2 Amwene 16
16
Tonga wa Akazi mwene wa Juda
1Mwene Peka mwana Remaliya agamanle yaka 17 aatongaga aIzarayeli, tchi tempu Akazi mwana Jotawu yaromile liye atonga aJuda. 2Mulombwana Akazi ule aromaga tonga anna yaka 20. Eto atongile yaka 16 muJeruzalemu. Mbwenye liye kasakanyile jofwanela vamentoni va Yehova Mulugu waye nnga jairile mbwiyaye Davi. 3Tchoira liye ohara ndila datene da amwene a Ana Izarayeli, ante ohofiyeda mutumeya mwanaye muwari mokuta mukuto molingana na jotakaletchetcha jatene jairana malogo a atu anno Yehova aatamangihile liye mwilamboni mwewa vasogolro va aIzarayeli. 4Eto na liyene ohovelela mikuto vamohi no tumeya jonukela mamburo otama ovelela mikuto wa amilugu eto okuta mikuto vazulu va mikuma dogwela nari vati va mitengo datene da matakuru gubugubu.
5Mwa enne mulombwana Rezimi mwene wa Siriya vamohi na mulombwana Peka mwana Remaliya mwene wa Izarayeli, kohomaruwaga aliwa dowa Jeruzalemu ira kadowe kawane kondo. Mwa enne kohozaga, aliwa murindja mwene Akazi. Mbwenye aliwa tchawandilege mugondjiha. 6Tempu imohive yenne Rezimi mwene wa Siriya ohogondjihaga sidadi ya Elate, liye itukula akoka. Mwa enne ohatamangihagamo akuda Juda atene kafwanyeya sidadi yenne. Noira eno, akuda Siriya ale kohozaga, aliwa kalaga sidadi ya Elate ile fiyeda siku na peno.
7Jagaireyile eno, mulombwana Akazi ohorumihaga milanyo wa mulombwana Tigalate-Pilezeri mwene wa Asiriya eraga: <<Miyo dili namalaba wenyu eto dili mwaninyu. Nnavepa ira muze, mudivunele mmandani mwa mwene wa Siriya vamohi na mmandani mwa mwene wa Izarayeli. Tchoira aliwa kohoza, aliwa wanaga na miyo.>> 8Evale mulombwana Akazi ule ohotukulaga parata vamohi na oru afwanyeya muNyumbani mwa Yehova vamohi na nyumba yokoyamo ja mwene, liye murumiheda mwene wa Asiriya. 9Mwa enne mwene wa Asiriya ule ohovwaga yovepa ya Akazi ule, liye maruwa vamohi na anyakondo aye, aliwa dowa gondjiha sidadi ya Damaxiku, aliwa kala yewa eto oahindaga atu atene kafwanyeya wewule, liye adowagana Kiri. Eto ohompaga mwene wewa Rezimi.
Ibuwa ya Damaxiku
10Noira enne, mwene Akazi ule ohodowaga Damaxiku ira adowe agumane na Tigalate-Pilezeri mwene wa Asiriya ule. Mwa enne vafiyile liye Damaxiku ule, agaonne ibuwa yafwanyeya wewule, ohopimaga ibuwele vamohi na makalelo matene, liye murumiheda namakuta Uriya yofwalrafwaniha ya ibuwele. 11Evale namakuta Uriya agawatchenle makalelo a ibuwele, na liyene ohosakanyaga ibuwa na makalelo mamohive nnga mwawandeliwe liye na mwene Akazi Damaxiku. Mwa enne liye oholabaga mabasa matene anne fiyeda ibuwa yatene mala, mwene Akazi ahanawelewo Damaxiku ule. 12Evale mwene Akazi ule agawenlewo Damaxiku, ohoonaga ibuwele. Evale liye ohozaga vaibuwani vale, liye velela mukuto. 13Eto ohotumeyaga mikuto daye vevale vamohi na jovelela ja jodja eto ohokutulelaga vazulu viwa jovelela ja jong'wa eto ohowazelaga sangiri na jovelela ja murendele vazulu va ibuwa vale. 14Fwanyeya ira ibuwa ya wanle voroma vene yafwanyeya vari va ibuwa ixa ile na Nyumba ya Yehova. Mbwenye mwene Akazi ohotamihaga ibuwa ya wanle ile, liye dowa hela pandi ya norti wa ibuwa ixa ile. 15Noira enne, mwene Akazi ohomuwandelaga namakuta Uriya eraga: <<Ulabegena ibuwa yaga ilukulu ixa ila ira usakanyegevo mukuto otumeyiwa wa mabebehi eto para yovelela ya jodja ya tchiguwo eto mikuto dotumeya na jovelela jaga ja jodja nnavelela miyo dagali mwene vamohi na mikuto dotumeya da atu atene nari jovelela jiwa ja jodja na jong'wa ejo jinadowa vamohi na kada mwanainyama. Sangiri natene na mikuto dotumeya na sangiri natene na jovelela niwazeliwege ibuwa ixa ila. Mbwenye ibuwa ya mukuwa ya wanle ila inafuna ikale yaga ira dilabege mabasa owombezana.>>#16:15 ira dilabege mabasa owombezana: Hiyo kaniiziwile makalelo bavi kawombezana atu tempu yenno. So iiziwile hiyo tchoira mwene wenno ali wabure eto Mazu a Mulugu anokameliha wombeza makanga. (Detoronomiyo 18:9-14) 16Mwa enne namakuta Uriya ohoiragana jatene jawongilege mwene Akazi.
17Noira eno, mwene Akazi ohogwadaga masintu omangihana karinya da mukuwa dedo dalabiwana muNyumbani mwa Yehova, liye kumihavo mabasiya kafwanyeya vazulu viwa. Eto ohokumihagavo tanki ya mukuwa yafwanyeya vazulu va ng'ombe, liye dowa hela vazulu va mabwe katandile atu. 18Eto ira amuziveliwihe mwene wa Asiriya, mulombwana Akazi ohokumihagamo muNyumbani mwa Yehova alipendira wenno vafwanyeya mpando wa umwene mwemo mwagaratetcha liye siku na sabado. Eto ohofungaga mulango wenno amwene kavoloweletcha atu muNyumbani mwa Yehova mule.
19Joira jimohi jiwa ja mwene Akazi jinafwanyeya jagalrembiwe mulivuruni mwa Joira ja Amwene a Juda. 20Mwene Akazi ohokwa, liye dowa vuma na makolo aye, liye koyiwa na ababaye sidadi ya Davi. Evale agakwile, mwanaye aitaniwa Ezekiya gwahambile umwene vamalroni vaye.
Currently Selected:
2 Amwene 16: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
