1 Amwene 21
21
Mulombwana Naboti ohokonda muguliheda mwene Akabe munda wa uva
1Jeji jagaireyile, vagavirile malambo, ohokalawo nkuda Jezereli mmohi aitaniwa Naboti. Liye ohokana mundaye wa uva sidadi ya Jezereli, wandamelana palasiyo ya Akabe, mwene wa Samariya. 2Mwa enne mwene Akabe ohomuwongana mulombwana Naboti ira: <<Miyo nnavepa ira udivahe mundawo wa uva ule ira dizalegemo ja orta jaga, mwasiwa uhuwandamela vande vaga. Miyo nnouvaha munda mmohiwa wapama wa uva kwaranya wenne, owu nari, wahafune munda, miyo nnouvaha kobiri.>> 3Mbwenye mulombwana Naboti ohomuwakulaga mwene Akabe eraga: <<Miyo nnolumbela wa Yehova ira kannawanda uvahani tereno yavahiwe ababaga.>>#21:3 kannawanda uvahani tereno yavahiwe ababaga: Fwanyeya ira Naboti avahiwe mundole na ababaye. Ababaye eto kavahiwe na Yehova ora aIzarayeli yagaweliwa atu ilambo ya Kana. Eto Mulugu ohakameliha gulihedana ilambo. (Levitiku 25:23-28) Ku wonga Naboti ahakale arumela guliha munda waye, yakala nnga unalramwisa ilambo Mulugu aavahile liye ababaye eto akala nnga unamulramwisa Mulugu. 4Mwa enne mwene Akabe ohowelelaga vande vaye agali otakaleliwene valukulu zela mazu amuwakunle mulombwana Naboti nkuda Jezereli ule, oira: <<Miyo kannauvahani tereno yavahiwe ababaga.>> Liye agadowile vande, ohogonantigi vakamani vaye, liye ing'aniha kove yaye ntchihini eto ohokondaga jodja.
5Mwa enne muhiyanaye Jezabeli ohozaga nfwanya, liye nfuka eraga: <<Kodi iireyile nni we peno kala otakaleliwene eto kondaga jodja?>> 6Evale liye ohowakulaga eraga: <<Tchoira miyo dimuwongilena nkuda Jezereli unaitaniwa Naboti miyo ira: <Nnavepa udigulihede munda wawo wa uva eto wafunaga miyo nnouvaha munda mmohiwa wa uva vamalroni va munda unafuna we divaha.> Mbwenye liye wakula waye uwongile ira: <Miyo kannauvaha mundaga wa uva.> >> 7Mwa enne muhiyanaye Jezabeli ule ohowakulaga eraga: <<Kodi weyo kuli mwene wa Izarayeli? Kavenya udje eto uhagalalihe murima wawo. Miyo nnouvaha munda wa uva wa mulombwana Naboti nkuda Jezereli ule.>>
Jezabeli ohompiha Naboti
8Noira enne, Jezabeli ule oholrembaga makarta na nzina na Akabe, liye karimbari na karimbu ya mwene. Liye tukula makarta ale, arumiheda andimuwa na asogolrelri atene kafwanyeya sidadi yakala mulombwana Naboti. 9Mukartani mule alrembilemo ira: <<Mukumihe nlamulo ira nikalewo siku nnafuna nyo jejuwari. Mwa eno, mmutukule mulombwana Naboti mmugaratihe sogolro wa atu atene kamuing'anaga. 10Mwaira eno, mwaasakulre alombwana ambinli otakala mirima kadowe sogolro ule, kamusumele ira: <Eni weyo uhumululuviha Mulugu eto uhumululuviha mwene.> Era eno mmutukule liye, mmukumihede unde wa sidadi, mudowe mwampe na mabwe.>> 11Mwa enne andimuwa vamohi na asogolrelri a musidadi mwakala Naboti mule, kagavwile mazu anne, kohoirana nnga mwemo Jezabeli mwaarumele liye, nnga mwemo mwalrembele liye mmakartani aarumihede liye ale. 12Kohelavo siku na jeju, aliwa mutukula mulombwana Naboti, dowa muhela sogolro wa atu atene. 13Noira enne, kohozaga alombwana ambinli otakala mirima, aliwa dowa garati sogolro wa mulombwana Naboti ule. Mwa enne alombwana otakala mirima ale kohoromaga wonga mazu abure omusumela Naboti vamentoni va atu atene keraga: <<Mulombwana Naboti uhumululuviha Mulugu eto uhumululuviha mwene.>>#21:13 Mulombwana Naboti uhumululuviha Mulugu: Jowonga ejo jali jonama jomunukeda Naboti ira atu kakayena muselu ompa ira munda waye akale wa Akabe. Tchoira ora yenno malamulo kawonga ira maliba mululuviha Mulugu airiwena eno. (Detoronomiyo 5:11, 17:2-7) Mwa enne kohomudowagana unde wa sidadi, aliwa roma nvoka mabwe, liye fiyeda kwa. 14Noira enne, kohorumihaga milanyo wa Jezabeli keraga: <<Mulombwana Naboti uhupiwa na mabwe.>>
15Mwa enne Jezabeli agaiziwile ira mulombwana Naboti ohopiwa na mabwe, ohomuwandela Akabe eraga: <<Kavenya, udowe watukule munda wa uva wenno Naboti nkuda Jezereli akondilena liye uguliheda. Tchoira liye eni kaliwo, uhumala kwa!>> 16Mwa enne mulombwana Akabe agavwile ira mulombwana Naboti ohokwa, ohomaruwa ira adowe mundani ule, atukule ira akale waye.
Mulugu ohomuruma Eliya ira adowe amugwihena mulandu mwene Akabe
17Noira eno, mazu a Yehova kohozaga wa Eliya, nkuda Tijibi ira: 18<<Uvenye udowe wanfwanye mulombwana Akabe mwene wa Izarayeli, wenno unafwanyeya Samariya. Liye eni unafwanyeya mmundani mwa uva mwa Naboti. Udowile ira atukule mundole akale waye. 19Udowe wamuwandele ira: <Yehova unawonga ira: <<Kodi na ibaribari weyo uhumpa mulombwana Naboti, weyo tukula jaye?>> > Eto umuwandele ira: <Yehova unawonga ira: <<Nimburo neno ninyangulrile anambwa sangiri na Naboti eto anodowa nimburo nimohive kanyangulre sangiri nawo.>> > >> 20Mwa enne kagagumanne, mulombwana Akabe ohowongaga na Eliya eraga: <<We mwidanaga we, kodi uhudifwanya?>> Liye ohowakula eraga: <<Duhufwanya. Tchoira uhuvivelela ira uiregena jabure vamentoni va Yehova. 21Yehova unawonga ira: <Miyo nnouzelana ubure ohokala wa masika. Nnoatolotcha muibalini mwawo alombwana atene, masiki kala muzari nari ahali muzari ira kahafwanyeye mwilamboni mwa Izarayeli. 22Atu a muibalini mwawo nnoairana nnga daairilena miyo atu a muibalini mwa Jerobowawu mwana Nebati eto nnga dimuirilena miyo mulombwana Baaza, mwana Ayiya.#1 Amwene 12:2-33, 15:29,30, 16:11-13 Tchoira weyo uhutatamula takaleliwa waga eto uhategiha aIzarayeli.> 23Eto zela muhiyanawo Jezabeli Yehova unawonga ira: <Anambwa anotakuna maningo a Jezabeli muwari mwa sidadi ya Jezereli.> 24Eto atu atene a Akabe anafuna kwaga, atu anne anakwele musidadi anerege takuniwa na anambwa. Eto ale anafuna kwela mukokolani, anadjiwege na mbalrame dovava zulu!>>
25Fwanyeya ira Akabe gwatabwetchetche vivelela ira asakanyege jabure vamentoni va Yehova kwaranya amwene atene. Liye airana ejo muwari mokanyihediwa na muhiyanaye Jezabeli. 26Liye ohosakanya jabure johokala ja masika, aharaga vikwamutu josema molingana na makalelo airile aAmore, anno Yehova aavokedile liye unde wa ilambo yaye ira Ana Izarayeli kakalegemo.
Twaruwa wa Akabe
27Mwa enne mulombwana Akabe agavwile mazu matene anne zela ubure wafuna muireyela, muwari mokumbanya mwaye, ohokawulaga jowara jaye, liye wara masakwi eto ohoromaga jejuwari, liye gonelaga masakwi eto awenda pure pure pure. 28Mwa enne mazu a Yehova kohozaga wa mulombwana Eliya, nkuda Tijibi ule, amuwandelaga eraga: 29<<Kodi uhuona makalelo anaviyeviha mulombwana Akabe vamentoni vaga? Voira liye uhuviyeviha vamentoni vaga, ubure watene wafuna miyo airela akuda Akabe, kannamuirela liye,#21:29 ubure watene wafuna miyo airela akuda Akabe, kannamuirela liye: Mazu a Mulugu anoniwandela ira Mulugu unoakamiheda ale anatwaruwa na mmirimani mwewa mwatene. Fwanyeya ira Akabe ali mwinnya oirana jotakala. Mbwenye agatwaruwile, Mulugu omuwendela tangaranga. Mutu mmohiwa wabure awendeliwe tangaranga na Mulugu agatwaruwile ali Jeyowakazi mwene wa Izarayeli. (2 Amwene 13:4-5) Mmohiwa ali Manasesi. (2 Koronika 33:9-17) mbwenye nnamuirela mwanaye unafuna za tongaga liye agakwile!>>
Currently Selected:
1 Amwene 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
