2 Samuweli 6
6
Kaxa ya Yopangana yohodowiwana Jeruzalemu
1-2Siku nimohi mwene Davi ohagumaniha akoka anyakondo oiziwa wana pama a Izarayeli okwakwana 30.000, aliwa dowa ilambo ya Bali-Juda ira kadowe katukule Kaxa ya Mulugu yenno atu vadowetcha atu karomolagavo nzina na Yehova wa Makuru Matene, wenno unakala vari va akerubi ambinli.
3Kagafiyile Bali-Juda ule, kohodowa vali Kaxa ile vande va mulombwana Abinadabe, wenno nyumbaye yafwanyeya vogwela vang'onove. Kohokumiha Kaxa ya Mulugu ile mmba mwiwa mwali atu, aliwa igweliha muatereladoni muxa wenno ali ahanarome labiwana.#6:3 aliwa igweliha muatereladoni muxa wenno ali ahanarome labiwana: Tukula Kaxa ya Yopangana ya Yehova na aterelado ali zelru da atu. Mulugu mbwenye ohowonga ira Kaxa ya Yopangana itukuliwege mmandani na jimiri. Nione Ezodu 25:14; Numero 7:6,9. Evale kagatukunle Kaxa ya Mulugu ile kadowagana, awendihaga aterelado ule aligi ana Abinadabe ambinli anno kafwanyeya kagali Uza na mbalaye Ayiyo. 4Eto mulombwana Ayiyo gwasogonlrege, liye kala vasogolro va aterelado wenno mwafwanyeya Kaxa ya Mulugu ile. 5Eto mwene Davi vamohi na aIzarayeli atene kohokalaga mundulri kaharaga aterelado ule, aliwa imbaga nyumbo eto kaimbaga joimbana jiwa, arpa, lira, makotcho na joimbana jinakala nnga parato.#6:5 joimbana jinakala nnga parato jinawongiwa eva jinairiwa címbalos na izugu. Jinakala nnga parato mbinli, mbwenye ulukula uwa unokwaranya parato. Wabubuda vamohi, jagumanaga, kuwa uwa kunakala wa masika. So mbwenye muwari mwa iLolo nzina niwa kannaiziweya Koimbagave kamutamalelaga Yehova mwa kopolo diwa datene. 6Mwa enne kadowagave enne, kagafiyile nimburo nobubudavo jalo na mulombwana Nakomi, ng'ombe dedo datutumula aterelado ule dohogwagwaduwaga. Evale ng'ombe dile dagagwagwaduwile, mulombwana Uza ohidedaga Kaxa ya Mulugu ile na ndanda naye ira yahagwe. 7Evale mulombwana Uza agatapunle mandaye ira ahinde Kaxa ile, Yehova ohotakaleliwaga na makalelo ohokala a masika zela mulombwana Uza na mwasa ofuna johinda Kaxa ya Mulugu ile. Evale Mulugu ohomporotcha mulombwana Uza vevale na mwasa wa yoviringaniha yaye.#6:7 yoviringaniha yaye: Fwanyeya ira Mulugu ohawandela aliba tukula jengo jotchena ira: <<Nyo mwatukulaga Kaxele kamuhindege, mwasiwa mwahinda, munokwa.>> So aliwa kahinda jimiri jotukulana jiwa jile, hiya Kaxele. Nione Ezodu 25:14; Numero 4:15, 7:6,9. Nona Mulugu ampa mulombwana Uza. Mwasiwa kaali funa wa Mulugu ira aliwa kahele Kaxele vazulu va aterelado otutumuliwa na ng'ombe. So Mulugu afunile ira Kaxele itukuliwege muwari mwa jimiri jotukulana. Mwa enne mulombwana Uza ohokwa wandamelana vevale vali Kaxa ya Mulugu ile. 8Mwa enne Davi ohotakaleliwaga na mwasa oira Yehova ohompa mulombwana Uza. Na mwasa wenne, ohovahaga nimburo nenne nzina na Pereji-Uza [ku wonga Tongiwa wa Uza]. Fiyeda peno nimburo nenne nnaitaniwa na nzina neno.
9Mwa enne Davi agaonne ira: <<Eni mutu mmohi uhukwa na mwasa wa Kaxa ya Yehova ila>>, ohomuovaga Yehova siku nenne. Muwari moova ohowongaga eraga: <<Nnga miyo nnawande tukula avi Kaxa ya Yehova ila ira ifiye Jeruzalemu unakala miyo?!>> 10Mwa enne na mwasa oova, Jeruzalemu wayana liye Kaxa ya Yehova ile, kafiyilegenawo. Mbwenye adowilege ihiya vande va mulombwana mmohi aitaniwa Obedi-Edomu, nkuda Gate. 11Mwa enne Kaxa ya Yehova ile yohomala medi miraru yagali vande va mulombwana Obedi-Edomu evale. Noira enne, Yehova ohomureliha mulombwana Obedi-Edomu nkuda Gate ule vamohi na atu atene a vande vaye na mwasa wa Kaxa ya Yehova yenno yafwanyeya vande vaye.
12Mwa enne kohokalawo atu kavenyilege, aliwa dowa muwandela mwene Davi, aliwa ira: <<Xii, vande va Obedi-Edomu vihiyile nyo Kaxa ya Mulugu vale, Mulugu uhumureliha liye na jatene ja vande vaye na mwasa wa Kaxa ya Mulugu yenno muhiyile nyo vande vaye!>> Mwa enne Davi agavwile, ohovenyaga na atwaye, aliwa dowa vande va mulombwana Obedi-Edomu vale, aliwa dowa tukula Kaxa ya Yehova ile, aliwa idowagana mohagalala sidadi ya Jeruzalemu wewo wakala Davi. 13Mwa enne alombwana katukunle Kaxa ya Yehova ile kagawendile paso tanu na imohi, mwene Davi ohotukulaga ng'ombe imohi ilukulu vamohi na mwana ng'ombe imohi ing'ining'inive yoruva, liye velela mukuto wa Yehova.#6:13 alombwana katukunle Kaxa ya Yehova ile: Nafwanya 1 Koronika 15:26, nnovwa ira atukunle Kaxa ali aLevi mokwakwanela na malamulo a Mulugu. Ku wonga Davi agaonne ira zelru daye dotukula Kaxa na aterelado kadalabile, liye ohotukula Kaxa ile muwari mwa zelru da Mulugu.
14Evale mwene Davi agamanle velela mukuto wa Yehova, ohoromaga ina na kopolo daye datene vamentoni va Yehova momutamalela. Eto mwa tempu yenne ali agawarile kuleti ya unamakuta yosakanyiwa na usalru wapama. 15Noira enne, Davi vamohi na aIzarayeli atene kaligi vamohi na liye kohotukulaga Kaxa ya Yehova ile, aliwa dowagana Jeruzalemu. Kadowaga, atene kokuwaga mohagalala kaimbaga palraza. 16Mwa enne kavolowagana Kaxa ya Yopangana ya Yehova ile musidadi, mwadi Davi wenno aitaniwa Mikali mwana Sawuli, ohoing'anelaga vajanelani, liye muona mwene Davi ainaga, alupalupaga vamentoni va Yehova. Mbwenye agamuonne ohomulramwisaga mmirimani mwaye, liye hamuonaga nnga yengo. 17Noira enne, aliwa kohotukulaga Kaxa ya Yehova ile, aliwa dowa volotchiha mmusasani wenno Davi akungile liye ira kaze kahiyemo Kaxa ile. Noira enne, Davi ohovelelaga mikuto dotumeya vamohi na jovelela ja murendele vamentoni va Yehova. 18Agamanle velela mikuto dotumeya na jovelela ja murendele jile, ohareliha atu atene mwa nzina na Yehova wa Makuru Matene. 19Agamanle areliha, ohagawelaga aIzarayeli atene kafwanyeyaga vevale alombwana vamohi na ahiyana kada mutu pawu imohi, pindula ya nyama na nibolu nimohi nosakanyiwa na uva oumma. Noira eno, atu atene kohobalaleya, kada mutu dowaga vande vaye.
20Noira enne, mwene Davi ohodowa ira aarelihe atu a vande vaye. Mbwenye afiyaga wene vande vale, muhiyanaye wenno aitaniwa Mikali mwana Sawuli ohozaga gumana na liye eraga: <<Kodi jaira we jile peno ali nni? We kalaga nnga zimora ohokana manyazo, we waraga johokala pama, roma aoniha jengo jokoyeya ahiyana anno anaalaba anamalabinyu!>>#6:20 we waraga johokala pama: Siku nenne Davi kawarile ja umwene mbwenye awarile yowara ya unamakuta. (6:14) Muwari moina mule, Mikali ohoona ira Davi osimbwa aoniha atu maningo aye. 21Mbwenye Davi ohomuwandelaga muhiyanayele eraga: <<Miyo daina vamentoni va Yehova. Mwasiwa Yehova ohodisakulra miyo, mukwaranya babawo, nari mutu uli watene wa vande vaye. Liye agadisakunlre, ohodihambiha ira dikale mundimuwa wa Izarayeli anno anafwanyeya kagali atu a Yehova. Nona miyo nneregeve hagalala vamentoni va Yehova. 22Tchoira miyo nnerege irana jimohive jeji eto nnokwaranyiha nnga jeji jiirile miyo peno. Eto weyo uneregeve diona nnga zimora. Mbwenye anamwali anno waawonga we, aliwa anerege diriheda.>> 23Eto fwanyeya ira Mikali, wenno ali mwana Sawuli ohokala eno ahabanle mwana fiyeda ukwa waye.
Currently Selected:
2 Samuweli 6: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
