1 Amwene 8
8
Kaxa ya Yopangana yohotamihediwa muNyumbani mwa Yehova
1Evale mwene Salomawu ohagumaniha Jeruzalemu andimuwa atene a aIzarayeli, asogolrelri atene a malogo, vamohi na andimuwa atene a muibalini mwa aIzarayeli ira kadowe katukule Kaxa ya Yopangana ya Yehova yenno yafwanyeya Siyawu sidadi ya Davi ira kadowena muNyumbani mwa Yehova.#8:1 kadowe katukule Kaxa… sidadi ya Davi ira kadowena muNyumbani mwa Yehova: Mwene Davi gwavolotchihile kaxele muwari mwa sidadi ya Davi yagali Jeruzalemu. (2 Samuweli 6:12-15) Eto fwanyeya ira Salomawu ohomangiha Nyumba ya Yehova unde wa sidadi ya Davi. Vagamanle malambo mangasi mangasi, ohomangiwa eto muru muxa ogumaniha sidadi ya wanle vamohi na Nyumba ya Yehova na nyumba dixa da Salomawu. (1 Amwene 3:1, 9:15) Ku wonga nnga jinereya na sidadi da tchineneva, wanle Jeruzalemu ohoulukula. Jeruzalemu wa wanle unaitaniwa sidadi ya Davi. 2Mwa enne atu atene a Izarayeli kohogumanelaga wa mwene Salomawu ira kawande dja Pwando ya Misasa yenno yadjetcha atu mwedi wa Etanimi, wenno unafwanyeya agali mwedi wanetanu na mbinli. 3Mwa enne andimuwa atene a Izarayeli kagafiyile, anamakuta kohotukulaga Kaxa ya Yopangana. 4Kohodowagana Kaxa ya Yopangana ya Yehova ile vamohi na Musasa Ogumanamo eto vamohi na jolabana jatene jotchenihiwa jafwanyeya mwemule. Atukunle jatene jejile ali anamakuta vamohi na aLevi afwiwa.
5Eto mwene Salomawu vamohi na aIzarayeli atene anno kagumanne wa liye vevo vafwanyeya Kaxa ya Yopangana, atene kohokutaga mikuto da mabila na ng'ombe dohokala da masika, dohowanda kontareya. 6Evale anamakuta kohotukulaga Kaxa ya Yopangana ya Yehova, aliwa dowana nimburo niwa muwari mwa Nimburo Notchenetchetcha, aliwa dowa hela vati va mapepelo a akerubi. 7Akerubi ale kali otapulelene mapepelo vazulu va Kaxa ya Yopangana vale, aliwa ikunelaga Kaxa ya Yopangana ile vamohi na jimiri jotembana. 8Fwanyeya ira jimiri jotembana jile jali jolapa bure fiyeda ira mutu akala muwari mwa Nimburo Notchena, owanda ona jimiri jile. Mbwenye kahi ira jofiyeda oneya unde nari. Jimiri jile jinafwanyeya evale fiyeda siku na peno.#8:8 Jimiri jile jinafwanyeya evale fiyeda siku na peno. Ku wonga ira ante tempu yenno yalrembiwa mazwala, jimiri jile johokalawo. Mutu adowa wewule owanda fwanya. Mbwenye kahi ira jihikalawove fiyeda tempu ili hiyo ila nari.
9Muwari mwa Kaxa ya Yopangana mule kamwali yengo imohiwa ahali mabwe menli osemiwa nnga matabwa#Detoronomiyo 10:5 anno mulombwana Mozeji ahenlemo liye agali Orebi wewo Yehova wasakanyile liye nipangano na Ana Izarayeli kagakumile ilambo ya Ijipitu. 10Anamakuta ale kagakumile muwari mwa Nimburo Notchenetchetcha nne, wohokala murambo azile azala muNyumbani mwa Yehova mule, 11fiyeda ira anamakuta tchawanda volowa ira kahinde mabasiwa na mwasa wa murambo ule, tchoira undimuwa wa Yehova wohozala muwari mwa Nyumba ya Yehova mule.#8:11 Agali kaniiziwile makalelo anna undimuwa wa Yehova wenno azala muwari mwa Nyumba ya Yehova mule, inoiziweya ira yali yengo yowopiha fiyeda ira anamakuta tchawanda volowa ira kahinde mabasiwa. Za wa undimuwa wa Mulugu watonyiheda ira Mulugu orumela mabasa omanga nyumbele eto liye erege kala na aIzarayeli muwari mokala munyumbani emule. Tcheniyo imohive yaireyile tempu yakungile aIzarayeli Musasa wa Yehova. (Ezodu 40:34-35) Sawasawa siku nazilege Munemba Otchena, johokala jionihedo jaireya jotonyiheda ira tempu ili hiyo ila Mulugu kanakala muwari mwa nyumba mbwenye unakala muwari mwa atwaye omuroromela Yesu. (Joira ja Anamarumiwa 2:1-11; 1 Korinto 3:16,17, 6:19)
Mwene Salomawu ohowonga vamwindjini
12Mwa enne Salomawu oholobelaga eraga: <<Yehova nyo mohowonga ira munoza mukalege muwari mwa mirambo dodiba.#Salmu 18:11, 97:2 13Na ibaribari duhumangelani nyumba yorihedeya ira nyo mukalegemo malambo a mukalakala.>> 14Noira enne, mwene Salomawu ohorungunuwaga, liye areliha aIzarayeli atene kafwanyeya evale. Mwa tempu yenne aIzarayeli atene kafwanyeya kagali oimelene. 15Liye ohowongaga eraga: <<Otamaleliwa akale Yehova, wenno uli Mulugu wa Izarayeli, wenno uwandile kwakwaneliheda mwa ndanda naye na kopolo jatene jejo japanganne liye na babaga Davi amuwandelaga ira: 16<Romela siku nakumihile miyo Ijipitu mulogo waga wa Izarayeli, miyo kannasakulre sidadi ili yatene ya malogo a Izarayeli ira imangiwevo nyumba ira nzina naga nitamaleliwegemo. Mbwenye dimusakunlre mwene Davi ira awandege atonga atwaga aIzarayeli.> >>
17Salomawu ohowongaga eto eraga: <<Babaga Davi ohokana yofuna mmirimani mwaye ira amange nyumba para nzina na Yehova Mulugu wa Izarayeli nitamaleliwegemo. 18Mbwenye Yehova ohomuwandela babaga Davi ira: <Weyo uhusakanya pama zela youmbuwela yawo mmirimani mwawo ira umange nyumba para nzina naga. 19Masiki eno miyo nnouwandela ira unafuna manga nyumba yenno kahi weyo. Mbwenye unafuna manga nyumba para nzina naga gu mwanawo wenno unafuna we mbala.> >> 20Salomawu ohowongaga eto eraga: <<Eni Mulugu uhumala kwakwaneliheda nipangano naye. Mwasiwa miyo dihivenya, miyo hala vamalroni va babaga Davi eto dihigarati vampandoni otonga wa aIzarayeli nnga mwemo mwawongele Yehova. Eto dihimanga nyumba para nzina na Yehova Mulugu wa Izarayeli. 21Eto dihisakanya nimburo nohelamo Kaxa ya Yopangana mwemo munafwanyeya matabwa a yopangana yenno Yehova asakanyile liye na ababihu agaakumihile ilambo ya Ijipitu.>>
Lobela wa Salomawu
22Noira enne, Salomawu ohoimelaga vasogolro va ibuwa ya Yehova, vamentoni va aIzarayeli atene, liye venyiheda mandaye zulu. 23Liye roma lobela eraga: <<So Yehova Mulugu wa Izarayeli! Kaliwo Mulugu olingana na nyo nne ilambo ya zulu, nne ilambo ya vati. Nyo Mulugu munokoya yopangana yenyu eto munaairela upama wenyu anamalaba enyu anno anawenda vamentoni venyu na mmirimani mwewa mwatene. 24Nyo muhukwakwaneliheda nipangano neno nasakanyile nyo na namalaba wenyu babaga Davi. Mwasiwa yawongile nyo na mulomo wenyu peno muhukwakwaneliheda na ndanda nenyu na kopolo. 25Nona Yehova Mulugu wa Izarayeli nnouvepani ira mukwakwanelihede yenno yapanganne nyo na babaga Davi namalaba wenyu muiraga: <Ahimawo kakala atu oing'ana pama ndila inawendana atu, kawenda na makalelo awendile we, aliwa banaze kaatongege aIzarayeli malambo a mukalakala.>#1 Amwene 2:4 26Nona so Mulugu wa Izarayeli, nnouvepani ira muwande kwakwaneliheda mazu anno mwawongile nyo na babaga Davi namalaba wenyu.
27<<Kodi nyo Mulugu munokala mwilamboni? Muing'ane, nne zulu nari zulu-zulu kunaukwakwanani ira nyo muwande kalawo. Kodi jinowandeya ira muwandege kala muwari mwa nyumba yenna imangile miyo?#8:27 Kodi jinowandeya ira muwandege kala muwari mwa nyumba: Salomawu muwari momanga nyumba ira Yehova akalegemo, kaumbuwenle ira nyumbele yohokwakwana ira Mulugu akalegemo. So mbwenye kala waye muwari mwa Nyumba ya Yehova ali undimuwa waye wahenle liye muwari mwa nyumbele. Nione 1 Amwene 8:30,32,34,36. 28So Yehova Mulugu waga, nnauvepani ira muvwe lobela wa miyo namalaba wenyu eto mubalre jejo jinavepa miyo namalaba wenyu vamentoni venyu peno. 29Meso enyu kakale ogudubulrene ntana na mahiyu zela nyumba yenna, zela nimburo neni, tchoira nyo mohowonga ira: <Nzina naga nnakala wewule.> Daing'aniha kove yaga nyumba yenna, muvuruwanege jolobela jatene jinavepege miyo namalaba wenyu. 30Vuruwanani jovepa jaga na jovepa ja atwinyu aIzarayeli kaza wa nyo kalobelaga kagaing'anihile kove diwa wewuno. Eto vuruwanani zulu wewo munakala nyo eto mwavwa, kurumuwelani.
31<<Eto mutu awongiwa ira uhukana mulandu omutegela nfwaye, atu kamuzagana ira kamulumbelihe vaibuwani va nyumba yenna, liye alumbela, 32vuruwanani zulu wewo, mulabe eto mutonge jejo. Akala mutule oirana, mmutonge na makalelo ofwanela tongiwa. Akala kairilena, muwande oniha ira mutule unukediwe vasayi vene eto muwande mukamiheda molingana na makalelo aye apama.#8:31-32 atu kamuzagana ira kamulumbelihe vaibuwani va nyumba yenna: Ku wonga aoneya mulandu ohokana umboni pama, atu komudowana mutu awanganyediwa vaibuwani va Nyumba ya Yehova ira alumbele. Agalumbenle, yengwele yali mmandani mwa Mulugu ira Mulugu asakanyede na makalelo aiziwile liye.
33<<Eto atwinyu aIzarayeli kagondjihiwa na amwidaniwa na mwasa outegelani, era eno, karungunuwela wa nyo ira karomolege nzina nenyu, kalobele, kauvepeni nikurumuwelo nyumba yenna, 34vuruwanani zulu wewo munakala nyo. Mukurumuwele yotega ya atwinyu aIzarayeli eto muwande aweliheda mwilamboni mwemo mwaavahile nyo makolo ewa a wanle.#8:34 muwande aweliheda mwilamboni mwemo mwaavahile nyo : Inakala nnga amwidani kohatamangiha aIzarayeli kakala olapela wene na Jeruzalemu. Evale amwidani ale kohogarati mwilamboni mwa aIzarayeli mule fiyeda aIzarayeli dowa Jeruzalemu, aliwa lobela wa Mulugu ira kawande welela ilambo yakala atu.
35<<Eto atwinyu kautegelani, nyo mwafunga zulu muzongwe aharumbwaga, kaza kalobela kaing'anihaga kove diwa nyumba yenna, karomola nzina nenyu, aliwa katwaruwa mwa jotega jiwa, nyo mwagamanle azuzumiha, 36Yehova vuruwanani zulu wewo munakala nyo eto mukurumuwele jotega ja anamalaba enyu anno anafwanyeya kagali atwinyu aIzarayeli eto mwaafundjihe ndila yapama yofwanela ira aliwa kawendegena eto mwaavahe muzongwe mwilamboni mwemo mwavahile nyo atwinyu ira ikale yewa.
37<<Eto mwilamboni muno mwakala ndala, nari maurenda owopiha, nari johanda jiwa jamala nongeya na nipevo nokaha, nari mwakala unguwi, nari miserebo, nari mingu dodja jalo ja mmindani, nari atwinyu karindjiwa na amwidani sidadi yewa, nari mwakala matembelrelro ohiyana-hiyana nari maurenda amohiwene muwari mwa atwinyu, 38yolobela ili yatene na yovepa ili yatene inavepa mutu mmohi nari atwinyu aIzarayeli atene kada mutu aiziwaga zuzumihiwa unafwanyeyana liye mmirimani mwaye, aliwa katapula mandiwa kaing'aniha nyumba yenna, 39vuruwanani zulu wewo munakala nyo. Mwaakurumuwele eto mwaakamihede. Mmulabe kada mutu na makalelo aye onfwanelela, voira nyo muhumala iziwa joumbuwela jaye jokoyeya mmirimani mwewa. Na ibaribari nyo bahi gunawanda iziwa joumbuwela jokoyeya ja kada mutu. 40Muwande irana eno ira aliwa kakale atu ouovani malambo matene anafuna atu kalaga ilambo yenno mwaavahile nyo makolo ehu.
41<<Eto zela mutu wenne ahali muwari mwa atwinyu aIzarayeli, agali okumela ilambo imohiwene na mwasa wa nzina nenyu, 42mwasiwa atu anerege za na mwasa ovwa zela nzina nenyu nindimuwa na ndanda nenyu na kopolo vamohi na muwono wenyu owongowa, mutu wa unde aza, alobela aing'anihaga kove yaye nyumba yenna, 43vuruwanani zulu wewo munakala nyo, musakanye jatene jejo jinavepe liye ira atu atene a mwilamboni kaiziwe nzina nenyu ira kawandege uovani nnga jinaira atwinyu aIzarayeli eto ira kaiziwe ira nyumba yenna imangile miyo inaitaniwa na nzina nenyu.
44<<Eto atwinyu kavenya ira kadowe kondoni kawane na amwidaniwa, kahara ndila inafuna nyo awandela, aliwa kalobela wa Yehova muwari moing'aniha kove diwa pandi ya sidadi yenna isakulrile nyo vamohi na nyumba yenna imangile miyo para nzina nenyu, 45vuruwanani zulu wewo yolobela yewa na yovepa yewa eto mwaakamihede.
46<<Eto aliwa kautegelani, tchoira kalivo ahanatega eto nyo mwaatakaleliwa, mwaavaheda aliwa mmandani mwa amwidaniwa, amwidaniwa ale kaatukula, kaadowagana ira kakale azari ewa ilambo yolapela nari vakwikwive, 47mwa enne kagadowiwena wewule, aliwa katwaruwa ilambo ya amwidani wewo watukuleliwe atu ira kakale azari eto kalobela ira: <Yehova hiyo nihitega, nihisakanya yabure, nihidawa>, 48katwaruwa na mmirimani mwewa mwatene,#8:48 katwaruwa na mmirimani mwewa mwatene: Fwanyeya ira mutu ahatwaruwe kuli kamihediwa na Mulugu. Mbwenye mutu atwaruwa, unowanda leveleliwa jabure jatene jaira liye. Nona mutu utegile kakayena yoova ira: <<Kadilrape.>> Nione Eberewu 4:16. no kalawo wewa watene ilambo ya amwidani inafwanyeya atu kagali azari eto katukula kove diwa, kalobela kaing'anaga pandi ya ilambo yewa yenno yaavahile nyo makolo ewa, sidadi yenna isakulrile nyo eto nyumba yenna imangile miyo para nzina nenyu, 49vuruwanani zulu wewo munakala nyo yovepa yewa no lobela wewa eto akamihedeni. 50Eto akurumuweleni atwinyu kautegenleni eto mukurumuwele jabure jatene jejo jinauireleni atu. Eto mwaawendele tangaranga aIzarayeli ira atu anne kaatukunle ira kakale azari kawande awendela tangaranga. 51Mwasiwa aliwa anafwanyeya kagali atwinyu vamohi na yowatchela yenyu ikumihile nyo ilambo ya Ijipitu, wewo wali atu muwari mwa goyi nnga kali muwari mwa hofu okaha, onyungulrutchamo momba. 52Eto meso enyu kakale ohulene ira muing'anege jovepa ja namalaba wenyu na jovepa ja atwinyu aIzarayeli ira muwande avuruwana muwari mwa jatene jinakuwege atu kafunaga kamihediwa. 53Mwasiwa nyo so Nabwiya Yehova mohasakulra muwari mwa atu atene a ilambo ya vati ira aliwa kakale yowatchela yenyu nnga mwemo mwawongele nyo muwari mwa namalaba wenyu Mozeji tempu yaakumiha nyo makolo ehu ilambo ya Ijipitu.>>#8:53 nnga mwemo mwawongele nyo muwari mwa namalaba wenyu Mozeji: Mulugu ohowonga na Mozeji zela liye asakulra aIzarayeli ira kakale atu ohiyana-hiyana. Nione Ezodu 19:4-6; Detoronomiyo 4:32-39.
Salomawu ohareliha aIzarayeli
54Salomawu agamanle lobela vamohi no vepa jatene eji wa Yehova, ohovenyaga sogolro wa ibuwa ya Yehova wewo wakokorile liye agavenyihedile manda aye zulu. 55Ohoimelaga, liye areliha aIzarayeli atene na mazu okuwa eraga: 56<<Otamaleliwa akale Yehova, wenno uavahile vuma atwaye aIzarayeli nnga mwemo mwapanganne liye. Liye uhumala kwakwaneliheda mapangano matene apama anno asakanyile liye muwari mwa namalaba waye Mozeji.#Detoronomiyo 12:10; Jozuwe 21:44-45 57Yehova Mulugu wehu akale na hiyo na makalelo nnga ali liye na ababihu. Kanihiye eto kaninyanyale. 58Asakanye ira mirima dehu dikale wa liye ira niharege ndila yaye eto ira niharihege malamulo aye vamohi na mangano aye vamohi na jotonga jaye nnga mwemo mwaarumile liye ababihu. 59Eto mazwaga divepile miyo vamentoni va Yehova kakale vakwikwive na Yehova Mulugu wehu ntana na mahiyu ira adikamihede miyo namalaba waye vamohi na atwaye aIzarayeli muwari mwa makatamiho matene a kada siku. 60Jaireya eno, pa evo vanafuna iziwa atu atene a mwilamboni ira Yehova gu Mulugu eto kaliwo mmohiwa. 61Eto inafwanela mmuharege Yehova Mulugu wehu na mmirimani mwenyu mwatene ira muwandege kalawo muwari mwa mangano aye eto muharihegemo malamulo aye nnga munaharihamo nyo peno.>>
Fuguleliwa wa mabasa a Nyumba ya Yehova
62Evale mwene Salomawu vamohi na aIzarayeli atene kafwanyeyaga vamohi na liye, kohovelelaga mikuto vamentoni va Yehova. 63Salomawu ohovelelaga wa Yehova mikuto da murendele ng'ombe dokwakwana 22.000 vamohi na mabila okwakwana 120.000. Mwa enne mwene Salomawu vamohi na Ana Izarayeli atene kofugulela mabasa a Nyumba ya Yehova. 64Siku nimohive nenne mwene Salomawu ohotcheniha nimburo na vari va ntando nafwanyeya sogolro wa Nyumba ya Yehova eto liye ohovelelaga mikuto dotumeya vatando vevale, jovelela ja mmundani, vamohi na jonuna ja mikuto da murendele wa Yehova. Salomawu aza avelelaga mikuto vatando vene, tchoira ibuwa ya mukuwa yafwanyeya vamentoni va Yehova ile yohosimbwa yeva. Tchawandeyile ira mikuto datene edile dimalelevo fendo imohive.
65Tempu imohive yafugulela atu mabasa a Nyumba ya Yehova, mwene Salomawu na aIzarayeli atene kasakanya eto Pwando ya Misasa. Aligi atu ohokala a masika okumela Lebo-Hamate ante dowa fiya ndabo na Ijipitu.#8:65 : Madilre a ilambo yatonga Salomawu ali Lebo-Hamate ante dowa fiya ndabo na Ijipitu: Siku nenne atu kagumanne evale tchali aIzarayeli bahi. Kohokalawo amwandamaniwa pwi katongiwa na aIzarayeli kazile siku nenne. Yenno yatonyiheda ira Nyumba ya Yehova tchali nimburo nogumana aIzarayeli bahi mbwenye ali nimburo ira atu a malogo matene kaze, kavelele mikuto diwa wa Yehova. Nione 1 Amwene 8:41-43, 46. Aliwa pwando yenne kasakanyile vamentoni va Yehova Mulugu wehu muwari mwa malambo matanu na menli hiya malambo amohiwa matanu na menli oroma ofugulana Nyumba ya Yehova, ku wonga malambo kumi na mannayi.
66Nagakwakwanne siku nanetanu na taru muwari mwa pwando yanembinli ile, Salomawu ohalanyaga atu atene eto aliwa kohomurelihaga mwene Salomawu. Noira enne kohobalaleyaga, aliwa dowaga mmavande mwewa mwa murendele eto mohagalala mmirimani mwewa na mwasa wa upama watene Yehova amuirele liye namalaba waye Davi vamohi na atwaye aIzarayeli.
Currently Selected:
1 Amwene 8: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
