2 Amwene 22

Joziya ohosakanya Nyumba ya Yehova akoka

1Mulombwana Joziya aromaga tonga anna yaka tanu na taru. Liye atongile yaka 31 muJeruzalemu. Mmaye nzina naye aitaniwa Jedida, mwana Adaya, wa sidadi ya Bozikate. 2Mwene Joziya ohowenda na makalelo ofwanela vamentoni va Yehova, aharaga ndila yatene yaharile mbwiyaye Davi. Kahiyile nne para muwononi odjana nne para muwononi oromana.

3Mwa enne mwene Joziya agamanle yaka 18 muwari mwa utongi waye, ohomuruma namalremba waye aitaniwa Safani, mwana Azaliya, muzula wa Mesulawu, liye ira: <<Udowe Nyumba ya Yehova, 4wawonge na mundimuwa wa anamakuta unaitaniwa Hilikiya ira mwakontari kobiri yenno ivelenle atu Nyumba ya Yehova, yenno inawatchela agwarda a va mulango. 5Mwamala kontari, mwavahede andimuwa anno kavahiwe ira kasogolrelrege mabasa osakanyeda Nyumba ya Yehova. Aliwa kagatukunle kobirile, anerege agawela alombwana atene analaba mabasa osakanyeda Nyumba ya Yehova ile, 6romela anamasema, dowa aliba manga atene. Eto kobiri imohiwa anerege gulana matabwa vamohi na mabwe ogwadiwa ira jisakanyiwena Nyumba ya Yehova. 7Mbwenye andimuwa anno kavahiwe ira kasogolrelrege mabasa osakanyeda Nyumba ya Yehova kikukumuliwe ira kahelege konta makalelo owendiha kobiri mwasiwa aliwa anafwanyeya kagali atu olaba mororomeleya.>>

Hilikiya ohofwanya Livuru na Malamulo

8Mundimuwa wa anamakuta Hilikiya ohomuwandelaga namalremba Safani eraga: <<Miyo dihifwanya Livuru na Malamulo muNyumbani mwa Yehova.>>#22:8 dihifwanya Livuru na Malamulo muNyumbani mwa: Ku wonga na mwasa wa amwene abure katonga malambo a mundulrimu ora yenno akuda Juda tchaiziwile malamulo a Mulugu. Nne anamakuta okuta mikuto da Mulugu tchawenda na mazu a Mulugu. Tapulela namakuta afwanyaga Livuru na Malamulo a Mulugu, yali nnga yengo ixa para liye na mwene Joziya na akuda Juda atene. (2 Amwene 23:24) Mwa enne namakuta Hilikiya ohonvaheda livuru nne namalremba Safani ule, liye roma ileri. 9Mwa enne namalremba Safani ohoza wa mwene, liye muwandelamo mabasa arumiwe liye, eraga: <<Anamalabinyu kohomala kumihamo kobiri yafwanyeya mmba mule, kohavaheda ale analaba mabasa osogolrelra josakanyeda Nyumba ya Yehova.>> 10Eto namalremba Safani ule ohomuwandelagave mwene, liye ira: <<Eto namakuta Hilikiya uhudivaheda livuru.>> Evale ohoilerigi livuru nne vamentoni va mwene.

11Fwanyeya ira mwene agavwile mazu kafwanyeya muwari mwa Livuru na Malamulo mule, ohokawulaga jowara jaye.#22:11 agavwile mazu… ohokawulaga jowara jaye: Mwene Joziya ohokawula jowara jaye mokumbanya na mwasa wa mazu avwile liye. Tchoira liye ohoiziwa ira ora yenno aIzarayeli kohomala viringaniha malamulo pwi oira aIzarayeli kikayena amilugu amohiwa. Eto malamulo anno kohowonga zela tonga wafuna Mulugu zana na mwasa ohara amilugu amohiwa. (Detoronomiyo 5:7, 7:4, 11:28) 12Noira enne, ohomurumaga namakuta Hilikiya ule, na Aikawu, mwana Safani vamohi na Akibori mwana Mikaya na namalremba waye Safani, vamohi na namalaba waye Asaya, liye aruma awandelaga eraga: 13<<Mudowe mwanfuke Yehova zela miyo vamohi na andimuwa atene, vamohi na akuda Juda atene zela mazu anafwanyeya mulivuruni neni nifwanyiwe muNyumbani mwa Yehova. Tchoira uwali wohokala wa masika wa Yehova uhunizela na mwasa wa ababihu. Mwasiwa aliwa tchafunne vwelela mazu anafwanyeya mulivuruni mu ira kaharihegemo nnga mwemo mulrembiwele atu zela hiyo.>>

Mwene Joziya ohowandeliwa jafuna ireya sogolro

14Mwa enne namakuta Hilikiya, na Aikawu, na Akibori, na Safani, vamohi na Asaya, kohomaruwaga, aliwa dowa wa namafiyiheda wa muhiyana aitaniwa Hulida, wenno akala tatamo yaitaniwa tatamo yanembinli muwari mwa Jeruzalemu. Namafiyiheda ule ali mwadi Salumi, gwarda wa jowara ja Nyumba ya Yehova. Fwanyeya ira Salumi ali mwana Tikiva eto ali muzula wa Haraji. Kagadowile, kohonfwanya, aliwa muwandelamo Hulda ule jatene jarumiwe atu na mwene. 15Evale liye ohawakulaga eraga: <<Yehova Mulugu wa Izarayeli unawonga ira: <Mudowe mwamuwandele mulombwana wenno uurumileni ira muze wa miyo, mwamuwandele muire 16Yehova unawonga ira: <<Miyo nnoza dizena ubure zela ilambo yenna vamohi na atu atene anafwanyeyamo, mokwakwanela na jejo jinafwanyeya mulivuruni neno niilerile mwene wa Juda. 17Tchoira aliwa kohodihiya, aliwa roma atumeyelaga jonukela amilugu amohiwene, aliwa kohoditakaleliwiha na makalelo ohokala a masika muwari mwa mabasiwa matene analaba atu na mandiwa. Nona miyo dihindiha uwali waga zela nimburo neni eto takaleliwa waga kuza utima.>> > >>

18Namafiyiheda ule ohowongagave eraga: <<Mbwenye mwanfwanya mwene wa Juda wenno uurumileni ira muze munfuke Yehova, mwamuwandele ira: <Zela mazu matene uvwile we, Yehova Mulugu wa Izarayeli unawonga ira: 19<<Na mwasa oira uhubaranyeda twaruwa mmirimani mwawo eto uhuviyeviha vamentoni va miyo Yehova wagavwile mazu matene diwongile miyo zela ubure unafuna miyo irela nimburo neni vamohi na atu atene anafwanyeyamo ira nnafuna dibwanyule sidadila eto ditembelrelre, voira wagavwile jatene ejo uhuwanda kawula jowara jawo, nlaga vamentoni vaga, eni miyo dihivwa nizu nawo. Unawonga gu Yehova. 20Na mwasa wenno weyo mbwenye meso awo kinaona ubure watene unafuna miyo zana ilambo yenna. Miyo nnosakanya ira weyo ukalewo mwa murendele ufiyede kwa, wakoyiwe masiyeni wawo, ugumane na makolo awo.>> > >> Evale aliba rumiwa ale kohotukulaga mazu matene anne, aliwa dowa muwandela mwene.

Currently Selected:

2 Amwene 22: iLolo

Highlight

Copy

Compare