2 Amwene 13
13
Tonga wa Jeyowakazi mwene wa Izarayeli
1Mwene Jowasi mwana Akaziya agamanle yaka 23 aatongaga aJuda, tchi tempu Jeyowakazi mwana Jewu aromile liye atonga aIzarayeli muSamariya. Liye atongile yaka 17. 2Liye ohosakanya jabure vamentoni va Yehova. Tchoira liye ohara jotega ja Jerobowawu, mwana Nebati wenno aategihile aIzarayeli. Kafunile hiya jabure ejile. 3Na mwasa wenne, Yehova ohotakaleliwaga na makalelo ohokala a masika zela aIzarayeli, liye avaheda mmandani mwa Hazayeli mwene wa Siriya eto ohavaheda mmandani mwa mwanaiwa Beni-Hadade fendo didjindji dene. 4Mbwenye jagaireyile enne, mulombwana Jeyowakazi ohonvepa Yehova. Mwa enne Yehova ohovwa yovepa yaye, tchoira ohoona zuzumihiwa wa aIzarayeli wewo wazuzumihiwa atu na mwene wa Siriya. 5Evale Yehova ohavaha aIzarayeli maliba avunela mmohi azile avunela mmandani mwa amwidaniwa akuda Siriya, Ana Izarayeli dowa kalaga mmavande mwewa nnga voroma vene. 6Mbwenye masikive jaireyile enne, aliwa tchahiyile jotega ja akuda Jerobowawu, wenno aategihile aIzarayeli. Kohokalelave wenda ndila imohive. Eto aliwa tchakumihilewo nimbozo nofwalrafwaniha mulugu Azera nafwanyeya Samariya ule. 7Mwene wa Siriya ohomala atolotcha anyakondo a aIzarayeli eto ohomala atchila nnga utu. Anyakondo atene a Jeyowakazi kohomala tolowa, so kahanle atu 50 owendiha kavalo, na aaterelado kumi, vamohi na alombwana 10.000 otamanga na mendo.
8Joira jimohi jiwa ja mwene Jeyowakazi, na mabasa matene alabile liye, vamohi na kopolo daye, jinafwanyeya jagalrembiwe mulivuruni mwa Joira ja Amwene a Izarayeli. 9Jeyowakazi ohokwa, liye dowa vuma na makolo aye, aliwa mukoya Samariya. Noira eno, mwanaye Jeyowasi gwahambile umwene vamalroni vaye.
Tonga wa Jeyowasi mwene wa Izarayeli
10Mwene Jowasi agamanle yaka 37 aatongaga aJuda, tchi tempu Jeyowasi mwana Jeyowakazi aromile liye atonga aIzarayeli sidadi ya Samariya. Liye atongile yaka 16. 11Mwene Jeyowasi ohosakanya jabure vamentoni va Yehova. Liye kahiyile yotega ili yatene yaira Jerobowawu mwana Nebati aategihaga aIzarayeli. Na liyene ohowenda ndila datene davirile liye. 12Joira jimohi jiwa ja mwene Jeyowasi na mabasa matene alabile liye na kopolo daye danna liye awanaga na Amaziya mwene wa Juda, jatene ejo jinafwanyeya jagalrembiwe mulivuruni mwa Joira ja Amwene a Izarayeli. 13Jeyowasi ohokwa, liye dowa vuma na makolo aye, liye koyiwa Samariya vamohi na amwene a Izarayeli. Noira enne, mwanaye Jerobowawu ohala vampandoni otonga vamalroni vaye.#13:13 mwanaye Jerobowawu ohala vampandoni otonga vamalroni vaye: Fwanyeya ira muwari mwa amwene a Izarayeli, kohokalawo ambinli kanna nzina nimohive na Jerobowawu. Mwene oroma vamwalanile aIzarayeli na aJudewu ali Jerobowawu mwana Nebati. Jerobowawu owelela ali mwana Jeyowasi. Liye ohotonga Jerobowawu mwana Nebati agakwile wanle.
Bulela wa Elizewu
14Namafiyiheda Elizewu ohoroma bulelana urenda ohokala wa masika wenno afuna liye kwana. Evale Jeyowasi mwene wa Izarayeli ohovenyaga dowa nfwanya, liye muoramela amunlelaga eraga: <<Babani, babani. Nyo munafwanyeya mwagali aaterelado a kondoni a Izarayeli vamohi na aliba wendiha kavalo.>>#13:14 munafwanyeya mwagali aaterelado a kondoni a Izarayeli vamohi na aliba wendiha kavalo : Mwene Jeyowasi awongaga eno, ku wonga liye amuona Elizewu nnga maliba alimbiha aIzarayeli nnga anyakondo owenda na kavalo na aaterelado a kondo. 15Evale Elizewu ohomuwongagana mwene ule, liye ira: <<Katukula urwa na mafumo.>> Evale mwenole ohotukulaga. 16Noira enne, Elizewu ohomuwandelaga mwene wa Izarayeli ule eraga: <<Katukula nifumo nimohi uhele muurwani mwawo, utambule.>> Evale mwenole ohoiragana. Eto noira enne, Elizewu ohotukulaga manda aye, liye hela vazulu va manda a mwene vale. 17Mwa enne Elizewu ohomuwongagana eraga: <<Kahula janela nnafwanyeya pandi ya Siriya.>>#13:17 pandi ya Siriya : MaBibiliya amohiwa anawonga pandi ya makumelo wa nzuwa. Evale mwenole ohula janela nne. Noira enne, Elizewu ohomuwongaganave eraga: <<Kaing'aniha nifumo nawo no vajanelani vo, amala uvoke.>> Evale mwenole ohovokaga nifumo nne. Agavokile, Elizewu ohowongaga eraga: <<Nenne ti nifumo Yehova unagondjihana liye. Ti nifumo nnafuna agondjiha akuda Siriya. Tchoira weyo unoalata akuda Siriya pandi da Afeki, ante ufiyede atolotcha.>> 18Noira enne, Elizewu ohowongagave na mwene ule eraga: <<Katukula mafumo amohiwa ohala ayo.>> Evale mwene Jeyowasi ohotukula. Noira enne, Elizewu ohomuwongaganave eraga: <<Kalatagana vati.>> Mwenole oholatana vati fendo taru, liye hiya. 19Evale mutu wa Mulugu Elizewu ohotakaleliwaga awongaga eraga: <<Uhiyele nni? Miyo dafuna ira ulategeve vati ante fendo tanu owu fendo tanu na imohi. Wahairena eno wogofiyeda agondjiha akuda Siriya, ante ufiyede atolotcha. Mbwenye eni unaagondjiha fendo taru bahi.>>
Venya wa mutu atatileliwe masiye wakoyiwe Elizewu
20Noira enne, Elizewu ohokwa, aliwa mukoya. Fwanyeya ira kohokalawo makuru a amadjuba okumela Mowabe kazetcha tatamula kondo mwilamboni mule maromelo wa kada yaka. 21Mwa enne siku nimohi aIzarayeli kadowaga mukoya mutu mmohi akwile, kohoonaga nikuru na amadjuba kazaga. Evale kohomutukulaga mutule, aliwa mutatilela mmasiyeni mwakoyiwe Elizewu, aliwa tawaga. Mwa enne mutule agamorenle va makuvani a Elizewu, mutu akwile ule ohovenyaga mokwani, liye roma wenda ekave na manyalo aye.
Kondo ya aIzarayeli na akuda Siriya
22Fwanyeya ira Hazayeli mwene wa Siriya oazuzumihetcha aIzarayeli tempu yatene ya umwene wa Jeyowakazi. 23Mbwenye Yehova ohawendela tangaranga eto ohairela upama, liye welela wenda na aliwa na mwasa oziveliwa yopangana yasakanyile liye na Abarahamu, Izaki na Jako. Mwa tempu yenno Yehova ali ahanafune atolotcha eto ali ahanafune atatilela olapela wene na liye.
24Hazayeli mwene wa Siriya ohokwa. Evale mwanaye Beni-Hadade gwahambile umwene vamalroni vaye. 25Noira enne, Jeyowasi mwana Jeyowakazi ohagondjiha fendo taru akuda Siriya, liye tukula sidadi da Izarayeli dafwanyeya mmandani mwa Beni-Hadade mwana Hazayeli, dedo datukuliwe tempu ya babaye Jeyowakazi kawanaga mukondoni.
Currently Selected:
2 Amwene 13: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
