Detoronomiyo 22
22
Makalelo ofwanelela wamuona mwanainyama opupuruwa wa mwandamani wawo
1Mozeji ohowongagave eraga: <<Wafwanya ng'ombe nari nibila na muIzarayeli nfwawo nagapupuruwile, kumiyale kalaga nnga kuonile. Inafwanela utukule udowena wa mwinnya. 2Eto akala mwinnya unakala olapela wene na weyo owu hehi wahamuiziwe, inafwanela udowena vande vawo, mwanainyama ule akaleve na weyo fiyeda mwinnya aoneye, azele, weyo unvahede. 3Muiregena makalelo mamohive anno masiki kala buru nari jowara, nari masiki yengo ili yatene yodimela. Nfwawo adimeliha, weyo waona, kumiyale kalaga nnga kuonile. 4Eto wanfwanya buru wa muIzarayeli nfwawo nari ng'ombe yaye yagagwile mundila, kumuhiyede eka. Inafwanela umukamihede venyiha.#Ezodu 23:4-5
Zela miselu dohiyana-hiyana
5<<Kavikale jowandeya ira muhiyana awarege jowara ja mulombwana eto nne mulombwana wara jowara ja muhiyana. Tchoira mutu wenne unairana jejo unasakanya yengo yotakaletchetcha wa Yehova Mulugu wenyu.
6<<Wawendaga mundila, wafwanya itundji ya mbalrame mmutengoni nari vati mwagali ana mbalrame nari mazayi eto mmiwa agali emule vamohi na ahimaye nari aganna mazayi, kumutukule mmiwa ule vamohi na ahimayene. 7Inafwanela waatukule ahimaye bahi. Mbwenye mmiwa umuhiye adowege ira jatene juwendelege pama eto ira malambo awo kaindjive mwilamboni.
8<<Wamanga nyumba ixa, yakana vazulu viwa nimburo nogarati, inafwanela utchize nimburo na vazulu nne tawiha ira mutu amora zulu ule, weyo unakayena mulandu ovuviha sangiri vande vawo.
9<<Mmindani mwawo mwa uva kuzalemo mbewu dimohi diwa tawiha ira unakondihiwe jovaha ja mbewu dile vamohi na jovaha ja uva.#22:9 tawiha ira unakondihiwe jovaha ja mbewu dile : Afwase mutu alima mbewu mbinli munda mmohive, jodja jile jakala jokondihiwa mwasiwa jalimiwe moviringaniha malamulo a Mulugu. (Levitiku 19:19) Owu hehi, afwase mutu ahindiwana munda okana mbewu mbinli, yogofuneya ira jovaha jatene kavahiwe anamakuta.
10<<Eto kutipulrihege ng'ombe na buru vamohi.
11<<Kuwarege yowara yosakanyiwa na mawoya a nibila eto yagali yogumanihiwa vamohi na ntondje.#Levitiku 19:19
12<<Inafwanela mumangihege ja yavi yavi mukantoni mwannayi mwene mwa kapa inawara nyo.
Makalelo otonga milandu doraruwa
13<<Mulombwana mmohi amutela muhiyana, amugonana eto afiyeda mwezo omutakaleliwa, 14eto aroma munukedaga jengo johokala pama, aroma wonga mazu abure zela namwali ule eraga: <Miyo dohomutela muhiyanola. Mbwenye dagamugonnena, dionne ira liye ohobabiha gona na mulombwana>, 15jaireya eno inafwanela namwali ule babaye vamohi na mmaye kavenye katukule nguwo yotonyiheda ira namwali ule ateliwaga, ali ahanagumane na mulombwana,#22:15 nguwo yotonyiheda ira… ali ahanagumane na mulombwana: Malambo a mundulrimu namwali ateliwaga, ndila yoroma yagona liye na mamunaye, liye aroma tandelavo nguwo. Evale kagagonnevo, moira ali ahanagonena mulombwana, vanguwoni vale vofwanyeya sangiri. Evale namwali ule aavaheda ababaye nguwele ira ukale umboni ira na ibaribari ateliwaga ali ahanagone na mulombwana. kadowena va mulango va sidadi wewo unakala andimuwa otonga a sidadi yenne, 16babaye awonge ira: <Miyo dohomuteliha mwanaga na mulombwanola, mbwenye liye uhumutakaleliwa, 17uhuroma munukeda jabure, uni: <<Mwaninyula uhubabiha gona na mulombwana.>> Mbwenye miyo dihikana nguwo yotonyiheda ira na ibaribari mwanagola ali ahanagone na mulombwana. Nguwo iwa tchi ila.> Era enne ababaye ale katukule nguwo yotonyiheda ira namwali ule ali ahanagone na mulombwana, katandele vasogolro va andimuwa otonga a sidadile. 18Era enne andimuwa a sidadile anomutukula mulombwanole, kamuwaxule, 19eto anompagalriha kobiri da parata 100, katukule kanvahe namwali ule babaye na mwasa oira uhuwonga mazu abure zela namwali wa Izarayeli ohogona na mulombwana. Era eno unomutukula akale muhiyanaye kalawo waye watene, kavali mwalana. 20Mbwenye akala mazu awongile mulombwanole ali mazu a ibaribari, kaona ira na ibaribari namwali ule ohoroma gona na mulombwana ahanateliwe, 21anomudowana namwali ule vande va babaye, va mulango. Evale alombwana atene a sidadi yenne anonvoka mabwe ante afiyede kwa. Tchoira uhusakanya yengo yotakaletchetcha muwari mwa Izarayeli araruwaga vande va babaye. Ayo ba makalelo anafuna nyo malihaga ubure vari venyu.
22<<Afwanyiwa mulombwana mmohi amugonihaga mwadi mwinnya, ambinlene kapiwe, roma mulombwana wenno unafwanyiwe amurarutchaga muhiyanole, vamohi na muhiyana wenne amurarutcha liye. Muiregena eno ira muwandege maliha ubure vari va ilambo ya Izarayeli.
23<<Eto akalavo namwali mmohi uli ahanagone na mulombwana, abanyelriwa na mulombwana, mwa enne mulombwana mmohiwa anfwanya musidadi mule amugonana, 24inafwanela mwaatukule ambinlene, mwaazena va mulango va sidadile, mwaavoke na mabwe ante kafiyede kwa. Tchoira namwali ule kafunile kuwa musidadi mule eto mulombwanole uhumutakaliha muhiyana wa nfwaye. Ayo ba makalelo anafuna nyo malihaga ubure vari venyu.
25<<Eto mulombwana anfwanya mukokolani namwali mmohi ubanyelriwe, evale mulombwanole amugoniha namwali ule momuhindela, unafuna kwa gu mulombwanole bahi. 26Mbwenye namwali ule kanairiwana yabure. Liye kanna mulandu oira apiwe, mwasiwa jimuireyele nnga mutu avenyaga ampaga nfwaye. 27Tchoira liye anfwanyile kokolani, liye muhinda eto namwali ubanyelriwe ule ohokuwa, so kalivo avwile ira aze anvunele.
28<<Mulombwana anfwanya namwali uli ahanagone na mulombwana eto uli ahanabanyelriwe, amuhinda amugonana, evale kafwanyiwa, 29mulombwana wenno umugonihile namwali ule unokumiha kobiri 50 da parata anvahe namwali ule babaye, tchoira uhumutakaliha. Eto aira eno unomutela akale muhiyanaye. Amutela, kavali mwalana kalawo waye watene.#Ezodu 22:16-17
30<<Kakalevo mulombwana unafuna mugonana muhiyana wa babaye, tchoira airana eno uhumuwungula babaye.>>
Currently Selected:
Detoronomiyo 22: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
