2 Samuweli 16
16
Gumana wa mwene Davi na mulombwana Ziba
1Mbwenye mwene Davi agakwaranyile vang'ono vazulu va mwango vale, mulombwana Ziba, namalaba wa Mefibozeti, ohozaga gumana na liye. Liye ohazagana aburu ambinli kaganna yogaratela vazulu viwa, kagatukunle pawu 200 na mazamwa 100 a uva oumma, na mazamwa 100 a jovaha jimohi jiwa, na kantilu mmohi osakanyiwa na tembe mwagazanle vinyu.#16:1 mulombwana Ziba: Zela muselu wa mulombwana Ziba, nione 2 Samuweli 9:2.
2Evale mwene Davi ohonfuka Ziba ule eraga: <<Kodi jejo jinna we jo unafuna ulabena nni?>> Ziba ohowakulaga eraga: <<Aburu ala dazelena ira atu a vande va mwene kagwelegevo. Pawu di na jodja jititi ji dizelena ira azombwe a mwene kadje. Eto vinyula dizelena ira atu kagomile no wenda mukokolani kang'we.>> 3Evale mwene Davi ohonfukaga akoka, liye ira: <<Nnga marafula patarawawo muzuliye Mefibozeti uli waani?>> Ziba ohomuwakulaga mwene eraga: <<Liye uhanle muJeruzalemu. Tchoira liye uwongile ira: <Peno mulogo wa aIzarayeli anodivaheda umwene wa mbwiyaga Sawuli!> >>#16:3 Ziba awongaga ira Mefibozeti ohowonga ira: Peno mulogo wa aIzarayeli anodivaheda umwene, era munukeda. Liye awongile jonama amunukedaga Mefibozeti ira aone upama vamentoni va Davi. Fwanyeya ira Mefibozeti ohofuna ira adowe vamohi na Davi so mbwenye Ziba gwamutawile, nomala liye dowa wa Davi roma munamelaga. Nione 2 Samuweli 19:24-29. 4Evale mwene Davi ohomuwandelaga Ziba eraga: <<Jatene ja mulombwana Mefibozeti, peno jinafwanyeya jagali jawo.>> Evale Ziba ohowongaga eraga: <<Miyo mbwiyeni so mwene, nnoukokorelani eto nnouvepani ira diwande fwanya mahala vamentoni venyu malambo matene!>>
Simeyi ohomutembelrelra mwene Davi
5Mwene Davi agafiyile sidadi ya Bawurimi, ohozaga mulombwana mmohi eni wa muibalini mwa Sawuli, wenno aitaniwa Simeyi, mwana Jera. Liye ohozaga amutembelrelraga mwene Davi. 6Eto ohoromaga nvoka mabwe Davi vamohi na atene kamulaba, vamohi na atu atene kawenda vamohi na Davi, vamohi na anyakondo kamuwerewerile mwene Davi.
7Simeyi ohomutembelrelaga Davi eraga: <<Kakumamo muno we mpanga we, mutu ohokana mabasa we! 8Eni Yehova unautonga na mwasa oira we wahapa atu oindjiva a mwene Sawuli! Eni Yehova uhunvaha umwene mwanawo Abisalawu. Eni peno weyo unafuna uone ubure, uhumala tembelrelreya mwasiwa uli mpanga!>>
9Abizayi mwana Zeruwiya agamuonne mulombwana Simeyi amutembelrelraga mwene Davi na makalelo anne, ohowongaga na mwene Davi, liye ira: <<Kodi mwasiwa gwa nni mwanambwa okwa ha wenna liye za utembelrelragani nyo mbwiyeni so mwene? Kadihiyeni miyo ira dimugwade muru waye!>> 10Mwene Davi mbwenye ohomuwakulaga mulombwana Abizayi eraga: <<Miyo kadinna pandi na nyo ana Zeruwiya! Akala umurumile gu Yehova ira aze aditembelrelre, kakalevo unafuna fuka zela jeji!>> 11Noira enne, Davi ohowongagave na Abizayi vamohi na asogolrelraye atene, liye ira: <<Mwana umbanle miyo unodisaka ira adipe! Nnga akala mwanaga ombala miyo unofuna jodipa, nnga ikalele mutu wa nlogo na Benjami ula? Mmuhiye liye asakanye jinafune liye. Mmuhiye liye aditembelrelre, tchoira gu Yehova umurumile ira airena! 12Eto Yehova afuna, liye podi za direliha miyo zela tembelrelriwa nnatembelrelriwa miyo wu!>>
13Noira enne, kohomaruwaga kadowaga muulrendoni mwiwa eto mulombwana Simeyi oaharaga mmambalo mwa mwango aatembelrelraga, aavokaga mabwe eto avenyihaga tumbulru. 14Evale mwene Davi vamohi na atu atene kafwanyeya na liye ulrendo wannaga atu ule, kowendagave kadowaga musogolrove ante aliwa dowa fiya tcherela ya muhindje Jordawu kagali owaheyene. Evale Davi ohovumaga.
Huzayi ohogumana na Abisalawu
15Mulombwana Abisalawu vamohi na atwaye atene a Izarayeli kohofiyaga Jeruzalemu. Eto mulombwana Ayitofeli mwa tempu yenno afwanyeyaga vamohi na aliwa. 16Evale nkuda Ariki, Davi nfwaye aitaniwa Huzayi wenno amurumile liye ule, agangumannena mulombwana Abisalawu ohoromaga kuwa eraga: <<Mwene oye! Mwene oye!>> 17Mbwenye mulombwana Abisalawu aganvwile mulombwana Huzayi akuwaga enne, ohonfukaga eraga: <<Kodi weyo nfwawo kahi Davi? Nnga mwasiwa gwa nni wahamuharaga nfwawo?>> 18Evale Huzayi ohowakulaga, liye ira: <<Nari, miyo mbwenye nnamuharege mwene wenno usakulriwe na Yehova na mulogo watene wa aIzarayeli eto nnokala vamohi na liye. 19Kodi ukalawo mutu mmohiwa ofwanela ira dimuhare? Na makalelo nnga dimulabile miyo babawo, nnafuna nnga eto dulabe na wenne wa mwanaye!>>
Abisalawu ohagonana ahiyana a babaye Davi
20Evale Abisalawu agavwile enne, ohomuwongana mulombwana Ayitofeli eraga: <<Miyo nnafuna udiwandele inafuna hiyo ira veva. Kodi niire avi?>> 21Evale Ayitofeli ohomuwakulaga Abisalawu eraga: <<Ugone na ahiyana ang'ono a babawo, anno waahiyile liye ira kaing'anelege vande vaye! Werana eno aIzarayeli atene anovwa makalelo anamwida we babawo fiyeda mutakaliha mozela agonana ahiyanaye. Era eno atene anawenda na weyo anolimbihiwa pama.>> 22Noira enne, kohokungaga musasa vazulu va nyumba para mulombwana Abisalawu. Evale mulombwana Abisalawu ohavolowagana amwendi a babaye ale, liye roma agonagana, aIzarayeli atene kaing'anaga.#16:22 liye roma agonagana, aIzarayeli atene kaing'anaga: Yeniyo yakwakwanela na mazu awongile Yehova. Nione 2 Samuweli 12:11.
23Fwanyeya ira mulombwana Ayitofeli tempu yawenda liye na Davi, awonga yengo, yengwele mwene Davi oirana. Eto vere liye adowa wa mulombwana Abisalawu, awonga yengo na mulombwana Abisalawu, na liyene oirana. Ku wonga atene kovwelela jejo jawonga mulombwana Ayitofeli kalaga nnga unawonga gu Mulugu.
Currently Selected:
2 Samuweli 16: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
