nimburo neni, nyo nivaha ilambo yenna, ilambo munafwanyeya mukaka na nuwi pwi pwi. 10Nona miyo peno dihizana joroma handa ja ilambo yenno nyo Yehova munivahile nyo.> Wamala dodobela jatene ejile, unohiya vamentoni va Yehova Mulugu wawo eto unokokora vamentoni vaye. 11Waira eno weyo vamohi na atu atene a vande vawo vamohi na aLevi vamohi na atu oza anno anafwanyeya musidadi mwawo munohagalala mudjaga pwando nimburo nenne zela upama watene Yehova Mulugu wawo uuirele liye.>>#Detoronomiyo 12:18, 14:23
Lobela wa aliba velela yanekumi
12<<Yaka yaneraru tchi yaka yovelela yanekumi ya johanda jenyu jatene.#Detoronomiyo 14:28-29 Yaka yenne yafiya, mwamala gumaniha janekumi jenyu jatene ja mmundani mwenyu, mutukulege jatene jejile, mwaavahege aLevi vamohi na atu oza vamohi na anapawi vamohi na amakwele ira aliwa kadje musidadi mwenyu mwemo munakala nyo ira karumbale. 13Era eno muwonge vamentoni va Yehova Mulugu wenyu muire: <Dihikumiha vande vaga janekumi, jejo jinafwanyeya jagali jotchena, miyo za avaha aLevi na atu oza vamohi na anapawi vamohi na amakwele, molingana na malamulo enyu matene anno mudirumile nyo. Miyo kadiviringanihile malamulo enyu matene eto kadidiwanle nne nlamulo nimohi. 14Tempu yanna miyo kumbanya kadidjile yengo ili yatene yafwanyeya muwari mwa yanekumi. Nne tempu yatakanle miyo kadikumihilevo yengo.#26:14 tempu yatakanle miyo: Zela takala unawongiwa, nione rodape unafwanyeya 12:15. Nne kadikumihilevo yengo ili yatene didowa damukutelana mutu ukwile. Yehova Mulugu waga miyo dihivwelela jowonga jenyu eto dihimala irana jatene nnga mwemo mudirumile nyo. 15Yehova muing'ane kuma zulu, wewo unafwanyeya nimburo nnakala nyo, mwaarelihe atwinyu aIzarayeli vamohi na ilambo yenno mwaavahile nyo nnga mwemo mwalumbenle nyo na makolo ehu ira munonivaha ilambo yenno munafwanyeya mukaka na nuwi pwi pwi.>
16<<Peno Yehova Mulugu wenyu unaurumani ira mukwakwanelihedege mangano ala vamohi na jotonga ji. Nona inafwanela mukoyege eto muing'ane pama ira muharihegemo na mmirimani mwenyu mwatene vamohi no kalawo wenyu watene. 17Peno nyo muhulumbela ira Yehova guli Mulugu wenyu eto muhuwonga ira munerege hara ndila daye datene eto munerege hariha mangano aye, malamulo aye vamohi na jotonga jaye eto munerege vwelela jowonga jaye. 18Eto Yehova peno uhuuwandelani ira nyo munakala atwaye a ibaribari#Ezodu 19:5 nnga mwemo muwongele liye. Eto uhuuwandelani ira muharihege malamulo aye matene. 19Mwera eno, Yehova unouhelani vazulu kwaranya malogo matene waapandutchile liye ira atu kautetelegeni eto nzina nenyu nnoza nivweye vamohi no titimihiwa. Yehova unoirana jatene ejo ira mukale atu otchena wa Yehova Mulugu wenyu nnga mwemo muwongele liye.>>
Currently Selected:
Detoronomiyo 26: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
