2 Samuweli 8
8
Davi ohagondjiha amwidanaye
1Jejile jagaireyile, Davi ohomaruwaga, liye dowa wana na aFilistewu. Agadowile wana na aFilistewu ale, ohagondjihaga, liye awaka utongi wanna atu. Eto ohawaka mmandani mwiwa sidadi imohi yakala atu yenno yaitaniwa Metegi-Ama, liye tukula kala yaye.
2Eto noira eno ohodowaga agondjiha akuda Mowabe. Agaagondjihile, ohawandelaga ira kagonanti vati. Kagagonatile, ohotukulaga ngohi, liye roma pima ante ngohile vagomenle atu, liye apa. Nomala liye pima akoka ante ngohile vagomenle atu, liye apa. Nomala liye pima akoka ante ngohile vagomenle atu, liye ahiya, kwahaapa. Liye iragana eno fiyeda atu atene mala. Mwa enne akuda Mowabe kahapiwe ale kohokala anamalaba a Davi eto aliwa kompagalri misoko.
3Eto noira eno, ohodowaga liye wana na mulombwana Hadadezeri, mwana Reyobe, mwene wa Zoba, liye fiyeda mugondjiha. Tempu yenno ali mwene Hadadezeri agadowile ira awombole utongi waye vilambo dafwanyeya wandamelana muhindje Eufarati. 4Evale liye agamugondjihile mwene Hadadezeri ule, ohomuwakaga aaterelado 1.000 a kondoni, na atu 7.000 owendiha kavalo da kondoni#8:4 aaterelado 1.000 a kondoni, na atu 7.000 owendiha kavalo da kondoni: Nione eto 1 Koronika 18:4. MaBibiliya amohiwa anawonga atu 1.700 owendiha kavalo owu hehi atu 1.600 owendiha kavalo. vamohi na anyakondo amohiwa okwakwana 20.000 owenda na mendo. Mwa enne Davi ohotukulagamo kavalo 100 bahi da kondoni ira dikale daye. Mbwenye kavalo datene dohala ohorangalihaga mendo.#8:4 kavalo datene dohala ohorangalihaga mendo: Malambo a mundulri atu kogwada misepa da kavalo da kondoni na makalelo kaiziwile atu ira dahawande tamanga dowaga kondoni. Tchi imohive yairilena mwene Davi.
5Evale akuda Siriya kakala Damaxiku kohozaga ira kamukamihede Hadadezeri mwene wa Zoba ule. Muwari mwa akuda Siriya kazile ale, Davi ohapaga 22.000. 6Davi agaagondjihile, ohosakanyaga mabazi a anyakondo aye sidadi ya Damaxiku muwari mwa akuda Siriya. Evale akuda Siriya kohokala anamalaba a Davi, aliwa roma mpagalrigi misoko. Eto Yehova omukamiheda mwene Davi ira awandege agondjiha amwidanaye mwatene mwadowa liye wana.
7Davi agamugondjihile mwene Hadadezeri ule, ohawakaga anamalaba a Hadadezeri ale defeza da oru dedo dawendetchana atu, liye dowagana Jeruzalemu. 8Eto ohotukulaga mukuwa oindjiva afwanyeya sidadi ya Beta na sidadi ya Berotayi, sidadi dedo dafwanyeya mwilamboni mwa mwene Hadadezeri emule.
9Ohokalawo mwene mmohi wa ilambo ya Hamate, wenno aitaniwa Toyi. Liye agavwile ira: <<Eni mwene Davi uhugondjiha nikuru natene na anyakondo a mwene Hadadezeri!>>, ohoziveliwaga. 10Muwari moziveliwa, ohomurumaga mwanaye mmohi aitaniwa Jorawu ira adowe amulondjele Davi eto amutetele zela mabasa alabile liye na mwasa owana na mwene Hadadezeri fiyeda mugondjiha. Tchoira Hadadezeri na mulombwana Toyi mundulri mwaza atu keretcha wana. Evale ohomurumana mwanaye ule jengo ja parata, ja oru na ja mukuwa. 11Mwanaye ule agazilena nvaha Davi, Davi ohotukulaga jengo jile, liye velela wa Yehova na makalelo nnga airilena liye malambo a mundulri ja parata na ja oru jejo jaawakile liye atu a vilambo datene dagondjihile liye.#8:11 Fwanyeya ira Davi ohotukula jaawakile liye amwidani kondoni nari jovaha jimohi jiwa javahiwe liye, liye velela wa Yehova. Ku wonga liye akoyile muwari mwa nyumba yokoyamo ja Yehova ira mwanaye awande mangana Nyumba ya Yehova. (2 Samuweli 7:12-13; 1 Koronika 22:1-11) 12Vilambo daawakile liye jengo, anvaheda Yehova ti di: Edomu, Mowabe, ilambo ya akuda Aminoni, ilambo ya aFilistewu na ilambo ya akuda Amaleki. Davi eto ohonvaheda Yehova jejo jamuwakile liye Hadadezeri, mwana Reyobe, mwene wa Zoba.
13Davi agawenlewo, ohapaga alombwana a Edomu okwakwana 18.000 nimburo naitaniwa ndabo na Mwinnyu. Mwa enne Davi nzina naye nohovweya. 14Davi agagondjihile, osakanyaga mabazi a anyakondo aye muwari mwa ilambo yatene ya Edomu. Evale akuda Edomu atene kohokala anamalaba a Davi. Eto Yehova omukamiheda mwene Davi ira awandege agondjiha amwidanaye mwatene mwadowa liye wana.
Asogolrelri a mwene Davi
15Mwene Davi oatongetcha aIzarayeli atene. Muwari motonga, otonga mwa ibaribari eto oasogolrelra mokwakwanela atwaye atene. 16Musogolrelri waye wa anyakondo aitaniwa Jowabe wenno mmaye ali Zeruwiya. Eto maliba lremba joira ja guverno ali Jozafa mwana Ailude. 17Eto Zadoki mwana Ayitube na Aimeleki mwana Abiyatare, aliwa kafwanyeya kagali anamakuta. Mulombwana Seraya ali maliba lremba madugumento a mwene. 18Mulombwana Benaya mwana Joyada ali mundimuwa wa agwarda a Davi, anno kafwanyeya kagali akuda Kereti, na akuda Peleti. Eto ahima a mwene Davi kali andimuwa osogolrelra ja aIzarayeli.#8:18 ahima a mwene Davi kali andimuwa: MaBibiliya amohiwa anawonga ira: kali anamakuta.
Currently Selected:
2 Samuweli 8: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
