2 Tesalonika 3
3
APawulo kohavepa afwiwa ira kaalobelelege
1Hiyo abalihu, yengo yogomiheda inafuna hiyo nuwandeleni tchi ila. Nnouvepani munilobelelege ira nalaleyaga mazu a Nabwiya, mazu kawande gaweya pama, kawande rihediwa nnga karihediwe atu mwa nyo. 2Inafwanela munilobelelege hiyo ira niwande vuneliwa mwa atu otakala na abure anno ananiharahara. Tchoira mwilamboni mu kahi ira atu atene kohokana nroromelo.
3Masiki atu amohiwa kakale abure, Nabwiya mbwenye gororomeleya. Liye gunafuna aulimbiheni eto liye unowanda ukoyani ira mwahagwele mmandani mwa Mutu Wabure.#3:3 Mutu Wabure unawongiwa gu Satana. 4Hiyo eto nihikana ibaribari ira malambwala Nabwiya unoukamihedani irana jatene juwandenleni hiyo eto nihiiziwa ira muwari mwa kopolo daye, muneregeve irana.
5Hiyo nnonvepa Nabwiya ira awande uiziwihani nyo mmirimani mwenyu makalelo Mulugu anauziveliwani liye eto alabe mmirimani mwenyu ira mukale olimbene nnga Kiristu mwalimbele liye.
Mazu oakokomeza atu omuroromela Yesu ira kairegenave jofuna ja Mulugu
6Hiyo abalihu, nnourumani na nzina na Nabwiya wehu Yesu Kiristu ira nyo vari venyu mwamuona mutu unaitaniwa na nzina na mbalihu, liye akala muyere, ahafunaga hinda mabasa, ahawendagana makalelo nnga nuwandenleni hiyo, inafwanela mutu wenno mmurambele. Kammuwendegena vamohi.
7Tchoira nyo muhumala iziwa ira tempu yawenda hiyo na nyo, nohokana makalelo ofwanela ira munisazihege, tchoira nagalive na nyo, kanere garati wene, 8eto kanidjile ja annya vasayi. Mbwenye hiyo nohokana makalelo olaba mabasihu ntana na mahiyu ira niwande gula jodja jehu tawiha ira munoza munizuzumele hiyo.
9Kahi ira hiyo kananna direitu yofuna vahiwa jodja, nari. Hiyo nohokana. So nagali na nyo, nohokana mabasa nalaba hiyo ira niwande gula jodja jehu ira nyo mwahala, muwande saziha makalelo ninna hiyo. 10Eto tempu yawendetcha hiyo na nyo, nohouwandelani ira mutu wenno ahanalaba, inafwanela liye ahadje.
11Hiyo para wongaga eno, tchoira nihimala vwa ira muwari mwa nyo kohokalamo atu anakalave ogaratene, kinafuna laba mabasa, so mabasiwa ku urambwe bahi. 12Atu anera ejo, hiyo nnafuna naarume, naalimbihe na nzina na Nabwiya Yesu Kiristu eni. Inafwanela mutu vanakala liye, ahindege mabasaye mopwaseya, adjaga jaye jinapa liye.
13Mbwenye nyo abalihu, kamugomegena irana japama. 14Akala muwari mwa nyo ukala mutu unakonda irana jengo jilrembile hiyo mukartani mu, inafwanela nyo muwande mutonya vatando ira atu kamuhiye mmambalo ira liye anyaswe zela joira jaye. 15Mbwenye mwamuirana eno, kamumwese nnga mwidani, mbwenye mmukokomezege nnga mbalinyu opupuruwa.
16Nabwiya mwinnya, wenno unanivaha murendele, auvahegeni murendele mwatene mwemo munavira nyo. Nabwiya eto akale na nyo mwatene.
17 Miyo Pawulo nnolremba malondjelo ala na ndanda naga. Tchi ionihedo inera miyo na makarta matene analremba miyo ira atu kaona malrembelo aga ala, kaiziwe ira: <<Ulrembile mazwala gu mulombwana Pawulo.>> # 3:17 Pawulo ira awonge ira: nnolremba malondjelo ala na ndanda naga ku wonga mazu madjindji a karta ni Pawulo amulrembihile mutu mmohiwa. Nione Roma 16:22. So magomelo Pawulo ere asinarivo. Nione eto Galasiya 6:11; Koloso 4:18. 18Sayi da Nabwiya wehu Yesu Kiristu dikale na nyo mwatene.
Kukala mazu a karta nanembinli nalrembiwele atu omuroromela Yesu a Tesalonika.
Currently Selected:
2 Tesalonika 3: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral
