Detoronomiyo 21
21
Makalelo omaliha mulandu mutu apiwa na atu ohoiziweya
1Mozeji ohowongagave eraga: <<Ilambo yenno inafuna uvahani Yehova Mulugu wenyu ira ikale yenyu, mwanfwanya mutu agakwile unde olapela wene na atu, mwahamuiziwaga mutu umpile, 2inafwanela andimuwinyu vamohi na anamatonga enyu kavenye, kadowe kapime roma vikwile mutule fiyeda sidadi dowandamelana nimburo nenne. 3Era enne aliwa kagapimile, kaona sidadi isimbwile wandamelana na nimburo vikwile mutule, andimuwa a sidadi yenne katukule mwana ng'ombe ya muhiyana ili yahanababihege labiwana nne mangeleliwa nigologolo munikohini ira itutumule yengo, 4kadowena ndabo nokana mahindje owenda, ndabo neno nili nahanababihege limiwa nne nahanababihege zaliwa yengo. Kadowe kakotole nikohi mwana ng'ombe ile nimburo nenne. 5Era enne anamakuta anno anafwanyeya kagali aLevi, kaze nimburo nenne tchoira Yehova Mulugu wenyu waasakunlre aliwa ira kamulabege eto ira karelihege mulogo watene mwa nzina na Yehova. Aliwa bavahiwe ira kawandege maliha milandu dowana na doporotchana. 6Era eno andimuwa atene a sidadi yenno isimbwile wandamelana na nimburo vikwile mutule anoza kahambemo manda ewa vazulu va mwana ng'ombe yenno ikotoliwe nikohi daboni ule, 7eto kawonge kaire: <Sangiri na mutule uvuvihile kahi hiyo. Eto meso ehu kionne jejile jiireyaga. 8Yehova muwatchele mwanainyama ula vamalroni va mutu wenne umpile mutule ira mumalihe mulandu unna atwinyu aIzarayeli anno nyo Yehova mwaawombonle nyo. Sangiri na mutu ukwile ni, kamwamange mulandu atwinyu aIzarayeli.> Era eno mulogo watene kinakana mulandu na mwasa wa mutu wenno upiwe. 9Ayo ba makalelo anafuna nyo kumihamo mulandu mwilamboni mwenyu zela sangiri na mutu ohotega wenno upiwe. Mwairana eno muhusakanya pama vamentoni va Yehova.
Makalelo omutela muhiyana ohindiwa
10<<Mwadowa mwawanaga kondo na amwidaninyu eto Yehova Mulugu wenyu auvahedani aliwa mmandani mwenyu, mufiyeda agondjiha, mwaatukulaga amohiwa mwaadowagana ira kakale azari, 11eto muwari mwa atu anne mwaatukunle nyo, wamuonamo muhiyana mmohi oriya, unfunaga ira akale muhiyanawo, 12umutukule umudowena vande vawo. Wamudowana, liye ainge mpalra mmuruni mwaye, arende vinyala daye, 13eto atchindje jowara jejo jawarile liye ahindiwaga, aze agarati vande vawo amale mwedi ompumbula amunlelaga babaye vamohi na mmaye. Era eno weyo podi dowa mugonana. Evale weyo unokala mamunaye eto liye unokala muhiyanawo. 14Eto weyo wafiyeda mwezo ohomuziveliwa, umuhiye adowege unafuna liye. So mbwenye kumugulihe na kobiri nne kumukalihe muzari, tchoira weyo uhumala mutakaliha.
Undimuwa ozela kala murandji baliwa
15<<Mulombwana mmohi akana ahiyana ambinli, mmohi amuziveliwaga, mmohiwa amutakaleliwaga, mwa enne ahiyana ambinlene aabalana ahima eto muwari mwa ahimale, mwanapongwe murandji baliwa akala wa muhiyana wenne unamutakaleliwa liye, 16siku nnafuna liye agawela anapongwe aye jorayela jaye, kavikale wandeya ira arimbitule undimuwa ozela kala murandji baliwa ira anvahe mwana wa muhiyana wenne unamuziveliwa liye, amuhiyaga mwana murandji wa muhiyana wenne unamutakaleliwa liye. 17Mbwenye inafwanela awande nvaha fendo mbinli jorayela mwanaye murandji wenno unafwanyeya agali mwana wa muhiyana wenne unamutakaleliwa liye. Tchoira liye unafwanyeya agali murandji. Nona undimuwa ozela kala murandji baliwa, kwaye.
Makalelo oatonga ahima ohovwelela
18<<Mutu amukana mwanaye nvuruvuru ohovwelela, wenno unaruniha jowonga ja babaye nari jowonga ja mmaye, masiki kamutonge kamuonihaga goyi liye ahafunagave vwelela, 19inafwanela babaye na mmaye kamutukule mwanole, kamudowena va mulango va sidadi, vevo vinakala andimuwa otonga a sidadi yenne. 20Kadowa wewule kawonge na andimuwa a sidadile kaire: <Mwanihula gu nvuruvuru eto unaruniha jinamuwandela hiyo nne kanavwelela jowonga jehu. Mabasaye so ku dja vamohi no lrezelra.> 21Jaireya eno, inafwanela atu atene a musidadi mule kanvoke na mabwe ante afiyede kwa. Inafwanela mukumihegevo ubure vari venyu ira aIzarayeli atene kavwa, kawandege ova.
Zela atu otomeyiwa vaimirini
22<<Eto afwanyeya mutu okana yotega yofwanela ira apiwe, afiyeda piwa eto agakwile kadowa kamutomeya vaimirini, 23maningo aye kikaleve vaimirini evale fiyeda unde tcha. Mbwenye inafwanela akumihiwevo, adowe atimbeliwe siku neno, tawiha ira unatakalihe ilambo yenyu yenno Yehova Mulugu wenyu unafuna liye uvahani nnga yowatchela yenyu, tchoira maliba tomeyiwa vaimirini gu mutu otembelrelriwa na Mulugu.>>#Galasiya 3:13; Lukaji 23:33
Currently Selected:
Detoronomiyo 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
