1 Samuweli 16

Mulugu ohomusakulra Davi ira akale mwene wa aIzarayeli

1Evale Yehova ohowongaga na Samuweli eraga: <<Kodi unaza uhiye mukumbanya Sawuli alini, agali miyo dihimala munyanyala ira liye ahakale mwene wa mulogo wa Izarayeli akoka? Uvenye utukule nnyanga, uzalihemo makura, umaruwe udowe sidadi ya Beleme. Wafiya wewo, udowe vande va mulombwana mmohi unaitaniwa Jese. Liye uhumukana mwanaye mmohi wenno dimusakunlre miyo ira akale mwene.>> 2Mbwenye Samuweli ohomuwakula Yehova, liye ira: <<Nnga nnairena ejo avi, agali mulombwana Sawuli uhukalawove? Tchoira liye avwa, unodipa.>> Yehova ohomuwakula, liye ira: <<Nari, so weyo wadowaga, utukule mwana ng'ombe ya muhiyana, wafiya wewule, wawonge ira: <Miyo dazela velela mukuto wa Yehova.> 3Wamala eno, umuitanele Jese mukutoni. Mwagadowile wewule, miyo nnouwandela yenno inafuna we ira. Mutu wenne unafune miyo utonyiheda, weyo unomuhambiha muwari momukutulela makura.>>

4Samuweli agavwile mazu anne, ohoiragana nnga mwemo mwamurumele Yehova. Liye venyihana, dowaga ilambo ya Beleme. Agafiyile wewule, andimuwa a wewule kagamuonne, kohorendjeyaga, aliwa dowa nfuka kangurumelaga, aliwa ira: <<Kodi za wenyu kwa murendele?>> 5Liye ohawakula, liye ira: <<He, za waga kwa murendele. Miyo dazela velela mukuto wa Yehova. Nnafuna muvitchenihe ira mudihare mukutoni unaya miyo.>> Nomala eno, Samuweli ohomutchenihaga mulombwana Jese vamohi na ahimayene anno kafwanyeya kagali anapongwe.#16:5 muvitchenihe… Samuweli ohomutchenihaga mulombwana Jese vamohi na ahimayene: Kaniiziwile makalelo kavitchenihile atu eto makalelo Samuweli aatchenihile liye akuda Jese. So mazu anowonga ira wanle atu kahanadowe kuta mukuto, kohokana sanganiko daharihamo atu muwari mokozeya ira kakutege. (Ezodu 19:9-15) Agamanle atcheniha, ohomuitana mulombwana Jese na ahimaye ira kamuharege mukutoni.

6Akuda Jese kagazile, Samuweli ohomuona mwana Jese mmohi aitaniwa Eliyabe. Agamuonne wenne aumbuwela ira: <<Mwana wenna na ibaribari gwenno Yehova umusakunlre liye ira ahambihiwe umwene.>> 7Mbwenye Yehova ohowongaga na Samuweli eraga: <<Weyo kuing'ane baleya wa mutu, nne ulukula wa mutu. Miyo wenno kadinfunile mwasiwa miyo kannaing'ana nnga makalelo anaing'ana atu. Tchoira atu anaing'ana makalelo a mutu, mbwenye miyo dagali Yehova nnaing'ana mmirimani mwa mutu.>>

8Noira eno, Jese ohomuitanaga mwanaye Abinadabe, liye mudowana wa Samuweli. Mbwenye Samuweli ohowongaga, liye ira: <<Nari. Yehova umusakunlre liye kahi wenna.>> 9Noira eno, Jese ohomuzagana mwanaye Sama. Eto Samuweli ohowongaga, liye ira: <<Nari. Yehova umusakunlre liye kahi wenna.>> 10Mwa enne Jese ohazagana ahimaye atanu na ambinli. Mbwenye Samuweli ohomuwandela ira: <<Nari, mwa ahimawo atene anna, usakulriwe na Yehova kalivo.>>

11Evale Samuweli ohonfuka Jese, liye ira: <<Kodi weyo ahima a anapongwe awo anna we banna bahi, kunna mwana mmohiwa ahalivo?>> Jese ohowakulaga, liye ira: <<Ahalivo eva gwa ng'onong'onuwa. Liye eto unadjiha mabila.>> Evale Samuweli ohowonga, liye ira: <<Kadowani mwamuitane aze. Tchoira hiyo kannaroma dja liye ahanaze.>>

12Evale Jese oharuma atu, aliwa mudowela. Fwanyeya ira liye ali muzombwe oriya, okana maningo apama eto meso aye kong'asimela. Evale Yehova ohomuwandela mulombwana Samuweli, liye ira: <<Mutu dimusakunlre miyo gwenno, umuhambihe na makura.>> 13Evale Samuweli ohotukulaga nnyanga neno mwafwanyeya makura, liye mukutulela Davi vamentoni va abalaye atene. Evale Munemba wa Yehova ohomuzelaga kala na liye roma siku nenne ante dowaga sogolro. Nomala eno, Samuweli ohowelelaga waniwa wakoka wene ilambo ya Rama.

Davi amulabaga Sawuli

14Noira eno, Munemba wa Yehova afwanyeya na mwene Sawuli ohokumamo, evale munemba mmohiwa wabure orumiwa na Yehova ohoza roma muzuzumihaga Sawuli. 15Evale anamalaba a Sawuli kohomuwongana, aliwa ira: <<Mbwiyeni hiyo nihiiziwa ira munemba wabure orumiwa na Mulugu, uhuza, uzuzumihagani. 16Yapamiwa inafwanela munirume hiyo anamalabinyu, nidowe namusake maliba imba arpa aze. Aza, tempu inafuna nyo hindiwa na munemba wabure orumiwa na Mulugu, maliba imba ule aimbaga arpa waye, nyo munerege kala pama akoka.>> 17Evale Sawuli ohawakulaga anamalabaye ira: <<Ihikala pama! Dowani mwamusake mutu unawanda imba arpa pama, mmuzena wa miyo.>> 18Evale namalaba mmohi ohowongaga eraga: <<Sidadi ya Beleme uhukalawo mulombwana mmohi uneriwa Jese. Liye uhumukana mwanaye mmohi unawanda imba pama arpa. Liye eto gu mutu olimba murima, mutu owanda wana, owanda wonga pama, mutu oriya eto liye gosogolrelriwa na Yehova.>> 19Evale Sawuli oharuma atu ira: <<Muvenye mudowe wa Jese, mwawonge ira: <Sawuli unirumile ira mmurumihede mwaninyu Davi wenno unadjiha mabila.> >> 20Evale Jese agavwile milanyo darumihile mwene Sawuli, ohomuruma mwanaye Davi anvahaga pawu na tembe mwazanle vinyu na mwana mbuzi eni, liye gweliha vaburuni ira anvahe mwene Sawuli.

21Evale Davi ohodowaga, liye roma mulaba mwene Sawuli. Mwa enne Sawuli ohomuziveliwa simbwa fiyeda liye musakulra ira atukulege jowanana jaye kadowaga kondoni. 22Noira eno, ohorumiha milanyo wa mulombwana Jese doira: <<Miyo dihimuziveliwa mwanawo Davi. Na mwasa wenno nnouwandela weyo ira umuhiye akale wewuno alabege mabasa vamohi na miyo.>> 23Kuma evo dowa sogolro, munemba wabure orumiwa na Mulugu, fendo datene amuhinda liye mwene Sawuli, Davi otukula arpa, liye roma imba. Davi aimbaga enne, munemba wabure ule okumamo mwa mwene Sawuli,#16:23 Davi aimbaga enne, munemba wabure ule okumamo mwa mwene Sawuli: Kahi ira Davi agogodelra mazoka. Tchoira Davi ohokana Munemba Otchena eto liye aimba muwari mosogolrelriwa na Munemba Otchena ule. Eto fwanyeya ira kada muzika ukana makalelo unanilabela liye. Zelru da maliba imba nnovolowa muwari mwa aliba vuruwana. Ja Munemba Otchena jaimba Davi johondunya ja munemba wabure wanna Sawuli. Tapulela ira inafwanela mutu aing'ane pama muzika nnaimba liye nari nnavuruwana liye, mwasiwa mutu avuruwana muzika diimbiwe na atu osogolrelriwa na minemba dabure, unolanda zelru da minemba dedo muwari mwa muzika ule. liye vulumuwaga, kalaga pama nnga mwakalele liye.

Currently Selected:

1 Samuweli 16: iLolo

Highlight

Copy

Compare