1 Timoteyo 1

Pawulo unamulondjela Timoteyo

1Unalremba gu miyo Pawulo, namarumiwa wa Yesu Kiristu, nnafwanyeya dagali mutu urumiwe na Mulugu Nvulusi wehu vamohi na Yesu Kiristu wenno unamuroromela hiyo. 2Nnoulrembela we Timoteyo, mwanaga wa ibaribari muwari mwa nroromelo.#1:2 mwanaga wa ibaribari: Kahi ira Timoteyo ali mwana Pawulo ombala. So Pawulo unamulimbiha zela ja Mulugu eto Timoteyo omukamihedetcha Pawulo mabasa olaleya na makalelo nnga baba unawenda liye na mwanaye. Malondjelo anaurumiheda miyo ba ala. Difunne ira sayi na tangaranga na murendele unna Mulugu Babihu na Nabwiya wehu Yesu Kiristu, jatene ejo jikale na we.

Pawulo ohomuwandela Timoteyo ira aarunihe anamalaleya onama

3Miyo dahanakume sidadi ya Efezo uli we wo ira didowe porovinsiya ya Masedoniya, dohouhiya muEfezo mwasiwa wewo kohokalawo atu anawonga ja Mulugu, kafundjihaga jewa jene. Daurumile ira uwandege ahiyiha atu anno ira kahafundjihegeve ejo, 4eto ira kahabalrege anatchitwa ohokana mabasa nari mazina oindjiva ohomala a atu kakwile wanle. Tchoira ejo jinazana kayikelana hiya irana mabasa anafuna Mulugu anno anakumela muwari mwa nroromelo.

5Ira miyo durume ira waahiyihe atwale jonama jiwa, ili ira atu kakale ozivelana mokana mirima dotchena eto mokala atu ohokana wanganyeda mmirimani mwewa eto mokala atu okana nroromelo na ibaribari.#1:5 atu kakale ozivelana mokana mirima dotchena: Ku wonga Pawulo amurumile Timoteyo ira aamiyalihe atu onama ira kahiye jonama jiwa, kakayena mirima dotchena eto kahakayena wanganyeda mmirimani mwewa eto kakayena nroromelo na ibaribari. Muwari mwa ejo, punaza aliwa kala atu okana zivelana. Ku wonga zivelana unazela muwari mwa jengo taru ji. Mbwenye wewo uli jofundjiha jonama, kuli zivelana.

6Kohokalawo atu kahiyile ejo, aliwa mabasiwa so ku wonga jengo johokana mabasa. 7Aliwa anofuna jovikaliha anamafundjiha malamulo, mbwenye kinaonelramo jejo jinawonga atu nne jejo jinarumelela atu.

Pawulo ohowonga zela mabasa a malamulo

8Hiyo nihiiziwa ira malamulo a Mulugu bapama, malringana mutu aiziwe pama labana uwa. 9Tchoira hiyo nihiiziwa ira malamulo tchaazenle atu apama mbwenye kaazenle atu anairana jabure, atu ohovwelela, aliba runiha ja Mulugu, aliba tega, aliba irana jotakala, aliba apa ababiwa, aliba apa afwiwa, 10atu anne anararuwa, ale anafuna joagoniha alombwana afwiwa, atu anne anaahinda afwiwa ira kakale azari, atu anne ananama, ale anaanukeda afwiwa vamentoni va anamatonga. Malamulo kaazele atu atene anaruniha mafundjihelo apama a Mulugu.

11Mafundjihelo apama a Mulugu anaruniha atu abure, banno anafwanyeya muwari mwa Muselu Wapama Mulugu udivahedile liye ira dilaleye, muselu wenno unaniwandela zela undimuwa unna Mulugu oteteliwa.

Pawulo ohomutamalela Mulugu zela vulusiwa waye

12Miyo nnomutamalela Nabwiya wehu Yesu Kiristu wenno unadivaha kopolo dowanda labana mabasaye, mwasiwa liye odiona kala ororomeleya, liye dihambiha ira dilabe mabasaye 13agali wanle dali mutu oluluviha nzina na Yesu, dali mutu oaharahara atu omuroromela Yesu, dali mutu ofuna nnga nzina na Yesu nimale. Mbwenye dihiwanda watchela tangaranga mwasiwa jabure jile dairana mohomuroromela, mohoiziwa jaira miyo. 14Sayi dilukulu da Nabwiya dilabile ira diwande muroromela eto diwande kana zivela wewo unafwanyeya muwari mwa Yesu Kiristu.

15Inafwanela atu atene omuroromela Yesu kagarati, kawande iziwa ibaribari ira: <<Yesu Kiristu para kuma zulu, za mwilamboni ya vati ila, uzele aavunele atu otega.>> Eto muwari mwa atu otega, otabwetchetcha tega gu miyo. 16Mulugu udiwendela tangaranga miyene mutu akwarannye tega ira muwari mwa miyo Yesu Kiristu awande oniha vilela ulukulu unna liye vamentoni va ale kafuna muroromela ira kakayena ingumi yohomala.

17Mulugu Mwene wa tempu datene, wenno ahanawanda kwa, ahanawanda oneya na meso, Mulugu mmohive uliwo, ateteliwe eto undimuwa waye uoneye kuma peno dowa sogolro kala no kala. Ame.

Pawulo ohomukokomeza Timoteyo ira akaleve olimbene na nroromelo naye

18Miyo nnouruma we mwanaga Timoteyo ira uwane pama kondo. Tchoira malambo a mundulrimu kohokala atu kagumanne na weyo, aliwa uwandela mazu ofiyihediwa zela mabasa wafuna we laba.#1:18 kohokala atu kagumanne na weyo, aliwa uwandela mazu ofiyihediwa zela mabasa wafuna we laba: Yesu agadowile zulu, muwari mwa atu omuroromela Yesu, liye ohawongiha atu mazu aye. Anno Yesu aawongihile liye kaitaniwa anamafiyiheda. Afwase anamafiyiheda kohowonga mazu omulimbiha Timoteyo muwari mwa kopolo da Munemba Otchena ira: <<Weyo wadowa, walaleyege mohoova tchoira Mulugu unousogolrelra. Mwatene mwene unafuna we vira, Mulugu unakala na weyo ira mazu anafuna we laleya kavweyege pama.>> Va Pawulo unamuwumbutcheda nfwaye mazu kawongile anamafiyiheda ora yenno yamurumile atu ira Timoteyo alimbihiwe kopolo ira airegena yenno yarumiwe liye. Nione 1 Timoteyo 4:14. Inafwanela utukule mazwale ira uwanena kondo 19wagahidedile pama nroromelo nawo eto mohowanganyeda yengo.

Tchoira kohokalawo atu amohiwa kahiyile ibaribari, aliwa mala pupuruwela olapela wene na nroromelo niwa. 20Muwari mwa atu anno, mmohi gu mulombwana Imenewu, mmohiwa gu mulombwana Alexandiri. Miyo mbwenye, atu anno dihimala avaheda mmandani mwa Satana ira adowe aalange, kaiziwe ira kahi pama mutu mululuviha Mulugu.#1:20 atu anno dihimala avaheda mmandani mwa Satana ira adowe aalange: Voira aliwa kohoirana ja Satana, Pawulo aahiyile ira Satana aaonihe goyi kagaliwove mwilamboni ya vati. Ali ira kagaonne goyi, kawande twaruwa. Zela muselu wenno, nione eto 1 Korinto 5:1-5.

Currently Selected:

1 Timoteyo 1: iLolo

Highlight

Copy