2 Samuweli 15
15
Abisalawu ohomuwaka babaye umwene
1Jagaireyile enne, vagamanle malambo, mulombwana Abisalawu ohodowa, liye gula aterelado mmohi otunyiwa na kavalo. Eto ohakana alombwana 50, aliwa tamangaga sogolro wa aterelado ule. 2Mwa enne va kada unde tcha na mabebehene, Abisalawu ovenya, liye dowa va mulango vavira mutu ira adowe atongiwe na mwene makani anna liye. Abisalawu amuona mutu azagana makani aye, liye omperutcha, nfukaga ira: <<Kodi munakumela waani?>> Evale mutule owakula ira: <<Miyo nnakumela sidadi ya Udje eto dili wa nlogo na Udje.>> 3Evale mutule amuwandelamo muselu wazana liye, Abisalawu omuwandela eraga: <<Muselu unazana we gwapama, weyo uhukana razawu. Mbwenye muwari munadowa we, kunanfwanyamo mutu uvahiwe na mwene ira atonge muselu wazana we! 4Ahakale kadihambiha dikala namatonga wa ilambwela, kada mutu akana makani aye erege zana wa miyo eto miyo derege tonga na makalelo apama.>> 5Mwa enne mutule aza ira amukokorele momuriheda, Abisalawu ule otapula ndanda naye, liye muhideda mutule, mbejari. 6Mwa enne mulombwana Abisalawu oairana aIzarayeli atene anno kadowana makani ewa wa mwene Davi ira katongiwe. Ayo ali makalelo Abisalawu asakanyile liye ira aholotche mirima da aIzarayeli atene ira kamuharege liye.
7Mwa enne vagavirile yaka nnayi, mulombwana Abisalawu ohodowaga muwongana mwene Davi eraga: <<Miyo dera mudirumelihe didowe sidadi ya Eboroni, dakwakwanelihede yolumbela yalumbenle miyo na Yehova. 8Mwasiwa miyo namalaba wenyu dikalaga Jesuri mwilamboni mwa Siriya, doholumbela wa Yehova ira: <Yehova mufiyeda diweliheda muJeruzalemu akoka, miyo nnoutamalelani muwari movelela mukuto!> >> 9Evale Davi ohomuwakula eraga: <<Kadowa mwa murendele.>> Evale mulombwana Abisalawu ohomaruwaga, liye dowaga Eboroni. 10Mbwenye Abisalawu agafiyile Eboroni, ohorumihaga milanyo mozembiheya wa malogo matene a Izarayeli eraga: <<Nyo mwavwa palraza irumaga, muwonge ira: <Mulombwana Abisalawu gu mwene unatonga Eboroni.> >> 11Fwanyeya ira mulombwana Abisalawu akumaga Jeruzalemu, kohokalawo atu 200 kadowile vamohi na liye. Mbwenye atwale kadowaga tchaiziwile yafuna Abisalawu sakanya wewule.
12Eto mulombwana Abisalawu agadowile Eboroni, muwari mokuta mukuto waye, ohomuitanaga mulombwana Ayitofeli nkuda Jilo ira aze kuma sidadi ya Jilo yali liye. Ayitofeli ali namawelruza wa mwene Davi. Mwa enne umwene wa mulombwana Abisalawu wohoulukulagave ulimbaga pama eto atu kahara jofuna jaye ira amuwake babaye umwene koindjivagave.
Davi ohokuma muJeruzalemu amutawaga mwanaye
13Mwa enne ohokalawo mutu mmohi azilege muwandela mwene Davi eraga: <<Eni aIzarayeli atene mmirimani mwiwa ananfuna Abisalawu ira akale mwene wewa.>> 14Evale mwene Davi agavwile mazu anne, ohagumanihaga anamalabaye atene na anyakondo aye atene kafwanyeya Jeruzalemu eraga: <<Kavenyani, nitaweni mwasiwa hiyo nahamutawe Abisalawu, kaninna makalelo anafuna hiyo vuneya. Mubaranye mukumemo musidadi mu, tawiha ira liye unazege na atwaye, anifwanye mwemu anipe na supada.>> 15Anamalaba a mwene ale kagavwile enne kohomuwakulaga keraga: <<Hiyo mbwiyeni nnoirana jatene munawonge nyo.>> 16Evale mwene Davi ohosogolraga, atu atene kafwanyeya vande vaye kohomaruwaga kamuharaga mundulri mwaye. So musidadi mule Davi aahiyilemo ahiyanaye ang'ono kumi bahi ira kaing'anelege vande vale.#15:16 amwendaye kumi: Mazwala anawonga zela yoviringaniha imohiwa ya Davi. Mwasiwa Mulugu ohowonga ira mwene kavende joakana ahiyana pwi pwi. (Detoronomiyo 17:17) Fwanyeya ira Davi kawandile wenda na makalelo ofwanela vamentoni va Mulugu zela ja ahiyana. (2 Samuweli 11:2-5,27) 17Mwene Davi vamohi na atu atene kamuharaga, kagakumile vande vale, kohodowaga aliwa imela nyumba yogomiheda. 18Mwa enne anamalabaye atene, na aKereti atene na aPeleti#15:18 aKereti atene na aPeleti kafwanyeya kagali agwarda a Davi. atene, vamohi na akuda Gate 600 anno kamuharile kumela sidadi ya Gate,#15:18 akuda Gate 600 anno kamuharile kumela sidadi ya Gate: Akuda Gate kafwanyeya kagali aFilistewu. Ku wonga aliwa kohiya wenda na aFilistewu afwiwa, aliwa roma wenda na Davi. Nione eto 2 Samuweli 15:19. atene anne kohoviraga, aliwa kala vasogolro, liye aharaga mundulri mwewa.
19Mwa enne mwene Davi ohomuwandelaga nkuda Gate mmohi aitaniwa Itayi, liye ira: <<Kodi mwasiwa gwa nni na wenne dowaga vamohi na hiyo? Kawela, uhale na mwene muxa unafuna za, mwasiwa weyo uli mutu oza eto mwilamboni muno wire tawelamo. 20Weyo uzile mwilamboni muno tchineneva, kodi vihikala wandeya ira miyo peno dutukule ira nitawege vamohi? Tchoira miyo kadiiziwile unadowa miyo. Inafwanela uwele eto wadowaga, waatukule afwawo atene kazile na weyo. Eto upama na tangaranga da Yehova jatene jikale na weyo!>>
21Mbwenye mulombwana Itayi ohomuwakulaga mwene Davi, liye ira: <<Miyo mbwiyeni so mwene nnawonga vamentoni va Yehova okalawo ira nneregeve uharani. Masiki munaya nyo mbwiyeni so mwene mwahaiziwewo, miyo nneregeve uharani. Akala nimburo munaya nyo munokwawo, akala munokalawo, na miyene namalaba wenyu nnokala vamohi na nyo.>> 22Mwa enne mwene Davi ohomuwandelaga Itayi, liye ira: <<Akala tchi eno, kasogolra.>> Evale mulombwana Itayi nkuda Gate ohodowaga sogolro na atwaye atene na ahima atene annaga liye, aliwa dowa kala sogolro. 23Evale atu atene kafwanyeya mmavande kagaaonne atu adjindji ale kaviraga, konlaga mokuwa. Mwa enne mwene Davi vamohi na atu atene koholambuwaga mwana muhindje wa Sedoromi, aliwa roma volowela mukokolani.
24Fwanyeya ira ora yakuma atu musidadi mule, mulombwana Abiyatare na Zadoki vamohi na aLevi atene kohozagana Kaxa ya Yopangana ya Mulugu, aliwa ihiya vati fiyeda atu atene kumamo musidadi mule. 25Noira eno, mwene Davi ohomuwandelaga Zadoki, liye ira: <<Katukula Kaxa ya Mulugu uwelelena musidadi mwakoka mwene. Tchoira Yehova adifwewela murima, unodiweliheda musidadi mwakoka mwene eto unoza adihiye ira dione Kaxela vamohi na Nyumba inakaletcha liye! 26Mbwenye Yehova awonga ira: <Miyo kannaufuna!>, dihimala rumela, airena malringana inafuna liye.>>
27Davi ohowongagave na namakuta Zadoki eraga: <<Weyo kuli namaona?#15:27 namaona ku tapulela namafiyiheda. Nione 1 Samuweli 9:9. Davi afuna Zadoki akale meswaye musidadi mule ira amuwandelege jaira mwanaye Abisalawu. Uvenye weyo na Abiyatare, muwelelege musidadi mwa murendele eto mwadowaga, mwaatukule ahiminyu ambinli, mwanawo Ayimazi vamohi na Jonata mwana Abiyatare. 28Miyo nnaya dakale mukokolani nimburo nnalambuwetcha atu, diing'anelaga ira divwe wa nyo zela jatene jinaireya musidadi.>> 29Evale mulombwana Zadoki na Abiyatare kohotukulaga Kaxa ya Mulugu, aliwa dowagana Jeruzalemu. Eto aliwa kohokala Jeruzalemu wewule.
Davi ohomuruma mutu ira adowe amuwendelele mwanaye Abisalawu
30Evale Davi ohogwelaga nkuma wa Mitengo da Azeti no nla waye wene. Ohopotaga muru waye eto awendaga eno ahanna sapato. Eto atu atene kafwanyeyaga vamohi na liye kohomalaga pota miru diwa, kanlaga.
31Mwa enne Davi ohowandeliwaga ira: <<Eni namawelruza wenyu Ayitofeli uhugumanela na ale anamuhara Abisalawu!>> Davi agavwile enne ohowongaga eraga: <<Yehova miyo nnouvepani ira musandutche zelru da mulombwana Ayitofeli ira dikale zelru doviringana.>> 32Evale mwene Davi afiyaga vazulu va mwango, vevo vamutamaleletcha atu Mulugu, mulombwana Huzayi, nkuda Ariki, ohozaga wa Davi. Fwanyeya ira liye azilege na bataye yagamanle kauwa eto mmuruni mwaye mwagali teyave. 33Evale Davi ohomuwongana, liye ira: <<Wadihara, unafuna uwendjede goyi inna miyo! 34Mbwenye wamuhara Abisalawu, udowa wanvepa ira: <So mwene miyo nnafuna duharegeni, dulabegeni, dikale namawelruza wenyu na makalelo nnga damuwelruza miyo babinyu>, waira eno mbwenye uhudikamiheda ira zelru da Ayitofeli dahalabe mabasa. 35Tchoira mulombwana Zadoki na Abiyatare kali wewo. Weyo unerege dowa waawandelege anamakuta ale jatene jinavwege we nyumbani wa mwene. 36Eto ahimiwa ambinli Ayimazi, mwana Zadoki, na Jonata mwana Abiyatare, anafwanyeya wewo. Aliwene banazege kadiwandelege jatene jinavwege we wewule. Waira eno mbwenye uhudikamiheda!>> 37Mwa enne Davi nfwaye wenno aitaniwa Huzayi ule, ohowelelaga Jeruzalemu avolowaga tempu imohive yavolowa mulombwana Abisalawu musidadi mule.
Currently Selected:
2 Samuweli 15: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
