2 Samuweli 21
21
Muselu wa aJibeyawu na ahima a mwene Sawuli
1Tempu ya mwene Davi wohooneya ndala yamanle yaka taru doharana dene. Muwari mwa enne mwene Davi ohonfukaga Yehova na mwasa wa ndala yenne. Evale Yehova ohomuwakulaga, liye ira: <<Ndalela ikalelewo na mwasa wa Sawuli vamohi na atu a vande vaye. Mwasiwa Sawuli ohapa akuda Jibeyawu.>>#21:1 Ndalela ikalelewo na mwasa wa Sawuli… Mwasiwa Sawuli ohapa akuda Jibeyawu: Fwanyeya ira tongiwa wa jotega ja mutu mmohi jinowanda za afwanya atu amohiwa yaka didjindji da sogolro. Tchoira ndala tchazile Sawuli agaliwo mbwenye agakwile wanle. Na makalelo amohive, akuda Amaleki kakwele jotega ja ababiwa. (1 Samuweli 15:1-3) Eto mwana Davi ambanle liye moraruwa na Bateseba akwele jotega ja babaye. (2 Samuweli 12:14) Eto Mulugu aatongile akuda Juda zela jotega ja Manasesi liye agakwile wanle. (2 Amwene 23:26, 24:3) 2Fwanyeya ira akuda Jibeyawu ale tchali a nlogo na Ana Izarayeli. Mbwenye kali atu a vang'ono ohala a aAmore. So Ana Izarayeli kere sakanya yopangana yowandana na aliwa. Mwa enne aliwa kagamanle sakanya nipangano nne, mwene Sawuli ohovenya, dowa roma wanaga na aAmore ale ira aape ira ilambo yatene yewa ikale ya aIzarayeli na aJuda. Na mwasa wenno, Yehova ohotakaleliwa, liye ziha ndala mwilamboni. Mwa enne mwene Davi agavwile mazu anne, ohaitanihaga aJibeyawu, liye mala awandelamo jatene. 3Evale Davi ohafukaga, liye ira: <<Nnga vireyile atu eno, nyo munafuna ira miyo duireleni nni? Tchoira miyo nnafuna duireleni upama uli watene munafune nyo ira mulando wehu amalihiwe, nyo muwande nireliha hiyo atu a Yehova!>> 4Evale aJibeyawu ale kohowakulaga, aliwa ira: <<Hiyo mulandu unna hiyo na mwene Sawuli vamohi na abalaye ira umale, inafuna hiyo kahi parata nne oru nari. Eto hiyo kannafuna mpa nne mutu mmohi wa Izarayeli, nari.>> Evale mwene Davi ohafukaga eraga: <<Nnga munafuna ira nuireleni nni?>> 5-6Evale aliwa kohowakulaga keraga: <<So mbwenye nnafuna mwaatukule alombwana atanu na ambinli muwari mwa ahima a mulombwana Sawuli wenno avendetcha jonitolotcha ira nahawande fwanyeya mwilamboni mwa aIzarayeli, ira hiyo nidowe naamangelele, aliwa kakwe vamentoni va Yehova Jibeya wewo wakala Sawuli, wenno asakulriwe na Yehova!>> Evale mwene Davi ohowakulaga eraga: <<Kavali makani, miyo nnouvahedani!>>
7Davi mbwenye ohomuhiya mulombwana Mefibozeti, mwana Jonata, Sawuli muzuliye na mwasa wa yolumbela yasakanyile Jonata mwana Sawuli na Davi vamentoni va Yehova. 8Mwa enne mwene Davi ohovenyaga, liye dowa atukula ahima a anapongwe ambinlene a mwana muhiyana Rizipa mwana Ayiya, anno aabanle liye na Sawuli, anno kaitaniwa Arimoni na Mefibozeti,#21:8 Mefibozeti unawongiwa veva kahi mwana Jonata nari. Ali mwana Sawuli wenno ambanle liye na Rizipa. Tchoira Sawuli ohomukana mwana aitaniwa Mefibozeti eto mwanaye Jonata ohomukana mwana aitaniwa eto Mefibozeti. vamohi na ahima a anapongwe atanu a Merabe mwana Sawuli, anno aabanle liye na Adiriyeli mwana Barizilayi, wenno ali nkuda Meyola. 9Ohatukulaga ahima atanu na ambinli ale, liye dowa avaheda akuda Jibeyawu. Akuda Jibeyawu ale kagaatukunle, kohadowagana mwangoni, aliwa amangelela vamentoni va Yehova. Mwa enne atene atanu na ambinli ale kohokwaga vamohi mwangoni wewule. Jejo jaireyaga maromelo ohanda jengo, ku wonga sevada aromaga wene rendiwa.
10Noira enne, muhiyana Rizipa mwana Ayiya ule, ohotukulaga sakwi, liye dowana tandela vanibweni wewule wakwile ahimaye ambinli na alombwana amohiwa atanu ale, roma gonelaga wewule, romela tempu ya mahandelo fiyeda siku narumbweliwege muzongwe atu atanu na ambinli kakwile ale.#21:10 romela tempu ya mahandelo fiyeda siku narumbweliwege muzongwe atu atanu na ambinli kakwile ale: Afwase mwana muhiyana Rizipa ohomala wandamelana medi mitanu na mmohi agali wewo. Eto liye na ntana kahiya ira mbalrame dovava zulu dingovolege maningo a atwale, nne na mahiyu kahiya ira anavinyama kazevo katakunege. 11Mwa enne Davi ohowandeliwaga jejile jaira muhiyana Rizipa, mwana Ayiya, wenno ali Sawuli mwendaye. 12Davi agavwile enne, oharumaga atu ira kadowe sidadi ya Jabeji-Jileyadi ira katukule makuva a Sawuli na makuva a mwanaye Jonata. Tchoira Sawuli na Jonata kagapiwile na aFilistewu ilambo ya Jilibowa, akuda Jabeji-Jileyadi badowile sidadi ya Bete-Seya, aliwa dowa mozemba, tukulavo mitembo diwa varampani vevo vaatomeyile aFilistewu.#21:12 aliwa dowa mozemba, tukulavo mitembo diwa varampani vevo vaatomeyile aFilistewu: AFilistewu kagampile Sawuli na Jonata, kadowile tomeya maningo ewa vatando vene sidadi ya Bete-Seya. Evale kohokala aIzarayeli okumela sidadi ya Jabeji kadowile na mahiyu, aliwa dowa kumihavo maningo a Sawuli na Jonata, aliwa dowa koya, aFilistewu kahaonaga. (1 Samuweli 31:11-13) 13Evale Davi ohotukulaga makuva a Sawuli na makuva a mwanaye Jonata eto agudela makuva a ana Sawuli atanu na ambinli kamangeleliwe ale. 14Mwa enne kohotimbelaga makuva a Sawuli ale na makuva a Jonata mwilamboni mwa Benjami, tatamo ya Zela wewo wakoyiwe mulombwana Kixi Sawuli babaye. Fwanyeya ira aliba rumiwa ale kohoirana jatene nnga mwawongele mwene Davi. Jagamanle ireya enne Mulugu ohorumelaga jolobela ja atu zela ndala yafwanyeya mwilamboni mule.
Kondo da aIzarayeli na aFilistewu
15AFilistewu kohowelelagave kana kondo na aIzarayeli. Evale mwene Davi ohovenyaga vamohi na anyakondo aye, aliwa dowa wana na aFilistewu. Evale kagawanile tempu ilukulu, mwene Davi ohowaheyaga. 16Eto ohokalawo nFilistewu mmohi aitaniwa Isbi-Benobe. Mulombwana Isbi-Benobe ule abaliwe muibalini mwa atu alukulu olapa. Liye ohokana mwanango wa mukuwa anyemela kilu taru eto ohokana supada nixa. Liye ohovenyaga, liye za ira awane na mwene Davi. 17Mbwenye mulombwana Abizayi mwana Zeruwiya, ohomukamihedaga mwene Davi, liye mulata Isbi-Benobe ule, fiyeda liye mpa. Noira enne, anyakondo atene a Izarayeli koholumbelaga zela mwene Davi keraga: <<Eni kuma peno dowa sogolro hiyo nadowaga kondoni, nyo kamuniharege. Tawiha ira munatimihe wareya wa Izarayeli!>>
18Jagaireyile enne, wohooneya eto kondo imohiwa sidadi ya Gobe, aIzarayeli na aFilistewu. Muwari mowana, mulombwana Sibekayi, wenno ali nkuda Husati, ohompaga nFilistewu mmohi eriwa Safe, mulombwana abaliwe muibalini mwa atu alukulu olapa ale. 19Noira enne, wohokala eto kondo imohiwa aIzarayeli na aFilistewu ilambo ya Gobe yenne. Evale mulombwana Eliyanani, mwana Jare-Orejimi wenno ali nkuda Beleme ohotukula mwanango mulukulu eto onyemela, liye mpana nFilistewu mmohi eriwa Goliya, nkuda Gate.#21:19 Goliya, nkuda Gate: Nafwanya 1 Koronika 20:5, anawonga Goliya wenno Davi ampile liye ohokana mbalaye eriwa Lami. Afwase Davi agampile Goliya, mbalaye ule gwahanlena nzina neno. 20Noira enne, wohooneya eto kondo imohiwa ilambo ya Gate. Wewule wohokala nFilistewu olapetchetcha anna jibuno tanu na imohi va kada ndanda eto tanu na imohi va kada nnyalo. Gumaniha jibuno jatene, kalaga jibuno 24. Liye eto abaliwe muibalini mwa atu alukulu olapa ale. 21Evale liye ohozaga, roma apokihaga aIzarayeli. Mbwenye mwene Davi mbalaye Simeya mwanayiwa eriwa Jonata, ohodowaga liye mpa.
22Atu annayi ale kakumile muibalini mwa atu alukulu olapa a Gate. Davi vamohi na anyakondwaye kohapa alombwana olapa ale.
Currently Selected:
2 Samuweli 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
