2 Samuweli 7

Mulugu ohosakanya yopangana na mwene Davi

1Yehova agamanle mukamiheda mwene Davi agondjiha amwidanaye atene, Davi ofiyeda garati vande palasiyoni waye, liye vumaga mwa murendele. 2Mwa enne siku nimohi mwene Davi ohomuwandelaga namafiyiheda mmohi aitaniwa Nata ira: <<Kaing'ana! Miyo nnakala nyumba yapama yomangiwa na matabwa a seduru agali Kaxa ya Mulugu ilive mmusasani. Kodi kifwanenle dimange nyumba ira Kaxa ile ikalegemo?>> 3Evale Nata ohomuwakulaga Davi eraga: <<Tiye, wairena yenno inafuna we. Mwasiwa Yehova uli na weyo!>>

4Mwa enne, siku nazilege Davi awongaga na namafiyiheda Nata, mahiyuni uwa, mazu a Yehova kohozaga wa namafiyiheda Nata, kamuwandelaga ira: 5<<Uvenye udowe wawonge na namalaba waga Davi, umuwandele ira: Yehova unawonga ira: Unafuna dimangela nyumba miyo Yehova ira dikalegemo kahi weyo. 6Tchoira miyo roma tempu yaakumihile miyo Ana Izarayeli muIjipitu, fiyeda peno va kannakayena nyumba yaga. So nnawendetchave mmusasani okungiwa, miyo kalaga emule bahi! 7Eto mwatene mwawenda miyo na Ana Izarayeli atene, kodi miyo dihibabiha wonga na musogolrelri uli watene wa Izarayeli dimurumile miyo ira aakumbuzege atwaga ira: <Nnga mwasiwa gwa nni nyo hafunaga dimangela miyo nyumba yomangiwa na matabwa a seduru?> >>

8Yehova ohowongaga na Nata eraga: <<Na mwasa wenno, weyo uvenye udowe wamuwandele namalaba waga Davi wire: <Yehova wa Makuru Matene gunawonga ira: <<Miyo dukumihile mukokolani mwemo mwawenda we mundulri mwa mabila ira udowe wakale musogolrelri wa atwaga aIzarayeli! 9Eto miyo dalive na weyo mwatene mwavira we eto dahatolotcha amwidanawo atene vamentoni vawo! Eto eni miyo nnoza diulukulihe nzina nawo ira nikale nnga mazina a andimuwa andimuwa anafwanyeya mwilamboni ya vati! 10Eto miyo nnoza daavahede atwaga aIzarayeli nimburo neno ira aliwa kakalegemo eto nnoazala ira aliwa kakalegeve nimburo newa. Dagaavahedile nimburo newa, kinakukumuliwegeve eto kilivo atu amohiwa abure anafuna za aonihaga goyi nnga goyi yanna atu voroma vene tempu yawendetcha atu na anamasogolrelra amohiwa daahambihile miyo mundulrimu ira kaasogolrelrege atwaga aIzarayeli!#7:10-11 Miyo nnoza daavahede atwaga aIzarayeli nimburo ira aliwa kakalegemo… kinakukumuliwegeve: Mulugu agamanle avaha aIzarayeli ilambo yatene ya Kana nnga mwawongele liye na Abarahamu, Mulugu uhuwonga zela ilambo imohiwa ihanle. Ilambo imohiwa Mulugu unafuna liye avaha atwaye gu Jeruzalemu Muxa. (Jowandeliwa 21:2-4) 11Weyo eni kunakana kondo akoka na amwidanawo atene, unerege vuma. Eto vamohive vevo miyo dagali Yehova nnouwandela ira miyo gunafuna umangela weyo nyumba ya umwene.#7:10-11 Mulugu awongaga na Davi ira: miyo gunafuna umangela weyo nyumba ya umwene ku wonga ira sogolro ahima a Davi kafuna kakale andimuwa otonga umwene wa Izarayeli.

12<<Tchoira malambwawo kakwakwana ira udowe wavume na makolo awo, mundulri mwawo, muwari mwa ahimawo anafuna hala, miyo nnomuvenyiha mutu mmohi ira akale vamalroni vawo, eto miyo nnogarateyiha umwene waye. 13Liye mbwenye gunafuna manga nyumba ira nzina naga nikalegemo. Eto miyo nnosakanya ira umwene waye ukale umwene wa mukalakala. 14Miyo nnokala babaye eto liye unokala mwanaga. Liye mbwenye atega, miyo nnomulanga na nkogozo wa atu, na viwaxuwaxu da atu. 15Mbwenye miyo kadiza dihiya muzivela nnga dahiyile miyo muziveliwa Sawuli, wenno dimuhiyile miyo mundulri ira weyo ukale sogolro. 16Weyo mbwenye vande vawo vamohi na umwene wawo unerege dowa sogolro malambo a mukalakala vamentoni vaga. Mpando wawo wa umwene unogarateya kala no kala.>> > >>#7:16 Utongi wawo uneregeve dowa sogolro malambo a mukalakala. Mazwala anoza kakwakwanele muwari mwa Yesu tempu inafuna liye venyiha utongi waye wogomiheda. Tchoira Yesu ubaliwe muzizani mwa Davi. Nione Lukaji 1:32-33; Eberewu 1:8.

Lobela wa Davi

17Noira enne, mulombwana Nata ohodowaga nfwanya mwene Davi, liye muwandelamo mazu matene Yehova amuwandenle liye muwari momuoniha jengo mmuruni mwaye. 18Evale mwene Davi agavwile mazwale, ohovolowaga mMusasani mwa Yehova, liye garati vamentoni va Yehova, liye roma lobela eraga: <<Yehova Mulugu kodi miyo dili ani eto atu a vande vaga bani ira nyo mudifiyihe makalelo dinna miyo ala?! 19Eto muwari mwa jatene jidiirele nyo, vamentoni va nyo Nabwiya Yehova munaona nnga jihiyeva. Ante nyo munofiyeda wonga zela vande va miyo dagali namalaba wenyu zela tempu ya sogolro. Kodi nyo Nabwiya Yehova munoiretcha eno na atu atene? 20Nabwiya Yehova miyo namalaba wenyu dagavwile jatene jiwongile nyo, kadinna yengo inafuna miyo wonga. Tchoira nyo muhumala iziwa jatene jili mmirimani mwaga dagali namalaba wenyu! 21Yehova nyo na mwasa wa nipangano nenyu nnga jejo jafuna nyo na mmirimani mwenyu, muhuwanda diwandela miyo namalaba wenyu undimuwa watene wenno munafuna nyo za irana sogolro. 22Mwa eno, nyo so Nabwiya Yehova muli mundimuwa. Tchoira kaliwo okwakwanela na nyo. Na mwasa wa jatene jivwile hiyo na mabaru ehu zela nyo, nnowanda rumela ira kaliwo Mulugu mmohiwa ahali nyo bahi! 23Kanilivo nlogo nolingana na atwinyu aIzarayeli. Muwari mwa malogo matene a ilambo ya vati, aIzarayeli ti nlogo nimohive nyo Mulugu mwaawombonle nyo ira kakale atwinyu. Muiragana eno ali ira muvweyihe nzina nenyu. Nyo mohowanda awombola muwari mwa aIjipitu ira kakale atwinyu eto mohowanda irana jengo jilukulu jotikiniha mwaatamangihagamo atu mwilamboni mwiwa na amilugu ewa ira atwinyu kakalemo. 24Yehova gu nyo musakannye ira aIzarayeli kakale mulogo wenyu malambo a mukalakala, nyo so Yehova gwasakunlre ira mukale Mulugu wewa.>>#7:24 gu nyo musakannye ira aIzarayeli kakale mulogo wenyu malambo a mukalakala: Kaali ira aIzarayeli kohomusakulra Mulugu ira akale Mulugu wewa. So mbwenye Mulugu gwaasakunlre aIzarayeli ira kakale atwaye mofuna mwaye hiya muwari moona joira jiwa. Agali tempu ili hiyo ila oindjiva a aIzarayeli kinamuroromela Yesu eto kinna pandi na Umwene wa Mulugu, vasogolro Mulugu unoza aatwarutche ira kamuroromele. Nione Roma 11:23-31.

25Davi ohowongagave eraga: <<Nyo so Nabwiya Yehova nnouvepani ira mukwakwanelihede kala no kala mazu muwongile nyo zela miyo namalaba wenyu na atu a vande vaga. Iranani nnga muwongele nyo.#7:25 mukwakwanelihede kala no kala mazu muwongile nyo… Iranani nnga muwongele nyo. Davi agavwile yawongile Mulugu, oholobela anvepaga Mulugu ira airena yenno yalumbenle liye irana. Tchi imohive yairile Daniyeli. (Daniyeli 9:2,16-19) Nona inafwanela ninvepe Mulugu ira airegena jejo jalumbenle liye irana. 26Mwaira eno nzina nenyu nnerege tamaleliwa kala no kala eto atu anerege wonga ira: <Yehova wa Makuru Matene gu Mulugu wa aIzarayeli!> Eto nivande na miyo namalaba wenyu Davi nnakalege nogarateya nene vamentoni venyu! 27Tchoira nyo so Yehova wa Makuru Matene, Mulugu wa aIzarayeli, muhuwanda diiziwiha miyo namalaba wenyu, mudiwandelaga ira: <Miyo nnoumangela nyumba.> Nona tcheniyo idivahile miyo namalaba wenyu kopolo ira diwande lobela yolobela yenno ilobenle miyo ila! 28So Nabwiya Yehova, nyo muli Mulugu, jowonga jenyu ti ja ibaribari. Nyo muhupangana ira mudivahe japama jatene eji dagali namalaba wenyu. 29Nona mofuna mwenyu inafwanela muwande reliha vande vaga miyo namalaba wenyu ira umwene waga udowege sogolro kala no kala, vamentoni venyu. Tchoira nyo Nabwiya Yehova muhuwonga ira munoreliha umwene waga miyo namalaba wenyu malambo a mukalakala!>>

Currently Selected:

2 Samuweli 7: iLolo

Highlight

Copy

Compare