2 Amwene 19
19
Ezekiya oholobela muNyumbani mwa Yehova
1Ezekiya vavwile liye mazu matene anne, mokumbanya mwaye ohokawulaga jowara jaye, liye wara sakwi. Noira enne, ohodowaga volowa muNyumbani mwa Yehova. 2Mwa enne ohomurumaga musogolrelri wa vande vaye aitaniwa Eliyakimu vamohi na Sebina wenno ali namalremba waye vamohi na andimuwa a anamakuta atene ira kamale wara masakwi, kadowe kawonge na namafiyiheda Izaiya, mwana Amoji. 3Kagadowile, kohomuwandelaga mulombwana Izaiya keraga: <<Mwene Ezekiya unawonga ira peno ti siku na makatamiho, siku notongiwa vamohi na siku nonyaswihiwa. Hiyo nnakala nnga nili muhiyana uhanle vang'ono ira abale, mbwenye kopolo dobalana kanna. 4Mwene wa Asiriya ohomuruma mundimuwa ule unawongetcha mazwaye ira aze wa hiyo, ampokihe Mulugu Okalawo. Yehova Mulugu wenyu avuruwane joruwana jatene jeji eto amutonge mutu wenne uwongile mazu abure matene anna. Mwa eno, inafwanela munilobelele hiyo atu a vang'onove nihanlewo.>>
5Mwa enne anamalaba a mwene Ezekiya ale, kagawongile wa Izaiya jatene jene jarumiwe atu, 6Izaiya ohawandelaga eraga: <<Mudowe mwamuwandele mbwiyinyu Ezekiya ira Yehova unawonga ira: <Kuove jowonga jatene jivwile we zela makalelo matene kadiluluvihile anamalaba a mwene wa Asiriya. 7Miyo dagali Yehova nnomuruma munemba omukukumula ira avwa muselu omurendjetcha, awelele mwilamboni mwaye. Eto nnosakanya ira agafiyile ilambo ya waniwa, apiwe na supada.> >>
Mwene wa Asiriya ohowonga akoka mazu ompokiha Mulugu
8Noira enne, mundimuwa owonga ja mwene ule ohovwaga ira: <<Eni mbwiyawo mwene wa Asiriya, uhukuma Lakiji.>> Evale adowaga, anfwanyilege mwene wa Asiriya ule awanaga na sidadi ya Libina. 9Fwanyeya ira mulombwana Senakeribe mwene wa Asiriya ule ohowandeliwa ira: <<Eni mulombwana Tiraka mwene wa Etiyopiya unaza ira awane na weyo.>> Agavwile enne, oharuma anamalabaye na karta ira kadowe wa Ezekiya eraga: 10<<Mudowe mwawonge na mulombwana Ezekiya mwene wa Juda ira: <Mulugu wawo wenno unamunyindela we kaunyenge awongaga ira: <<Sidadi ya Jeruzalemu ila kinavahediwa mmandani mwa mwene wa Asiriya.>> 11Tchoira weyo unovwetcha jatene amwene a Asiriya anaaireletcha atu amwene a vilambo datene, kaatolotchaga atenene. Kodi weyo unowanda vulumuwa? 12Waumbuwela malogo amohiwa ohiyana-hiyana anno makolo aga kaatolotchile atu, romela Gozani, Arani, Rezefe vamohi na akuda Edeni#19:12 akuda Edeni anawongiwa eva kahi amohive ali livuru na Jenesesi. (Amosi 1:5) anno katukuleliwe ilambo ya Telasari, kodi amilugu ewa kohowanda avunela? 13Kodi ante peno amwene katongetcha ilambo ya Hamate na Aripade na sidadi ya Sefarivayimi na Hena vamohi na Iva, atene anno anafwanyeya waani?> >>
Lobela wa Ezekiya
14Evale mulombwana Ezekiya agawatchenle karta na aliba rumiwa ale, agailerile, ohovenyaga, liye dowa Nyumba ya Yehova, liye tapula karta nne vamentoni va Yehova. 15Noira enne, mwene Ezekiya oholobelaga wa Yehova eraga: <<Yehova Mulugu wa Izarayeli munakala vari va akerubi, nyo bahi guli Mulugu wa maumwene atene a ilambo ya vati. Nyo gusakanyile ilambo ya zulu na ilambo ya vati. 16Yehova kareyani mabaru enyu, mudivuruwane. Yehova muhule meso enyu, muing'ane. Muvuruwane mazu a Senakeribe zela wenno umurumile liye ira aze aupokiheni nyo Mulugu Okalawo. 17Yehova na ibaribari amwene a Asiriya kohomala gondjiha gondjiha malogo oindjivene vamohi na vilambo diwa dene. 18Eto kohatatilela amilugu a aliba gondjihiwa munloni, tchoira tchali amilugu, mbwenye jali josakanyiwa na manda a atu, jagali ja mitengo na ja mabwe. Nona aliwa kohowanda atolotcha. 19Mbwenye nyo Yehova Mulugu wehu, nnouvepani, nivuneleni mmandani mwewa ira atu a maumwene matene kaiziwe ira nyo bahi gunafwanyeya mwagali Yehova Mulugu.>>
Izaiya ohomulimbiha Ezekiya
20Noira eno, mulombwana Izaiya mwana Amoji, ohorumihaga milanyo wa Ezekiya eraga: <<Yehova Mulugu wa Izarayeli unawonga ira: <Jidivepile we zela muselu wa Senakeribe mwene wa Asiriya, miyo dihivwa.> 21Mazu Yehova uwongile liye zela mulombwana Senakeribe ba ala: <Namwali mwana wa Siyawu ahamuiziwile mulombwana wenno uli mwana wa Jeruzalemu unoulramwisa eto unouruwana.#19:21 Namwali mwana wa Siyawu… unoulramwisa eto unouruwana: Siyawu ali mwango wewo wamangiwe Jeruzalemu. Senakeribe afuna aagondjihe akuda Jeruzalemu mbwenye Mulugu ohowonga ira akuda Jeruzalemu anagomela mulramwisa no muruwana Senakeribe. Unouzuwuza muru waye mundulri mwawo. 22Kodi umpokihile ani eto umululuvihile ani? Kodi uhumuiziwa wenno wamukuwela we na mazu ogwela na wenno wamuing'aniheda we meso awo zulu?#19:22 Kodi uhumuiziwa… wenno wamuing'aniheda we meso awo zulu? Ku wonga muwari momupokiha Mulugu, akuda Senakeribe kohofiyeda mwezo oing'ana zulu, aliwa wongaga na afwiwa ira: <<Zulu wu kaliwo mutu. Kalivo unafuna kumela zulu ira auvuneleni mmandani mwihu.>> Fwanyeya ira Mulugu ohotakaleliwa valukulu na yowonga yenno. Jatene ejo wadiirela miyo Mulugu Otchena wa Izarayeli. 23Weyo uharuma atwawo, aliwa za dipokihaga miyo Nabwiya. Weyo uhuwonga ira: <<Miyo vamohi na aaterelado aga oindjiva a kondoni nnogwela zulu wa mwango, pandi imohi ya Libano ira didowe dagwihe mitengo da seduru dolapetchetcha nnafwanyeya wewule vamohi na mitengo doriyetchetcha da faya nnafwanyeya wewule eto nnowanda fiya mamburo orutcha fiyawo, wewo unafwanyeya kokola yapama. 24Miyo dohotimba visime, miyo ng'wa mahindje vilambo da unde. Eto dohoummiha na manyalo aga mihindje datene da Ijipitu.>> > 25Yehova unawonga ira: <Kodi we mulombwana Senakeribe kuiziwile ira jatene jalaba we, airana gu miyo nnga mwabanlre miyo wanle eto kuiziwile ira jejo dibalrile wanle malambo a mundulri ira weyo uirena? Miyo eto gwauzihile mwilamboni muno ira usandutche sidadi dolimba dowerewerihiwa na muru ira dikale madebe. 26Nona annya a mwilamboni mu kakala okukumuwene eto kawendaga kaovaga eto kaganna manyazo. Aliwa kohofiyeda kala nnga tongwe, nari matamba matiti eto nnga mpinda wa vazulu va nyumba wenno unanyala afiyeda umma ahanaulukule. 27Mbwenye makalelo awo ogarati na makalelo awo ovenya na makalelo awo owelawo vamohi no takaleliwa wawo zela miyo, jatene jene dihimala iziwa. 28Mbwenye nnga weyo uhuoniha takaleliwa wawo zela miyo, nnga dihimala vwa makalelo anakonda we tongiwa na miyo, nnafuna dukokihe imezo yaga vapunoni vawo eto duhele momba waga wanoni wawo ira duwelihede ndila yenno yakumile we.> >>
29Izaiya ohowongagave mazu a Yehova amuwandelaga mwene Ezekiya eraga: <<Eto ira ukayena ibaribari zela mazu anawonga miyo ala, ionihedo inafuna miyo uvaha tchi ila. Yaka ila na yaka ya metchelo kamunawanda zala. Munadjege jododela bahi mosanyeya mwene. Mbwenye yaka yaneraru munozala eto munohanda, munozala minda da uva, amala munodja jovaha jiwa.#19:29 Yaka ila na yaka ya metchelo… Munadjege jododela…Ku wonga na mwasa wa kondo, atu tchawandege lima. Mbwenye yapamiwa yali yaka yaneraru aliwa kerege zala eto kerege handa, ku wonga kada mutu erege garati vande vaye na murendele. 30Tchoira atu ohala a nlogo na Juda anno kahanakwe, anotimbeleya kakayena mitchitchi diwa didowege vati,#19:30 anotimbeleya kakayena mitchitchi diwa didowege vati: Ku wonga kala atu ogarati pama mwa murendele. Tchoira wanle nlogo na Juda nawenda zagi zagi. Mbwenye Mulugu gwafuna sakanya ira kakale olimba nnga mutengo ohowanda tchikulriwavo. eto kafiyede vaha jovaha zulu uwa. 31Na ibaribari kohokalawo atu ohala anafuna kuma muJeruzalemu. Ku wonga kohokalawo atu ovuluwa anafuna kakume mwango Siyawu. Yehova unoirana jatene eji na mwasa wa sandje yaye.>>#19:31 na mwasa wa sandje yaye: Mulombwana Senakeribe oholuluviha nzina na Yehova. Fwanyeya ira Yehova atukunle nzina naye liye hela Jeruzalemu eto Yehova uhukana sandje zela nzina naye. (2 Koronika 6:6, 33:7) Nona afuna airele upama atwaye na sidadi yenno wafwanyeya nzina naye. Masiki aliwa kamutegeleve, ohokanamo ira aatonge na mwasa wa jotega jiwa, mbwenye kaatolotchile atene. Mulugu ohokana afuna liye ahiya a vang'ono ira nzina naye nidowegeve sogolro. Jatene ejo airilena na mwasa wa sandje yanna liye zela nzina naye. Nione 19:34.
32Mulombwana Izaiya ohowongagave eraga: <<Zela mwene wa Asiriya Yehova unawonga ira: <Liye kaza avolowa musidadi mu, nne kaza avokedamo nifumo eto nne kaza awelela muno na defeza daye, nne kaza asakanya makalelo ali matene owanda volowa sidadila.#19:32 kaza asakanya makalelo ali matene owanda volowa sidadila : Malambo a mundulrimu anyakondo kotukuletcha teya, aliwa guda, helaga mmambalo mwa muru ira yaindjiva, kawande lupa murule, kavolowe muwari mwa sidadi ile ira kagondjihe. 33Ndila yazenle liye, unowelela ndila imohive yenno adowaga. Mbwenye sidadi yenna kaza avolowamo. Unawonga gu Yehova. 34Tchoira miyo dagali Yehova nnovunela sidadila ira diwombole na mwasa ozivela nzina naga eto na mwasa omuzivela namalaba waga Davi.> >>
Yehova ohaporotcha akuda Asiriya eto ohavunela aJuda
35Mahiyu mamohive anne Mungelro wa Yehova ohovenyaga dowa apa anyakondo vamisasani va akuda Asiriya atu okwakwana 185.000. Fwanyeya ira na mabebehene anyakondo amohiwa ohala ale kavenyaga, kaafwannyege afwiwa okwene gwembelre gwembelre vati. 36Mwa enne Senakeribe mwene wa Asiriya ule, ohowelelaga mundulri, liye dowa kalaga Ninive. 37Mwa enne agali munyumbani mwa mulugu waye aitaniwa Nisroki, amutamalelaga, ahimaye ambinli Adarameleki na Sarezeri, kohompaga na supada. Noira enne, kohotawaga, aliwa dowa ilambo ya Ararati. Evale mwanaye aitaniwa Ezari-Hadomi gwahambile umwene vamalroni vaye.
Currently Selected:
2 Amwene 19: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
