1 Amwene 9
9
Yehova ohomutwanyuwela Salomawu
1Mwene Salomawu agamanle manga Nyumba ya Yehova na nyumba yaye vamohi na jatene jafuna liye manga, 2Yehova ohomutwanyuwelaga Salomawu fendo yanembinli nnga vamutwanyuwele liye agali Jibeyawu.#1 Amwene 3:5; 2 Koronika 1:7 3Evale Yehova ohomuwandelaga eraga: <<Miyo dihivwa lobela wawo vamohi no vepa wawo wirile we vamentoni vaga. Miyo dihimala tcheniha Nyumba imangile we ira nzina naga nikalege mwemule malambo a mukalakala. Meso aga vamohi na murimaga jinakalege mwemule malambo matene. 4Eto weyo wawenda mofuna mwaga na murimawo watene eto mowongowa vamentoni vaga uharihagamo jatene jiurumile miyo eto ukoyaga mangano aga vamohi na jotonga jaga molingana na makalelo awendile babawo Davi, 5miyo nnosakanya ira ahimawo kakale vampandoni otonga aIzarayeli malambo a mukalakala nnga mwemo mwapanganne miyo na babawo Davi, ira: <Ahimawo banaze kaatongege aIzarayeli malambo a mukalakala.> 6Mbwenye weyo owu hehi ahimawo mwaperuwa muhiyaga ndila daga eto mwahiya harihamo malamulo aga vamohi na mangano duvahileni miyo, mwaroma ahara eto mwaatamalelaga amilugu amohiwene, 7pa evo vanafuna miyo za adimeliha aIzarayeli ilambo yenno yaavahile miyo eto nyumba yenna itchenihile miyo ira nzina naga nitamaleliwegemo, nnoza divokele olapela wene na miyo. Eto aIzarayeli anoza kakale imariya eto anoza kapetiwege na atu atene a mwilamboni ya vati. 8Eto zela nyumbela ivweyile na makalelo ohokala a masika ila, atu kaviraga kaona makalelo anafuna gomela nyumba ila, anoza katikinege, kazumege, kawongege ira: <Xii, kodi mwasiwa gwa nni Yehova aza airagana eni ilambwela vamohi na nyumbela?> 9Eto anoza kawakuliwege ira: <Mwasiwa kohomuhiya Yehova Mulugu wewa, wenno waakumihile makolo ewa ilambo ya Ijipitu, aliwa abanda amilugu amohiwene, akokorelaga eto aharaga aliwene. Nona Yehova aavaha ubure watene wenna.> >>
Mabasa amohiwa alabile Salomawu
10Salomawu amalile yaka 20 ira amange nyumba mbinli dile, roma Nyumba ya Yehova na nyumba ya mwene. 11Mwa enne mulombwana Salomawu agaonne zela mabasa matene alabile mulombwana Hirawu mwene wa Tiru, mabasa ovenda matabwa a seduru, na matabwa a faya, vamohi na oru nnga mwafunele liye, ohonvaha mulombwana Hirawu ule sidadi 20 muwari mwa ilambo ya Galileya. 12Evale mwene Hirawu agakumile waniwa Tiru ira adowe aone sidadi dedo davahiwe liye na Salomawu, agaonne sidadi diwa, liye mbwenye kaaziveliwile. 13Mwa enne pawongilege liye na Salomawu eraga: <<Mbalaga, kodi sidadi mudivahile nyo diwa ti dedi?>> Nona kuma evale ante peno sidadi dedile nnaitaniwa ilambo ya Kabuli [ku wonga kinna mabasa]. 14Fwanyeya ira mulombwana Hirawu amurumihede mwene Salomawu kilu 4.000 da oru.
15Mwene Salomawu ohavenda atu ira kalabege mabasa okanyihediwa ira awande manga Nyumba ya Yehova, vamohi na nyumbaye ya umwene, vamohi na nimburo naitaniwa Milu eto ira kamange muru wa Jeruzalemu. Liye eto ohosakanyeda sidadi da Azori, Mejido na Jezeri. 16Fwanyeya ira ahanamange sidadi ya Jezeri, Farawu mwene wa Ijipitu ere venya, liye mala gondjiha sidadile, liye itumeya eto liye apa akuda Kana atene kakala musidadi mwemule. Mwa enne ohonvahedaga sidadile mwanaye wa muhiyana wenno afwanyeya agali mwadi Salomawu siku natelana atu.
17Evale mulombwana Salomawu ohovenyiheda sidadile ya Jezeri eto ohomanga Bete-Horoni wa Pedi, 18Balate, na Tadimori, mukokolani mwa ilambo ya Juda 19vamohi na sidadi danna mwene Salomawu dokoyamo jengo na sidadi mwakala aaterelado a kondoni vamohi na mwemo mwakala aliba wendiha kavalo. Mulombwana Salomawu ohomanga jatene nnga mwafunela liye ira amange Jeruzalemu, mwango da Libano vamohi na pandi datene datonga liye.
20Zela atu atene kahali aIzarayeli ohala mwilamboni mwewa, romela aAmore, aEti, aFerizi, aEvi vamohi na aJebuzi,#9:20 aAmore, aEti, aFerizi, aEvi vamohi na aJebuzi, kali atu kakaletcha mwilamboni mwa Kana, aIzarayeli kahanadowe gondjiha ilambo ya Kana. 21anno kabaliwe na atu anno aIzarayeli kahawandile atu atolotcha wanle, , Salomawu ohasakanya ira kakale azari ohinda mabasa okanyihediwa fiyeda siku na peno. 22Mbwenye Salomawu kankalihile nne muIzarayeli mmohi ira akale muzari. So Ana Izarayeli bafwanyeya kagali anyakondo, asogolrelri a umwene, adiministaradore, andimuwa a anyakondo, andimuwa a aaterelado a kondoni, vamohi na aliba wendiha kavalo. 23Indjiva wa andimuwa oaing'anela asogolrelri a anamalaba ali 550. Aliwa baasogolrelra atu atene kalaba mabasa omanga ja Salomawu.
24Salomawu muhiyanaye wenno ali mwana Farawu, ohokumaga sidadi ya Davi wakaletcha liye, liye tamela nyumba yaye yenno yammangele mwene Salomawu. Noira eno, pa evale mulombwana Salomawu vamangile liye nimburo naitaniwa Milu.
25Fendo taru va kada yaka#9:25 Fendo taru va kada yaka: Nione Ezodu 23:17, 34:23; Detoronomiyo 16:16. Salomawu ovelela mikuto dotumeya vamohi na mikuto da murendele vaibuwani yenno yamangile liye para mikuto da Yehova. Eto tempu imohive otumeyavo jonukela vamentoni va Yehova. Mwa enne mulombwana Salomawu okwakwaniha mabasa a Nyumba ya Yehova.
26Eto mwene Salomawu ohosakanya nikuru na mwadeya sidadi ya Eziyomi-Jeberi, inafwanyeya wandamelana Elate, mutcherelani mwa Bara Yofila, mwilamboni mwa Edomu. 27Mwa enne mwene Hirawu oharumaga alombwana oiziwetchetcha wenda mwiko ira kadowe vamohi na anamalaba a Salomawu. 28Mwa enne kohowendihaga mwadeya dile mwiko fiyeda Ofiri, aliwa dowa tukula kilu 14.000 da oru, aliwa dowa nvaha mwene Salomawu.#9:28 aliwa dowa tukula kilu 14.000 da oru, aliwa dowa nvaha mwene Salomawu: Navwa mazwala inafwanela niumbuwele ira Salomawu atukulaga oru pwi, yali yoviringaniha vamentoni va Yehova. Nione Detoronomiyo 17:14-20.
Currently Selected:
1 Amwene 9: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
