1 Amwene 22
22
Mwene Jozafa ohorumela dowa kondoni na mwene Akabe
1Vohomala yaka taru ilambo yagali yomiyalene pama, wahali kondo zela akuda Siriya na Izarayeli. 2Mbwenye yaka yaneraru ile, mulombwana Jozafa mwene wa Juda, ohomaruwaga dowa ira amuwalredihe Akabe mwene wa Izarayeli. 3Evale mwene wa Izarayeli ule ohawandelaga andimuwa kalaba vamohi na liye eraga: <<Kodi kamuiziwile ira sidadi ya Ramote-Jileyadi tchehu? Eto hiyo nili omiyalene kannafuna itukula mmandani mwa mwene wa Siriya.>> 4Mwa enne ohonfukaga mwene Jozafa eraga: <<Kodi weyo unodihara kondoni ira nidowe nawane Ramote-Jileyadi?>> Evale mulombwana Jozafa ohomuwakulaga mwene wa Izarayeli ule eraga: <<Miyo nnodowa vamohi na nyo eto anyakondo aga anogumanela na anyakondo enyu eto kavalo daga nnogumanela na kavalo denyu.>>
5Jozafa ohomuwandelagave mwene wa Izarayeli ule eraga: <<Mbwenye nahanadowe, inafwanela mubabihe nfuka Yehova.>> 6Mwa enne mwene wa Izarayeli ule ohagumaniha anamafiyiheda okwakwana wandamelana alombwana 400, liye afuka eraga: <<Kodi miyo podi dowa kondoni Ramote-Jileyadi, owu nari kadiyewo?>> Aliwa kohowakula keraga: <<Kadowani, mwasiwa Nabwiya unouvahedani aliwa mmandani mwenyu.>> 7Eto Jozafa ohowongaga eraga: <<Kodi veva kalivo namafiyiheda mmohiwa wa Yehova ira hiyo ninfuke?>> 8Evale mwene wa Izarayeli ohomuwakulaga Jozafa eraga: <<Uhukalawo mulombwana mmohiwa unaitaniwa Mikaya, mwana Inla, oira niwande nfuka Yehova muwari mwa liye. So mbwenye miyo nnomutakaleliwa, tchoira liye kanababihege fiyiheda mazu apama zela miyo, unawonga ubureve.>> Evale Jozafa ohowongaga eraga: <<So mwene kamuwongege eno!>> 9Mwa enne mwene wa Izarayeli ule ohomuitanaga mundimuwaye mmohi, liye muwandela eraga: <<Kamudowele mobaranya mulombwana Mikaya, mwana Inla.>>
Namafiyiheda Mikaya ohoruniha jowonga ja anamafiyiheda onama
10Mwa tempu yenne mwene wa Izarayeli ule vamohi na mulombwana Jozafa mwene wa Juda kafwanyeya kagagaratile kada mutu vampandoni vaye va umwene, kagawarile jowara ja umwene, aliwa kagaratilege pandi ya mundila, va mulango ovolowela sidadi ya Samariya. Eto anamafiyiheda atene kafwanyeyaga vamentoni vewa kawongaga jofiyiheda jiwa. 11Mwa enne, muwari mwa anamafiyiheda ale, mmohi ali mulombwana Zedekiya, mwana Kenana. Liye ohovisakanyelaga manyanga a momba, liye wonga eraga: <<Yehova unawonga ira: <Munoaporotcha akuda Siriya na manyanga ala, mufiyede atolotcha atene.> >>#22:11 Zedekiya muwari monama, liye ohowonga ira: Munoaporotcha akuda Siriya na manyanga ala. Ku wonga liye ohowonga ira: <<Munoatamangiha akuda Siriya na makalelo nnga nyari yamutamangihaga mutu na manyangaye.>> Mbwenye ejo jali jonama. 12Eto anamafiyiheda atene kohoromaga wonga jofiyiheda jiwa zela muselu mmohive wenne, keraga: <<Kavenyani mudowe Ramote-Jileyadi. Mwadowa munogondjiha, tchoira Yehova unouvahedani aliwa mmandani mwenyu so mwene.>>
13Mwa enne mutu arumiwe ira amuitane Mikaya ule, aganfwanyile ohomuwandelaga eraga: <<Anamafiyiheda atene anawonga na mwene mazu apama ala, ala, ala. Na wenne wadowa, inafwanela wawongege yengo imohive nnga aliwa, uwongege upama.>> 14Mbwenye mulombwana Mikaya ohowakulaga eraga: <<Miyo nnawonga vamentoni va Yehova okalawo ira miyo dadowa, nnawonga yenno inawandeliwe miyo na Yehova.>> 15Mwa enne agazile, mwene ohonfukaga eraga: <<Mulombwana Mikaya, kodi hiyo podi dowa Ramote-Jileyadi nawane, owu kaniyewo?>> Evale liye ohowakula eraga: <<Mudowe mwawane. Mwadowa munogondjiha mwasiwa Yehova unouvahedani aliwa mmandani mwenyu so mwene.>> 16Mbwenye mwene ule ohowelelaga nfuka eraga: <<Kodi miyo nnafuna duulumbelihe fendo dingasi mwa nzina na Yehova para diiziwe ira unawonga ibaribari?>> 17Evale mulombwana Mikaya ohowakulaga eraga: <<Miyo dahaona aIzarayeli atene kagali obalaleyene mmwangoni, kalaga nnga mabila ohokana namakumbuza. Noira eno, Yehova ohowonga ira: <Aliwa kinna mbwiyiwa. Waawandele ira kada mutu awelelege vande vaye mwa murendele!> >> 18Mwa enne mwene wa Izarayeli ule ohomuwongagana mulombwana Jozafa eraga: <<Kodi miyo vale kadauwandenle ira liye afiyihedaga mazu a Yehova zela miyo kanawonga mazu apama, so unawonga mazu a ubureve?>>
19Eto mulombwana Mikaya ohowongagave eraga: <<Kavuruwana mazu a Yehova! Miyo dihimuona Yehova agagaratile mpando waye wa umwene eto nikuru natene na zulu nafwanyeya nagali vamohi na liye, amohiwa ikukuru ya muwononi odjana, amohiwa muwononi oromana. 20Mwa eno, Yehova ohowonga eraga: <Kodi unafuna munyenga mulombwana Akabe bani ira adowe apiwe kondoni Ramote-Jileyadi?> Mwa enne kada mutu awonga yaye yaye. 21Mwa enne ohokalawo munemba azilege vamentoni va Yehova, liye wonga eraga: <Miyo gunafuna munyenga.> Noira eno, Yehova ohonfuka ira: <Unafuna umunyenge na makalelo bavi?> 22Evale liye ohowakula ira: <Miyo nnovenya, didowe dakale munemba onama vamulomoni va anamafiyiheda aye atene.> Mwa enne Yehova ohomuwakula ira: <Kavenya udowe wamunyenge. Tchoira wamunyenga, jinafuna we wonga, liye unoirana.> >> 23Mwa enne mulombwana Mikaya ohomarihaga mazwaye amuwandelaga Akabe eraga: <<Eni Yehova uhumala hela munemba onama vamilomoni va anamafiyiheda enyu atene ala. Eto Yehova uhuwonga jengo jabure jinafuna uireyelani!>>
24Noira enne, namafiyiheda Zedekiya mwana Kenana ohozaga wa namafiyiheda Mikaya, liye nvaha purada mbartuni eraga: <<Kodi roma alini Munemba wa Yehova akumaga mwa miyo, aza awongaga na weyo?>> 25Evale mulombwana Mikaya ohowakulaga eraga: <<Unoza ukayena ibaribari mwasiwa siku neno nafiya, weyo unerege volowa kwartu ila ukumaga, uvolowaga kwartu imohiwa ukumaga usakaga vovitala.>>
26Noira enne, mwene wa Izarayeli ule ohowongaga eraga: <<Kamuhindeni mulombwana Mikaya ula, mmudowena wa Amoni, wenno unafwanyeya agali musogolrelri wa musidadi, vamohi na Jowasi mwana mwene. 27Mwamudowana, mwawonge ira: <Mwene uwongile ira mmuhele mutula mukadeya, adjege jodja ja vang'ono na mahindje a vang'ono, ante miyo difiyede welawo kondoni mwa murendele!> >> 28Evale mulombwana Mikaya ohowongaga eraga: <<Nyo so mwene mwawelawo kondoni mwa murendele, era eno, kahi Yehova uwongile mwa miyo.>> Eto ohowongagave eraga: <<Muvuruwane pama nyo atene zela yenno iwongile miyo.>>
Kwa wa mwene Akabe
29Mwa enne mwene wa Izarayeli vamohi na Jozafa mwene wa Juda, kohomaruwa, aliwa dowa Ramote-Jileyadi. 30Aliwa kavolowaga mukondoni mule, mwene wa Izarayeli ule ohomuwandelaga Jozafa eraga: <<Miyo nnafuna diware jowara jimohi jiwa ira atu kahadiiziwe, ira divolowe kondoni dawane. Weyo mbwenye wavolowaga mukondoni uware jowara jawo ja umwene.>> Mwa enne mwene wa Izarayeli ule ohowungulaga jowara ja umwene jile, liye wara jimohi jiwa, ambinlene aliwa volowa mukondoni.
31Eto mwene wa Siriya ohawandelaga asogolrelri aye 32, anno kasogolrelra aaterelado a kondoni, liye ira: <<Nyo kamuwane na mutu mmohiwa mung'onong'ono, nne mundimuwa, nari. So mbwenye muwane na mwene wa Izarayeli.>> 32Mwa enne asogolrelri a aaterelado a kondoni ale kagamuonne Jozafa, kohowongaga keraga: <<Na ibaribari mwene wa Izarayeli gwenna.>> Mwa enne aliwa kohozaga wa liye ira kawane. Mbwenye mulombwana Jozafa ohokuwaga. 33Agakuwile, aliwa kohomuona ira: <<Mwene wa Izarayeli unamusaka hiyo kahi wenna>>, evale kohiyaga muhara. 34Noira eno, ohokala munyakondo mmohi avokilege wene nifumo naye, ahamuiziwile mutu guvi afuna liye mulata.#22:34 ahamuiziwile mutu guvi afuna liye mulata: Navwa ira liye avokile ahaiziwile yengo tchivi, kahi ira liye kaiziwile ira eni miyo nnafuna divoke nifumo. So avokaga nifumo nne kaumbuwenle ira: <<Miyo nnafuna dimpe mwene Akabe>>, nari. So liye avokile moira: <<Nnafuna dimpe munyakondo wa burebure>>, mwasiwa tempu yenne mwene Akabe ohowungula jowara jaye ja umwene liye wara jowara ja kondoni ira atu kahawande muiziwa. Agavokile, nifumo nne nohodowaga, aliwa mulata mwene wa Izarayeli vari vagumana jowara ja momba jawarile liye mirimani waye. Noira enne, mulombwana Akabe ohowongaga na mulombwana wenno awendiha aterelado waye, liye ira: <<Kadikumihemo mukondoni mu, mwasiwa miyo dihiporotchiwa.>> 35Fwanyeya ira kondo yaliwo siku nenne yaligi kondo yohokala ya masika, fiyeda siku nompumbula atu kawanagave. Nona mwene Akabe ohokalagave muatereladoni mwaye, kagamuseyile emule sogolro wa akuda Siriya, fiyeda siku natene nenne. Mbwenye liye akwilege tchiguwoni. Eto sangiri nakumaga vailondani vale, notchotchaga, aliwa morelaga muwari mwa aterelado mule. 36Mwa enne nzuwa nagavirile, wohovweyaga nizu nakuwaga muwari mwa nikuru na anyakondo a aIzarayeli nne ira: <<Kada mutu adowege sidadi yaye eto kada mutu adowege waniwa!>>
37Mwa enne mwene Akabe ohokwa, aliwa mutukula, mudowana Samariya, aliwa dowa mukoya wewule. 38Kohotukulaga aterelado waye wa kondoni ule, aliwa dowa muhuwa tanki ya Samariya vevo vahambetcha aputa. Mwa enne anambwa kohonyangulraga sangiri naye, nnga mwemo mwawongele Yehova.#22:38 nnga mwemo mwawongele Yehova: Fwanyeya ira mazwala kakwakwanela na mazu awongile Yehova. Nione 21:19.
39Joira jimohi jiwa ja mwene Akabe, vamohi na mabasa matene alabile liye eto zela nyumba ya umwene yamangile liye na manyanga a tembo, vamohi na sidadi datene damangile liye, jatene ejo jinafwanyeya jagalrembiwe mulivuruni mwa Joira ja Amwene a Izarayeli. 40Mwa eno, mulombwana Akabe ohokwa, liye dowa vuma na makolo aye. Eto mwanaye Akaziya gwahambile umwene vamalroni vaye.
Tonga wa Jozafa mwene wa Juda
41Mwene Akabe agamanle yaka nnayi atongaga Izarayeli, tchi tempu Jozafa mwana Aza aromile liye atonga aJuda. 42Jozafa aromaga tonga anna yaka 35. Eto ohotonga yaka 25 ilambo ya Jeruzalemu. Mmaye nzina naye ali Azuba, mwana Sili. 43Fwanyeya ira mulombwana Jozafa ohoirana jofwanela vamentoni va Yehova aharaga ndila datene dapama davirile babaye Aza. Liye kaperuwile. 44Mbwenye liye kagumunle mamburo otama ovelela mikuto wa amilugu. Atu kohokalelave velela mikuto no tumeya jonukela muvibuwani mwemule.#22:44 MaBibiliya amohiwa anohiyana makalelo kagwadile atu maversikulu a kapitulu yenna. Mbwenye jowonga jiwa ti jimohive. 45Fwanyeya ira Jozafa ali mwene awenda mwa murendele na mwene wa Izarayeli.
46Joira jimohi jiwa ja mwene Jozafa, vamohi na kopolo dalabilena liye eto na makalelo awanile liye, jatene jinafwanyeya jagalrembiwe mulivuruni mwa Joira ja Amwene a Juda. 47Liye ohatamangiha mwilamboni mule aliba raruwa muwari mwa sanganiko da amilugu ewa kahanlemo, anno kakaletcha mamburo a vikwamutu josema tempu yatonga babaye Aza.
48Fwanyeya ira tempu yenno mwilamboni mwa Edomu kamwali mwene, so mbwenye mwali governadore osakulriwa na amwene a Juda.
49Mulombwana Jozafa ohosakanya mwadeya dotukula jengo ira didowege Ofiri datukulege oru. Mbwenye mwadeya dile kadadowile. Dohomala nongeya sidadi ya Eziyomi-Jeberi dahanawendeve. 50Mwa enne mulombwana Akaziya mwana Akabe, ohomuwandela Jozafa ira: <<Mwaawongena aliba wendiha mwadeya denyu kagwele vamohi na aliba wendiha mwadeya aga ira kadowe vamohi ulrendo wafuna atu wenda.>> Mbwenye mulombwana Jozafa ohokonda.
51Mwene Jozafa ohofiyeda kwa, liye dowa vuma na makolo aye, liye koyiwa wewo wakoyiwe makolo aye, sidadi ya mbwiyaye Davi. Noira eno, mwanaye Jeyorawu gwahambile umwene vamalroni vaye.
Tonga wa Akaziya mwene wa Izarayeli
52Mwene Jozafa agamanle yaka 17 aatongaga aJuda, tchi tempu Akaziya mwana Akabe aromile liye atonga aIzarayeli mwilamboni mwa Samariya. Liye aatongile aIzarayeli yaka mbinli. 53Liye ohosakanya jabure vamentoni va Yehova, tchoira liye ohara ndila da babaye vamohi na ndila da mmaye eto ohara ndila da Jerobowawu, mwana Nebati, wenno aategihile aIzarayeli. 54Liye omuhara Baali eto ohomukokorela, liye tatamulaga uwali wa Yehova Mulugu wa Izarayeli na makalelo matene nnga jairile babaye.
Kukala mazu a livuru na 1 Amwene.
Currently Selected:
1 Amwene 22: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
