2 Samuweli 23
23
Mazu ogomiheda a Davi
1Ala ba mazu ogomiheda a mwene Davi mwana Jese.#23:1 Ala ba mazu ogomiheda a mwene Davi Mwana Jese. Zela ukwa wa mwene Davi, nione 1 Amwene 2:1-4. Ba mazu a Davi wenno ahambihiwe na Mulugu wa Jako ira akale mwene eto wenno ali mwinnya oimba nyumbo dapama muwari mwa Izarayeli.
2<<Munemba wa Yehova, gunawonga mwa miyo. Mazwaye anafwanyeya vamilomoni vaga.
3Mulugu wa Izarayeli guwongile, Nibwe na Izarayeli gudiwandenle ira:
<Mwene wenno unatonga na makalelo apama, mwene wenno unatonga amuovaga Mulugu
4unalingana no wareya wa nzuwa nakumaga na mabebehi, zulu wahakale mirambo eto unalingana na muzongwe unameliha makupu mwilamboni ya vati.>
5Eto Mulugu unaza arelihe vande vaga na makalelo anno. Mwasiwa liye uhusakanya na miyo yopangana yohomala, yokwakwanela, yolimba. Dihikana ibaribari ira liye unodikamiheda eto unodivaha jatene jinafuna miyo!
6Mbwenye atu ohokana mabasa anaza kakale nnga minga dedo nnavokediwa kokolani mwasiwa kannahindiwa na manda!
7Mbwenye unafuna hinda unatukula momba owu mwanango, liye dowa wutana minga dile, liye dowa tumeya na munlo!>>
Anyakondo a kopolo a mwene Davi
8Ala ba mazina a anyakondo a kopolo Davi anna liye: Oroma ali mulombwana Josebe-Basebete nkuda Takemoni. Liye ali muwari mwa alombwana araru a kopolo eto ali mundimuwa wa afwaye. Liye ohotukula mwanangwaye, liye mala apana alombwana 800 kondo imohive.
9Omuharela ali mulombwana Eliyazari, mwana Dodo. Dodo babaye ali Awoyi. Liye afwanyeya muwari mwa alombwana araru a kopolo a Davi. Siku nimohi aFilistewu kohomaruwaga, aliwa dowa kondoni ira kawane na aIzarayeli. Eliyazare na Davi kohapokiha aFilistewu. Evale aFilistewu kagavenyihanne kazaga, aIzarayeli kohotawaga. 10Mbwenye Eliyazare ohodowa aporotcha aFilistewu ale ekave. Ndanda naye nohowaheyaga fiyeda umma agali na supada naye nene mmandani. Siku nenne Yehova ohavahaga gondjiha wohokala wa masika. So aIzarayeli afwaye ale kazilege liye agamanle apa aFilistewu ale, aliwa za ira katukulege jowanana janna atu okwa ale.
11Waneraru gu mulombwana Sama, mwana Aje nkuda Harari. Fwanyeya ira siku nimohi aFilistewu kohogumanelaga tatamo ya Leyi, wewo wafwanyeya munda wa bwanda pwi. Evale aIzarayeli kohatawaga aFilistewu. 12Mbwenye Sama ohoimelaga vari va mundole ambarelaga, liye apa aFilistewu. Yehova ohavaha gondjiha ohokala wa masika.#23:12 Yehova ohavaha gondjiha ohokala wa masika.: Wanle Mozeji ohawandela aIzarayeli makalelo owana kondo. Liye eto ohawandela ira kahaove amwidaniwa mwasiwa Yehova Mulugu wenyu unodowa vamohi na nyo ira awane na amwidaninyu ira muwande agondjiha. (Detoronomiyo 20:4) Voira Sama ali muIzarayeli mmohive awandile muroromela Mulugu, Mulugu oholaba muwari mwa mutu mmohive wenne ira aatamangihe aFilistewu.
13-14Tempu yohanda iwandamelaga, muwari mwa alombwana a kopolo 30 a Izarayeli, kohokalawo alombwana araru kadowilege wafwanyeya Davi nimburo nolimba notawelamo, nifukwe na Adulawu. Mwa tempu yenne anyakondo a aFilistewu kakungilege misasa diwa ndabo na Refayina, tatamo ya Beleme. 15Davi ohowongaga ira: <<Nnosauwela nnga mutu adivahe mahindje a isime inafwanyeya wandamelana va mulango wa Beleme!>> 16Mwa enne alombwana araru a kopolo ale kohovenyaga, aliwa dowa xolra vakapamentoni va aFilistewu, aliwa dowa runga mahindje isime yenno yafwanyeya wandamelana va mulango wa Beleme. Mbwenye kagafiyilena mahindjale wa Davi, liye kang'wilege. Mbwenye akutulenlege vati, vamentoni va Yehova. 17Liye ohowongaga eraga: <<<<Yehova miyo kannang'wa mahindjala! Tchoira miyo dang'wa mahindjala, inakalege nnga ding'wile sangiri na alombwana kazuzumihile vingumi diwa, kadowa karunga mahindjala kazana!>> Mwa enne liye mahindjale kang'wilege. Ti jejo jairile alombwana araru a kopolo ale.
18Eto mulombwana Abizayi, mwana Zeruwiya Jowabe mbalaye ali mundimuwa wa anyakondo 30 a kopolo ale. Siku nimohi liye ohotukulaga mwanango waye kondoni, liye fiyeda apana atu 300. Mwa enne nzina naye nohoroma vweya kalaga nnga alombwana araru a kopolo ale. 19Mulombwana Abizayi ule ali mutu ovweya bure muwari mwa anyakondo 30 a kopolo ale eto liye ali mundimuwa wewa. Mbwenye vweya wavweyile liye kwafiyile makalelo kavweyile alombwana araru a kopolo ale.
20Eto ohokalawo mulombwana mmohiwa aitaniwa Benaya, mwana Joyada wa sidadi ya Kabizeli. Liye ali mulombwana wa kopolo eto oirana jengo jidjindji. Liye ohapa anyakondo ambinli a kopolo a Mowabe. Liye eto ohodowa mpa podogoma mmulihani, vati vagali neve.#23:20 vati vagali neve: Neve tchi yengo yotchena nnga ntondje inamora zulu vamalroni va muzongwe unde wasimbwa didila. Neve damora, kinanyowela vati mbwenye nnowanda mala malambo mangasi mangasi dagali vati. Unde wakaha, neve diwa nnomala nyungulruwa. 21Benaya eto ohompa mulombwana mmohi eni nkuda Ijipitu, mulombwana mulukulu. Benaya ule annaga ikumbuzo bahi, mbwenye mulombwana owopiha ule ohokagana mwanango mmandani mwaye. Evale Benaya ohomukwivelaga, liye muwaka mwanango anna liye mmandani mwaye mule, liye mpana mwinnya. 22Ti jejo jairile mulombwana Benaya mwana Joyada. Evale liye nzina naye novweya nnga alombwana araru a kopolo ale. 23Liye ali mutu ovweya bure muwari mwa anyakondo 30 a kopolo ale. Mbwenye vweya wavweyile liye kwafiyile nnga makalelo kavweyile alombwana araru a kopolo ale. Davi ohomutukula, liye muhela kala musogolrelri wa agwarda aye anno kamuing'aneletcha.
Mazina a atu amohiwa kafwanyeya muwari mwa nikuru na 30
24Muwari mwa nikuru naitaniwa 30, alombwana kalimo ba ala: Azayeli wenno ali Jowabe mbalaye, mulombwana Eliyanani mwana Dodo wa sidadi ya Beleme, 25mulombwana Sama na mulombwana Elika, akuda Harodi; 26Helezi nkuda Palti, Ira mwana Ikesi nkuda Tekowa; 27Abiyezeri nkuda Anatoti, Mebunayi nkuda Husati; 28Zalimomi nkuda Awoyi, Marayi nkuda Netofa; 29Helebe mwana Bana nkuda Netofa, Itayi mwana Ribayi wa sidadi ya Jibeya, sidadi ya nlogo na Benjami. 30Benaya nkuda Piratoni, Hidayi wa mwana muhindje wa Gaji; 31Abi-Albomi nkuda Ariba, Azimavete nkuda Bawurimi; 32Eliyaba nkuda Saliboni, na ana Jazeni, na Jonata; 33Sama nkuda Harari, Ayawu mwana Sarari nkuda Arari; 34Elifeleti mwana Akajibayi, (Akajibayi babaye ali nkuda Makate), Eliya mwana Ayitofeli nkuda Jiloni; 35Hezarayi nkuda Karimele, Parayi nkuda Aribi; 36Igali mwana Nata, wa sidadi ya Zoba, Bani nkuda Gadi; 37Zeleki nkuda Amoni, Narayi nkuda Beroti wenno atukuletcha jowanana ja Jowabe mwana Zeruwiya; 38mulombwana Ira na mulombwana Garebe, akuda Itira; 39Mulombwana Uriya nkuda Eti. Gumaniha atenene kali alombwana 37.
Currently Selected:
2 Samuweli 23: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
