2 Amwene 15
15
Tonga wa Azariya mwene wa Juda
1Jerobowawu agamanle yaka 27 aatongaga aIzarayeli, tchi tempu Azariya mwana Amaziya aromile liye atonga aJuda. 2Liye aromaga tonga anna yaka 16. Liye atongile yaka 52 muJeruzalemu. Mmaye ali muhiyana mmohi wa Jeruzalemu aitaniwa Jekoliya. 3Mwene Azariya ohosakanya jengo jofwanela vamentoni va Yehova molingana na makalelo matene anna babaye Amaziya. 4So mbwenye liye kagumunle mamburo otama ovelela mikuto wa amilugu. Atu kodowetchave sakanyaga mikuto diwa eto tumeyaga jonukela mamburo otama ale.
5Yehova ohombuleliha mwene Azariya na urenda wa maranya. Mwa enne liye akala nyumba yayene olapela wene na atu. Evale mwanaye Jotawu gwanna utongi wa vande va mwene vale, aatongaga atu atene a mwilamboni mule. Mwene Azariya ohokana maranya fiyeda ukwa waye. 6Joira jimohi jiwa ja mwene Azariya vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 7Azariya ohokwa, liye dowa vuma na makolo aye, liye koyiwa na ababaye sidadi ya Davi. Noira eno, mwanaye Jotawu gwahambile umwene vamalroni vaye.
Tonga wa Zakariya mwene wa Izarayeli
8Mwene Azariya agamanle yaka 38 aatongaga aJuda, tchi tempu Zakariya mwana Jerobowawu yaromile liye atonga aIzarayeli muSamariya. Liye atongile medi mitanu na mmohi. 9Liye ohosakanya jabure vamentoni va Yehova nnga jairile makolo aye. Liye kahiyile jotega jatene jaira Jerobowawu mwana Nebati aategihaga aIzarayeli. 10Evale ohokalawo mulombwana mmohi eriwa Salumi mwana Jabeji amupanganenle, liye mulata vamentoni va atu atene, fiyeda Zakariya ule kwa. Noira enne, Salumi ule gwahambile umwene vamalroni vaye. 11Joira jimohi jiwa ja mwene Zakariya, jinafwanyeya jagalrembiwe mulivuruni mwa Joira ja Amwene a Izarayeli. 12Mwa enne na ibaribari kohokwakwanela mazu Yehova awongile liye na Jewu eraga: <<Na mwasa wenno ahimawo banafuna kalaga amwene roma mwanawo, ante muzulawo, muzulawo mwanaye, fiyeda muzulawo mwanaye mwanayiwa.>>#2 Amwene 10:30
Tonga wa Salumi mwene wa Izarayeli
13Mwene Azariya agamanle yaka 39 aatongaga aJuda, tchi tempu Salumi mwana Jabeji aromile liye atonga aIzarayeli. Liye atongile mwedi mmohi bahi mwilamboni mwa Samariya. 14Agatongile mwedi mmohi, mulombwana Menayemi mwana Gadi ohokuma Tiriza, liye za Samariya, liye mulata mulombwana Salumi mwana Jabeji ule, liye mpa Samariya wewule. Noira enne, Menayemi ule gwahambile umwene vamalroni vaye. 15Joira jimohi jiwa ja mwene Salumi, vamohi na makalelo ampanganenle liye mwene Zakariya, jatene jinafwanyeya jagalrembiwe mulivuruni mwa Joira ja Amwene a Izarayeli.
16Mulombwana Menayemi agampile mwene Salumi, liye ohodowaga bwanyula sidadi ya Tifiza, liye mala apa atu atene kafwanyeyamo vamohi na tatamo dowandamelana romela Tiriza dowa sogolro. Liye airela ejo mwasiwa atwale kohokonda ira liye akale mwene wewa. Nona liye ohomala tolotcha sidadi ya Tifiza eto liye ohokawulaga vingulu da ahiyana atene okana vambani.
Tonga wa Menayemi mwene wa Izarayeli
17Mwene Azariya agamanle yaka 39 aatongaga aJuda, tchi tempu Menayemi mwana Gadi aromile liye atonga aIzarayeli. Liye atongile yaka kumi mwilamboni mwa Samariya. 18Menayemi ohosakanya jabure vamentoni va Yehova. Kalawo waye watene kahiyile jotega jatene jaira Jerobowawu mwana Nebati aategihaga aIzarayeli. 19Mwa enne mulombwana Puli mwene wa ilambo ya Asiriya ohozaga ira awane na atu a ilambwele. Evale mwene Menayemi ule ohonvaha mwene Puli ule kilu 35.000 da parata ira ahamuirele yabure, umwene waye udowegeve sogolro. 20Ira Menayemi awande kobiri yatene yenne, asokilege muwari mwa aliba rayela atene a aIzarayeli, kada mutu kumihaga kobiri 50 da parata, fiyeda kwakwana kobiri yatene yenne ira kanvahe mwene wa Asiriya ule. Mwa enne mwene wa Asiriya ule ohovahiwaga kobiri yatene yenne, liye maruwa welelaga waniwa. 21Joira jimohi jiwa ja mwene Menayemi, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Izarayeli. 22Mulombwana Menayemi ohokwa, liye dowa vuma na makolo aye. Noira eno, mwanaye aitaniwa Pekaiya gwahambile umwene vamalroni vaye.
Tonga wa Pekaiya mwene wa Izarayeli
23Mwene Azariya agamanle yaka 50 aatongaga aJuda, tchi tempu Pekaiya mwana Menayemi aromile liye atonga aIzarayeli. Liye atongile yaka mbinli muSamariya. 24Ohosakanya jabure vamentoni va Yehova. Nne liye kahiyile jotega jatene jaira Jerobowawu mwana Nebati aategihaga aIzarayeli. 25Mwa enne musogolrelri waye wa anyakondo aitaniwa Peka mwana Remaliya, vamohi na alombwana 50 a Jileyadi kohomurungunuwelaga, aliwa dowa mulata mwene Pekaiya ule sidadi ya Samariya nyumba yaye ya umwene eto kohompa mulombwana Arigobe na mulombwana Ariye. Mulombwana Peka agampile mwene Pekaiya ule, liye gwahambile umwene vamalroni vaye. 26Joira jimohi jiwa ja mwene Pekaiya, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Izarayeli.
Tonga wa Peka mwene wa Izarayeli
27Mwene Azariya agamanle yaka 52 aatongaga aJuda, tchi tempu mulombwana Peka mwana Remaliya aromile liye atonga aIzarayeli sidadi ya Samariya. Liye atongile yaka 20. 28Fwanyeya ira mulombwana Peka ohosakanya jabure vamentoni va Yehova. Na liyene kahiyile jotega jatene jaira Jerobowawu mwana Nebati aategihaga aIzarayeli.
29Mwa malambo anne atonga mulombwana Peka mwene wa Izarayeli, mulombwana Tigalate-Pilezeri mwene wa Asiriya#15:29 Tigalate-Pilezeri mwene wa Asiriya gu mwene mmohive unaitaniwa na nzina na Puli va vs 19. ohozaga, liye gondjiha sidadi di: Ijomi, Abeli-Bete-Maka, Janowa, Kedeji, Azori, Jileyadi na ilambo ya Galileya na ilambo yatene ya Nafitali. Agagondjihile, ohatukulaga atu atene a sidadi datene, liye adowagana Asiriya. 30Evale mulombwana Ozeya mwana Elahe, ohomupanganelaga Peka mwana Remaliya ule, liye mulata fiyeda mpa. Noira enne, Ozeya ule gwahambile umwene vamalroni vaye. Jejo jaireyile mulombwana Jotawu mwana Uziya#15:30 Jotawu mwana Uziya: Ku sawasawa no wonga Jotawu mwana Azariya. Tchoira Azariya ohokana mazina menli, Azariya na Uziya. agamanle yaka 20 aatongaga aJuda. 31Joira jimohi jiwa ja mwene Peka, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Izarayeli.
Tonga wa Jotawu mwene wa Juda
32Mwene Peka mwana Remaliya agamanle yaka mbinli aatongaga aIzarayeli, tchi tempu Jotawu mwana Uziya aromile liye atonga aJuda. 33Jotawu aromaga tonga anna yaka 25. Liye atongile yaka 16 muJeruzalemu. Mmaye nzina naye aitaniwa Jeruza mwana Zadoki. 34Liye ohosakanya jofwanela vamentoni va Yehova molingana na makalelo matene anna babaye Uziya. 35So mbwenye liye kagumunle mamburo otama ovelela mikuto wa amilugu. Tchoira atu kodowetchave sakanya mikuto diwa eto aliwa tumeyaga jonukela mamburo anne. Mulombwana Jotawu gumangile Mulango wa Nkumani wa va Nyumba ya Yehova. 36Joira jimohi jiwa ja mwene Jotawu, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 37Mwa malambo anne Yehova paromile liye muruma Rezimi mwene wa Siriya vamohi na Peka mwana Remaliya mwene wa Izarayeli, aliwa za wanaga na Juda. 38Noira eno, Jotawu ohokwa, liye dowa vuma na makolo aye, liye koyiwa na ababaye sidadi ya mbwiyaye Davi. Mwa enne mwanaye Akazi gwahambile umwene vamalroni vaye.
Currently Selected:
2 Amwene 15: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
