Detoronomiyo 2
2
Mozeji ohawumbutcheda aIzarayeli zela vira wewa ilambo ya akuda Ezawu na ilambo ya Mowabe
1Mozeji ohowongagave eraga: <<Noira enne, nohorungunuwaga nidowaga muisalesaleni, niharaga ndila ya Bara Yofila nnga mwemo mwadiwandenle Yehova. Mwa enne hiyo nohomala malambo madjindjene nirungunuwaga mwango wa Seyire. 2Mwa enne Yehova ohodiwandelaga eraga: 3<Rungunuwa wenyu ilambo ya mmwangoni ila ukwakwana.#2:3 Rungunuwa wenyu: Ora yenno aIzarayeli kamanle wandamelana yaka 38 kawendawendaga muisalesaleni, atu abure kakwaga. Ohala ali ahimiwa na azuliwa. Karungunuwani muing'ane pandi ya norti. 4Waawandele atu atene ira: <<Muvire mmadilreni mwa abalinyu ana Ezawu,#2:4 abalinyu ana Ezawu: Ana Ezawu anawongiwa va ba atu anne kakumile munlogoni mwa Abarahamu na Izaki. Tchoira Izaki ohabala ahima ambinli Jako na Ezawu. Jako ahimaye aliwa itaniwaga aIzarayeli. Mbwenye Ezawu ohotama dowa mwango wa Seyire, wenno eto aitaniwa Edomu. Nione Jenesesi 25:25-28, 36:8. anno anakala Seyire. Mwadowa wewule aliwa anerege uovani. Mbwenye polre polre. 5Kamwairele yabure, mwasiwa miyo kaduvahileni pandi ili yatene ya ilambo yewa, nne vonyingaliha nnyalo. Tchoira Ezawu miyo dihinvaha mwango wa Seyire ira ikale ilambo yaye.#2:5 Ezawu miyo dihinvaha mwango wa Seyire ira ikale ilambo yaye. Akuda Ezawu tchali atu a Mulugu aye nne tchali atu omuroromela Mulugu. Masiki eno, Mulugu ohavaha ilambo yewa ira kakalegemo. Zela atu amohiwa, nione Detoronomiyo 2:9,19,24. Zela ibaribari ira Mulugu unaavaha kada atu ilambwiwa na malambwiwa anafuna atu kalagamo, nione Joira ja Anamarumiwa 17:26. 6Mwadowa wewule, jodja jinafuna nyo djaga munerege gula na aliwa. Eto nne mahindje anno munang'wege nyo, munerege gula na aliwa. 7Tchoira miyo dagali Yehova Mulugu wenyu duhurelihani muwari mwa mabasa matene munalaba nyo na mandinyu, mwasiwa miyo dihiiziwa ira nyo munawendawenda muisalesaleni indimuwa mu. Eto yaka 40 mumanle nyo muisalesaleni, miyo dagali Yehova Mulugu wenyu dalive na nyo. Tchalivo yengo ili yatene yauhalenleni.>> > >>
8Evale Mozeji ohowongaga na aIzarayeli eraga: <<Mwa enne hiyo niviraga ilambo ya abalihu ana Ezawu anno kakala Seyire, roma ndila ya ilambo ya Araba kuma Elate na Eziyomi-Jeberi, nohorungunuwa hiyo roma hara ndila ya isalesale ya Mowabe. 9Mwa enne Yehova ohodiwandelaga eraga: <Kwamexeri akuda Mowabe, nne kukangane na aliwa uvendaga jowana, mwasiwa miyo kannauvaha pandi ili yatene ya ilambo yewa ira utukule. Tchoira miyo dahavaha ahima a Lroti sidadi ya Ari ira ikale yewa.> >>#2:9 miyo dahavaha ahima a Lroti sidadi ya Ari: Lroti ohabala ahimaye ambinli a anapongwe. (Jenesesi 19:36-38) Mmohi ali Mowabe nikolo na akuda Mowabe. Mmohiwa ali Beni-Ami nikolo na akuda Amoni. Nione 2:19.
10(Fwanyeya ira wanle nohokalawo nlogo na atu olapa bure, a kopolo nnga aAnaki, kagali oindjivetchetcha, kaitaniwetcha aEmi, kakaletcha sidadi ya Ari. 11Aliwa vamohi na aAnaki ale kabalriwa nnga akuda Refayina.#2:11 akuda Refayina. Kafwanyeya kagali atu alukulu kakaletcha ilambo ya Kana wanle. Noira eno, Yehova ohatolotchamo, akuda Amoni aliwa dowa itukula ilambo ya akuda Refayina ile, aliwa roma kalagamo. Nione vs 20-21 Mbwenye akuda Mowabe kaaitanetcha aEmi. 12Eto wanle akuda Hori kakaletcha Seyire. Mbwenye ana Ezawu kohatamangiha mwilamboni mwewa, aliwa mala atolotcha, aliwa halana ilambwele kalaga nnga jairile aIzarayeli na vilambo dedo Yehova aavahile liye ira dikale dewa.)
13Mozeji ohowongagave eraga: <<Yehova ohoniwandelaga eraga: <Muvenye mulambuwe mwana muhindje wa Zeredi.> Evale hiyo noholambuwa mwana muhindje wa Zeredi. 14Kuma Kadeji-Barneya ante dowa lambuwa mwana muhindje wa Zeredi ule namanle yaka 38,#2:14 Kuma Kadeji-Barneya ante dowa lambuwa mwana muhindje wa Zeredi ule namanle yaka 38: Ku wonga kuma tempu yakonda aIzarayeli volowa ilambo ya Kana fiyeda atu atene okondale mala kwa. AIzarayeli kalambuwaga Zeredi ku wonga kohokuma muisalesaleni mwali atu, aliwa dowaga sogolro muulrendoni mwewa kadowaga ilambo inafuna atu vahiwa. fiyeda alombwana atene okana idadi yodowa kondoni a tempu yenno aliwa mala kwa, aliwa dimela vari vehu nnga mwemo mwalumbenle Yehova. 15Tchoira Yehova gwairihile na ndanda naye na kopolo ira atene kamale tolowa tempu yenne fiyeda atolotcha atene ira kahafwanyeye muwari mwa hiyo.
16<<Evale alombwana atene okana idadi yodowa kondoni kagamanle tolowa vari vehu, 17Yehova ohodiwandelaga eraga: 18<Peno muvire mmadilreni mwa Mowabe sidadi ya Ari, 19ante mudowe mwafiye ilambo ya akuda Amoni. Mwafiya wewule, kamwamexeri nne kamukangane na aliwa. Tchoira ilambo ya aAmoni miyo kaduvahileni pandi ili yatene ira ikale yenyu. Mbwenye daavahile ahima a Lroti ira ikale ilambo yewa.> >>
20(Fwanyeya ira ilambo ya akuda Amoni wanle yabalriwa nnga ilambo ya akuda Refayina. Tchoira wanle akuda Refayina bakalamo. Mbwenye akuda Amoni kaaitanetcha aZanzumi. 21Aliwa kali atu oindjivetchetcha eto kali alukulu eto kali olapa nnga akuda Anaki. Mbwenye Yehova ohatolotcha. Mwa enne aAmoni ale kohatamangihamo mwilamboni mule, aliwa kalagamo vamalroni vewa.#2:21 aAmoni ale kohatamangihamo mwilamboni mule: Akuda Mowabe masiki kalive atu ohonvwelela Mulugu eto masiki kalive atu ohokana pandi na Mulugu, Mulugu ohowanda atamangihamo atu kafwanyeya emule, liye avaha aliwa ilambwiwa. Nione Joira ja Anamarumiwa 17:26. Mazu matene anna ali para aIzarayeli kawande iziwa ira: <<Akala Mulugu ohavaha ilambo atu ohombalra, hiyo nagali atwaye, nadowa ilambo ya Kana, Mulugu unonikamiheda ira naagondjihe amwidanihu.>> 22Yehova ohairana makalelo amohive molingana na makalelo airilena liye akuda Ezawu anno kakala Seyire wewo waatolotchile atu akuda Hori. Evale akuda Ezawu kohatamangihamo mwilamboni mwewa, aliwa kalagamo vamalroni vewa, fiyeda peno.
23Eto akuda Kafitori anno kakumile mwilamboni mwa Kafitori kohotolotcha tatamo da akuda Ava, fiyeda Gaza, aliwa kalagamo vamalroni vewa.)
24Mozeji ohowongagave eraga: <<Yehova eto ohodiwandelaga eraga: <Muvenye mudowe mwalambuwe mwana muhindje wa Arinoni. Tchoira miyo dihimala uvahedani mmandani mwenyu mulombwana Seyoni nkuda Amore mwene wa Ejiboni vamohi na ilambo yaye yatene. Mudowe mwawane na liye ira mutukule ilambo yenne. 25Peno miyo nnoroma sakanya ira atu a mwilamboni yatene ya vati kasimbwege uovani. Atu atene kavwa zela nyo, anerege ngurumela sogolro wenyu eto anerege kukumuwa.> >>
Mozeji ohawumbutcheda aIzarayeli zela gondjihiwa wa mwene Seyoni
26Mozeji ohowongagave eraga: <<Yehova agadiwandenle, miyo doharumaga atu na milanyo kuma isalesale ya Kedemoti wafwanyeya hiyo ira kadowe wa Seyoni, mwene wa Ejiboni. Miyo daarumile ira kadowe kamuwandele mazu a murendele ira: 27<Nnavepa ira munihiye ira nivire mwilamboni mwenyu. So nnafuna nivire mundila bahi. Kannaperuwa nne para muwononi odjana nne para muwononi oromana. 28Eto nnavepa ira jodja jinafuna hiyo djaga munigulihedege na kobiri eto munigulihedege mahindje ong'wa. So nnavepa ira munihiye nivire bahi na mendo 29nnga jiniirele ana Ezawu anno anakala Seyire vamohi na akuda Mowabe anno anakala Ari. Munihiye nivire ira nalambuwe muhindje Jordawu, nidowe ilambo yenno inafuna nivaha Yehova Mulugu wehu.>
30<<Mbwenye miyo dagarumihile milanyo dile, mulombwana Seyoni mwene wa Ejiboni ule kafunile. Ohonikondiha hiyo vira mwilamboni mwaye, tchoira Yehova Mulugu wenyu ohomuummiha murima waye, liye nvaha murima onyinda ira ahanibalre. Mulugu airelena eno ira auvahedeni Seyoni mmandani mwenyu nnga munaonela nyo peno. 31Eto Yehova ohodiwandelaga eraga: <Miyo dihiroma uvahedani mulombwana Seyoni vamohi na ilambo yaye yatene sogolro wenyu. Kadowani mwatukule ira ilambo yaye ikale yenyu.> 32Evale mulombwana Seyoni ohoza vamohi na anyakondo aye, aliwa gumana na hiyo sidadi ya Jaza ira niwane. 33Mwa eno, Yehova Mulugu wehu ohonivaheda mmandani mwihu, hiyo mpa liye na ahimaye vamohi na atwaye atene. 34Evale nohogondjiha sidadi daye datene, eto hiyo mala tolotcha sidadi datene dedile, hiyo mala apamo alombwana na ahiyana vamohi na ahima kafwanyeya emule. Nne mutu mmohi kanamuhiyile.#2:34 hiyo mala apamo alombwana na ahiyana vamohi na ahima: Jatene eji kohoirana muwari mofuna mwa Mulugu. Tchoira ali tonga wa Mulugu zela jotega ja atwale. Tchoira Yehova gwaawandenle aIzarayeli ira kairegena eno. (Detoronomiyo 9:1, 18:9-12, 20:16-18) Fwanyeya ira aIzarayeli tchaapa atu mofuna mwewa mbwenye muwari morumiwa na Yehova. Mulugu aakamelihile aIzarayeli wana na akuda Ezawu nari akuda Mowabe nari akuda Amoni. Mbwenye Mulugu aarumile aIzarayeli ira kadowe kamutolotche mwene Seyoni vamohi na atwaye kakala ilambo ya Ejiboni. 35So mbwenye natukunlege hiyo ja meso jene ali jifuwo jiwa ira jikale jehu vamohi na jengo jatukunle hiyo sidadi dimohi diwa dedo dagondjihile hiyo. 36Romela sidadi ya Aroweri, yenno inafwanyeya wandamelana tcherela ya mwana muhindje wa Arinoni vamohi na sidadi inafwanyeya wandamelana muhindje ule, ante dowa fiya Jileyadi, kilivo nne sidadi imohi yokana muru olapa yawandile vuluwa, nahaitolotcha. Jatene ejo Yehova Mulugu wehu ohonivaheda mmandani mwihu. 37So ilambo yahafiyile hiyo ali ilambo yatene ya ana Amoni, romela tcherela yatene ya mwana muhindje wa Jaboke, vamohi na sidadi datene da ilambo ya mwango didjindji. Mwatene mwanikondihile Yehova Mulugu wehu, kanafiyilemo.>>
Currently Selected:
Detoronomiyo 2: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
