1 Amwene 17
17
Namafiyiheda Eliya ohowonga na mwene Akabe
1Mwa enne mulombwana mmohi aitaniwa Eliya, nkuda Tijibi wenno akaletcha Jileyadi, ohowonga na Akabe eraga: <<Miyo nnawonga vamentoni va Yehova okalawo, Mulugu wa Izarayeli wenno nnamulaba miyo ira kuma yaka yenna dowaga sogolro kanarumbwa muzongwe eto nne kunakala ningame, fiyeda miyo diwonge ira muzongwe arumbwe.>> 2Noira enne, mazu a Yehova kohozaga wa mulombwana Eliya amuwandelaga eraga: 3<<Uvenye udowe pandi ya makumelo wa nzuwa, wavitale wandamelana mwana muhindje wa Kerite wenno unafwanyeya makumelo wa nzuwa wa muhindje Jordawu. 4Weyo unerege ng'wa mahindje okumela mwana muhindje wa Kerite ule eto miyo daharuma anakungu ira kauvahege jodja.>> 5Mwa enne liye ohodowaga irana nnga mwemo mwamuwandenle Yehova. Liye venya, dowa kalaga wandamelana mwana muhindje wa Kerite, wenno unafwanyeya makumelo wa nzuwa wa Jordawu. 6Mabebehi na tchiguwo anakungu kozana pawu na nyama, aliwa nvahaga. Eto ong'wa mahindje okumela mwana muhindje ule. 7Mbwenye vagavirile malambo, mwana muhindje ule ohoummaga na mwasa oira muzongwe karumbwa.
Muselu wa makwele mmohi ahali muIzarayeli
8Mwa enne mazu a Yehova kohomuzelaga Eliya, kawongaga keraga: 9<<Uvenye udowe sidadi ya Sarepita inafwanyeya mwilamboni mwa Sidoni, wakalege wewule. Miyo dihimuruma makwele mmohi wa muhiyana ira auvahege jodja.>> 10Mwa enne mulombwana Eliya ohodowa Sarepita. Agadowile, afiyaga va mulango va muru wa sidadile, ohonfwanyaga makwele mmohi wa muhiyana adodelaga vikwakwari. Liye ohomuitanaga, liye ira: <<Nnouvepani mudivahe mwana mahindje, ding'we!>> 11Evale muhiyanole adowaga runga mahindjale, Eliya ohomuwongagana akoka eraga: <<Pepani nnouvepani ira mwazagana mahindje ayo, muzena eto pawu ya vang'ono.>> 12Mbwenye muhiyanole ohowakula eraga: <<Miyo nnawonga vamentoni va Yehova Mulugu wenyu ira miyo kadinna nne pawu ing'onong'onove. So dinna ndanda nimohi na utu muyombweni bahi, na azeti wa vang'ono mugarafwani. Kaing'anani, didodile vikwakwari mbinli di ira didowe davipiyelena miyo na mwanaga ira nidje, amala eno nikwe.>> 13Evale Eliya ohomuwongagana eraga: <<Kamuove! Kadowani mwairena nnga muwongele nyo. Mbwenye jejo jinna nyo, mubabihe disakanyela pawu imohi ing'onong'onove, muzena mudivahe. Amala eno mudowe mwasakanye para nyo vamohi na mwaninyu. 14Tchoira Yehova Mulugu wa Izarayeli unawonga ira: <Utu unafwanyeya muyombweni na azeti unafwanyeya mugarafwani kajinamalamo, fiyeda siku Yehova unarumbwihe liye muzongwe!> >> 15Mwa enne muhiyanole ohodowaga liye irana nnga mwemo mwawongele mulombwana Eliya. Evale muhiyanole vamohi na Eliya vamohi na atu a vande vaye kohodja malambo madjindjene. 16Utu muyombweni mule kamanlemo eto nne azeti mugarafwani mule kamanlemo, nnga mwemo mwawongele Yehova muwari mwa Eliya.
17Jeji jagamanle ireya, vagavirile malambo, makwele ule mwanaye ohokala murenda. Eto urenda wanna mwanole wohosimbwave na makalelo ohokala a masika fiyeda liye mariheya. 18Mwa enne muhiyanole ohomuwongana Eliya eraga: <<Nyo mutu wa Mulugu, miyo dutegenleni yengo nni? Kodi muzele vande vaga vano ira mudiwumbutchede yotega yaga eto ira mumpe mwanaga?>> 19Evale mulombwana Eliya ohomuwandelaga eraga: <<Kadivahedeni mwaninyu uyo uno!>> Evale ohomutukulaga mmandani mwa mmaye mule, liye mudowana nimburo na muzulu, kwartuni waye wakaletcha liye, dowa mugonantiha vakamani vaye. 20Mwa enne ohokuwaga wa Yehova eraga: <<Kodi nyo Yehova Mulugu waga, muhufiyeda eto muzuzumiha makwele ula maliba vande vevo vinakala miyo, fiyeda nyo mpa mwanaye?>> 21Noira enne, ohomugonantelaga mwanole vazulu fendo taru, nomala liye lobela wa Yehova monla eraga: <<Nyo Yehova Mulugu waga, nnouvepani ira mmuwelihede mwanola kalawo waye.>> 22Mwa enne Yehova ohovwaga kuwa wa Eliya, kalawo wa mwanole muwelela akoka, liye kana ingumi. 23Noira enne, mulombwana Eliya ohomutukulaga mwanole, liye nkumana kwartuni waye wa muzulu ule, dowa nvaheda mmaye, liye kwi: <<Kaing'anani, mwaninyu uhukalawo.>> 24Evale muhiyanole ohomuwongagana Eliya eraga: <<Va mbwenye dihiiziwa ira nyo muli mutu wa Mulugu eto mazu a Yehova anawonga nyo ba mazu a ibaribari!>>
Currently Selected:
1 Amwene 17: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
