2 Amwene 14
14
Tonga wa Amaziya mwene wa Juda
1Jeyowasi mwana Jeyowakazi agamanle yaka mbinli aatongaga aIzarayeli, tchi tempu Amaziya mwana Jowasi aromile liye atonga aJuda. 2Aromaga tonga anna yaka 25. Evale ohotonga muJeruzalemu yaka 29. Mmaye ali muhiyana mmohi wa Jeruzalemu aitaniwa Jeyowada. 3Amaziya ohowenda na makalelo apama vamentoni va Yehova. Mbwenye kafiyile nnga makalelo anna mbwiyaye Davi. Liye ohoirana jatene japama jairile babaye Jowasi. 4So mbwenye liye kagumunle mamburo otama ovelela mikuto wa amilugu. Tchoira atu kodowetchave sakanya mikuto diwa eto aliwa tumeyaga jonukela mamburo anne.
5Mulombwana Amaziya agamanle ona ira umwene wogarateya mmandani mwaye, ohapa anamalabaye a muumweneni, anne kampile babaye, wenno ali mwene. 6Mbwenye aliba mpa babaye ale ahimiwa, liye kaapile. Airilena mokwakwanela na mazu kalrembiwe Livuru na Malamulo a Mozeji, anno Yehova awongile liye ira: <<Kakalevo babi unafuna piwelaga yotega ya mwanaye, nne kakalevo mwana unafuna piwelaga yotega ya babaye. Mbwenye kada mutu apiwelege yotega yaye.>>#14:6 Kakalevo babi unafuna piwelaga yotega ya mwanaye: Nlamulo neno nnafwanyeya Detoronomiyo 26:16. Mulugu kanarumela ira mutu atongiwe zela yotega ya nfwaye. So Mulugu mofuna mwaye, hiya mofuna mwehu unowanda apiha ahima vamohi na ababiwa. Nione 1 Amwene 14:10, 16:3; 2 Amwene 9:9; 1 Samuweli 15:3.
7Mwene Amaziya ohapa alombwana 10.000 akuda Edomu kawanaga ndabo na Mwinnyu, liye fiyeda gondjiha sidadi ya Sela. Mwa enne ohovaha sidadile nzina na Jokiteli. Ante fiyeda siku na peno sidadile inaitaniwave na nzina neno.
8Noira enne, Amaziya ohorumihaga milanyo wa Jeyowasi, mwana Jeyowakazi, muzula wa Jewu, mwene wa Izarayeli eraga: <<Nnafuna uze ira niwane.>> 9Mbwenye Jeyowasi mwene wa Izarayeli ule ohorumiha milanyo momuwakula mwene Amaziya mwene wa Juda eraga: <<Mudowe mwamuwandele mwene Amaziya, muire: <Nikaruwe nafwanyeya Libano nohorumihaga milanyo wa mutengo wa seduru afwanyeya Libano umohive wewule, liye ira: <<Dera udirumihede mwanawo wa muhiyana ira mwanaga amutele.>> Mbwenye anavinyama a mukokolani kafwanyeya Libano ule, kaviraga kohonyingalaga nikaruwe nne.> 10Tchi imohive na weyo. Tchoira weyo wahaporotcha akuda Edomu, nona uhuroma vitukulela mmirimani mwawo. Inafwanela uhagalalege na undimuwa unna we vande vawo. Kodi mwasiwa gwa nni we funaga jovizelena ubure weyo vamohi na atwawo a Juda?>>
11Mbwenye mazwale kaganfwanyile Amaziya mwene wa Juda, liye kafunile vwa. Mwa enne Jeyowasi mwene wa Izarayeli ohomaruwaga eto mwene Amaziya na liyene ohomaruwaga, aliwa dowa gumana Bete-Semeji mwilamboni mwa Juda, roma wana. 12Mwa enne aJuda kohogondjihiwa na aIzarayeli, kada mutu roma tawelaga vande vaye. 13Noira enne, Jeyowasi mwene wa Izarayeli ohomuhinda Amaziya mwene wa Juda, wenno ali mwana Jowasi, muzula wa Akaziya, mukumana Bete-Semeji ule, liye mudowagana Jeruzalemu. Agafiyile Jeruzalemu, ohotwaga muru mulukulu wa Jeruzalemu ule mameturu 180, romela mulango unaitaniwa Mulango wa Efarayimi, ante dowa mulango unaitaniwa Mulango wa Vamwendoni. 14Eto ohotukulaga oru watene, na parata watene, vamohi na jolabana jatene jafwanyeya muNyumbani mwa Yehova, na nyumba yokoyamo ja mwene eto ohatukulaga atu amohiwa nnga atu ohindiwa, liye welela Samariya.
15Joira jimohi jiwa ja mwene Jeyowasi na mabasa matene alabile liye na kopolo daye, vamohi na kondo datene dawanile liye na Amaziya mwene wa Juda, jatene jejo jinafwanyeya jagalrembiwe mulivuruni mwa Joira ja Amwene a Izarayeli. 16Jeyowasi ohokwa, liye dowa vuma na makolo aye, liye koyiwa Samariya vamohi na amwene a Izarayeli. Noira enne, mwanaye Jerobowawu gwahambile umwene vamalroni vaye.
17Mulombwana Jeyowasi mwana Jeyowakazi, mwene wa Izarayeli agakwile, Amaziya mwana Jowasi, mwene wa Juda ohomala yaka 15 agaliwove. 18Joira jimohi jiwa ja mwene Amaziya jinafwanyeya jagalrembiwe mulivuruni mwa Joira ja Amwene a Juda. 19Noira eno, kohompanganela ira kampe muJeruzalemu. Evale liye ohotawelaga sidadi ya Lakiji. Mbwenye koharumaga atu, aliwa muhara Lakiji ule, aliwa mpa. 20Noira eno, kohotukulaga mutembo waye, aliwa mugweliha vakavaloni muwelelana Jeruzalemu wakoka wene, aliwa mukoya wewule vamohi na makolo aye sidadi ya Davi.
21Mwa enne atu atene a Juda kohomutukulaga mwanaye Azariya, agalive muzombwe wa yaka 16, aliwa muhambiha umwene vamalroni va babaye Amaziya ule. 22Babaye Amaziya agakwile, agadowile vuma na makolo aye, Azariya ohogondjiha sidadi ya Elate, liye itukula ira ikale ya aJuda akoka eto liyene guimangile akoka.
Tonga wa Jerobowawu mmohiwa, mwene wa Izarayeli
23Mwene Amaziya mwana Jowasi agamanle yaka 15 aatongaga aJuda, tchi tempu Jerobowawu mmohiwa mwana Jeyowasi aromile liye atonga aIzarayeli. Jerobowawu atongile yaka 41 sidadi ya Samariya. 24Liye ohosakanya jabure vamentoni va Yehova. Liye kahiyile yotega ili yatene yaira xaraye Jerobowawu mwana Nebati aategihaga aIzarayeli. 25Masiki eno, liye ohaweliheda aIzarayeli afwaye vilambo diwa dawakiwe atu na amwidani romela Lebo-Hamate ante dowa fiya Ntiya Nokwa,#14:25 romela Lebo-Hamate ante dowa fiya Ntiya Nokwa, ku wonga ilambo yatene ya aIzarayeli. nnga mwemo mwawongele Yehova Mulugu wa Izarayeli na namalaba waye namafiyiheda Jonasi, mwana Amitayi, wenno ali wa Gate-Eferi. 26Tchoira Yehova ohoona goyi dohokala da masika daona aIzarayeli, kalivo mutu nne muzari nari ahali muzari, kalivo awanda akamiheda. 27Mbwenye Yehova kawongile ira: <<Miyo nnafuna ditimihe wene nzina na aIzarayeli ira nahavweye ilambo ya vati.>> Mwa enne Yehova ohavunela muwari mwa mulombwana Jerobowawu, mwana Jeyowasi.
28Joira jimohi jiwa ja mwene Jerobowawu, vamohi na mabasa matene alabile liye, vamohi na kopolo daye, vamohi na makalelo awanile liye, na makalelo awombonle liye sidadi ya Damaxiku na Hamate sidadi dedo dali da Juda,#14:28 Wanle amwene ambinli oroma a Juda anno kafwanyeya kagali Davi na Salomawu kotongetcha sidadi ya Damaxiku na Hamate. Nona kawongaga ira sidadi dedo dali da Juda (2 Samuweli 8:6; 1 Amwene 4:21) jatene ejo jinafwanyeya jagalrembiwe mulivuruni mwa Joira ja Amwene a Izarayeli. 29Jerobowawu ohokwa, liye dowa vuma na makolo aye anno kafwanyeya kagali amwene a Izarayeli. Noira eno, mwanaye Zakariya gwahambile umwene vamalroni vaye.
Currently Selected:
2 Amwene 14: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
