2 Amwene 21
21
Tonga wa Manasesi mwene wa Juda
1Manasesi aromaga tonga anna yaka 12. Liye atongile yaka 55 muJeruzalemu. Mmaye nzina naye aitaniwa Efiziba. 2Liye ohosakanya jabure vamentoni va Yehova, molingana na jotakaletchetcha jahara malogo a atu anno Yehova aatamangihile liye mwilamboni mwewa vasogolro va Ana Izarayeli. 3Tchoira liye ohowelela manga akoka mamburo otama ovelela mikuto wa amilugu anno babaye Ezekiya abwanyunle liye. Eto ohomanga vibuwa da Baali eto ohosakanya nimbozo na mulugu unaitaniwa Azera nnga asakanyile Akabe, mwene wa Izarayeli. Eto ohokokorela vamohi no tamalelaga jomoneya jatene jinafwanyeya zulu. 4Ohomanga vibuwa dimohi diwa muNyumbani mwa Yehova, agali Yehova ohowonga ira: <<Atu anaza katamalelege nzina naga Jeruzalemu.>> 5Eto matando amenlene a Nyumba ya Yehova ohomangawo vibuwa da mukuto para jomoneya jatene jinafwanyeya zulu. 6Eto ohomutumeya mwanaye muwari momusakanya mukuto eto oavuruwana aliba wonga ja mitalre eto awombezaga makanga eto liye afukaga aliba wonga na atu okwa eto awendetcha na akwiri. Ohokalelave sakanyaga jabure vamentoni va Yehova, roma tatamulaga takaleliwa wa Yehova. 7Eto ohotukula nlandaniho nosemiwa na nimbozo na mulugu Azera neno nasakanyile liye, liye dowa hela muNyumbani mwa Yehova, agali Yehova ohowonga na Davi vamohi na mwanaye Salomawu ira: <<Muwari mwa malogo matene miyo dihisakulra Nyumba yenna vamohi na sidadi ya Jeruzalemu ira katamalelege wewo nzina naga malambo a mukalakala. 8Miyo kannaakumiha aIzarayeli ilambo yenna yaavahile miyo makolo ewa malringana aliwa kakale atu ohara jatene jawandenle miyo, vamohi na malamulo matene anno namalaba waga Mozeji aawandenle liye.>> 9Aliwa mbwenye tchafunne vwa. Mwa enne mwene Manasesi ohategiha aJuda, aliwa roma sakanyaga jabure kwaranya jabure jejo jaira malogo anno Yehova atolotchile liye vasogolro va Ana Izarayeli.
10Noira enne, Yehova ohowonga muwari mwa anamalaba aye anamafiyiheda, eraga: 11<<Mulombwana Manasesi mwene wa Juda uhusakanya jotakaletchetcha kwaranya jotakala jisakanyile aAmore anno kaliwo liye ahanakalewo eto uhategiha akuda Juda muwari mwa vikwamutu daye dosema. 12Na mwasa wenno miyo dagali Yehova Mulugu wa Izarayeli nnawonga ira: <Miyo nnozana ubure wohokala wa masika Jeruzalemu vamohi na Juda, fiyeda ira mutu wenne unavwe zela ubure unafuna miyo irana, unokala waheyo. 13Eto nnotukula mpimo wenno dapimilena miyo Samariya vamohi na mpimo dapimilena miyo vande va Akabe,#21:13 mpimo wenno dapimilena miyo Samariya vamohi na mpimo dapimilena miyo vande va Akabe: Mpimo unawongiwa va ku wonga ubure watene Yehova aairele liye akuda Samariya (2 Amwene 17:5-6) na atu a muibalini mwa Akabe (1 Amwene 21:24), ubure umohive wafuna za afwanya akuda Jeruzalemu. Na ibaribari yoireya (2 Amwene 25:1-11). dize dipimena Jeruzalemu. Eto nnohuwa Jeruzalemu kalaga nnga mutu ahuwaga parato muwari, amala aifutukulaga, ahuwaga unde uwa. 14Eto nnoanyanyala ahima a atwaga, daavahede mmandani mwa amwidaniwa. Amwidaniwa anoroma abela eto anerege atukulela jengo jiwa. 15Tchoira aliwa kohosakanya jabure vamentoni vaga eto kohoditatamula uwali, romela siku nakumile makolo ewa Ijipitu fiyeda peno.> >>
16Eto hiya yotega yasakanyile liye aategihaga aJuda muwari mwa vikwamutu josema ira kasakanyege jabure vamentoni va Yehova, yabure imohiwa ya mulombwana Manasesi yali ira liye ohovuviha sangiri nohokala na masika na atu ohokana yabure fiyeda sangiri niwa zala Jeruzalemu roma magomo a wu ante dowa fiya magomo a wu.
17Joira jimohi jiwa ja mwene Manasesi, vamohi na mabasa matene alabile liye, vamohi na jotega jaye, jatene jinafwanyeya jagalrembiwe mulivuruni mwa Joira ja Amwene a Juda. 18Manasesi ohokwa, liye dowa vuma na makolo aye, liye koyiwa munda afwanyeya vande vaye, munda wa Uza. Mwa enne mwanaye Amoni gwahambile umwene vamalroni vaye.
Tonga wa mwene wabure Amoni, vamohi no piwa waye
19Mulombwana Amoni aromaga tonga anna yaka 22. Liye atongile yaka mbinli muJeruzalemu. Mmaye nzina naye aitaniwa Mesulemeti, mwana Aruzi wa sidadi ya Jotiba. 20Mwene Amoni ohosakanya jabure vamentoni va Yehova nnga babaye Manasesi. 21Liye ohara ndila datene daharile babaye eto ohotamalela vikwamutu josema jejo jatamaleletcha babaye eto liye ohokokorela jejo. 22Mwa enne ohomuhiya Yehova Mulugu wa makolo aye, eto kaharile ndila ya Yehova. 23Evale anamalaba a Amoni kohompanganela, aliwa mpa mwene Amoni ule agali vande vaye. 24Mbwenye liye agakwile, atu a mwilamboni mule kagahanle, kohapa atu atene kampanganenle mwene Amoni kafiyeda mpa. Nomala eno, kohomutukula mwanaye aitaniwa Joziya, aliwa muhambiha umwene vamalroni vaye.
25Joira jimohi jiwa ja mwene Amoni, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 26Mwene Amoni kohomukoya masiyeni waye, mmundani mwa Uza. Evale mwanaye Joziya gwahambile umwene vamalroni vaye.
Currently Selected:
2 Amwene 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
