2 Samuweli 24
24
Davi ohakontariha atu
1Mwa malambo anne Yehova ohotakaleliwaga na makalelo ohokala a masika zela aIzarayeli akoka. Mwa enne Yehova ohosakanya ira Davi aairele aIzarayeli yabure awongaga eraga: <<Kadowa wakontari indjiva wa aIzarayeli na akuda Juda.>>#24:1 Yehova ohotakaleliwa… zela aIzarayeli akoka: Hiyo kaniiziwile mwasiwa Yehova atakaleliwe liye na aIzarayeli. So mbwenye iiziwile hiyo tchoira Yehova ohosakanya ira Davi aairele aIzarayeli yabure awongaga eraga: <<Kadowa wakontari indjiva wa aIzarayeli na akuda Juda.>>: Fwanyeya ira Mulugu alabile muwari mwa Satana. Satana gwanvahile zelru Davi ira aakontari atu. (1 Koronika 21:1) Davi ira arome akontari atwaye atene, yakala nnga liye aanyindela atu adjindji anna liye adowaga kondoni hiya Mulugu. So jatene jejile Mulugu gwasakanyile ira aIzarayeli katolotchiwe bahi. Eto nafwanya Ezodu 30:12-16, nnovwa ira Yehova ohomuwandela Mozeji ira: <<Siku noalrembelra atu atene, inafwanela kada mutu apagalrigi mwana kobiri tawiha ira Mulugu unaze aatonge.>> Mbwenye Davi kairilena. 2Evale mwene Davi ohomuwandelaga Jowabe musogolrelri waye wa anyakondo afwanyeya na liye eraga: <<Uvenye uwendawende muwari mwa malogo matene a Izarayeli, roma Dani ante dowa Beriseba, waakontari atu atene ira uiziwe indjiva uwa.>> 3Jowabe mbwenye ohowonga na mwene eraga: <<Nnga kodi mwasiwa gwa nni nyo mbwiyeni so mwene funaga ira mwaalrembelre atu atene? Yeniyo mbwenye kinakala. So mbwenye Yehova Mulugu wenyu akale unafuna aindjiviha atwinyu fendo 100, kwaranya nnga muindjivele atu peno va. Eto nyo mbwiyeni so mwene muone jatene jejo na meso enyu, mwahanakwe!>>#24:3 mwasiwa gwa nni nyo mbwiyeni so mwene funaga ira mwaalrembelre atu atene? Va fwanyeya ira mulombwana Jowabe ohoona ira mwene Davi afuna aviringanihe. Mwa enne ohomusumulula. 4Mbwenye Davi ohokalelave ntindi zela mazu awongile liye, kabanlre jowonga ja Jowabe na asogolrelri a anyakondo. Noira enne, mulombwana Jowabe ohomaruwaga na asogolrelri a anyakondo ale vamentoni va mwene vale ira kadowe karome akontari atu atene a Izarayeli. 5Evale aliwa kagamaruwile, kohodowaga lambuwa muhindje Jordawu, aliwa roma mabasiwa sidadi ya Aroweri, pandi ya muwononi odjana wa sidadi inafwanyeya nimburo notita na Gadi, aliwa kwaranyavo dowa pandi ya Jazeri. 6Nokuma evale kohodowaga Jileyadi, aliwa vira dowa mwilamboni mwa Kadeji wakaletcha akuda Eti. Noira eno, kohodowaga Dani ante aliwa dowa fiya Sidoni. 7Noira eno, kohodowaga nimburo nolimba notawelamo nafwanyeya Tiru, na sidadi datene da aEvi na sidadi datene da akuda Kana. Noira enne, kohorungunuwaga, aliwa dowa pandi ya suli wa ilambo ya Juda, aliwa dowa fiyeda Beriseba. 8Mwa enne kagamanle wendawenda ilambo yatene, kohowelelaga Jeruzalemu. Muwari mwa ulrendo wewa watene kamanle medi mitanu na minnayi na malambo 20. 9Noira enne, mulombwana Jowabe ohodowaga muwandelamo mwene Davi, indjiva wa atu atene a Izarayeli. Ohowongaga eraga: <<Alombwana olimba mirima a Izarayeli owana na supada kali 800.000 eto a nlogo na Juda kali 500.000.>>
Mulugu ohotonga yotega ya Davi
10Mbwenye Davi agamanle akontari atwale, ohoroma umbuwela zela ibure yasakanyile liye muwari moakontari atu. Na mwasa wenne, mwene Davi ohonvepaga Yehova eraga: <<Yehova miyo duhutegelani zela jejo jiirile miyo, daakontarigi atu. Yehova nnouvepani ira mukurumuwele yodawa yaga miyo namalaba wenyu. Mwasiwa miyo dihisakanya uzimora!>> 11Noira enne, mmetcheloni muwa, mwene Davi agavenyile na mabebehene, mazu a Yehova kohozaga wa namafiyiheda Gadi, namaona wa Davi ira: 12<<Udowe wamuwandele Davi wire: <Yehova gunawonga ira: <<Miyo nnafuna diwonge jengo taru jabure. Usakulre muwari mwa jengo taru ji ira miyo duirele yenno inasakulre we!>> > >> 13Evale namafiyiheda Gadi agawandeliwe mazwale, ohodowaga nfwanya Davi, liye kwi: <<Yehova unouvaha jabure taru ji ira usakulrevo. Kodi weyo unafuna ira mwilamboni mwawo muze ndala fiyeda yaka taru? Owu unafuna umale medi miraru amwidanawo kautamangihaga? Owu unafuna ira mwilamboni mwawo muze itukwa ya atu kakwaga fiyeda malambo mararu? Uumbuwele inafuna we sakulra muwari mwa jabure taru ji ira miyo didowe damuwandele Yehova wenno udirumile!>> 14Evale mwene Davi ohomuwakulaga namafiyiheda Gadi, liye ira: <<Miyo dili mmakatamihoni eni. Yapamiwa evo inafwanela nigwele mmandani mwa Yehova, mwasiwa Yehova gwa tangaranga dilukulu. Mbwenye ira nigwele mmandani mwa amwidani, kanifunile.>>
15Evale Yehova ohorumiha itukwa ya atu mwilamboni mwatene mwa Izarayeli, romela mabebehi ante ora yafunile Yehova. Mwa enne kohokwa atu ohokala a masika romela Dani ante dowa fiya Beriseba alombwana okwakwana 70.000. 16Nomala eno, mungelro otolotcha ule agawongonle muwono waye ira atolotche Jeruzalemu, Yehova eto omuhiyiha mungelrole yabure yafuna liye ira. Liye kwi: <<Ikwakwana! Kakumihawo ndanda nawo.>> Fwanyeya ira ora yenno Mungelro wa Yehova ule afwanyeyaga nimburo nobubudavo jalo na mulombwana Arawuna nkuda Jebuzi. 17Davi ohomuonaga mungelro aapa atu ule. Evale ohowongaga na Yehova eraga: <<Yehova utegenleni gu miyo. Dihisakanya ubure. Nnga mabila ala kautegenleni nni? So nnafuna ira muditonge miyo damwinnya vamohi na vande va ababaga!>>
Davi ohomanga ibuwa ya Yehova
18Siku nimohive nenne namafiyiheda Gadi ohozaga wa Davi liye muwandela ira: <<Uvenye udowe, wammangele Yehova ibuwa ya mukuto, nimburo nobubudavo jalo na mulombwana Arawuna, muJebuzi.>>#24:18 wammangele Yehova ibuwa ya mukuto: AIzarayeli kahanavolowe mwilamboni mwa Kana, Mulugu ohovayela wonga ira: <<Vasogolro nnoza dutonyihedeni nimburo nokuta mukuto.>> (Detoronomiyo 12:5-6,11-14) Fwanyeya ira Mulugu amutonyihedile Davi nimburo nobubudavo jalo na mulombwana Arawuna wandamelana sidadi ya Jeruzalemu. (1 Koronika 22:1) Mwa enne tchi tempu yaromile atu iziwa nimburo nomutamalela nawonga Mulugu wanle. (1 Amwene 8:29, 9:3; 2 Amwene 21:4,7; 2 Koronika 7:12,16) Ku wewo wamangiwe eto Nyumba ya Yehova. 19Evale mwene Davi ohovenyaga ira airena nnga mwemo mwamuwandenle Gadi eto nnga mwemo Yehova mwawongele liye. 20Evale mulombwana Arawuna againg'anne ha ule, ohomuonaga mwene Davi vamohi na anamalabaye atene kazaga wa liye. Mwa enne liye ohodowaga, liye mukokorela mwene Davi aoramihaga kove yaye ante fiyiha vati. 21Noira enne, Arawuna ohofukaga eraga: <<Kodi mwasiwa gwa nni mbwiyeni so mwene, nyo zaga wa miyo namalaba wenyu?>> Davi ohowakulaga, liye ira: <<Hiyo nazela ira nigule nimburo nawo nobubudavo jalo ira nimangevo ibuwa ya mukuto wa Yehova ira Yehova awande maliha ubure unafwanyeyana atu atene.>> 22Evale mulombwana Arawuna ohowongaga na Davi eraga: <<Tukulani mbwiyeni so mwene. Miyo nnauvahani ira muvelele yenno munafuna nyo! Nnouvahani eto ng'ombe diwa ira akale mukuto otumeya eto nnouvahani jobubudana vamohi na magologolo ogumanihana ng'ombe di ira jikale kuni dotumeyana mukuto. 23Jatene eji miyo nnouvahani nyo mbwiyeni so mwene!>> Arawuna ule ohowongagave eraga: <<So mwene, Yehova Mulugu wenyu awande uonani moziveliwa.>> 24Mbwenye mwene Davi ohomuwandelaga Arawuna kwi: <<Nari. Miyo nnafuna dibabihe gula jatene eji, tchoira miyo kannavelela wa Yehova Mulugu waga mikuto dotumeya dedo divahiwe miyo sayi sayi.>> Mwa enne Davi ohogulaga nimburo nobubudavo jalo nne vamohi na ng'ombe dile na kobiri 50 da parata. 25Noira enne, Davi ohodowaga manga ibuwa ya mukuto wa Yehova eto ohovelelaga mikuto dotumeya na jovelela ja murendele. Mwa enne Yehova ohorumelaga yovepa ya Davi. Evale ubure watene wanna atu muIzarayeli mwatene wohomala.
Kukala mazu a livuru na 2 Samuweli.
Currently Selected:
2 Samuweli 24: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
