1 Samuweli 15

AIzarayeli kohagondjiha akuda Amaleki

1Siku nimohi mulombwana Samuweli ohoviraga dowa muwandela Sawuli, liye ira: <<Yehova gwadirumile ira duhambihe ira ukale mwene wa atwaye aIzarayeli. Nona uvuruwane mazu a Yehova. 2Yehova wa Makuru Matene gunawonga ira: <Miyo nnoatonga akuda Amaleki mwasiwa kohovenda jowana na aIzarayeli kakumaga ilambo ya Ijipitu.#15:2 nnoatonga akuda Amaleki mwasiwa kohovenda jowana na aIzarayeli: Muselu ula unafwanyeya muwari mwa Ezodu 17:8-13; Detoronomiyo 25:17-19. 3Nyo muvenye tchineneva mwawane na akuda Amaleki eto mutolotche jatene jinna atu. Mwaafwanya, kamwawendele tangaranga nne kamwaairele yengo yapama. Mwaape alombwana atenene vamohi na ahiyana na ahimiwene, na ahima a mmandani, ng'ombe, mabila, akamelo, na aburu.> >>

4Sawuli agavwile enne, ohaitanihaga anamwindji atene, aliwa dowa gumana ilambo ya Telayimi. Kagagumanne, ohakontarigi anyakondo atene. Muwari moakontari, aafwannyege anyakondo 200.000 a aIzarayeli owenda na mendo, amohiwa 10.000 a aJuda. 5Nomala enne, mwene Sawuli vamohi na anyakondwaye ale kohogundeyaga kadowaga sidadi ya akuda Amaleki, aliwa dowa avitalela afwiwa ale ndabo nimohi eni. 6Mwa tempu yenne akuda Keni kakaletcha ilambo ya aAmaleki yenne. Mwa enne Sawuli ohovayela awandela akuda Keni eraga: <<Nyo akuda Keni muvayele venyamo mwilamboni mwa Amaleki, tawiha ira nnaze dupeni vamohi na aAmaleki. Tchoira nyo mohairela upama Ana Izarayeli vazile atu kakumaga ilambo ya Ijipitu.>> Noira eno, aKeni ale kohokumamo mwilamboni mwa aAmaleki mule.

7Evale mwene Sawuli ohoromaga wana na aAmaleki atenene kuma ilambo ya Havila, ante dowa fiya Suri makumelo wa nzuwa wa Ijipitu. 8Ohomuhinda wa meswene mulombwana Agagi mwene wa aAmaleki ule. Mbwenye atu atene ohala ale, Sawuli ohatolotcha na supada. 9Sawuli vamohi na alombwanaye kohomuhiya mwene Agagi ule vamohi na anavinyama atene apama romela ng'ombe, mabila, vamohi na ana mabila, ana ng'ombe oruva na jengo jatene japama tchatolotchilege. Mbwenye katolotchilege jengo johokala pama na jengo johokana mabasa bahi.

Yotega ya Sawuli

10Evale mazu a Yehova kohozaga wa Samuweli ira: 11<<Miyo nnokumbanya na mwasa omusakulra Sawuli ira akale mwene. Tchoira liye uhudihiya, uhulramwisa jejo jamuwandenle miyo.>> Samuweli agavwile mazu anne, ohokana kumbanya ulukulu. Mahiyu matene anne ohokalela lobela na mwasa wa jengo jawongile Yehova. 12Mmetcheloni muwa na mabebehene, ohovenyaga ira adowe angumanena Sawuli. Mbwenye atu kohomuwandelaga ira: <<Sawuli ohodowa sidadi ya Karimelo, liye imetcha nimbozo noira nzina naye nivweyege. Eto akumaga wewo, liye ohokwaranya, liye dowaga Jiligali.>> 13Noira eno, Samuweli ohomusakaga Sawuli fiyeda nfwanya. Aganfwannye, Sawuli ohowongaga na Samuweli eraga: <<Yehova aureliheni! Miyo dihimala irana jatene jadirumile Yehova.>> 14Mbwenye Samuweli ohonfuka, liye ira: <<Akala we ukwakwaneliheda jatene, nnga nla wa mabila na wa ng'ombe nnavwa miyo ji jinakumela waani?>> 15Sawuli ohowakulaga eraga: <<Alombwana aga baawakile aAmaleki ale, aliwa zagana. Aliwa kohotukula japama, mabila apama vamohi na ng'ombe dapama ira kavelele mukuto wa Yehova Mulugu wenyu. Mbwenye hiya ejo, jatene jene nihimala tolotcha.>> 16Evale Samuweli ohowongaga eraga: <<Kamiyala we! Miyo nnafuna duwandele jatene jidiwandenle Yehova mahiyu.>> Sawuli ohoira: <<Kawongani!>> 17Samuweli ohomuwandelaga eraga: <<Masiki weyo wa mwinnya uvionege nnga mutu ohokana mabasa, Yehova mbwenye uhambihile weyo ira ukale muru wa malogo a aIzarayeli, mwene wa Izarayeli. 18Eto Yehova ohouruma ira: <Udowe waatolotche aAmaleki atu otega ale. Udowe wawane na aliwa ante ufiyede atolotchamo atene vamohi na jewa jatene.> 19Nnga mwasiwa gwa nni wahafunaga vwelela? Mwasiwa gwa nni we funaga johalana jengo ja amwidaninyu, we sakanyaga yengo yabure vamentoni va Yehova?>>

20Evale Sawuli ohowakulaga, liye ira: <<Miyo mbwenye dihivwelela jatene jadirumile Yehova. Miyo dohovenya nnga mwemo mwadiwandenle liye, miyo atolotcha aAmaleki atene, mutukula mwene Agagi wa meswene miyo muzagana. 21So mbwenye alombwana danna miyo batukunle ng'ombe na mabila apama anno Yehova afunile liye ira kapiwe. Aliwa eto kohotukula, aliwa zagana Jiligali uno ira kaze kavelele mukuto wa Yehova Mulugu wenyu.>>

22Evale Samuweli ohowongaga, liye ira: <<Kodi na ibaribari weyo unaumbuwela ira Yehova unaziveliwa jovelela mikuto dotumeya hiya vwelela inawonga liye? Uvwe pama, ili yapama nvwelela Yehova hiyaniha no kuta mikuto. Eto vuruwana inawonga liye tchapama hiyaniha no tukula mabila a alombwana oruva velelaga mukuto. 23Konda irana yenno inafuna liye, tchi yotega imohive no wombeza makanga. Eto vitukulela tchi yabure imohive no irana jotakala no hara ikwamutu yosema. Voira weyo wohokonda irana jawongile Yehova, na liyene peno va umala ukonda ira wahakaleve mwene waye.>>

24Evale Sawuli ohowakula eraga: <<Miyo dihitega! Miyo dihiya jadiwandenle Yehova na jadiwandenle nyo, mwasiwa daaova aIzarayeli, miyo irana yenno yawonga atu. 25Mbwenye miyo nnouvepani nyo ira mudikurumuwele yotega yaga, muwelele kala na miyo ira miyo dimutamalelege wa Yehova.>> 26Samuweli ohowakula eraga: <<Miyo kannawelela wa weyo. Voira weyo wohokonda irana mazu a Yehova, Yehova na liyene peno va uhukonda ira wahakale mwene oatonga aIzarayeli.>>

27Noira eno, Samuweli ohorungunuwaga ira akume. Mbwenye Sawuli ohindaga kapa ya Samuweli eto kapa ile yohokauwaga. 28Mwa enne Samuweli ohowongaga, liye ira: <<Peno Yehova uhukawula umwene wawo oatonga aIzarayeli, uhumusaka mutu mmohiwa wapama ira atongege hiyaniha na weyo. 29Eto Mulugu, wenno unafwanyeya agali Ibaribari ya aIzarayeli,#15:29 Mazu oira Ibaribari ya aIzarayeli ti nzina na Mulugu. Ku tapulela ira muwari mwa jatene, yengo yokana ibaribari kwaranya muwari mwa aIzarayeli gu Mulugu mwinnya ekave bahi. kananama eto youmbuwela yaye kanatchindja. Liye kahi mutu nnga hiyo ira amala unotchindja youmbuwela yaye, liye hairagana yenno iwongile liye.>>

30Evale Sawuli ohowongaga eraga: <<Miyo dihitega! Masiki eno nnouvepani ira mudirihede vamentoni va andimuwa a mulogo waga na aIzarayeli atene. Mudihiye dikale vamohi na nyo akoka ira didowege damutamalelegeve Yehova Mulugu wenyu.>> 31Evale Samuweli ohowelela wa Sawuli akoka. Noira eno, Sawuli ohomutamalela Yehova.

32Mwa eno, Samuweli ohowongaga, liye ira: <<Kadowani mwamutukule Agagi mwene wa aAmaleki, mudizelena va.>> Evale mwene Agagi ohodowaga vali Samuweli mohagalala aumbuwelaga ira: <<Na ibaribari wopiha wa ukwa waova miyo uhumala.>>#15:32 Na ibaribari wopiha wa ukwa waova miyo uhumala. MaBibiliya amohiwa anawonga ira: Na ibaribari ihifiya tempu ira dione wopiha wa ukwa. 33Mbwenye Samuweli ohowongaga eraga: <<Sawasawa nnga weyo na supada nawo woapetcha ahiyana ahimiwa, na wenne peno nnafuna nuupe, mmawo ahakayena mwana!>> Noira eno, Samuweli ohomugwadanya mwene Agagi yano yano, Jiligali wewule vamentoni va Yehova.#15:33 Samuweli ohomugwadanya mwene Agagi… vamentoni va Yehova ku wonga liye ohoirana funa wa Yehova.

34Noira eno, Samuweli ohodowaga waniwa Rama eto Sawuli ohowelelaga waniwa Jibeya. 35Eto Samuweli kawelenle dowa mpanda Sawuli akoka. So mbwenye vakala liye, Samuweli omukumbanya Sawuli. Eto Yehova na liyene ohokumbanya ira: <<Kodi mwasiwa gwa nni diza dimusakulraga Sawuli ira akale mwene wa aIzarayeli?!>>

Currently Selected:

1 Samuweli 15: iLolo

Highlight

Copy

Compare