1 Amwene 10
10
Muhiyana atonga ilambo ya Saba ohoza mpanda mwene Salomawu
1Mwene wa muhiyana atonga ilambo ya Saba ohovwaga zela makalelo avweyile mwene Salomawu muwari mwa nzina na Yehova.#10:1 Moira zelru da Salomawu dakumile wa Yehova, vweya waye ali muwari mwa nzina na Yehova. Mwa enne ohovenyaga adowaga Jeruzalemu ira adowe amuxixe mwene Salomawu na jofuka jorutcha. 2Liye adowilege Jeruzalemu wewule na nikuru nlukulu na anamalabaye vamohi na akamelo ohokala a masika anno katukunle jonukela na oru mudjindji ohokala wa masika na mabwe ofuneyetchetcha. Mwa enne liye agafiyile wa mwene Salomawu, ohonfuka jatene janna liye mmirimani mwaye. 3Mwa enne mwene Salomawu ohomuwakula jofuka jaye jatene. Kilivo nne yengo yamurutchile wakula uwa. 4Mwa enne mwene wa muhiyana wa Saba ule, agaonne zelru datene da Salomawu vamohi na nyumba ya umwene yenno yamangile liye, 5vamohi na jejo jadja liye vameza vaye, vamohi na nyumba mwakala andimuwaye atene, na mabasa kahinda anamalabaye atene, vamohi na jowara jiwa jatene, vamohi na aliba musakanyela jong'wa jaye, vamohi na mikuto dotumeya dedo daveleletcha atu muNyumbani mwa Yehova, liye agaonne jatene jejile ohotikiniheyaga valukulu. 6Mwa enne ohowonga na mwene eraga: <<Mazu davwile miyo dagali ilambwaga zela makalelo enyu vamohi na zelru denyu, ali mazu a ibaribari. 7Mbwenye miyo dagavwile kadaroromela. Nona dihifiyeda za uno. Va mbwenye dihiona na meso aga. Aliba diwandela ale jowonga jiwa nne metadi kajafiyile. Tchoira nyo so mwene muhukwaranya zela jejo javwile miyo zela zelru denyu vamohi na jorayela jenyu. 8Orelihiwa ba alombwana enyu atene vamohi na anamalaba enyu ala anafwanyeya na nyo malambo matene, anno anavwa zelru denyu. 9Otamaleliwa akale Yehova Mulugu wenyu, wenno uuziveliwileni, auhelani vampandoni votonga va Izarayeli. Yehova uhuusakanyani mwene ira muwandege tonga na matongelo a ibaribari eto apama, mwasiwa Yehova unoazivela aIzarayeli malambo a mukalakala.>> 10Mwa enne ohonvaha mwene Salomawu kilu 4.000 da oru, vamohi na jonukela johokala ja masika, vamohi na mabwe ofuneyetchetcha. Fwanyeya ira kunababihege za akoka jonukela joindjiva na makalelo nnga jaindjivile jonukela jejo mwene wa muhiyana wa Saba anvahile liye mwene Salomawu.
11Eto mwadeya da Salomawu dedo dasogolrelriwa na atu a mwene Hirawu, ora yazilena atu oru okumela Ofiri, dohozana eto viga da alimuge vamohi na mabwe ofuneyetchetcha okumela Ofiri wewo. 12Viga da alimuge dile, mwene Salomawu ohosakanyagana jolimbihana mmambalo mwa masikada a Nyumba ya Yehova vamohi na Nyumba ya umwene, vamohi na joimbana jinaitaniwa lira vamohi na arpa para aliba imba. Fwanyeya ira viga da alimuge dokala ha dedile kannaze akoka eto kannaoneye fiyeda siku na peno.
13Mwene Salomawu ohonvaha mwene wa muhiyana wa Saba ule jatene jejo jafunne liye vamohi na jatene javepile liye hiya jengo jimohi jiwa janvahile liye mofuna mwaye ahanvepileve. Noira enne, muhiyanole vamohi na anamalabaye, kohowelelaga mwilamboni mwewa.
Jorayela ja mwene Salomawu
14Va kada yaka mwene Salomawu komuzelana oru mudjindji okwakwana kilu 23.000,#10:14 kilu 23.000 Ku wonga matalento 666. 15hiya misoko dedo daveleletcha aliba sakanya malronda, vamohi na aliba kana joguliha jiwa, vamohi na jovelela ja amwene atene a Arabiya, vamohi na asogolrelri a mwilamboni mule.
16Mwene Salomawu ohosakanyaga defeza dilukulu 200 da oru ohaniwa.#10:16 defeza dilukulu 200 da oru ohaniwa. Hiyo kaniiziwile makalelo matene kalabile atu ira kasakanyede defeza dile. Vamohi viwa defeza diwa dakala da matabwa. Owu hehi afwase kagumaniha oru na momba aliwa sakanyana defeza dile. Ira asakanye kada defeza yanongile kilu tanu na mbinli da oru. 17Eto ohosakanya defeza dimohi diwa ding'ining'ini dokwakwana 300. Kada defeza asakanyilena kilu mbinli da oru. Noira enne, mwene Salomawu ohotukulaga defeza dile, liye dowa hela Nyumba ya Guguru ya Libano.#10:17 Nyumba ya Guguru ya Libano: Nyumbele tchafwanyeya kokolani mbwenye ali vande va Salomawu. Para itaniwaga na nzina neno mwasiwa yarihiwe na matabwa a seduru. Eto matabwa a seduru ale kakumela guguru ya Libano. Nyumbiwa yafwanyeya Jeruzalemu. Nione 7:2.
18Eto mwene Salomawu ohosakanya mpando mundimuwa wa umwene, agali wa manyanga a tembo, liye mukunela na oru wapama. 19Mpandole ohokana sikada niwa nanna monyingala tanu na imohi.#10:19 monyingala tanu na imohi: Ali sikada nimohive nanna monyingala tanu na imohi. Eto mpandole pandi yosameliha muru wali worungunuwa. Pandi dambinli dene da mmambalo mosameliha miwono mohokala jofwalrafwaniha ja apodogoma kaimenlemo, mmohi wu, mmohiwa wu. 20Eto mmambalo mwa kada vonyingala va sikada nne mohokala jofwalrafwaniha ja apodogoma wu na wu. Ku wonga va monyingala tanu na imohi, apodogoma atene a sikada nne kali kumi na ambinli. Fwanyeya ira kaliwo mwene mmohiwa wa ilambo ili yatene ababihile kana mpando wa umwene wa makalelo anne.
21Kopo datene dong'wana da mwene Salomawu vamohi na jolabana jatene jafwanyeya muwari mwa Nyumba ya Guguru ya Libano jali ja oru ohogumanihiwa na yengo imohiwa. Fwanyeya ira kwaali yengo nne imohi yasakanyiwe na parata, tchoira tempu ya Salomawu parata ali yengo yohokana tima. 22Mwasiwa mwene Salomawu ohokana nikuru na mwadeya dadowetcha Tarisi#10:22 mwadeya dadowetcha Tarisi : Mabibiliya amohiwa ani mwadeya dowendiha negosiyo. dakaletcha vamohi na nikuru na Hirawu. Va kada yaka taru mwadeya dile dodowa Tarisi, aliwa tukulaga oru, parata, manyanga a tembo, minyani, vamohi na mbalrame doriyetchetcha daitaniwa pavawu.
23Mwene Salomawu oakwaranya amwene atene a mwilamboni ya vati zela rayela waye na zelru daye. 24Atu a mwilamboni ya vati yatene kazetcha wa Salomawu kanvepaga ira kavuruwane zelru dedo danvahile Mulugu. 25Yaka datene kada mutu azaga ozana yonvaha yaye. Salomawu ovahiwa jolabana ja vande josakanyiwa na parata vamohi na josakanyiwa na oru, vamohi na jowara, na jowanana kondoni, jonukela, kavalo vamohi na akavaru. 26Noira enne, Salomawu ohogumanihaga aterelado aye vamohi na aliba wendiha kavalo aye atene a kondoni. Fwanyeya ira Salomawu anna aterelado a kondoni okwakwana 1.400 vamohi na atu 12.000 owendiha kavalo. Mwa enne ohogawaga, aterelado a kondoni amohiwa na aliba wendiha kavalo amohiwa, liye dowa ahiya sidadi mwakala aaterelado a kondoni eto amohiwa kakala na liye muJeruzalemu.
27Eto mwene Salomawu ohozalihaga muJeruzalemu mule parata nnga mabwe eto ohozalihagamo matabwa a seduru kalaga nnga mitengo da nantambu nnafwanyeya ilambo ya mikuma ding'onong'ono da Juda.
28Kavalo danna mwene Salomawu, dakumetcha Ijipitu na Silisiya.#10:28 : Navwaga ira Kavalo danna mwene Salomawu, dakumetcha Ijipitu: kahi yengo yapama. Inafwanela niwande iziwa ira Salomawu kawendile mokwakwanela vamentoni va Yehova. Tchoira Yehova ohowonga ira mwene kawelele Ijipitu aromaga gudela kavalo. Nione Detoronomiyo 17:16. Anamalaba a mwene Salomawu, kodowa, aliwa gula na peresu yapangana atu, aliwa dowagana wa mwene Salomawu. 29Aterelado a kondoni ale kagulaga Ijipitu ule, aterelado mmohi kagula na kobiri da parata 600 eto kavalo imohi kagula na kobiri da parata 150. Mwa makalelo anne anamalaba a mwene Salomawu kowanda gula ejile, aliwa dowa agulihedaga amwene a aEti vamohi na akuda Siriya.
Currently Selected:
1 Amwene 10: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
