2 Samuweli 9
9
Muselu wa Davi na mulombwana Mefibozeti
1Siku nimohi mwene Davi ohafukaga atwaye eraga: <<Kodi vande va mwene Sawuli vihikala mulombwana uhanle ira miyo dimuirele upama na mwasa wa nfwaga Jonata?>> 2Fwanyeya ira mwa tempu yenne ohokala namalaba mmohi wa Sawuli, wenno aitaniwa Ziba. Kagamuitanne, agafiyile wa mwene Davi, Davi ohonfukaga eraga: <<Weyo uli mulombwana Ziba?>> Liye ohowakulaga eraga: <<He gu miyene namalaba wenyu!>> 3Noira enne, Davi ohomuwandelaga eraga: <<Miyo dauitanela ira dufuke. Kodi muibalini mwa Sawuli kahanlewo nne mutu mmohi ofuna ira miyo dimuirele upama wa Mulugu?>> Evale Ziba ohowakulaga eraga: <<Uhukalawo Mefibozeti, mwana mmohi wa Jonata uhanle, wenno uranganle manyalo amenlene.>> 4Noira enne, Davi ohonfukaga eraga: <<Nnga liye unafwanyeya waani?>> Ziba ohowakulaga eraga: <<Liye unafwanyeya vande va mulombwana Makiri mwana Amiyeli mwilamboni mwa Lo-Debari.>> 5Noira enne, mwene Davi oharumaga atu ira kamudowele mwana Jonata ule vande va mulombwana Makiri mwana Amiyeli sidadi ya Lo-Debari.
6Evale mulombwana Mefibozeti, mwana Jonata, Sawuli muzuliye, ohozaga wa Davi. Afiyaga ohoworama afiyihaga kove yaye vati, muwari momuriheda. Noira enne, Davi ohomuitanaga eraga: <<Mefibozeti!>> Liye ohowakulaga eraga: <<Gu miyene namalaba wenyu!>> 7Noira enne, Davi ohomuwandelaga eraga: <<We mulombwana Mefibozeti kuove mwasiwa miyo nnafuna duirele upama na mwasa wa babawo Jonata wenno ali nfwaga. Miyo nnafuna duwelihede vilambo datene dedo dali da mbwiyawo Sawuli. Weyo eni roma peno dowa sogolro unakalege vamohi na miyo eto unadjege meza imohive na miyo.>> 8Davi agawongile enne, mulombwana Mefibozeti ohokokoraga, aoramihedaga kove yaye vati, liye wakula eraga: <<Mbwiyeni miyo dagali mulombwana Mefibozeti nnafwanyeya dagali nnga mwanambwa okwene. Nnga miyo dili ani ira nyo mudiirele eno?>>
9Noira eno, mwene Davi ohomuitanaga Ziba wenno ali namalaba wa Sawuli, liye muwandela eraga: <<Ziba miyo nnafuna duwandele. Jatene jali ja mwene Sawuli na vande vaye vatene, miyo peno dihimala nvaha marafula patarawu wawo muzuliye ula! 10Eni kuma peno, weyo vamohi na ahimawo atene vamohi na anamalabawo atene mudowe mwalimege. Mwagalimile, jengo jinafuna kumaga munerege zana, munvahege mulombwana Mefibozeti ula vamohi na atu atene a vande vaye ira kakayena jodja. Mbwenye mwinnya Mefibozeti ula unadjege meza imohive na miyo!>> Fwanyeya ira mulombwana Ziba anna ahima a anapongwe kumi na atanu, vamohi na anamalaba 20. 11Evale liye ohowakulaga eraga: <<Mbwiyeni miyo dagali namalaba wenyu nnoirana jatene nnga mwemo muwongele nyo!>> Kuma evale dowaga sogolro, mulombwana Mefibozeti adja vamohi na mwene Davi nnga mwanaye.
12Mulombwana Mefibozeti ule ohomukana mwanaye mmohi wa muzombwe wenno aitaniwa Mika. Eto atu atene kakala vande va Ziba, kohoroma mulaba mulombwana Mefibozeti nnga anamalaba aye. 13Ala ali makalelo Mefibozeti akala liye Jeruzalemu, adjaga meza imohive na mwene Davi. Mulombwana Mefibozeti alive orangala manyalo amenlene.
Currently Selected:
2 Samuweli 9: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
