1 Amwene 1
1
Ulula wa mwene Davi
1Mwene Davi ohomala ulula, aganna yaka didjindji. Evale anamalaba aye komukunelana manta, mbwenye masikive eno liye oona didila. 2Na mwasa wenne, anamalaba aye ale kohomuwongagana keraga: <<Mbwiyeni so mwene, hiyo nnafuna nidowe nanvende namwali ahamuiziwile mulombwana ira akalege na nyo ira auing'anelegeni pama. Unagonege mmambalo mwenyu#1:2 Unagonege mmambalo mwenyu : Kafunaga nvenda namwali, kaali ira Davi amugonegena mbwenye ali ira agonege mmambalo mwa liye, ira didila aona liye umalege. ira muwandege ona kaha.>> 3Mwa enne kohodowaga pandi datene da Izarayeli ira kanvende namwali mmohi oriya. Kagadowile nvenda, kohonfwanyaga namwali mmohi aitaniwa Abizage, wa tatamo ya Sunemi, aliwa muzana wa mwene. 4Fwanyeya ira namwali ule ali muhiyana oriyetchetcha eto ali namwali ofwanelela muing'anelaga pama mwene. Evale ohoroma mulaba mwene Davi. Fwanyeya ira namwali ule ali muhiyana oriyetchetcha. Liye ohoroma mukalihavo mwene ule eto liye mulabaga. Mbwenye namwali ule Davi kamugonnena.
Adoniya ohofuna jokala mwene
5Evale Adoniya, mwana Davi wenno ambanle liye na Ajite, ohovitetelaga eraga: <<Miyo nnafuna dikale mwene.>>#1:5 Miyo nnafuna dikale mwene. Sogolro nnovwa ira Davi oholumbela ira mwanaye Salomawu gwafuna kala mwene liye agakwile. (1 Amwene 1:17,30,35) Tchoira Davi eto ohotukula fwaramento datene dakoyile liye ira Nyumba ya Yehova imangiwe, liye nvaheda mwanaye Salomawu amurumaga ira amangegena. (1 Koronika 22:1-11) Mbwenye mulombwana Adoniya agaiziwileve, ohoroma jofuna kala mwene. Ku wonga Adoniya ohovenda jovikaliha mwene ahali mofuna mwa babaye. Evale ohovendaga aaterelado a kondo vamohi na aliba wendiha kavalo vamohi na alombwana 50 ira katamangege sogolro waye.#1:5 Adoniya osayela alombwana 50 ira katamangege sogolro waye ira liye aoneyege nnga mundimuwa ohokala wa masika ira aIzarayeli kamuiziwe eto sogolro kamuwatchele nnga mwene. 6Eto fwanyeya ira malambo a mundulrimu mulombwana Adoniya airana yengo yabure, babaye Davi kamusumululetcha. Adoniya eto afwanyeya agali mulombwana oriyetchetcha. Eto fwanyeya ira zela baliwa waye, Adoniya ali wenno amuharile marafula Abisalawu. 7Adoniya ohovwanana na Jowabe wenno mmaye afwanyeya agali Zeruwiya, vamohi na Abiyatare wenno ali namakuta, liye ira: <<Miyo nnafuna dikale mwene!>> Evale aliwa kohorumela jejo jawongilege liye, aliwa roma muhara eto aliwa mukamihedaga. 8Mbwenye namakuta Zadoki na Benaya mwana Joyada, na namafiyiheda Nata, na Simeyi, na Reyi vamohi na alombwana a kopolo a Davi, kohokondaga muhara mulombwana Adoniya. 9Evale mulombwana Adoniya ohotukulaga mabila, ng'ombe na ana ng'ombe oruva, liye aitana abalaye atene anno kafwanyeya kagali ana Davi na anamalaba atene a Davi anno kali alombwana a Juda, aliwa dowa vamohi wandamelana nibwe na Zoweleti neno nnafwanyeya wandamelana isime ya Rojeli. Kagafiyile wewule, Adoniya ohopaga anavinyama, liye velela mikuto muwari mohambihiwa umwene. 10Mbwenye namafiyiheda Nata na Benaya vamohi na alombwana a kopolo a Davi, liye kaaitanne. Nne mbalaye Salomawu kamuitanne.
Davi owonga ira unafuna kala mwene gu Salomawu
11Noira enne, namafiyiheda Nata ohodowaga muwandela jejile Bateseba wenno ali mmaye Salomawu, liye kwi: <<Kodi weyo kuvwile jinaireya? Adoniya wenno Davi umbanle liye na Ajite eni gu mwene. Eto mbwiyihu Davi jejo kaiziwile. 12Miyo nnafuna duwelruze eni. Akala weyo unofuna vulumutcha ingumi yawo vamohi na ingumi ya mwanawo Salomawu,#1:12 vulumutcha ingumi yawo vamohi na ingumi ya mwanawo Salomawu: Tchoira tempu yenne Nata ohoiziwa ira Adoniya akala mwene, unompa Salomawu vamohi na mmayiwa. Tchoira Adoniya ohomala iziwa ira babaye Davi oholumbela ira Salomawu gwafuna kala mwene vamalroni vaye, liye agakwile. Nona Nata amuwelruzaga Bateseba mmaye Salomawu ira awande vulumutcha ingumi yaye vamohi na ingumi ya mwanaye. 13uvenye tchineneva eni, udowe wawonge na mwene Davi wire: <Mbwiyeni so mwene, kodi nyo kamulumbenle wa miyo vano namalaba wenyu ira: <<Mwanawo Salomawu gunafuna kala mwene odiharela miyo ira agarati vampandoni vaga va umwene atongege?>> Nnga mwasiwa gwa nni Adoniya hambihiwaga umwene?> 14Tempu inawongege we eno na mwene, miyo nnovolowa ira na miyene diwande wendjeda mazu mamohive.>>
15Evale Bateseba ohomaruwaga, liye dowa kwartuni wa mwene ira adowe awonge na liye. Mwa tempu yenne Davi ohoulula bure eto namwali Abizage wa tatamo ya Sunemi ule, gwamulabetcha 16Evale muhiyanole Bateseba agavolowile mmba mule, ohomukokorelaga mwene Davi momuriheda. Evale mwene onfukaga kwi: <<Katchiye, wazela nni?>> 17Liye ohowakulaga eraga: <<Mbwiyeni, nyo moholumbela wa miyo namalaba wenyu mwa nzina na Yehova Mulugu wenyu ira: <Mwanawo Salomawu gunafuna kala mwene odiharela miyo, atongege vampandoni vaga va umwene.> 18Eto kaing'anani, peno Adoniya uhambihiwa umwene, nyo mbwiyeni so mwene mwahaiziwile. 19Liye uhuvelela mikuto didjindji dene, ng'ombe na ana ng'ombe oruva na mabila eto wahaitana ahiminyu atene so mwene vamohi na namakuta Abiyatare, na Jowabe musogolrelri wenyu wa anyakondo. Mbwenye namalaba wenyu Salomawu liye kamuitanne. 20Mbwiyeni so mwene, aIzarayeli atene anauing'anani nyo ira mmuwonge wenno munanfuna nyo ira akale mwene vampandoni venyu. 21Mbwiyeni so mwene, mwahawonge yengo, nyo mwafiyeda kwa mudowa mwavuma na makolo enyu, miyo na mwanaga Salomawu nnaoneyege nnga amwidani a Adoniya.>>
22Mwa enne Bateseba awongagave enne na mwene, tchi tempu yafiyilege namafiyiheda Nata. 23Evale kohomuwandelaga mwene Davi ira: <<Namafiyiheda Nata uhuza.>> Noira enne, liye ohofiyaga vamentoni va mwene, liye mukokorela mwene momuriheda. 24Noira eno, Nata ohowongaga eraga: <<Mbwiyeni so mwene, kodi uwongile gu nyo ira: <Adoniya gunafuna kala mwene odiharela miyo eto agarati vampandoni vaga otonga.>? 25Tchoira peno eva eni liye uhudowa velela mikuto didjindji dene, ng'ombe na ana ng'ombe oruva na mabila eto waaitanne ahiminyu, na asogolrelri enyu a anyakondo na namakuta Abiyatare. Eni aliwa anadja eto anang'wa vamentoni vaye kawongaga keraga: <Mwene Adoniya oye! Oye!> 26Mbwenye liye kadiitanne miyo dagali namalaba wenyu, nne namakuta Zadoki, nne Benaya mwana Joyada, nne mwaninyu Salomawu namalaba wenyu. 27Kodi jatene jejo jikumile wa nyo mbwiyeni so mwene? Nnga mwasiwa gwa nni muza mwahaniwandelaga hiyo anamalaba enyu zela wenno unafuna kala mwene ouharelani nyo ira agarati mpando wa umwene wenyu mbwiyeni so mwene?>>
28Evale mwene Davi ohowakulaga eraga: <<Kamuitaneni Bateseba.>> Evale liye ohovolowaga, liye za imela vamentoni va mwene. 29Noira enne, mwene Davi oholumbelaga eraga: <<Miyo nnawonga vamentoni va Yehova okalawo, wenno uwandile wombola ingumi yaga muwari mwa makatamiho aga matene. 30Mokwakwanela nnga mwalumbenle miyo na weyo mwa nzina na Yehova Mulugu wa Izarayeli diiraga: <Na ibaribari mwanawo Salomawu unoza akale mwene odiharela miyo, aze agarati vampandoni vaga vamalroni vaga>, na ibaribari yenno yalumbenle miyo nnoirana siku na peno!>> 31Noira eno, Bateseba ohokokoraga, liye oramiha muru waye ante fiyiha kove yaye vati vamentoni va mwene Davi, liye kwi: <<Mbwiyeni so mwene Davi, umwene wenyu udowegeve sogolro kala no kala!>>
Salomawu ohambihiwa umwene
32Noira eno, mwene Davi ohowongaga eraga: <<Mudowe mwamuitane namakuta Zadoki na namafiyiheda Nata na Benaya mwana Joyada.>> Evale kohaitanaga, aliwa za fiya vamentoni va mwene. 33Kagazile, mwene ohawandelaga eraga: <<Mwaatukule anamalaba aga eto mmugwelihe mwanaga Salomawu vakavaruni vaga, mmaruwe mudowe isime ya Jiyoni.#1:33 isime ya Jiyoni tchi isime yafwanyeya unde wa sidadi ya Jeruzalemu. Agali isime ya Rojeli wewo wadowile hambihiwa Adoniya yafwanyeya wandamelana kilometuru imohi unde wa sidadi. 34Mwadowa, namakuta Zadoki na namafiyiheda Nata kamuhambihe ira akale mwene wa aIzarayeli. Mwagamanle muhambiha, muimbe palraza, mukuwe muire: <Mwene Salomawu oye!> 35Era eno mmaruwe, liye akale vasogolro, nyo mmuharege mundulri mwaye. Liye aze agarati vampandoni vaga va umwene eto atongege vamalroni vaga, mwasiwa miyo guwongile ira liye akale wenno unafuna asogolrelraga aIzarayeli na aJuda.>>#1:35 liye akale wenno unafuna asogolrelraga aIzarayeli na aJuda: Fwanyeya ira malambo a mundulrimu Sawuli agakwile, muwari mwa aIzarayeli atene, wohokala gaweya. Tchoira aIzarayeli atene kafwanyeya kagali malogo kumi na menli. Eto fwanyeya ira nlogo na Levi kanagaweliwe ilambo, so aliwa kalaba mabasa a Mulugu zela sogolrelra mikuto da Yehova nari afundjiha atu zela ja Mulugu. (Detoronomiyo 10:8-9; Nemiya 8:8-9) Muwari mwa malogo kumi na nimohi kahanle, malogo kumi kohobandana vamohi, aliwa itaniwaga aIzarayeli eto aIzarayeli ale kohokana mwene wewa aitaniwa Isbozeti. Nlogo nimohi nahanle na Juda kohokana mwene wewa aitaniwa Davi. Mbwenye vakwile Isbozeti, aIzarayeli kohosakulra ira kasogolrelriwege na mwene wa Juda, wenno afwanyeya agali Davi. Fwanyeya ira Davi afuna mwanaye Salomawu akale mwene wa aIzarayeli atene, ku wonga umwene wa aIzarayeli na umwene wa Juda. Vasogolro nnovwa ira Salomawu agakwile, aIzarayeli kohofiyeda konda tongiwa vamohi na akuda Juda. Evale aIzarayeli kohokana amwene ewa eto akuda Juda kohokana amwene ewa, atene kagali aIzarayeli ve. (1 Amwene 12:1-19) 36Noira enne, mulombwana Benaya mwana Joyada ohomuwakulaga mwene Davi eraga: <<Jikale eno! Eto Yehova, Mulugu wenyu mbwiyeni so mwene akwakwanelihede jatene jejo ira jiireye! 37Eto Yehova akale na Salomawu na makalelo nnga akaletcha liye na nyo mbwiyeni so mwene. Eto asakanye ira utongi waye ukale utongi undimuwa kwaranya utongi wenno wanna nyo, mbwiyeni so mwene Davi.>>
38Noira enne, namakuta Zadoki na namafiyiheda Nata vamohi na Benaya mwana Joyada vamohi na aKereti na aPeleti,#1:38 aKereti na aPeleti: kafwanyeya kagali agwarda a Davi. Afwase tchali aIzarayeli. (Ezekiyeli 25:16; Sofoniya 2:5) kohomutukulaga Salomawu, aliwa mugweliha vakavaruni va mwene Davi, aliwa mudowana isime ya Jiyoni. 39Evale namakuta Zadoki ohovolowa mmusasani mwa Yehova, liye tukula nnyanga mwafwanyeya makura, liye mukutulela mulombwana Salomawu. Noira enne, kohoimbaga palraza, evale atene kohokuwaga keraga: <<Mwene Salomawu oye!>> 40Noira enne, atu atene kohomaruwa kawelelaga muJeruzalemu Salomawu liye kala vasogolro aliwa muharaga mundulri mwaye kaimbaga falauta eto kakuwaga mohagalala wohokala wa masika, fiyeda teya rendeya.
41Mwa enne mulombwana Adoniya vamohi na atu atene aaitanne liye ale, kagamanle dja, kohovwaga kuwa wa palraza ule. Evale Jowabe agavwile enne, ohowonga eraga: <<Kodi kuwa watene nnavwa hiyo okumela musidadi mu, kodi muli nni?>> 42Evale awongagave enne, tchi tempu yafiyaga mulombwana Jonata mwana namakuta Abiyatare. Adoniya agamuonne Jonata azaga, ohowongaga eraga: <<Kafiya, mwasiwa weyo uli mulombwana wapama. Eto unazana jengo japama ira uniwandele!>> 43Mbwenye Jonata ohomuwakulaga Adoniya eraga: <<Nari. Miyo dazela wonga ira mbwiyihu mwene Davi uhumuhambiha Salomawu umwene. 44Mwene eto uhumuruma namakuta Zadoki na namafiyiheda Nata na Benaya mwana Joyada na aKereti vamohi na aPeleti ira kanvelele Salomawu. Aliwa mugweliha vakavaruni va mwene Davi. 45Noira eno, namakuta Zadoki na namafiyiheda Nata, aliwa muhambiha umwene isime ya Jiyoni, nomala eno aliwa dowaga mohagalala. Nona eni peno musidadi mu muli dugu dugu dugu. Akala mohovwa kuwa, jiireyilemo musidadi mu ti jejo. 46Eto eni Salomawu ugarati mpando wa umwene. 47Eto asogolrelri atene a mwene kohodowa, aliwa murelihaga mwene Davi kamuwongagana keraga: <Mulugu wenyu asakanye ira nzina na Salomawu nikale nindimuwa kwaranya nzina nenyu eto asakanye ira utongi waye ukale undimuwa kwaranya utongi wenyu.> Noira eno, mwene Davi ohokokora vakamani vaye. 48Agakokorile mwene ohowonga eraga: <Otamaleliwa akale Yehova Mulugu wa Izarayeli wenno uwandile muhambiha mwanaga vamalroni vaga meso aga kaing'anaga jatene jejo!> >> 49Evale Jonata agamanle wonga ejile, aliba itaniwa atene kafwanyeya evale na Adoniya kohorendjeyaga, aliwa venya, kada mutu haraga ndila yaye, aliwa dowaga jiwa.
50Noira enne, mulombwana Adoniya ohoroma muova Salomawu, na mwasa oova ohovenyaga, liye dowa hideda vannyangani va ibuwa ya mikuto.#1:50 liye dowa hideda vannyangani va ibuwa: Ibuwa ya mukuto yohokana mmwendoni muwa minnayi mwemo mwakala nnga manyanga mwemo anamakuta mwazoliha atu sangiri na mikuto. Adoniya ahindaga mwemule, aumbuwela ira nali nimburo notchena eto kavali jowandeya apiwe agali evo. Eto fwanyeya ira wenno anna mulandu vamentoni va Mulugu, masiki ahidede manyanga a vaibuwani liye agomela piwa. (Ezodu 21:14) 51Evale mwene Salomawu ohowandeliwaga ira: <<Eni Adoniya unauovani nyo so mwene eto uhudowa hinda vannyangani va ibuwa liye iraga: <Miyo nnafuna mwene Salomawu alumbele peno ira kaza adipiha miyo na supada!> >> 52Salomawu agavwile ejile, ohowongaga eraga: <<Liye akala mutu wapama, miyo nnolumbela ira kannamorihediwa vati nne nsisi naye nimohi. Mbwenye mwa liye mufwanyeya ibure, unagomela kwa.>> 53Evale mwene Salomawu oharumaga atu ira kadowe kamukumihewo ibuwani wafwanyeya liye ule. Evale atwale kagadowile, kohomukumihawo, liye za. Agazile ohokokoraga vamentoni va mwene Salomawu, aoramihaga muru waye ante liye fiyiha kove yaye vati. Evale mwene Salomawu ohomuwongagana, liye ira: <<Venya udowege vande vawo!>>
Currently Selected:
1 Amwene 1: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
