Detoronomiyo 25
25
Anamatonga katongege mwa ibaribari
1Mozeji ohowongagave eraga: <<Atu ambinli kakangana, era eno, kadowa wa anamatonga ira kaatongele makani ewa, anamatonga ale inafwanela kammange mulandu mutu wenne uviringanihile eto kamukalihe wapama mutu wenne ahaviringanihile. 2Eto maliba viringaniha ule afwanela waxuliwa, namatonga ule aarume atu kamugonantihe vati, kamuwaxule mokwakwanela na yoviringaniha yaye, namatonga ule aing'anaga. 3So mbwenye mwamuwaxulaga mutu, kamukwaranyihege fendo 40, tawiha ira mwasimbwa muwaxula bure kwaranya evo, munaze mmunyaswihe.#25:3 tawiha ira mwasimbwa muwaxula bure kwaranya evo, munaze mmunyaswihe. Nyaswa uwa afwase anawonga zela muvevuwiha vari va aIzarayeli. Mwasiwa kasimbwa mbubuda bure, aIzarayeli afwaye kamuonege nnga gu mutu ohosimbwa kana mabasa vari va afwaye atene. 4Kakalevo unafuna imanga ng'ombe wanoni, aroma dugudiha udja.#1 Korinto 9:9; 1 Timoteyo 5:18
Muselu omuhamba nyumba mwadi mbalawo
5<<Kakalawo alombwana angasi angasi kabaliwe ingulu imohive, kakalaga vamohi, mwa enne mmohi amutela muhiyanaye eto afiyeda kwa ahambanlena mwana wa mwanapongwe, kavikale jowandeya ira muhiyanole adowe ateliwe na mulombwana mmohiwene. Inafwanela marafula ule mbalaye avenye adowe amutele. 6Mwa enne mwana murandji wa mwanapongwe wenno unambalena liye, gunafuna halana nzina na marafula wenno ukwile ira nzina naye nahadimele ilambo ya Izarayeli.
7<<Mbwenye mulombwanole ahafune mutela mwadi mbalaye ule, muhiyanole avenye adowe va mulango va sidadile, vevo vinakala andimuwa, awonge na aliwa, aawandele ira: <Mamunaga mbalaye unakonda ditela miyo ira nzina na mbalaye nihale mwilamboni mwa Izarayeli. Liye kanafuna dihamba miyo nyumba.> 8Mwa enne andimuwa a sidadile anomuitana ira kamuwongena. Kamuwongana, liye mbwenye akalave olimbene na yofuna yaye awonga ira: <Miyo kannafuna mutela muhiyanole>, 9era eno, kunyadaye ule unoza vamentoni vaye andimuwa atene a sidadile kaing'anaga. Aza unomuwungula xineli nnyalo naye nimohi, amala amutapele mare wintoni waye, awonge na liye aire: <Ala ba makalelo anairiwana mutu wenne ahanafune muhamba nyumba mwadi mbalaye.> 10Era enne aIzarayeli anaitanege vande vaye na nzina na: <Vande va maliba wunguliwa xineli.>
11<<Eto alombwana ambinli kawanaga mmohi na nfwaye, mwa enne mutu mmohi muhiyanaye aza ira anvunele mamunaye ule, amuhinda mulombwana mmohiwa ule jengo ja munyongani, 12mungwade muhiyanole ndanda. Kammuwendele tangaranga muhiyana wenno unairena jejo.
Mipimo na jonyemela jokwakwanela
13<<Kamukayegena jengo mbinli jokana manyemelelo ohiyana mutumbani mwenyu, yengo imohi inyemelaga bure, yengo imohiwa inyemelaga vang'ono. 14Vande venyu kavikalege mipimo minli dohiyana, mpimo mmohi mulukulu, mmohiwa mung'onong'ono. 15Mbwenye mukayegena jonyemela vamohi na jopimana jokwakwanela, japama. Mwera eno, malambo enyu anoindjiva mwavolowa ilambo yenno inafuna Yehova Mulugu wenyu uvahani. 16Mwasiwa atu anne analabana mipimo dohokala dapama, ba atu otakaletchetcha vamentoni va Yehova Mulugu wenyu.>>
Mozeji ohawandela aIzarayeli ira kaatolotche aAmaleki
17<<Muumbuwele jejo jauireleni aAmaleki mundila mukumaga Ijipitu.#Ezodu 17:8-16 18Muumbuwele ira aliwa kohoza gumana na nyo mundila, mwagamanle kukumuwa vamohi no waheya, aliwa roma apa atu kafwanyeya mundulri. Aliwa tchamuovile Mulugu. 19Nona, Yehova Mulugu wenyu amala uvahani vuma muwari mwa amwidaninyu atene ouwandamelani ilambo yenno inafuna liye uvahani ira mutukule ikale yenyu, inafwanela mutimihe nzina na aAmaleki ira nahaumbuweliwegeve akoka mwilamboni ya vati. Yeniyo mbwenye kamudiwale.>>
Currently Selected:
Detoronomiyo 25: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
