2 Tesalonika 2

Zela za wa Nabwiya Yesu

1Hiyo abalihu, nnafuna nuwendjeliheni zela za wa Nabwiya Yesu Kiristu, na tempu inafuna hiyo za gumanihiwa ira nikale vamohi na liye. 2Inafuna hiyo uwendjelihani tchoira masiki nyo muvwe mazu ofiyihediwa ira siku na Nabwiya nihimala za, masiki muvwe mutu awongaga, masiki muvwe na karta nilrembiwe na nzina nehu ira siku na Nabwiya nihimala za, nyo jatene ejo kamubaranyele zuzuma mmirimani mwenyu nne kamukukumuwe zela jejo. 3Nyo kamunyengiwe na mutu zela yengo ili yatene. Tchoira siku na Nabwiya nahanaze, ikala tempu inafuna za yoira atu oindjiva kahiye ja Mulugu. Eto siku na Nabwiya nahanaze, unoza aoneyihiwe mulombwana oirana jinakondiha malamulo, mwana ofuna tolotchiwa.#2:3 mwana ofuna tolotchiwa: Owu hehi Mwana wenno unafuna tolotcha. Tchoira wenno unafuna za, unotolotcha eto unagomela tolotchiwa. 4Mulombwana wenno unoza awane eto unovitukulela nnga mutu oakwaranya amilugu atene anaahara atu nari jatene jinatamalela atu. Eto liye unoza agarati Nyumba ya Yehova, awongege ira: <<Miyo vano dili Mulugu.>>#2:4 Mulombwana wenno unoza awane eto unovitukulela: Pawulo awonga ejo ira afwaye kaiziwe ira: <<Voira jejo kajinarome ireya, kannafiye siku na Nabwiya.>> Pa evale vafuna atu kana ibaribari ira aliba wonga ira: <<Siku na Nabwiya nihimala za>>, kawonga jonama.

5Kodi nyo mwire diwala jatene jauwandenleni hiyo malambo a mundulrimu? 6Nyo muhumala iziwa ira tempu ili hiyo ila ukala unamuhiyiha mutu wabure ule ira ahawande za tchineneva, mbwenye aze aoneyihiwe tempu yaye yagakwakwanne.

7Masiki mutu wabure ule ahanaze, jikala jengo jabure pwi jinakondiha malamulo jinaireya malambwala. Jabure ejo kajinaiziweya pama na atu a unde. Maliba muhiyiha mutu wabure ira ahaze tchineneva gu mmohive unalaba malambwala ira avungule jabure jinaireya. Mbwenye tempu inafuna dowa maliba hiyiha ule, 8pa evale vanafuna oneyihiwa mulombwana wabure ule. Liye agazile, unolaba mabasaye ante vanafuna za Nabwiya Yesu mpa mulombwana wabure ule mowonga bahi eto unoza amutolotche muwari moza waye wotikiniha.

9Mulombwana wenno unafuna za, ahanapiwe na Yesu, Satana unonvaha kopolo dowanda irana jionihedo na jotikiniha ira liye awande anyenga atu. 10Eto Satana unonvaha malrango matene oanyengana atu anne anafuna tolowa.#2:10 Satana unonvaha malrango matene oanyengana atu: Satana unalabana kopolo daye ira aanyenge atu. Nona inafwanela atu omuroromela Yesu kahawande kukumuwa kaona jengo johiyana hiyana jiireyaga muwari mwa aliba fukulra nari aliba kwima nari aliba kutela azimu. Tchoira Satana unahela ndanda ira jatene ejo jiireye. Nione Ezodu 7:1-13. Aliwa anafuna katolowele mwasiwa kifunne ziveliwa ibaribari ira kawande vulusiwa. 11Nona, Mulugu unoza aahiye, unoza akumihemo zelru dapama, kawande roromela jonama. 12Ili ira atene kahaziveliwe ibaribari, atene oziveliwa jengo johokala pama, kagwena mulandu.

Yokokomeza ira atu omuroromela Yesu kakale olimbene na nroromelo newa

13Abalihu oziveliwiwa na Nabwiya, hiyo vano nagarati ili pama nimutamalele Mulugu mwasiwa liye uusakunlreni kuma voroma vene ira muvulusiwe. Musakulriwe ira muvulusiwe muwari motchenihiwa na Munemba Otchena eto muwari mwa nyo rumela ibaribari. 14Nyo mwagavwile Muselu Wapama nalaleya hiyo, tchi tempu yenno yuitanneni Mulugu ira muze muvulusiwe momuroromela Yesu. Mulugu uuvuluseleni ira awande uvahanimo nyo undimuwa unna Nabwiya wehu Yesu Kiristu. 15Naiziwa ira vasogolro Mulugu unafuna anivahe undimuwa unna Kiristu, inafwanela nyo abalihu mwawendaga mwilamboni muno, muimele pama, muhidede pama makalelo nnga nuwandenleni hiyo muwari mwa mazu nufundjihileni hiyo na mulomo nari mazu nilrembile hiyo mukartani.

16Nabwiya wehu Yesu Kiristu mwinnya na Mulugu Babihu na sayi dewa koniziveliwa hiyo eto konivaha pwaseya wohomala na yoing'anela yehu yapama. 17Yesu Kiristu na Mulugu kaupwaseyiheni eto kaulimbiheni mmirimani mwenyu ira muwandege irana no wonga japamave.

Currently Selected:

2 Tesalonika 2: iLolo

Highlight

Copy