2 Samuweli 22
22
Davi ohomutamalela Yehova zela agondjiha amwidanaye
Salmu 18
1Davi siku namuwombonle Yehova mmandani mwa amwidanaye atene eto mmandani mwa Sawuli, ohomuimbela Yehova nyumbo ila eraga:
2Yehova gu nibwe naga, gu nimburo naga notawelamo eto gu maliba divunela!
3Yehova gu Mulugu waga, gu nibwe naga. Miyo nnatawela mwa liye. Liye gu defeza yaga eto gu kopolo dodivulusa, liye gu votawela vaga volimba eto liye gu nimburo naga notawelamo! Yehova gu Nvulusi waga. Nyo Yehova munowanda divunela muubureni mwatene!
4Miyo nnerege uvepani nyo Yehova, tchoira nyo muli ofwanela tamaleliwa. Mwa eno, miyo nnokala ovuneya mwa amwidanaga atene!
5Ukwa wohodirindja nnga mahindje omanganyeya a mbara! Eto dafuna dilrowe, ditolowe muwari mwa mwana muhindje otamanga.
6Mingohi da Nimburo na Anokwa dohodihinda eto maratuwero a ukwa kohodimanga!
7Mbwenye miyo mmakatamihoni mwali miyo dohomuitana Yehova. Miyo dohomuitana Mulugu waga ira adikamihede. Liye uhuvwa nizu naga muNyumbani munafwanyeya liye. Kuwa waga wohofiya baruni waye!
8Evale ilambo ya vati yohotekenyeya, aliwa roma berimaga. Eto maaliserisi a ilambo ya zulu kohongurumela eto kohorendeya na mwasa oira Yehova ohotakaleliwa valukulu!
9Utchi ohokuma mpunoni mwaye eto wanoni waye wohokuma munlo otolotcha. Makalra ohinda kohokuma mwa liye!
10Liye ohula zulu eto ohotita na mirambo dodiba mendoni waye!
11Liye ohovava unduli wa akerubi eto ohooneya agagwenle mapepelo a nipevo!
12Yehova ohomala vikunela na isi ilukulu. Mirambo domanganyeya, dozaleliwa mahindje, dohomuwerewera!
13Muwari momoneya wanna liye, kohojerimaga makalra a munlo!
14Noira eno, Yehova ohoruma nnga ndari zulu eto Wenno Ukwaranyile Jatene ohovweyiha nizu naye!
15Liye ohovoka mafumo aye, liye amwadana amwidanaye atene eto ohorumiha jerima eto ohagondjiha!
16Muwari mosumulula wa Yehova eto muwari mwa mwelra wavumile liye bahi, pazile oneya vati va bara eto maaliserisi a ilambo ya vati pivuhuleyile atu kaoneya!
17Yehova ohotapula muwono waye kumela zulu, liye dihideda, dikumihavo vari va mahindje madjindji vafwanyeya miyo!
18Yehova ohodiwombola mmandani mwa mwidani waga wa kopolo, na mmandani mwa ale kadiharahara. Mwasiwa aliwa kali olimba dikwaranya miyo.
19Miyo dagali mmakatamihoni, aliwa kohodifwanya. Mbwenye Yehova ohodibarela.
20Yehova ohodikumiha mwali miyo, dihiya nimburo na murendele. Liye uhudiwombola mwasiwa unodiziveliwa.
21Yehova udiirela upama na mwasa wa upama waga.#22:21 Yehova udiirela upama na mwasa wa upama waga. Mazwala ba amohive anafwanyeya Salmu 18. Ba mazu Davi alrembile liye muwari momutamalela Yehova na mwasa omuvulumutcha mmandani mwa amwidanaye atene vamohi na mmandani mwa Sawuli. Va Davi unamutamalela Mulugu zela makalelo awandile liye kwakwaneliheda mazu a Detoronomiyo 28:1,7. Tchoira Davi muwari moharahariwa na Sawuli, ohokonda muirela yabure mwasiwa Yehova kamurumelihile ira ampe. Magomelo uwa, Yehova asakanyedile ira Davi akale mwene. Nona Davi wongaga uhudivaha jotambilra jaga mwasiwa mandaga kitakanle. Eto uhudivaha jotambilra jaga mwasiwa mandaga kitakanle.
22Tchoira miyo nnoharetcha ndila da Yehova eto miyo kannasakanye yabure dimuhiyaga Mulugu waga.
23Miyo nnokwakwanelihedetcha jofuna jaye jatene eto miyo kannahiye mangano aye!
24Eto miyo kadiirilena yabure vamentoni vaye eto miyo nnakaletchave olapela wene na jabure.
25Yehova uditambilriha zela upama waga eto na mwasa oira miyo dili mutu ohokana yabure vamentoni vaye!
26Nyo muli ororomeleya wa atu anno anafwanyeya kagali ororomeleya eto muli okwakwanela zela atu anne ali okwakwanela.
27Nyo muli otchena zela atu anne ali otchena eto muli orutcha wa atu anne ali abure.
28Nyo munoavunela atu anne anaviyeviha, mbwenye meso enyu anaaing'ana atu ovitukulela ira mwaatitihe.
29Nyo Yehova muli panti yaga! Nyo Yehova munomoneya isi inafwanyeyana miyo!
30Nyo munodivaha kopolo ira dagalive meka, diwande wana na nikuru nompumbula na amwidanaga! Eto muwari mwa kopolo da Mulugu waga, nnowanda lupa muru vazulu viwa, miyo dowa morela pandi ya ule!
31Ndila ya Mulugu tchi ndila yapama. Eto Mazu a Yehova bokwakwanela. Liye gu defeza para atu anne anatawela mwa liye.
32Kodi uli Mulugu bani ahali Yehova? Eto uli nibwe bani ahali Mulugu wehu?
33Mulugu gu nimburo naga nolimba notawelamo eto gu kopolo daga eto liye unosakanyeda ira ndila daga dikale dofwanela vamentoni vaye.
34Liye usakanya ira mendo daga dikale nnga mendo da nase. Liye uhudiimetcha pama mamburo otama.
35Liye unoterenariha mandaga ira dadowa kondoni, diwandege tambula urwa nosakanyiwa na mukuwa.
36Nyo muhudivaha defeza yovulusa wenyu. Dikamiheda wenyu uhuwanda dikaliha mutu olimba.
37Nyo muhurambalaliha ndila yaga ira manyalo aga kahateredeye.
38Miyo dihiwanda ahara amwidanaga ante miyo fiyeda agondjiha. Miyo kadawelenle mundulri fiyeda atolotcha.
39Miyo dohatolotcha eto dohawamba ira kahawande venya akoka. Aliwa kogwela vamanyaloni vaga.
40Nyo muhudivaha kopolo dowanana kondoni eto muhusakanya ira ale anavenya ira kawane na miyo kaze kaririyele vati, manyaloni waga.
41Nyo muhusakanya ira amwidani aga kaditawe eto miyo dahatolotcha ale kadiidile.
42Aliwa kohodowa avepaga afwiwa ira kaakamihede, mbwenye kalivo aavunenle. Noira eno, kohomukuwela Yehova, mbwenye liye karumenle.
43Mwa enne miyo dohatchila ante aliwa fiyeda kala nnga tumbulru na vati. Eto dohatchakatcha nnga madogo a murampani.
44Nyo muhuwanda divunela mmaduguduguni mwali miyo na mulogo waga eto muhuwanda divaha ira dikale mwene wa malogo oindjivene. Atu dahaaiziwile miyo voroma vene, peno anadilaba miyo.
45Atu oza okumela vilambo dimohi kohoza dikokorela miyo eto kagavwile nizu naga, kohodivwelela mobaranya.
46Atu oza mirima diwa dohomala nyungulruwa, aliwa roma kumamo nyumba dolimba mwavitanle atu, kangurumelaga.
47Yehova ukalawo! Otamaleliwa akale wenno unafwanyeya agali nibwe naga! Eto oteteliwa akale Mulugu waga wenno unafwanyeya agali nibwe nodivulusa.
48Liye unafwanyeya agali Mulugu wenno unaaweliheda kunyakunya amwidanaga eto unaahela atu atene vati va umwene waga.
49Liye gudikumihilevo vari va amwidanaga. Nyo muhudivweyiha vari va atu anne kadiharahara. Nyo muhuwanda divunela mmandani mwa alombwana opa.
50Na mwasa wenno Yehova miyo nnoutamalelani vari va malogo eto nnoimba nyumbo dotamalela nzina nenyu!
51Mulugu gunanvaha gondjiha ulukulu mwene waye eto unomuoniha upama waye mutu wenne umusakunlre liye, wenno unafwanyeya agali Davi vamohi na ahimaye atene, malambo a mukalakala.
Currently Selected:
2 Samuweli 22: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
