2 Amwene 20
20
Bulela wa mwene Ezekiya
1Mwa malambo anne, mwene Ezekiya ohoroma bulela, fiyeda liye hala vang'ono ira akwe. Mwa enne namafiyiheda Izaiya mwana Amoji ohozaga, liye nfwanya muwandela ira: <<Yehova unawonga ira: <Usakanyede jatene ja vande vawo. Tchoira weyo kunakalawo, unagomela kwa.> >> 2Evale mwene Ezekiya agavwile enne, ohorungunuwa aing'anaga ntchihini, liye roma lobela wa Yehova eraga: 3<<Yehova nnouvepani ira muumbuwele makalelo diwendile miyo vamentoni venyu mwa ibaribari eto na murima waga watene,disakanyaga jofwanela vamentoni venyu.>> Mwa enne mwene Ezekiya ohonlaga valukulu.#20:2-3 liye roma lobela wa Yehova: Mazwala ananikokomeza ira nikayena ntindi muwari molobela muwari mwa makatamiho ali atene. Mwene Ezekiya ahalobela, ogokwa. Mbwenye agalobenle, Mulugu ohomuwendela tangaranga. 4Evale namafiyiheda Izaiya agamaruwile eto adowaga, ahanahiye ntando na mwene Ezekiya, mazu a Yehova kohozaga wa Izaiya, amuwandelaga eraga: 5<<Uwele, udowe wamuwandele Ezekiya, musogolrelri wa atwaga ira: <Yehova Mulugu wa mbwiyawo Davi unawonga ira: <<Dihivwa lobela wawo eto dihiona misodi dawo. Mwa eno, nnouvulumutcha. Ndawiyavano unodowa Nyumba ya Yehova. 6Nnowendjeda malambo a ingumi yawo yaka 15 eto nnouvunela mmandani mwa mwene wa Asiriya weyo vamohi na sidadi yatene yenna. Miyo nnovunela sidadila na mwasa ozivela nzina naga eto na mwasa omuzivela namalaba waga Davi.>> > >> 7Nomala eno, Izaiya owongaga na anamalaba a mwene ira: <<Kadowani mwavende nibolu nosakanyiwa na jovaha ja mufigera, muzena, muhele vailondani vaye ira mwene avulumuwe.>>
8Evale Ezekiya agavwile ira unovulumuwa, liye ohonfukaga Izaiya eraga: <<Kodi ionihedo tchivi inafuna we dioniha ira dikayena ibaribari ira Yehova unodivulumutcha, fiyeda ira ndawiyavano didowe Nyumba ya Yehova?>> 9Izaiya ohomuwakulaga eraga: <<Ionihedo ya Yehova yoira Yehova unoirana yenno ilumbenle liye tchi ila. Usakulrevo muwari mwa jengo mbinli ji. Kodi unafuna ira nfulri wa relojiyo ya masikada abaranye masikada kumi, owu unafuna ira awelele mundulri masikada kumi?>> 10Evale mwene Ezekiya ohowakulaga eraga: <<Nfulri para baranya dowa sogolro masikada kumi, kirutchile. Miyo mbwenye nnafuna nfulri awelele mundulri masikada kumi.>> 11Mwa enne namafiyiheda Izaiya ohonvepaga Yehova. Evale Yehova ohowelihedaga nfulri mundulri masikada kumi a relojiyo ya nzuwa ya mwene Akazi.#20:11 masikada kumi a relojiyo ya nzuwa ya mwene Akazi. Malambo a mundulrimu Akazi ohomanga masikada na makalelo ira mutu aona nfulri vali liye va masikada, awande iziwa ora. Mbwenye ira Ezekiya akayena ibaribari zela vulumuwa waye, Yehova ohowelihedaga nfulri mundulri.
Ezekiya ohaoniha aliba milanyo okuma Babiloniya jengo ja umwene waye
12Muwari mwa malambo anne, mwene wa Babiloniya aitaniwa Merodaki-Balada, mwana Balada, agavwile ira Ezekiya ohobulela, ohorumihaga makarta vamohi na nvaho wa mwene Ezekiya. 13Mwa enne Ezekiya ohawatchelaga aliba rumiwa ale, liye aoniha nyumbaye yatene yokoyamo jorayela, vamohi na jafwanyeyamo romela parata, oru, na jonukela jimohi jiwa, na maperefume amohiwa apama, vamohi na nyumba yenno mwafwanyeya jowanana vamohi na jatene jafwanyeya muwari mwa nyumba dokoyamo ja mwene. Kilivo yengo nne imohi yahaaonihile liye, romela vande vaye vamohi na umwene waye watene. 14Noira enne, namafiyiheda Izaiya ohozaga wa mwene Ezekiya, liye nfuka ira: <<Kodi alombwana kazile ale, kakumele ilambo ya uvi? Nnga kagazile kawongile nni?>> Mwene Ezekiya ohomuwakulaga, liye ira: <<Kakumele olapela wene, ilambo ya Babiloniya. Kazela dipanda.>> 15Izaiya ohonfukagave eraga: <<Nnga kagazile vande vawo kaonne nni?>> Ezekiya ohomuwakulaga eraga: <<Kagazile kaonne jatene jinafwanyeya vande vaga. Tchoira muwari mwa nyumba daga dokoyamo jengo, kilivo nne yengo imohi inafwanyeyamo yahaaonihile miyo.>>
16Evale namafiyiheda Izaiya ohomuwandelaga mwene Ezekiya eraga: <<Kavuruwana mazu a Yehova. 17Anoza kafiye malambo ira jatene jinafwanyeya vande vawo, kumela jejo jaromile koya makolo awo fiyeda siku na peno, jatene jene jinoza jitukuliwe, jidowiwena Babiloniya. Kilivo yengo inafuna hala. Unawonga gu Yehova. 18Muwari mwa ahima a anapongwe anabaliwege muibalini mwawo, amohiwa anotukuliwa ira kadowe kakale atu ohoya mmba,#20:18 amohiwa anotukuliwa ira kadowe kakale atu ohoya mmba: Ora yenno kohokalawo amwene amohi kaafuna alombwana ohoya mmba ira kasogolrelrege mabasa amohiwa kaumbuwelaga ira: <<Mulombwana ohoya mmba kanatamangela ja ahiyana. Unerege hinda mabasaye bahi.>> (2 Amwene 9:32-33; Estere 2:3; Jeremiya 38:7; Daniyeli 1:3) Ku wonga eto ira Ezekiya kakana atu pwi okumela muibalini mwaye mwasiwa ahimaye amohiwa tchabala. kalabege vande va mwene wa Babiloniya.>> 19Mwene Ezekiya ohomuwakulaga namafiyiheda Izaiya eraga: <<Mazu matene a Yehova uwongile we ba pama.>> Liye awongaga enne, abalra ira: <<Voira jatene ejo jinafuna jiireya mundulri mwaga, kavali makani. Malringana miyo kalawo waga dikayena murendele vamohi no hagalala.>>
20Joira jimohi jiwa ja mwene Ezekiya, vamohi na kopolo daye datene eto vamohi na makalelo amangile liye ntiya na mahindje vamohi na movira mwa mahindje,#20:20 movira mwa mahindje: Malambo a mundulrimu atu komanga nnga ha ponti, vazulu viwa aliwa sakanyavo na makalelo kaiziwile atu ira mahindje kaviremo kawandege fiya wa atu amohiwa olapela wene. Ku wonga ira Ezekiya ohosakanya makalelo mamohive ira mahindje kavolowe sidadi ya Jeruzalemu. eto na makalelo azihile liye mahindje musidadi, jatene jinafwanyeya jagalrembiwe mulivuruni mwa Joira ja Amwene a Juda. 21Ezekiya ohokwa, liye dowa vuma na makolo aye. Mwa enne mwanaye Manasesi gwahambile umwene vamalroni vaye.
Currently Selected:
2 Amwene 20: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
